Sapta 13

Gavman Bilong God Bilong Kamapim Gutaim

 1. Ol gavman ol man i bin kamapim ol i no bin mekim wanem?

OL MAN i bin kamapim kain kain gavman na maski ol dispela man i laik mekim gutpela wok, tasol ol dispela gavman i no bin helpim tru ol man, a? I no gat wanpela gavman i bin pinisim pasin nogut na pasin bilong birua long ol man bilong narapela lain na skin. Na ol i no bin givim gutpela kaikai na haus long olgeta manmeri o pinisim sik bilong ol. Ol i no bin pinisim i dai, na ol i no inap kirapim bek ol man i dai pinis. I no gat wanpela gavman i bin kamapim gutaim long graun na givim gutpela sindaun tru long ol man. Ol dispela gavman i no inap tru long stretim hevi bilong ol man.

 2. Wanem nambawan bikpela tok bilong Baibel?

² Man bilong wokim yumi em i save yumi mas i gat stretpela gavman bilong bosim yumi bambai olgeta manmeri i ken i stap belgut na amamas. Olsem na Baibel i stori long wanpela gavman God bai bosim. God i tok pinis long kamapim dispela gavman na dispela em nambawan bikpela tok bilong Baibel.

 3. Aisaia 9:6, 7 i tok wanem long gavman bilong God?

³ Aisaia 9:6, 7 i stori long dispela gavman, olsem: “Wanpela meri i karim pikinini em bilong yumi, ol i givim wanpela pikinini man long yumi; em bai holim wok gavman na ol bai kolim nem bilong em olsem Gutpela Man, Tisa, strongpela God, Papa bilong oltaim, King bilong Gutaim. Gavman bilong em bai go bikpela, na gutaim i no ken pinis.”—Baibel King James Version.

 4. Husat dispela pikinini em i kamap king long gavman bilong God?

⁴ Em, Baibel i stori long wanpela pikinini i kamap na em bai kamap wanpela bikpela king, olsem “King bilong Gutaim.” Em bai bosim wanpela gutpela gavman tru. Dispela gavman bai kamapim gutaim long olgeta hap bilong graun, na dispela gutaim i no ken pinis. Dispela pikinini Aisaia i tok em bai kamap, em Jisas. Taim ensel Gebriel i tokim Maria long dispela pikinini, Gebriel i tok: “Em bai i stap king. . . . Na kingdom bilong en bai i no pinis.”—Luk 1:30-33.

KINGDOM EM I BIKPELA SAMTING

 5. (a) Baibel i tok wanem na yumi save, Kingdom em i bikpela samting tru? (b) Kingdom bilong God em i wanem samting? Em bai mekim wanem wok?

⁵ Taim Jisas i stap long graun, nambawan bikpela wok bilong em wantaim ol disaipel em wok bilong autim tok long kingdom bilong God. (Luk 4:43; 8:1) Ol i kamapim tok bilong dispela kingdom planti taim long Baibel. Na Jisas i lainim ol disaipel long beten long God, olsem: “Kingdom bilong yu i mas i kam. Mipela i mas bihainim laik bilong yu long graun olsem ol i bihainim long heven.” (Matyu 6:10) Tasol dispela kingdom em wanpela gavman tru? Ating bipo yu no ting olsem. Tasol em i wanpela gavman tru. Krais Jisas em i King bilong dispela Kingdom. Em bai bosim olgeta hap bilong graun, na bai ol manmeri i no ken bruk long ol narapela narapela lain na i stap birua birua. Nogat. Bai ol i stap wanbel wantaim aninit long Kingdom o gavman bilong God! ⁶ Jon Bilong Baptais em i kirap autim tok bilong dispela gavman, na em i tokim ol man: “Yupela tanim bel. Kingdom bilong heven em i kam klostu pinis.” (Matyu 3:1, 2) Bilong wanem Jon inap tok olsem? Long wanem Jisas, dispela Man bihain bai em i kamap king bilong dispela kingdom, em i kam long Jon bilong kisim baptais na bilong God i ken makim em long spirit holi. Na bihain Jisas i tokim ol Farisi: “Harim. Kingdom bilong God em i stap namel long yupela.” (Luk 17:21) Jisas inap tok olsem, long wanem em yet i stap namel long ol na God i makim em pinis bilong kamap king. Jisas i autim tok na lainim ol man na em i stap gut long God i go inap long taim em i dai, olsem na em inap tru long kamap king.

