Kingdom Bilong God Em I Wanem Samting?

 1. Bai yumi skelim wanem beten em planti man i save long en?

PLANTI milion manmeri i save long wanpela beten em planti i save kolim olsem Papa Bilong Mipela, o Beten Bilong Bikpela. Jisas i yusim dispela beten long skulim ol disaipel bilong em long pasin bilong beten. Em i beten long wanem samting? Na bilong wanem dispela beten i bikpela samting long yumi long nau?

 2. Jisas i lainim yumi long beten long wanem tripela bikpela samting?

² Jisas i tok: “Yupela i mas beten olsem: ‘Papa bilong mipela long heven, nem bilong yu i mas i stap holi. Kingdom bilong yu i mas i kam. Laik bilong yu i mas kamap long graun olsem em i save kamap long heven.’” (Ritim Matyu 6:9-13.) Bilong wanem Jisas i skulim yumi long beten long dispela tripela samting?—Lukim Futnot long pes 216.

 3. Yumi mas save long wanem samting long Kingdom Bilong God?

³ Yumi kisim save pinis olsem nem bilong God, em Jehova. Na yumi bin skelim pinis laik bilong God long ol man na long dispela graun. Tasol Jisas i toktok long wanem samting taim em i tok: “Kingdom bilong yu i mas i kam”? Yumi bai kisim save long Kingdom Bilong God em i wanem samting, em bai mekim wanem samting, na olsem wanem em bai mekim holi nem bilong God?

 4. Kingdom Bilong God em i wanem samting? Husat em i King bilong en?

⁴ Jehova i bin kamapim wanpela gavman long heven na em i makim Jisas long i stap King bilong en. Baibel i kolim dispela gavman olsem Kingdom Bilong God. Jisas em i “King bilong olgeta king na Bikpela bilong olgeta bikpela.” (1 Timoti 6:15) Jisas inap mekim planti gutpela samting winim olgeta arapela bikman, na em i gat bikpela strong winim tru olgeta bikman bilong graun.

 5. Kingdom Bilong God i stap we na mekim wok? Em bai bosim wanem samting?

⁵ Foti de bihain long Jisas i kirap bek, em i go antap long heven. Bihain Jehova i makim em olsem King bilong Kingdom. (Aposel 2:33) Gavman bilong God bai stap long heven na bosim graun. (Revelesen 11:15) Long dispela as Baibel i kolim Kingdom Bilong God olsem “Kingdom bilong em long heven.”—2 Timoti 4:18.

6, 7. Wanem samting i mekim na Jisas em i gutpela King tru winim olgeta king bilong graun?

⁶ Baibel i tok Jisas i winim olgeta king bilong graun bikos “em wanpela tasol i no inap i dai.” (1 Timoti 6:16) Olgeta bikman bilong graun bai dai, tasol Jisas bai i no inap i dai. Olgeta gutpela wok Jisas bai mekim bilong helpim yumi bai stap oltaim.

⁷ Baibel i tok profet olsem Jisas bai mekim wok king bilong em long pasin i fea na pasin sori: “Spirit bilong Jehova bai kam stap long em, olsem na em bai i gat savetingting na pasin bilong kliagut tru long ol samting, em bai givim gutpela tingting na em bai i gat bikpela strong, em bai i gat planti save na em bai i gat pasin bilong pret long Jehova. Em bai kisim amamas long pasin bilong pret long Jehova. Em bai no jasim man long samting em i lukim tasol long ai, o stretim man long samting em i harim tasol long yau. Em bai jasim ol taranguman long pasin i fea.” (Aisaia 11:2-4) Olsem wanem? Yu laik bai kain King olsem i stap bos bilong yu?

 8. Olsem wanem yumi save i no Jisas wanpela tasol bai mekim wok king?

⁸ God i bin makim sampela manmeri long mekim wok king wantaim Jisas long gavman long heven. Olsem, aposel Pol i tokim Timoti: “Sapos yumi sanap strong i stap, orait bai yumi mekim wok king wantaim em.” (2 Timoti 2:12) Hamas bai mekim wok king wantaim Jisas?

 9. Hamas manmeri bai mekim wok king wantaim Jisas? Wanem taim God i kirap long makim ol?

⁹ Olsem yumi lainim long Sapta 7, aposel Jon i bin lukim wanpela visen we Jisas i stap olsem King long heven wantaim 144,000 arapela king. Husat ol dispela 144,000? Jon i tok: “Wanem hap Pikinini Sipsip [em Jisas] i go long en, ol dispela lain i save bihainim em. God i bin baim bek ol namel long ol manmeri.” (Ritim Revelesen 14:1, 4.) Dispela l44,000 em ol Kristen i stap gut long God em i bin makim ol bilong “stap king na bosim graun.” Taim ol i dai, ol i kirap bek na kisim laip long heven. (Revelesen 5:10) Kirap long taim bilong ol aposel, Jehova i wok long makim ol Kristen i stap gut long em bilong insait long dispela lain 144,000 em ol bai stap king.

