Ol Wel Abus Bilong Revelesen—Ol i Makim Wanem Samting?

LONG apinun, long Sarere 15 Jun 1985, san i lait gut na lait bilong san i holim ol haus ofis bilong Yunaitet Nesen long Nu Yok. Planti man i go lukim ol dispela haus na ol i kirap nogut long ol samting ol i lukim.

Tasol inap long nau Yunaitet Nesen i no bin helpim olgeta lain man long sindaun gut wantaim. Wanpela man i soim rot long ol man i kam lukim ol haus bilong Yunaitet Nesen long dispela apinun, em i tok: ‘Bihain long Namba Tu Pait Bilong Olgeta Hap i gat 150 pait i bin kamap, na ol dispela pait i kilim i dai 20 milion manmeri. Ol man i no kamapim yet wanpela gavman em inap bosim olgeta hap bilong graun. Tasol Yunaitet Nesen i laik mekim dispela wok.’ Olsem Wanem? Bai i gat wanpela gavman em inap bosim olgeta hap bilong graun? Dispela samting inap kamap o nogat? Sapos yu skelim ol tok bilong Revelesen long ol wel abus, bai yu inap save long bekim bilong dispela askim.

Sampela man bilong stori long tok bilong Baibel, ol i pilim olsem ol samting ol wel abus bilong Revelesen i makim em i kamap pinis long taim bilong aposel Jon. Ol i no ting ol dispela wel abus i makim samting i laik kamap bihain. Wanpela bikpela buk bilong ol Katolik (The Catholic Encyclopedia) i stori long ol wel abus bilong Revelesen na i tok: ‘Ol man bilong raitim ol tok olsem bilong Revelesen, taim ol i stori long ol samting ol i bin lukim olsem piksa, ol i stori long samting i kamap pinis long bipo, tasol ol i raitim olsem ol i bin i stap taim dispela samting i no kamap yet na ol i tok profet long en na em i mas kamap bihain’

Tasol aposel Jon i tok, spirit holi i kamap strong long em na em i lukim ol samting i kamap “long de bilong Bikpela.” (Revelesen 1:10) Tru tumas, ol tok bilong Revelesen i no stori long sampela samting i kamap pinis long bipo; nogat. Revelesen i stori long samting bai kamap long bihain, long “de bilong Bikpela,” olsem long taim Bikpela bilong yumi, Krais Jisas, em i kamap king long heven na em i kirap mekim wok king bilong em. Revelesen sapta 6 i tok, long “de bilong Bikpela” bai i gat bikpela pait bilong olgeta hap, na long planti hap bai ol man i sot long kaikai na i gat hangre, na bai kain kain bikpela sik i kamap. Ol samting i kamap nau long taim bilong yumi i makim olsem: Kirap long yia 1914 yumi bin i stap long “de bilong Bikpela.”—Revelesen 6:1-8.a

Long dispela bikpela yia, em yia 1914, Krais Jisas i kirap bosim Kingdom bilong God. (Revelesen 11:15, 18) Olsem na ol samting ol wel abus bilong Revelesen i makim, ol dispela samting i bin kamap bihain long yia 1914. Yes, ol dispela wel abus i makim ol birua bilong God ol i wok long pasim ol manmeri bambai ol i no ken tingim Kingdom bilong God tasol i rot bilong kamapim gutaim long graun. Ol dispela birua i olsem wanpela bikpela snek na tripela wel abus. Orait, nau yumi ken skelim dispela bikpela snek i husat na wanem wel abus i bin kamap pastaim na wanem wel abus i kamap bihain.

Dispela Bikpela Snek

Jon i tok: “Narapela mak i kamap long heven. Dispela mak em i olsem: Wanpela bikpela snek i stap. Em i retpela na i gat 7-pela het na 10-pela kom. Na 7-pela hat bilong king i stap long ol het bilong en.” Dispela bikpela snek i makim wanem samting? Jon yet i stori na em i tok, dispela bikpela snek i makim Seten. Taim Kingdom bilong God i kamap long heven long yia 1914, dispela bikpela snek i birua tru long en. Orait, wanem samting i bin kamap? Baibel i tok: “Ol ensel bilong God ol i tromoi dispela snek i go daun. Em i dispela snek bilong bipo yet, na ol i kolim em Seten na ‘Man I Save Kotim Olgeta Man.’ Em i man bilong giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en ol i go daun wantaim em.”—Revelesen 12:3, 7-9.

