“Pret Long [God] na Litimapim Nem Bilong Em”
“Yupela i mas pret long [God] na litimapim nem bilong em.”—REVELESEN 14:7.
1. Yumi mas pret long husat? Yumi no ken pret long husat?
YUMI MAS PRET LONG HUSAT? Yumi no ken pret long dispela bikpela retpela snek, em Seten, na ol ensel bilong em. Nogat! Krais Jisas i rausim ol pinis long heven long taim Kingdom i kamap nupela long heven long yia 1914. Tasol nau ol piksa bilong Revelesen i kamapim long ples klia dispela oganaisesen hia long graun em Seten i mekim wok long en bilong pasim ol wok God i laik mekim. I gat piksa long tupela wel abus nogut na wanpela meri pamuk i dring longlong—em Bikpela Babilon. Olsem wanem? Yumi mas pret long ol dispela samting? Nogat tru! Yumi mas pret long Jehova wantaim Krais, em Kingdom bilong em i laik givim strafe nau long ol lain nogut bilong Seten.—Provep 1:7; Matyu 10:28; Revelesen 12:9-12.
Ol Wel Abus i Tok Bilas long God
2 Long namba et piksa bilong Revelesen i gat wanpela wel abus i kamap long solwara. Solwara i makim ol manmeri i kirap nabaut olsem si long solwara. Dispela wel abus i gat 7-pela het na 10-pela kom. Long ol kom bilong en 10-pela het bilong king i stap na dispela i makim bikpela namba bilong en, olsem bilong king, em Seten i givim long en. Dispela wel abus i tok bilas long Jehova na i mekim nogut long ol wokboi bilong Em olsem lepat o bea o laion i bagarapim man. Namba bilong en i bilong liklik taim tasol, long wanem em i kisim long bikpela snek, em Seten. Dispela wel abus em i wankain tru olsem Seten. Bipo profet Danyel i bin stori long sampela gavman politik bilong graun i olsem ol wel abus. Na ol gavman yet i save putim sampela animal bilong bus i stap olsem mak bilong ol, olsem laion i mak bilong Englan na taragau i mak bilong Amerika. (Danye1 8:5-8, 20-22) Tasol dispela wel abus long namba et piksa i makim olgeta gavman wantaim, na olgeta bikpela gavman Baibel i stori long en ol i insait long en. Planti taim ol dispela bikpela gavman o “het” bilong wel abus ol i bin daunim lain tru bilong God; sampela em Isip, Asiria, Babilon, Midia wantaim Pesia, Grik, Rom, Englan wantaim Amerika.—Revelesen 13:1, 2; 12:3, 7-9.
3. (a) Olsem wanem “bainat i kilim” wanpela het bilong wel abus? (b) Wel abus i gat tupela kom, olsem wanem dispela wel abus i go pas long kamapim piksa bilong namba wan wel abus? (c) Dispela namba wan wel abus i gat wanem nem? Dispela nem i makim wanem samting?
3 Englan em i namba seven bikpela gavman na long taim bilong bikpela pait bilong olgeta hap, long yia 1914-1918, i olsem “bainat i kisim em.” Tasol em i no bagarap olgeta, long wanem Amerika i kam helpim em. Bihain long dispela taim dispela tupela gavman, olsem Englan na Amerika, i wok wantaim na i kamap olsem wanpela bikpela gavman bilong graun. Jon i stori long dispela gavman i olsem wanpela wel abus i gat tupela kom. Dispela wel abus “i kirap insait long graun na i kam antap,” olsem em i kamap namel long ol lain i gat lo na gavman na i olsem ol i stap strong. Dispela wel abus i gat tupela kom em i go pas long kamapim piksa bilong namba wan wel abus na givim win bilong laip long en. Dispela i makim olsem gavman bilong Englan wantaim Amerika i nambawan lain bilong kamapim Lig ov Nesen na senis bilong en, em Yunaitet Nesen. Namba wan wel abus i gat nem bilong en, em wanpela namba, olsem 666. Long Baibel namba 7 i makim samting i gutpela olgeta, olsem na namba 6 i makim samting i no gutpela olgeta—em i sot. Na dispela namba 666 i makim olsem ol gavman bilong graun long nau ol i no gutpela liklik; ol i sot tru. Ol Witnes Bilong Jehova i save daun long ol gavman na bihainim stret ol lo bilong kantri ol i stap long en, tasol ol i strong na ol i no laik lotu long “wel abus” o piksa bilong en.—Revelesen 13:3-18; Rom 13:1-7.