10. Bilong wanem em i gutpela pasin tru long God i stretim rot na Jisas wantaim lain 144,000 i bosim ol manmeri?

¹⁰ Jehova i tingim tru yumi olsem na em i stretim rot long ol man i ken mekim wok king wantaim Jisas. Jisas bai stap gutpela king, long wanem, em i kliagut long yumi. Em i save pinis long pasin bilong stap olsem man na karim pen na hevi. Pol i tok Jisas i save pilim hevi bilong yumi, na em inap “pilim tru ol samting i save traim yumi” na “olgeta traim i save kamap long yumi, ol i bin kamap long em tu.” (Hibru 4:15; 5:8) Lain 144,000 ol tu i save long ol samting i save painim ol man. Na ol i bin karim hevi bilong sin na hevi bilong sik. Olsem na yumi ken save olsem Jisas na lain 144,000 i kliagut long filings bilong yumi, na tu, ol hevi yumi save karim.

11. Olsem wanem? Oltaim long heven olgeta i bin bihainim laik bilong God?

¹¹ Bilong wanem Jisas i skulim ol disaipel bilong em long beten olsem laik bilong God i mas kamap long graun olsem i save kamap long heven? Long Sapta 3 yumi kisim save olsem Satan dispela Devil i bikhet long Jehova. Bihain long Satan i bikhet, God i larim Satan na ol ensel husat i bihainim em, o ol spirit nogut, long i stap long heven inap sampela haptaim. Olsem na i no olgeta lain i stap long heven i bihainim laik bilong God. Long Sapta 10 bai yumi kisim sampela save moa long Satan na ol spirit nogut.

12. Revelesen 12:10 i stori long wanem tupela bikpela samting?

¹² Baibel i tok olsem bihain long Jisas i kamap King long Kingdom Bilong God, em bai go pait long Satan. (Ritim Revelesen 12:7-10.) Ves 10 i stori long tupela bikpela samting. Kingdom Bilong God long han bilong Jisas Krais i kirap mekim wok, na ol i rausim Satan long heven na tromoi em i kam daun long graun. Olsem yumi bin lainim, dispela olgeta samting i kamap pinis.

13. Ol i rausim Satan long heven na wanem samting i kamap?

¹³ Baibel i stori long ol gutpela ensel i amamas bihain long ol i tromoi Satan na ol spirit nogut bilong em long heven i kam daun. Baibel i tok: “Yupela heven na yupela husat i stap long en, yupela i ken amamas!” (Revelesen 12:12) Nau gutaim tru na pasin wanbel i stap long heven, long wanem, olgeta i bihainim laik bilong God.

14. Ol i rausim Satan long heven i kam daun na wanem samting i kamap long graun?

¹⁴ Tasol ol samting long graun i no olsem. Ol samting nogut i painim ol manmeri “long wanem, Devil i kam daun” na em i “belhat nogut tru, em i save em i gat sotpela taim tasol bilong i stap.” (Revelesen 12:12) Satan i belhat. Ol i bin rausim em long heven, na em i save klostu nau bagarap bai painim em. Em i mekim olgeta samting em inap mekim bilong kamapim trabel, pen na hevi long olgeta hap bilong graun.

15. God i laik bai dispela graun i stap olsem wanem?

¹⁵ Tasol laik bilong God long dispela graun i no senis. Em i laik bai ol manmeri i gutpela olgeta i stap oltaim long paradais long graun. (Song 37:29) Olsem wanem Kingdom Bilong God bai kamapim dispela samting?

16, 17. Daniel 2:44 i givim wanem save long yumi long Kingdom Bilong God?

¹⁶ Tok profet i stap long Daniel 2:44 i tok: “Long taim bilong ol dispela king, God bilong heven bai kamapim wanpela kingdom we i no inap bagarap. Na dispela kingdom i no inap go long han bilong ol narapela manmeri. Em bai brukbrukim i go liklik liklik na pinisim olgeta dispela kingdom, na em wanpela tasol bai stap oltaim oltaim.” Dispela tok profet i givim wanem save long yumi long Kingdom Bilong God?

¹⁷ Namba wan, em i soim olsem Kingdom Bilong God bai kirap long mekim wok “long taim bilong ol dispela king.” Dispela i makim olsem taim ol arapela gavman i stap yet long graun, Kingdom Bilong God bai kirap mekim wok. Namba tu, em i soim olsem Kingdom Bilong God bai stap oltaim na ol arapela gavman bai i no inap kisim ples bilong en. Na namba tri, Kingdom Bilong God na ol gavman bilong graun bai i pait wantaim. Kingdom Bilong God bai win na em wanpela gavman tasol bai bosim ol manmeri. Ol manmeri bai stap aninit long nambawan gutpela gavman.