Jon i tok, dispela samting bai mekim na bai bikpela hevi i painim ol man bilong graun. Jon i tok: “Yu graun, na yu solwara, yupela lukaut! Bikpela hevi i laik kamap long yupela! Seten i go daun pinis long yupela, na em i gat bikpela belhat tru. Em i save, em i gat sotpela taim tasol.” (Revelesen 12:12) Nau Seten i no inap i go bek moa long heven; em i mas i stap hia long hap bilong graun. Tasol em i wok yet long bagarapim Kingdom bilong God i kamap pinis long heven. Em i mekim olsem wanem? Em i save giamanim ol manmeri long rot bilong tripela wel abus. Orait, nau yumi ken skelim ol tok Jon i mekim long namba wan wel abus.

Wel Abus i Kamap long Solwara

Jon i tok: “Na mi lukim wanpela wel abus i kamap long solwara. Em i gat 10-pela kom na 7-pela het. . . . Dispela wel abus nau mi lukim, em i olsem lepat, na lek bilong en i olsem lek bilong bea, na maus bilong en i olsem maus bilong laion. Na dispela snek i givim strong bilong en long wel abus. Em i putim em i stap king olsem em yet, na i givim em bikpela strong.”—Revelesen 13:1, 2.

Dispela wel abus nogut i makim wanem samting? Spirit holi i givim tingting long Jon na Jon i raitim sampela tok i helpim yumi long save long bekim bilong dispela askim. Jon i tok: “[Dispela wel abus] i kisim strong inap long em i stap king bilong olgeta lain, na bilong olgeta graun, na bilong olgeta tok ples, na bilong olgeta kain skin.” (Revelesen 13:7) Orait, wanem samting i kisim strong bilong bosim olgeta manmeri i stap long graun? Em olgeta gavman, a? Tasol olsem wanem? Tru “dispela snek,” em Seten, em i “givim strong long wel abus” na “putim em i stap king”? Tru tumas. Baibel i tok: “Seten i stap het bilong olgeta man bilong graun.” Olsem na taim Seten i traim Jisas em i tok long givim “olgeta kingdom bilong graun” long Jisas. Seten i tok: “Dispela olgeta strong bai mi givim yu, wantaim biknem bilong en. Olgeta dispela samting i bilong mi pinis.”—1 Jon 5:19; Luk 4:5, 6.

Tasol 7-pela het bilong dispela wel abus i makim wanem samting? Jon i lukim narapela wel abus i olsem piksa bilong dispela namba wan wel abus. Em tu i gat 7-pela bet. Baibel i tok, dispela 7-pela het i makim “7-pela king” o 7-pela bikpela gavman bilong graun, em 5-pela ol i bagarap pinis, na wanpela nau i stap, na wanpela i no kamap king yet.” (Revelesen 17:9, 10) Baibel i stori long 5-pela bikpela gavman i bin kamap long graun paslain long taim bilong Jon, em Isip, Asiria, Babilon, Mido-Pesia, Grik. Namba 6 gavman, em Rom, i stap long taim bilong Jon.

Orait, namba 7 het i makim wanem samting? Ol samting Jon i lukim i mas kamap long “de bilong Bikpela,” olsem na dispela namba 7 het i makim bikpela gavman i senisim Rom na i kisim strong bilong bosim ol man nau long las taim kirap long yia 1914. Dispela gavman em tupela gavman i wok wantaim, olsem Englan na Amerika. Paslain long yia 1914 Englan i bosim planti ples tru, winim olgeta gavman i bin kamap long bipo. Namel long yia 1800 na yia 1900 gavman bilong Englan i kirap long wok gut wantaim gavman bilong Amerika long ol samting bilong wok politik na wok bisnis. Dispela tupela kantri i wok wantaim na long taim bilong Namba Wan na Namba Tu Pait Bilong Olgeta Hap, narapela i helpim narapela, na ol i wok wantaim i kam inap long nau. Long yia 1982 Presiden Reagan bilong Amerika i mekim wanpela tok long gavman bilong Englan na em i tok, ‘Kantri bilong yumi, em Englan na Amerika, i pren gut wantaim.’ Na long dispela taim, olsem long Februeri 1985, praim-minista bilong Englan i mekim wanpela tok long gavman bilong Amerika na em i tok: ‘Englan na Amerika, dispela tupela kantri i pren gut wantaim na yumi mas pas gut wantaim yet . . . long mekim wankain wok na bihainim wankain tingting . . . i go insait long yia 3,000 samting bilong taim bilong ol Kristen.’

Dispela tupela gavman, em Englan wantaim Amerika, i bin wok wantaim na mekim bikpela wok long bosim ol samting hia long graun, olsem na Baibel i stori long narapela wel abus bilong makim dispela tupela gavman i wok wantaim. Em namba tu wel abus bilong Revelesen.