Bilong Wanem Yumi Mas Pret long God?
4 Orait, yumi stori inap pinis nau long ol dispela wel abus! Namba nain piksa i gat gutpela stori long Pikinini Sipsip. Em i sanap long Maunten Saion wantaim ol 144,000 manmeri em i bin baim bek ol olsem namba wan lain namel long olgeta man bilong graun. Sampela bilong dispela lain ol i wok yet hia long graun, tasol long spirit i olsem olgeta 144,000 “i kamap pinis long maunten Saion, na long . . . Jerusalem i stap long heven.” (Hibru 12:22) I stret nau yumi lukim 24 hetman i stap long pes bilong sia king bilong God, long wanem ol tu i makim dispela lain 144,000; tasol dispela 24 hetman i makim ol taim ol i kirap bek pinis na ol i kisim pinis wok king na wok pris. Dispela 144,000 i mekim wanpela “nupela” singsing. Ol i mekim dispela singsing, long wanem narapela kain samting tru i bin painim ol, olsem God i bin baim bek ol namel long olgeta man bilong graun bambai ol i ken kisim wok king long Kingdom bilong heven. Bikpela lain tu ol i “singim nupela song long [Jehova],” tasol singsing bilong ol em i narapela kain, long wanem ol i wet long kisim laip oltaim long graun aninit long Kingdom, em as bilong dispela singsing bilong ol.—Revelesen 7:9; 14:1-5; Sam 96:1-10; Matyu 25:31-34.
5 Nau Jon i lukim sampela samting moa long dispela piksa—em i lukim wanpela ensel i flai i go namel long skai. Em i gat gutpela tok tru bilong autim. Em gutpela tok bilong i stap oltaim, long wanem em inap givim laip i stap oltaim long ol man bilong olgeta lain na olgeta tok ples na olgeta kain skin, em ol i bihainim tok bilong God long nau long taim Em i skelim olgeta man long kot. Yumi no laik lotu long ol dispela wel abus nogut nau tasol Jon i bin stori long ol. Tasol i stret yumi mas lotu long dispela gutpela God na litimapim nem bilong em, a? Tru tumas! Long wanem em i bin wokim heven na graun. Em i as bilong olgeta samting i stap, ol samting i gat laip na ol samting i no gat laip. Olsem na i gat as tru na dispela ensel i singaut strong na em i tok: “YUPELA I MAS PRET LONG [GOD] NA LITIMAPIM NEM BILONG EM”! Nek bilong dispela ensel i go kamap long olgeta hap bilong graun, na ol Witnes Bilong Jehova i wok wantaim em na long 200 samting tok ples ol i singaut strong na singautim olgeta man long i kam lotu long God.—Revelesen 14:6, 7; Aisaia 45:11, 12, 18.
Bikpela Babilon i Pundaun
6 Nau narapela ensel i kam. Em i autim wanpela tok yumi kirap nogut long en, em i tok: “Bikpela taun Babilon em i bagarap pinis [olsem pundaun]! Yes, em i [pundaun] pinis! Dispela taun Babilon tasol em i bin mekim olgeta lain manmeri ol i bihainim strongpela pasin pamuk bilong em. Dispela em i olsem em i givim strongpela wain long ol na ol i dringim!” (Revelesen 14:8) Dispela “Bikpela taun Babilon” i makim wanem samting na em inap giamanim ol lain man na ol i kamap longlong olsem man i dring strongpela wain?
7. Bikpela Babilon i makim wanem samting? Em i kamap olsem wanem?
7 Taun Babilon long bipo em i as ples bilong ol lotu giaman na ol dispela lotu giaman i go kamap long olgeta hap bilong graun na i kisim bikpela strong bilong bosim olgeta manmeri aninit long ol spirit nogut. Olsem na Baibel i kolim olgeta dispela lotu giaman olsem “Bikpela taun Babilon.” Bihain Rom i kisim biknem insait long dispela Bikpela Babilon, long wanem Rom i stap bikpela gavman long graun long taim lotu Kristen giaman i wok long kamap. Rom em i as ples yet bilong lotu bilong Babilon. Dispela samting i kamap ples klia long yia 1986. Long dispela taim ol hetman bilong lotu long olgeta hap bilong graun ol i bihainim singaut bilong pop bilong Rom na ol i go bung wantaim em long Asisi, klostu long Rom, bambai ol i ken mekim beten bilong kamapim gutaim na helpim dispela Yia Bilong Gutaim em Yunaitet Nesen i makim.