 7. Olsem wanem yumi save, taim Jisas i stap long graun bikpela tok i kamap long kingdom bilong God?

⁷ Taim Jisas i mekim wok bilong em long graun, bikpela tok i kamap long kingdom bilong God. Jisas i autim tok bilong kingdom na planti man i birua long em. Ol i putim em long kot na sutim tok long em, olsem: “Mipela i lukim dispela man em i paulim pasin bilong lain bilong mipela. Em i tambuim mipela long givim takis long Sisa. Na em i save tok, ‘Mi yet mi Krais. Mi king.’ ” Pailat i harim dispela tok na em i askim Jisas: “Yu king bilong ol Juda, a?”—Luk 23:1-3.

 8. (a) Taim Pailat i tokim Jisas, “Yu wanpela king, a?” orait Jisas i bekim wanem tok? (b) Taim Jisas i tok, kingdom bilong em “i no bilong dispela graun,” wanem insait bilong dispela tok?

⁸ Jisas i no bekim stret dispela askim bilong Pailat, em i abrusim liklik na em i tok: “Kingdom bilong mi em i no bilong dispela graun. Sapos kingdom bilong mi em i bilong dispela graun, orait bai ol wokman bilong mi ol i pait, na i no gat wanpela man inap putim mi long han bilong ol Juda. Tasol nau kingdom bilong mi em i no bilong dispela graun.” Jisas i bekim tok olsem, long wanem kingdom bilong em i no ken kamap long graun. Em i no ken i stap king long graun, em i mas mekim wok king long heven. Tasol ol i sutim tok long Jisas, long wanem ol i ting em i no gat namba bilong kamap king na i no stret em i tok, em i stap king. Olsem na Pailat i askim gen Jisas: “Olsem na yu wanpela king, a?”

 9. (a) Jisas i autim wanem gutpela tok i tru? (b) Long nau i gat wanem bikpela askim ol man i mas tingim?

⁹ Ol i laik kilim i dai Jisas, long wanem em i bin autim tok na lainim ol man long wanpela nupela gavman em bai kamap. Olsem na Jisas i tokim Pailat: “Yu tok pinis, mi king. Mama bilong mi i karim mi na mi kam long graun bilong dispela tasol: Mi gat wok long autim tok tru.” (Jon 18:36, 37) Tru tumas, taim Jisas i stap long graun em i wok strong long tokim ol man long gutpela tok bilong Kingdom o gavman bilong God. Dispela em i nambawan bikpela tok em i autim long ol man. Na long nau tu Kingdom em i nambawan bikpela samting ol man i mas tingim—ol i laikim wanpela gavman ol man i bin kamapim o kingdom bilong God, em Krais i bosim?

BILONG KAMAPIM DISPELA NUPELA GAVMAN

10. (a) Wanem samting i kamap na God i save em i mas kamapim wanpela nupela gavman? (b) Wanem namba wan taim long Baibel God i kamapim sampela tok long dispela gavman? (c) Snek i makim husat?

¹⁰ Taim Seten i pulim Adam tupela Iv na ol tu i bikhet, Jehova i save em i mas kamapim wanpela nupela gavman bilong bosim ol man. Olsem na kwiktaim God i tokaut long laik bilong em, em i laik kamapim dispela gavman. God i mekim sampela tok long dispela gavman taim em i kolim strafe bilong snek na em i tokim Seten: “Bai mi mekim yu birua long meri, na meri i birua long yu. Na bai mi mekim ol lain bilong yu i birua long lain bilong meri. Bai em i krungutim het bilong yu, na bai yu kaikaim lek bilong em.”—Jenesis 3:14, 15. ¹¹ Tasol ating yu bai tok: ‘Em i no mekim sampela tok long wanpela gavman, a?’ Orait, yumi ken skelim na bai yumi save. Dispela hap tok bilong Baibel i tok Seten bai birua long “meri,” na “lain” bilong Seten bai birua long “lain” bilong dispela “meri.” Orait, pastaim yumi mas save dispela “meri” em i husat.