Wel Abus i Kirap Insait long Graun

Jon i tok: “Na mi lukim narapela wel abus i kirap insait long graun na i kam antap. Em i gat tupela kom olsem kom bilong pikinini sipsip, na toktok bilong en i olsem toktok bilong bikpela snek.” Dispela bikpela gavman, olsem Englan wantaim Amerika, i tok ol i Kristen na ol i no ken kirapim pait. Long ai bilong ol man ol i kamap olsem pikinini sipsip; tasol ol i bihainim pasin olsem bilong bikpela snek. Olsem wanem? Long wanem ol i bin kisim planti kantri na kirap bosim ol na ol i bin kisim planti samting bilong graun. Na tu, dispela gavman “i wok strong long mekim graun wantaim ol manmeri i stap long en ol i lotu long dispela namba wan wel abus, bipo sua nogut bilong kilim em i dai em i drai pinis. . . . Em i tokim ol manmeri olsem: ‘Yupela i mas wokim piksa bilong wel abus.’” (Revelesen 13:3, 11-15) Dispela samting i kamap olsem wanem?

Oganaisesen politik bilong Seten i bosim olgeta hap bilong graun, olsem olgeta gavman bilong graun, em i kisim “sua nogut bilong kilim em i dai” long taim bilong namba wan pait bilong olgeta hap. Gavman bilong Englan na Amerika i no laik bai kain samting olsem i kamap gen, olsem na ol i kirapim ol manmeri long ‘lotuim’ dispela namba wan wel abus, olsem dispela oganaisesen politik bilong olgeta hap bilong graun. Ol i mekim olsem wanem? Ol i kirapim ol lain man long “wokim piksa” bilong dispela wel abus. Dispela samting i kamap olsem wanem?

Namba wan pait bilong olgeta hap i laik pinis na Presiden Wilson bilong Amerika em i kirap na wok strong long kamapim wanpela oganaisesen bilong mekim i dai ol pait na kamapim gutaim long graun, em Lig ov Nesen. Bilong helpim dispela wok, Presiden Wilson i go long Paris long yia 1919 long Bung Bilong Toktok long Kamapim Gutaim, na em i tokim ol deleget long dispela bung: ‘Ol deleget bilong lain bilong Amerika ol i laik helpim dispela wok bilong kamapim wanpela oganaisesen, olsem Lig ov Nesen. Mipela i ting dispela oganaisesen tasol em i rot bilong kamapim laik bilong mipela . . . long dispela pait . . . em mipela i laik pinisim olgeta samting i bin kirapim dispela pait.’

Presiden Wilson i mekim tok pinis na nau praim-minista bilong Englan, em Lloyd George em i kirap na em i tok: ‘Mi wanbel tru long ol gutpela tok Presiden bilong Amerika i bin mekim. Mi pilim olsem mi no ken mekim sampela tok moa; mi mas kirapim tasol ol narapela deleget bilong dispela bung bambai ol tu i orait long kamapim dispela oganaisesen, na . . . mi laik tok olsem: Olgeta manmeri i stap aninit long Bikpela Gavman bilong Englan ol i orait long dispela oganaisesen. Ol i laik tru bai dispela kain oganaisesen i ken kamap.’

Sampela mun bihain, ol lain i bung long London bilong stretim tok long kamapim dispela oganaisesen, olsem Lig ov Nesen, na ol i kaunim wanpela pas em King bilong Englan i bin raitim, em king i tok: “Mipela i winim pinis pait. Em bikpela samting. Tasol bikpela samting moa em olsem: Yumi bin mekim dispela pait bambai gutaim i ken kamap long graun na i stap oltaim, na nau yumi mas wok strong long mekim olgeta samting bambai dispela gutaim i ken i stap na i no gat pait moa. Em nambawan bikpela wok bilong yumi. Olsem na yumi mas kamapim wanpela strongpela oganaisesen i no ken bagarap. Mi laik tokim olgeta manmeri i stap aninit long Gavman bilong Englan, ol i mas wok strong long helpim wok bilong kamapim dispela oganaisesen, olsem Lig ov Nesen, na olgeta narapela man i laikim dispela oganaisesen, ol tu i mas wok strong bambai dispela strongpela oganaisesen bilong pasim pait em i ken kamap na dispela bai litimapim nem bilong God.”