8. (a) Olsem wanem Babilon i pundaun tru? Kirap long wanem taim dispela samting i kamap ples klia? (b) I gat wanem samting na yumi ken save God i no harim beten ol hetman bilong lotu i mekim bilong kamapim gutaim?
8 Tasol Bikpela Babilon i pundaun tru! Dispela samting i kamap ples klia kirap long yia 1919 na i kam inap long nau, long wanem planti man i lusim ol lotu giaman long olgeta hap. Long nau ol gavman komyunis i bosim planti hap bilong graun na ol komyunis i save tok, i no gat God. Ol skul i lainim ol yangpela bilong nau long wanpela tok i pait wantaim tok bilong God long Baibel; ol i lainim ol olsem God i no bin wokim yumi, yumi kamap nating tasol. Long hap bilong Yurop i gat ol lotu Talatala long en, wan wan man tasol i save go long lotu long nau. Na pop i raun raun na em i hatwok long strongim lotu Katolik bambai i no ken bruk olgeta na bagarap. Ol man i beten long ol god bilong ol lotu long olgeta hap, tasol ol dispela god i no harim. Wanpela meri (em Ruth L. Sivard) i tok: “Long yia 1987 i gat 22 pait i stap; dispela em i planti pait tru, winim olgeta yia bipo ol man i bin raitim stori bilong en long buk. Ol dispela pait i bin kilim i dai inap olsem 2,200,000 manmeri na i no pinis yet.”a Tru tumas, dispela bung long Asisi bilong mekim beten em i no helpim ol man liklik! Tasol Pop i laik makim olsem dispela bung i kamap long Oktoba 1986 em i wanpela bikpela samting, olsem na long Oktoba 1987 em i kamapim wanpela samting olsem raunpela mani bras i gat piksa bilong em yet long wanpela hapsait na piksa bilong makim dispela bung long narapela hapsait. Ol i “tok, ‘Em gutaim nau! Em gutaim nau!’ Tasol i no gat gutaim.”—Jeremaia 6:14, NW.
Pasin Pamuk Bilong Babilon i Kamap Ples Klia
9 Revelesen 14:8 i tok Bikpela Babilon em i wanpela meri pamuk. Ol pris pasto bilong en i gat nem nogut long mekim pasin pamuk na pasin sem. Ol evanselis i autim tok bilong lotu long televisen, olsem long Amerika, ol i bin pulim bikpela mani tru long lain bilong ol na ol i paulim dispela mani. Na ol i bin mekim ol kain pasin pamuk tu na ol i no sem long en. Na ol man i tingting planti long pasin bilong ol pris bilong lotu Katolik, olsem wanpela ripot i kamapim. (Ripot i stap long nius The Beacon Journal bilong Filadelfia, Pensilvenia, Janueri 3, 1988) Dispela ripot i tok: “Insait long 5-pela yia i go pinis sampela pris Katolik long hap bilong Amerika i bin mekim pasin sem long planti handet pikinini na dispela samting i bagarapim tru tingting bilong ol dispela pikinini. Em papamama bilong ol dispela pikinini na ol dokta na polis na loya i bin helpim ol dispela pikinini ol i tok olsem.” Planti pris pasto bilong Bikpela Babilon i bin mekim pasin pamuk na pasin sem na dispela samting i bagarapim nem bilong ol.
10. (a) Long Revelesen 18:3 pasin “pamuk” bilong Bikpela Babilon i makim wanem samting? (b) Olsem wanem na ol pris pasto bilong Bikpela Babilon i gat bikpela asua long blut, olsem Revelesen 18:24 i makim?