12. Revelesen sapta 12 i tok wanem long dispela “meri”?

¹² Em i no wanpela meri bilong graun. Seten em i no bel nogut long wanpela meri bilong graun. Dispela tok “meri” em i wanpela tok piksa. Em i makim wanpela samting. Hap bilong Revelesen long Baibel i stori long dispela “meri” na i tok, “em i pasim san long skin bilong en olsem klos. Na mun i stap aninit long lek bilong en. Na em i putim 12-pela sta olsem hat long het bilong en.” Bilong yumi ken save dispela “meri” i makim wanem samting, yumi ken lukim sampela tok moa bilong Revelesen i stori long pikinini bilong dispela “meri,” olsem: “Na meri i karim pikinini man. Dispela pikinini bihain bai i holim stik ain na i bosim olgeta lain manmeri. Orait meri i karim pikinini pinis, na kwiktaim ol i kisim pikinini i go antap. Na ol i bringim em i go long God na long sia king bilong em.”—Revelesen 12:1-5.

13. Dispela “pikinini man” i makim wanem samting? Na dispela “meri” i makim wanem samting?

¹³ Sapos yumi save dispela “pikinini man” em i makim wanem samting, orait bai yumi inap save dispela “meri” i makim wanem samting. Dispela “meri” em i no wanpela meri tru bilong graun, na olsem tasol dispela pikinini em i no wanpela pikinini tru bilong graun. Baibel i soim yumi dispela “pikinini man” em bai “bosim olgeta lain manmeri.” Olsem na dispela “pikinini” em i makim gavman bilong God long han bilong Krais Jisas. Na dispela “meri” i makim gutpela lain ensel bilong God long heven, ol i kamapim King Krais Jisas olsem “meri” i kamapim “pikinini.” Dispela lain ensel ol i save wok wantaim long mekim laik bilong God. Galesia 4:26 i kolim dispela lain olsem “Jerusalem i stap long heven.” Olsem na taim Adam tupela Iv i bikhet long wok king bilong God, God i stretim rot bilong kamapim wanpela Kingdom o gavman bilong helpim olgeta manmeri ol i laikim tumas stretpela pasin.

JEHOVA I TINGIM TOK PROMIS BILONG EM

14. (a) Jehova i mekim wanem na yumi save em i tingim tok promis bilong em long kamapim wanpela ‘pikinini’ em bai bagarapim Seten? (b) Husat dispela ‘pikinini’ God i tok promis long em?

¹⁴ Jehova i no lusim tingting long tok promis bilong em long salim wanpela ‘pikinini’ i kam, em bai kamap king long gavman bilong God, na em bai bagarapim Seten, olsem krungutim het bilong em. (Rom 16:20; Hibru 2:14) Dispela ‘pikinini’ bai kamap long lain bilong wanpela gutpela man, em Ebraham. Jehova i tokim Ebraham: “Long pikinini bilong yu olgeta lain manmeri bilong graun bai kisim blesing.” (Jenesis 22:18, NW) Husat dispela “pikinini”? Baibel yet i bekim tok, olsem: “Dispela promis God i givim long Ebraham wantaim pikinini bilong en. Em i no tok olsem: ‘Long ol pikinini.’ Em i no tok long planti pikinini. Nogat. Em i tok long wanpela tasol, na i spik, ‘Long pikinini bilong yu.’ Dispela pikinini em Krais.” (Galesia 3:16) Na Jehova i tokim pikinini bilong Ebraham, em Aisak, na tumbuna pikinini bilong Ebraham, em Jekop, dispela ‘pikinini’ bilong “meri” bilong God bai kamap long lain bilong ol.—Jenesis 26:1-5; 28:10-14.

15, 16. Olsem wanem yumi save dispela ‘pikinini’ bai holim wok king?