18. Wanem nem bilong laspela pait namel long Kingdom Bilong God na ol gavman bilong dispela graun?

¹⁸ Wanem samting bai kamap paslain long pait i kamap namel long ol gavman bilong dispela graun na Kingdom Bilong God? Ol spirit nogut bai mekim tok giaman bilong paulim “ol king bilong olgeta hap graun bilong bungim olgeta long i go long pait long dispela bikpela de bilong God i Gat Olgeta Strong.” Yes, ol gavman bilong ol man bai pait long Kingdom Bilong God.—Revelesen 16:14, 16; lukim Futnot long pes 210.

19, 20. Bilong wanem yumi nidim Kingdom Bilong God long bosim dispela graun?

¹⁹ Bilong wanem yumi nidim Kingdom Bilong God? I gat 3-pela as. Namba wan, yumi gat sin, na yumi save sik na dai. Tasol Baibel i tok aninit long Kingdom Bilong God yumi bai stap oltaim. Jon 3:16 i tok: “God i laikim tumas olgeta manmeri bilong graun, olsem na em i givim dispela Pikinini tru bilong em long ol bai olgeta man husat i bilip long em ol inap abrusim bagarap na kisim laip oltaim.”

²⁰ Namba tu as na yumi nidim Kingdom Bilong God em olsem, yumi stap namel long ol manmeri i save mekim pasin nogut. Planti i save tok giaman, trikim ol man, na mekim pasin pamuk. Yumi no inap pasim ol long mekim ol dispela samting. Tasol ol i no laik senisim pasin bilong ol, olsem na God bai bagarapim ol long Armagedon. (Ritim Song 37:10.) Namba tri as na yumi nidim Kingdom Bilong God em olsem, ol gavman bilong ol man i no gat strong, ol i gat hatpela pasin, o ol i pulap long pasin korapsen. Ol i no gat laik long helpim ol manmeri long bihainim tok bilong God. Baibel i tok olsem “man i bin bosim man na i bringim hevi tasol long em.”—Eklisiastis 8:9.

21. Olsem wanem Kingdom bai mekim na laik bilong God bai kamap long graun?

²¹ Bihain long Armagedon, Kingdom Bilong God bai mekim ol samting na bai laik bilong God i kamap long graun. Olsem, em bai rausim Satan na ol spirit nogut. (Revelesen 20:1-3) Na isi isi bihain, ol man bai i no sik na i dai moa. Long rot bilong pe bilong baim bek ol man, ol man i stap gut long God inap i stap oltaim oltaim long Paradais. (Revelesen 22:1-3) Kingdom Bilong God bai mekim holi nem bilong God. Dispela i makim wanem samting? Em i makim olsem taim gavman bilong God i bosim graun, olgeta manmeri bai litimapim nem bilong Jehova.—Lukim Futnot long pes 216.

22. Olsem wanem yumi save Jisas i no kamap King taim em i stap long graun o bihain stret long taim em i kirap bek?

²² Jisas i skulim ol disaipel bilong em long beten olsem: “Kingdom bilong yu i mas i kam.” Dispela i kamapim klia olsem gavman bilong God bai kamap long bihain. Pastaim Jehova bai kamapim gavman bilong em na putim Jisas i stap King bilong en. Olsem wanem? Jisas i kamap King bihain stret long em i go long heven? Nogat, em i mas wet pastaim. Bihain long Jisas i kirap bek, Pita na Pol i kamapim klia dispela samting taim ol i kolim tok profet i stap long Buk Song 110:1 long Jisas. Long dispela tok profet, Jehova i tok: “Sindaun long rait han bilong mi i go inap long taim mi putim ol birua bilong yu i stap aninit long lek bilong yu.” (Aposel 2:32-35; Hibru 10:12, 13) Jisas i mas wet inap long wanem taim na Jehova bai mekim em i kamap King?

23. (a) Jisas i kirap mekim wok King long gavman bilong God long wanem taim? (b) Bai yumi skelim wanem samting long sapta i kamap bihain?

²³ Planti yia paslain long 1914, wanpela grup bilong ol gutpela Kristen i kliagut olsem dispela yia em i wanpela bikpela yia long tok profet bilong Baibel. Ol samting i kamap long graun kirap long 1914 i kamapim klia olsem tingting bilong ol i stret. Jisas i kirap mekim wok King long dispela yia. (Song 110:2) I no longtaim bihain long dispela, ol i tromoi Satan i kam daun long graun, na nau “em i gat sotpela taim tasol bilong i stap.” (Revelesen 12:12) Sapta i kamap bihain long dispela bai helpim yumi long save olsem yumi stap long dispela haptaim. Yumi bai kisim save tu olsem klostu nau Kingdom Bilong God bai mekim ol samting bilong kamapim laik bilong God hia long graun.—Lukim Futnot long pes 217-220.