Long Janueri 16 long yia 1920 ol i kamapim dispela oganaisesen, em Lig ov Nesen, na 42 kantri i insait long en, olsem memba bilong en. Long 1934 map olsem 58 kantri ol i insait long en. Tru tumas, dispela wel abus i gat tupela kom na i kirap insait long graun na i kam antap, em i kirapim ol manmeri long “wokim piksa bilong wel abus.” Dispela piksa bilong oganaisesen politik bilong Seten long olgeta hap bilong graun, em laspela wel abus Revelesen i stori long en.

Retpela Wel Abus

Jon i stori long dispela laspela wel abus na em i tok: “Mi lukim . . . retpela wel abus. Dispela wel abus em i gat planti nem i pulap long skin bilong en. Na olgeta dispela nem em i kain kain tok bilas long God. Na wel abus i gat 7-pela het na 10-pela kom.” Ensel i tokim Jon long dispela wel abus, olsem: “Yu lukim pinis dispela wel abus. Bipo em i stap, na nau em i no i stap. Tasol bihain bai em i lukim dispela hul i no gat as, na em i kam antap, na bai em i lus olgeta. . . . em i olsem namba et king.” (Revelesen 17:3, 8, 11) Olsem ensel i stori long en, Lig ov Nesen i mekim wok olsem wanpela king na i laik bosim graun olsem wanpela bikpela gavman. Tasol em i no inap pasim Namba Tu Pait Bilong Olgeta Hap, em dispela pait i kirap long yia 1939. Long dispela taim i olsem dispela wel abus i no i stap moa; i olsem em i go daun insait long wanpela bikpela hul i no gat as.

Long taim bilong Namba Tu Pait, bikpela gavman bilong Englan na Amerika i wok strong long kirapim gen dispela oganaisesen. Long yia 1941, praim-minista bilong Englan, em Winston Churchill, em i bung wantaim Presiden Franklin Roosevelt bilong Amerika long wanpela sip long Solwara Atlantik na tupela i toktok hait long dispela samting. Tupela wantaim i tokaut olsem ol i laik bai gutpela taim i mas kamap na i mas i gat wanpela oganaisesen bilong helpim olgeta lain long sindaun gut wantaim na i no ken pret na dispela, oganaisesen i no ken bagarap. Long yia 1942, long Wosington, long Amerika, 26 kantri i orait long dispela oganaisesen Englan wantaim Amerika i laik kamapim, em Yunaitet Nesen. Olsem na long Oktoba 24 long yia 1945 ol i kamapim dispela oganaisesen, olsem Yunaitet Nesen. Nau dispela retpela wel abus i lukim hul i no gat as na em i kam antap. Long dispela taim nau inap olsem 159 kantri ol i insait long dispela oganaisesen na ol i laik bai dispela oganaisesen i mas helpim ol gavman bilong graun long nau long holimpas strong bilong ol long bosim graun.

Tasol ol i no tingim Kingdom bilong God i stap long han bilong Krais na em i kamap pinis long heven long yia 1914. Olgeta man meri long graun ol i mas tingting: Ol i laikim gavman bilong God o ol gavman ol man i bin kamapim. Liklik taim tasol na dispela retpela wel abus wantaim olgeta gavman ol man i bin kamapim bai ol i pait wantaim dispela King God i bin putim em i stap king long heven, em Krais Jisas. Na wanem samting bai kamap? Baibel i tok: “Bai Pikinini Sipsip [Krais Jisas] em i winim ol tru. Em i Bikpela bilong olgeta bikpela man, na em i King bilong olgeta king.” Tru tumas, dispela retpela wel abus wantaim olgeta gavman bilong graun bai ol i bagarap; bai ol i “lus olgeta.”—Revelesen 17:11, 14; lukim tu Danyel 2:44.

Gutpela tru yumi save long dispela bikpela snek wantaim tripela wel abus bilong em na ol i no giamanim yumi na bai yumi no lus wantaim ol! Ol manmeri i kamapim long ples klia olsem ol i stap gut long Kingdom bilong God bai ol i abrusim bagarap na bai ol inap i stap oltaim long “nupela graun” God bai kamapim. Bai God i “mekim drai olgeta wara i stap long ai bilong ol. Bai ol man i no i dai moa, na ol i no bel hevi moa, na ol i no krai na kisim pen gen. Dispela samting bilong bipo em i pinis olgeta.” (2 Pita 3:13; Revelesen 21:3, 4) Olsem na nau yu mas i stap aninit long Kingdom bilong God na bihainim ol tu bilong en, long wanem dispela gavman tasol inap bosim gut graun. Na bai yu tu yu inap kisim ol dispela gutpela blesing ol i bilong i stap oltaim.

[Futnot]