10 Tasol long Revelesen 18:3, taim Baibel i tok Bikpela Babilon i “pamuk,” dispela i makim pasin “pren” ol lotu giaman i bin mekim wantaim “ol king bilong graun.” Ol i bin helpim ol wok politik bilong ol gavman bilong graun na ol pait bilong ol, na ol i strong long ol man i mas lotuim ol gavman em ol i hap bilong wel abus. Ol man bilong politik i amamas long pren wantaim ol lotu, long wanem planti taim ol lotu i bin wok wantaim ol long mekim ol wok ol i laik mekim bilong helpim ol yet. Olsem na long yia 1933 Hitler i bin kontrak wantaim Vatiken, na taim ol Spen yet i pait long yia 1936-1939, long dispela taim tu ol lain bilong politik na lotu i bin wok wantaim. Long taim bilong Namba Tu Pait Bilong Olgeta Hap, ol pris pasto bilong lotu Katolik na Talatala na Budis na ol narapela lotu ol i wok strong long helpim kantri bilong ol yet na ol i kirapim ol man long i go insait long pait. I olsem ol i dringim strongpela wain na ol i kamap longlong. Ol dispela pris pasto i gat bikpela asua long blut, long wanem planti milion soldia na ol manmeri i no insait long ami ol i dai long ol pait i bin kamap long graun kirap long yia 1914 na i kam inap nau. Na ol pris pasto i bin helpim ol hatpela gavman, olsem bilong Hitler long Jemani na Mussolini long Itali, ol tu i gat asua long blut, long wanem ol dispela gavman i bin putim ol Witnes Bilong Jehova na ol narapela lain long ol banis kalabus nogut na planti ol i dai, na ol i bin kilim i dai sampela.—Jeremaia 2:34; Revelesen 18:3, 24.
11 Inap 74 yia pinis liklik hap lain gutpela Kristen bilong lain 144,000 wantaim planti planti manmeri ol i wok long kam insait long ‘bikpela lain,’ ol i save PRET LONG GOD NA LITIMAPIM NEM BILONG EM. Yumi strong yet long sakim pasin bilong lotuim wanpela lain politik o gavman em i hap bilong wel abus. Yumi no litimapim nem bilong piksa bilong wel abus—em Lig ov Nesen na Yunaitet Nesen—long wanem yumi save “Bikpela bilong yumi [Jehova] wantaim Krais tupela i kamap king” na Kingdom bilong tupela tasol inap kamapim gutaim tru na bai olgeta man i stap gutpela na i stap bel isi. Yumi tingting pinis long yumi mas bihainim “lo bilong God na holimpas bilip long Jisas.” Sapos yumi sanap strong olsem bai yumi kisim gutpela pe! Ol Kristen bilong lain 144,000 ol i “bilip long Bikpela na ol i dai” ol i ken amamas, long wanem “gutpela pasin ol i bin mekim, dispela i go wantaim ol.” Na ol manmeri bilong bikpela lain, maski ol man i mekim nogut long ol na ol i dai, o ol i gat sik na ol i dai, o ol i kisim bagarap na ol i dai, tasol ol i bin wok long i stap pren bilong God, olsem na long nupela taim bihain bai ol i kirap bek kwiktaim na i stap long lain bilong “nupela graun.” Yumi tingim ol dispela gutpela samting bai kamap na dispela i olsem strongpela samting bilong kirapim yumi na bai yumi PRET LONG GOD NA LITIMAPIM NEM BILONG EM.—Revelesen 11:15, 17; 12:10; 14:9-13; 21:1.
12 Kot i go yet na ol ensel i singaut na stori long tupela taim bilong kamautim kaikai long graun. Namba wan Man bilong kamautim kaikai long graun em Jisas, em i kamap King pinis long Kingdom long yia 1914. Yumi save em Jisas, long wanem em i sindaun long waitpela klaut, na em i gat hat bilong king long het bilong em, na em i “olsem Pikinini Bilong Man.” Nau long de bilong Bikpela, em i kamautim kaikai long graun—pastaim em i kisim hap lain bilong ol 144,000 Kristen ol i stap yet long graun na bihain em i kisim ol milion milion manmeri bilong bikpela lain. (Lukim tu Matyu 25:31-34; Jon 15:1, 5, 16.) Tasol long namba tu taim bilong kamautim kaikai, em i “katim olgeta kaikai bilong rop wain bilong graun” na tromoi i go insait long “bikpela tang ston bilong krungutim wain. Dispela em i olsem belhat bilong God.” Dispela strafe bai kamap long Amagedon long taim ol i kamautim na bagarapim olgeta man nogut bilong graun, olsem kaikai nogut bilong rop wain i gat gip long en. Jehova i rausim dispela rop wain nogut long graun, olsem na yumi mas litimapim nem bilong Em!—Revelesen 14:14-20; 16:14, 16.