¹⁵ I gat wanpela tok profet Jekop i mekim na yumi ken save dispela ‘pikinini’ bai kamap wanpela king. Jekop i tok, pikinini bilong em Juda bai “holim stik bilong king,” em namba o strong bilong mekim wok king, na bai “em i holim dispela strong inap papa tru bilong dispela strong i kamap na bosim olgeta [manmeri].” (Jenesis 49:10) Krais Jisas i kamap long lain bilong Juda. Em i “papa tru bilong dispela strong” bilong mekim wok king na ‘bosim olgeta manmeri.’—Hibru 7:14.

¹⁶ Jekop i mekim dispela tok profet na klostu 700 yia bihain Jehova i tok long Devit bilong lain Juda, olsem: “Mi makim pinis Devit, wokman bilong mi, . . . Oltaim wanpela man long lain bilong en bai i stap king. . . . olsem skai antap i stap oltaim.” (Sam 89:20, 29) Taim God i tok ‘wanpela man long lain bilong Devit’ bai stap king “oltaim,” olsem “skai antap i stap oltaim,” wanem insait bilong dispela tok? Insait bilong dispela tok i olsem: Kingdom o gavman bilong God Jehova long han bilong Krais Jisas, dispela Kingdom bai stap oltaim. Olsem wanem yumi save long dispela samting?

17. Olsem wanem yumi save dispela king em Krais Jisas?

¹⁷ Gebriel i tokim Maria long dispela pikinini Maria bai karim na em i tok: “Yu mas kolim nem bilong en Jisas.” Tasol Jisas i no bilong i stap tasol olsem pikinini o wanpela man long graun. Nogat. Gebriel i tok moa olsem: “Em bai i stap bikpela man. Na bai ol i kolim em Pikinini bilong God Antap Tru. Na bai God i putim em i stap king olsem tumbuna bilong en Devit. Em bai i stap king bilong lain bilong Jekop oltaim. Na kingdom bilong en bai i no pinis.” (Luk 1:31-33) Em, Jehova i stretim rot bilong kamapim wanpela stretpela gavman bilong i stap oltaim, na em bai helpim olgeta manmeri i givim bel long Jehova. Em gutpela samting tru, a?

18. (a) Baibel i tok ol gavman bilong graun bai pinis olsem wanem? (b) Gavman bilong God bai mekim wanem bilong helpim ol man?

¹⁸ Liklik taim tasol na bai Kingdom o gavman bilong God i kirap na bagarapim olgeta gavman bilong dispela graun. Long dispela taim bai King Krais Jisas i winim pait. Baibel i stori long dispela pait, olsem: “Long taim bilong ol dispela king God bilong heven bai kamapim wanpela kingdom i no inap bagarap. . . . Em bai bagarapim na pinisim ol dispela narapela kingdom, na em wanpela bai stap inap long taim bihain bihain.” (Danyel 2:44, NW; Revelesen 19:11-16) Gavman bilong God tasol bai stap na helpim tru olgeta manmeri. Bai King Krais Jisas i lukautim olgeta manmeri i stap gut long em na ol i no ken sik o i go lapun o i dai. Pasin nogut, pasin bilong i stap rabis, hangre, na olgeta narapela kain hevi olsem bai pinis. Gutaim tru bai kamap long olgeta hap bilong graun. (2 Pita 3:13; Revelesen 21:3-5) Tasol yumi mas kisim sampela save moa long ol man ol bai stap king long dispela Kingdom o gavman bilong God.

 6. Taim Jisas i stap long graun, bilong wanem Jon i tok, kingdom bilong God em i kam “klostu pinis”? Bilong wanem Jisas i tok, kingdom bilong God “em i stap namel long yupela”?

11. Pasin birua bai stap namel long husat?

[Piksa long pes 112, 113]

Jisas i salim ol disaipel i go mekim wanpela bikpela wok, em wok bilong autim tok long kingdom bilong God

[Piksa long pes 114]

Taim Jisas i sanap long kot, em i wok yet long autim tok long kingdom bilong God

[Piksa long pes 119]

Yu tingim Jisas em i wanpela bikpela king o olsem liklik pikinini nating?