Jehova—Pasin Bilong Em “i Stret na i Tru Olgeta”
13 Long namba ten piksa bilong Revelesen yumi lukim gen sampela samting i kamap long heven long pes bilong sia king bilong God. God i sindaun i stap long sia king bilong em na ol lain long heven i amamas! Hap lain 144,000, em ol i bin PRET LONG GOD NA LITIMAPIM NEM BILONG EM na ol i winim pait na kirap bek pinis ol i mekim wanpela singsing, em ‘song bilong Moses na Pikinini Sipsip.’ Ol i tok: “[Jehova], yu God I Gat Olgeta Strong. Olgeta wok yu mekim, em i bikpela, na mipela i lukim, na mipela i tingting planti! Yu king bilong olgeta lain man, na pasin bilong yu em i stret na i tru olgeta! Bikpela, yu wanpela tasol yu stap holi. Olsem na husat bai i no pret long yu? Husat bai i no litimapim nem bilong yu? Nogat. Olgeta lain man bai ol i kam na lotu long yu. Long wanem stretpela pasin bilong yu i kamap pinis long ples klia.” Kot bilong Jehova i stret na i tru olgeta na dispela piksa i kamapim dispela samting long ples klia tru! Ol ensel i kapsaitim 7-pela dis i gat belhat bilong God long en na nau olgeta lain i bung long Amagedon, na yumi save “God i tingting long bikpela taun Babilon”! Long taim stret singaut i kamap bilong kirapim ol man na bai ol i PRET LONG GOD NA LITIMAPIM NEM BILONG EM.—Revelesen 15:1–16:21.
14. Long namba 11 na namba 12 piksa “bikpela taun Babilon” i mekim wanem wok? Bilong wanem em i taim nau bilong lusim dispela ples?
14 Planti taim Revelesen i stori long Bikpela Babilon. Long namba 11 na namba 12 piksa bikpela tok long dispela bikpela “pamukmeri” i kamap. Em i “sindaun antap long bikpela wara”—em i bosim ol manmeri na givim ol tok giaman nogut long ol, olsem strongpela wain, na dispela i mekim ol i kamap longlong, olsem man i spak. Na em yet “em i dringim blut bilong ol [manmeri bilong God] na i kamap longlong.” Em i bin kirapim ol man long mekim nogut long ol dispela manmeri bilong God na em i kilim ol i dai. Na em i gat asua long blut bilong “olgeta man long graun ol birua i bin kilim ol i dai,” long wanem em i bin givim bel long helpim ol pait bilong dispela graun. Em i bin wok wantaim ol man bilong bikpela bisnis na pulim bikpela mani long ol man na rabisim ol, na em i gat bikpela mani kago. Tasol em i gat bikpela asua tru long pasin em i mekim wantaim ol lain politik. Em i bin mekim pasin pamuk wantaim ol, na em i wok strong long kisim biknem na sindaun antap long dispela wel abus bilong kamapim gutaim, em Yunaitet Nesen. Tasol ol kom o gavman bilong dispela wel abus yet, em ol i gat ami na planti samting bilong pait, bai ol i birua long em na bagarapim em olgeta. Olgeta man i PRET LONG GOD NA LITIMAPIM NEM BILONG EM, nau em i taim bilong ol i mas lusim “bikpela taun Babilon” kwiktaim, long wanem “sin bilong en i olsem bikpela hip tru, na i kamap inap long heven. Na God i tingim olgeta pasin nogut bilong dispela ples.”—Revelesen 17:1–18:24.
15. Bikpela pamukmeri i bagarap pinis na wanem ol singaut i kamap bilong litimapim nem bilong God? Na bihain wanem gutpela samting i kamap?
15 Jehova i mekim stretpela kot na dispela bagarap i painim Bikpela Babilon. Ol lain long heven na long graun tu ol i pilim dispela samting na ol i singaut na litimapim nem bilong God, long wanem ‘God i bin kisim bek ol, na em i gat biknem na strong.’ Taim ol i singaut na tok, “Yumi litimapim nem bilong God,” dispela i kamapim bikpela amamas bilong ol. Ol i amamas, long wanem bikpela pamukmeri i bagarap olgeta. Bagarap bilong em i samting nogut tru, tasol bihain wanpela gutpela samting i kamap long heven, olsem marit bilong Pikinini Sipsip, em Krais Jisas, na “meri” bilong em, ol 144,000 gutpela manmeri i winim pinis pait! Bikpela singaut tru i kamap olsem singsing bilong litimapim nem bilong Jehova, “em i God bilong yumi, em i gat olgeta strong.” Yes, “yumi ken belgut na amamas moa yet na litimapim nem bilong em! Taim i kamap pinis bilong Pikinini Sipsip i laik marit. Na meri bilong em i redi i stap”!—Revelesen 19:1-10.
16. Wanem bikpela tok bihain bai ol i stretim, olsem piksa 13 i makim? Olsem wanem ol bai stretim dispela tok?
16 Taim dispela marit bilong heven i no kamap yet, piksa 13 i makim ol samting i mas kamap bilong stretim bikpela tok i bin kamap long wok king bilong Jehova. Jehova i putim Jisas i stap King i winim olgeta king na Bikpela i winim olgeta bikpela man, na Jisas i kam wantaim ol ami bilong heven, em ol ensel. Em i “skelim manmeri long kot” na “kirapim pait” na em i “bihainim stretpela pasin tasol na i mekim.” Em i krungutim wain long tang ston bilong wain. Dispela em i makim bikpela belhat bilong God I Gat Olgeta Strong. Olgeta lain bilong Seten i stap yet long graun ol i bagarap olgeta! (Revelesen 19:11-21) Long rot bilong ol piksa long Revelesen yumi lukim ol dispela gutpela samting i laik kamap hariap na dispela i kirapim yumi long PRET LONG GOD NA LITIMAPIM NEM BILONG EM!
Litimapim Nem Bilong God Inap long Olgeta Taim Bihain
17 Piksa 14 na 15 long Revelesen i kamapim long ples klia ol gutpela samting bai painim olgeta man i PRET LONG GOD NA LITIMAPIM NEM BILONG EM. Taim Seten na ol spirit nogut i kalabus long hul i no gat as inap 1,000 yia, bai marit bilong Pikinini Sipsip i kamap long heven. Em yet wantaim “meri” bilong em, em lain 144,000, bai ol i mekim wok king na wok pris inap 1,000 yia. Dispela 144,001 king na pris bai wok long helpim ol manmeri long kamap gutpela olgeta. Bai i gat laspela traim na ol manmeri i wok yet long PRET LONG GOD NA LITIMAPIM NEM BILONG EM bai ol i win, na bai God i orait long ol i kisim laip i stap oltaim. Insait long dispela lain em ol planti milion manmeri bek long matmat, “ol man i gat nem na ol man nating,” ol inap long God i raitim nem bilong ol long buk bilong laip. “Nupela skai na nupela graun” bai kamapim ol gutpela blesing long ol man, na ol dispela gutpela samting i mas kamap tru, long wanem Man i “mekim olgeta samting i kamap nupela,” em Jehova, em i tok: “Yu raitim dispela tok. Dispela tok em i tru olgeta, inap long olgeta man i ken bilip tru long en.”—Revelesen 20:1–21:8.
18. Wanem laspela bikpela samting bilong Revelesen, olsem piksa 16 i kamapim?
18 Piksa 16 i kamapim laspela bikpela samting bilong Revelesen. Em wanem samting? Em taun Nupela Jerusalem. Dispela taun i narapela kain tru long ol taun ol man i wokim hia long graun—na em i narapela kain olgeta long bikpela taun Babilon, em ol tok giaman na pasin doti bilong en na pasin pamuk em i bin mekim wantaim ol lain politik i bin bagarapim tru nem bilong God. Dispela taun holi em i stret, na klin, na i gutpela samting tru. Em “meri” bilong Pikinini Sipsip, em poroman bilong em long wok bilong givim laip i stap oltaim long ol manmeri. (Jon 3:16) Olsem na bikpela singaut i kamap klia bilong kirapim ol man long lusim dispela taun giaman, em Bikpela Babilon!—Revelesen 18:4; 21:9–22:5.
19 Long rot bilong dispela lain ol i olsem “meri” i laik marit long Krais, strongpela spirit bilong Jehova i singautim ol man na i tok: “Yu kam!” Yes, yupela olgeta manmeri i gat pasin daun na yupela i laik kisim laip i stap oltaim long paradais long graun, yupela i mas kam long “bikpela wara, em wara bilong laip.” Yupela i mas bilip long olgeta samting Jehova i mekim long rot bilong Krais wantaim “meri” bilong em bilong helpim yupela long kisim laip i stap oltaim! Em gutpela samting tru—yu inap kamap gutpela olgeta na i stap oltaim long paradais long graun! Em gutpela pe olgeta man bai kisim, em olgeta planti man i bihainim singaut bilong ensel na ol i “PRET LONG [GOD] NA LITIMAPIM NEM BILONG EM”!—Revelesen 22:6-21.
[Ol Futnot]
a World Military, and Social Expenditures 1987-88.
[BAI YU BEKIM WANEM TOK?]
□ Piksa i stori long tupela wel abus em i gat wanem tok bilong helpim yumi nau long dispela taim?
□ Yumi mas mekim wanem long tok bilong dispela ensel em i flai namel long skai?
□ Olsem wanem Bikpela Babilon i mekim pasin pamuk? Ol man i pret long God ol i ting olsem wanem long dispela?
□ Olsem wanem ol i kamautim kaikai long graun long de bilong Bikpela?
□ Ol tok long pinis bilong Revelesen i stori long wanem ol gutpela samting? Olsem wanem lain bilong God i ken insait long ol dispela gutpela samting?
2. I gat wanem wel abus i kamap long namba et piksa? Dispela i makim wanem samting?
4. (a) Long piksa namba nain, husat ol i sanap long Maunten Saion? Ol 24 hetman i sanap long pes bilong sia king bilong God ol i makim husat? (b) Olsem wanem “nupela song” bilong lain 144,000 i narapela kain long “nupela song” bilong bikpela lain?
5. (a) Ensel i flai namel long skai em i autim wanem tok? Olsem wanem em tok bilong i stap oltaim? (b) Ensel i singaut strong na tok ol man i mas mekim wanem? Bilong wanem dispela tok i stret?
6. Narapela ensel i autim wanem tok i mekim yumi i kirap nogut?
9. Ol pris pasto bilong Bikpela Babilon i gat nem nogut long mekim wanem ol kain pasin i no stret?
11. Ol Kristen bilong lain 144,000 wantaim bikpela lain ol i no laik lotu long wanem samting? (b) I gat wanem ol gutpela samting bai kamap na dispela i olsem strongpela samting bilong kirapim yumi bai yumi pret long God na litimapim nem bilong em?
12. I gat wanem tupela taim bilong kamautim kaikai? Namba wan taim bilong kamautim kaikai i kamap long wanem taim? Namba tu taim bilong kamautim kaikai i kamap long wanem taim?
13. (a) Long namba 10 piksa hap lain 144,000 ol i kirap bek pinis ol i mekim wanem singsing? Wanem ol tok bilong dispela singsing?
17. Piksa 14 na 15 i stori long wanem ol gutpela samting bai painim olgeta man i pret long God na litimapim nem bilong em?
19. (a) Long rot bilong “meri” i laik marit long Krais, God i singautim ol man i kam mekim wanem? Ol manmeri i gat pasin daun ol i harim dispela singaut na ol i mekim wanem? (b) Sapos yumi bihainim tok bilong ensel na yumi “pret long [God] na litimapim nem bilong em,” orait bai yumi kisim wanem gutpela pe?
[Piksa long pes 27]
Dispela samting olsem raunpela mani bras ol i bin wokim long Oktoba 1987 bilong tingim bung ol i bin mekim long Asisi long Oktoba 1986, em bung bilong mekim ol beten bilong kamapim gutaim. Long wanpela hapsait i gat piksa bilong pop o “Papa Holi,” na ol i raitim tok olsem: “John Paul II Pontifex Maximus” na det. Na long narapela hapsait ol i putim piksa bilong “Santu Fransis” em i singaut bilong kisim “Bel Isi i Kam long God” long bung bilong Asisi