STADI ATIKOL 20
Buk Revelesen—Em i Tokaut Long Ol Samting Bai Painim Ol Birua Bilong God
“Ol dispela tok i bringim ol king i kam bung long dispela ples, long tok Hibru ol i kolim Armagedon.”—REV. 16:16.
SINGSING 150 [49] Askim God Long Kisim Bek Yu
PRIVIUa
1. Buk Revelesen i tokaut long wanem samting long ol manmeri bilong God?
BUK REVELESEN i tokaut olsem Kingdom Bilong God long heven i kirap mekim wok bos pinis na pait i kamap long heven na ol i tromoi Satan i kam daun long graun. (Rev. 12:1-9) Dispela i mekim na bel isi i stap long heven, tasol em i kamapim bikpela hevi moa long graun. Wai? Bikos Satan i belhat nogut tru na em i mekim nogut long ol man i stap gut long lotuim Jehova hia long graun.—Rev. 12:12, 15, 17.
2. Wanem samting bai helpim yumi long stap gut long bilip?
2 Olsem wanem yumi ken stap gut long bilip maski Satan i mekim nogut long yumi? (Rev. 13:10) Wanpela samting we bai helpim yumi em long save long wanem samting bai kamap bihain. Olsem, long Buk Revelesen aposel Jon i stori long sampela blesing em klostu nau yumi bai kisim. Wanpela bilong ol dispela blesing em olsem ol birua bilong God bai bagarap na pinis olgeta. Yumi bai skelim ol tok em Buk Revelesen i mekim long ol dispela birua na wanem samting bai painim ol.
“OL PIKSA” I STORI LONG OL BIRUA BILONG GOD
3. Buk Revelesen i stori long wanem ol piksa?
3 Long namba 1 ves bilong Buk Revelesen, em i tokim yumi olsem ol tok yumi bai ritim i stap long rot bilong “ol piksa,” o ol tok piksa. (Rev. 1:1) Buk Revelesen i yusim ol piksa long stori long ol birua bilong God. Em i stori long sampela wel animal. Olsem, i gat “wanpela wel animal i lusim solwara na i kam antap. Em i gat 10-pela kom na 7-pela het.” (Rev. 13:1) Na bihain i gat “narapela wel animal i kam aut long graun na i kam antap.” Dispela wel animal i toktok olsem wanpela traipela snek na em i mekim “paia i lusim skai na i kam daun long graun.” (Rev. 13:11-13) Bihain i gat narapela wel animal, em “wanpela retpela wel animal” na wanpela pamukmeri i sindaun antap long en. Dispela 3-pela wel animal i makim ol birua husat i pait long God Jehova na Kingdom bilong em inap longpela taim. Olsem na em i bikpela samting long yumi mas save long ol i makim husat.—Rev. 17:1, 3.
FOPELA TRAIPELA ANIMAL
Ol i “kam aut long solwara.” (Dan. 7:1-8, 15-17) Ol i makim ol strongpela gavman em ol i bin bosim ol manmeri bilong God na mekim sampela bikpela samting long ol kirap long taim bilong Daniel. (paragraf 4, 7)
4-5. Olsem wanem tok bilong Daniel 7:15-17 i helpim yumi long save long mining bilong ol dispela piksa?
4 Bilong yumi ken save long ol dispela birua ol i husat, yumi mas kliagut long ol dispela piksa i makim wanem samting. Wanpela gutpela rot bilong helpim yumi em long skelim ol tok Baibel i mekim. Ol narapela buk bilong Baibel i kamapim klia mining bilong planti ol piksa em Buk Revelesen i stori long en. Olsem, profet Daniel i bin driman na em i lukim “4-pela traipela animal i kam aut long solwara.” (Dan. 7:1-3) Daniel i tokim yumi long ol dispela traipela animal i makim husat. Ol i makim 4-pela “king,” o ol gavman. (Ritim Daniel 7:15-17.) Tok bilong Daniel i helpim yumi long kliagut olsem ol wel animal em Buk Revelesen i stori long en i makim ol gavman.
5 Nau yumi bai stori long sampela ol piksa em Buk Revelesen i stori long en. Taim yumi mekim olsem, yumi bai luksave long olsem wanem Baibel i helpim yumi long save long mining bilong ol dispela piksa. Yumi bai stori long ol dispela wel animal. Pastaim yumi bai stori long ol i makim husat. Bihain yumi bai stori long samting bai painim ol dispela wel animal. Na laspela samting, yumi bai stori long hau ol samting i kamap i mekim sampela samting long yumi long nau.
SAVE LONG OL BIRUA BILONG GOD OL I HUSAT
WEL ANIMAL I GAT 7-PELA HET
Em “i lusim solwara” na i kam antap na em i gat 7-pela het, 10-pela kom, na 10-pela kraun. (Rev. 13:1-4) Em i makim olgeta gavman bilong graun em ol i bin bosim ol manmeri long bipo yet na i kam inap long nau. Dispela 7-pela het i makim 7-pela strongpela gavman em ol i bin mekim sampela bikpela samting long ol manmeri bilong God. (paragraf 6-8)
6. Dispela wel animal i gat 7-pela het em Revelesen 13:1-4 i stori long en i makim wanem samting?
6 Wel animal i gat 7-pela het i makim wanem samting? (Ritim Revelesen 13:1-4.) Yumi luksave olsem dispela wel animal i olsem wanpela lepat, tasol lek bilong en i olsem wanpela bea na maus bilong en i olsem maus bilong laion, na em i gat 10-pela kom. Daniel i kolim ol wankain tok taim em i stori long 4-pela wel animal long Daniel sapta 7. Tasol Buk Revelesen i stori long wanpela wel animal tasol, na em i no stori long 4-pela narapela narapela wel animal. Dispela wel animal i no makim wanpela gavman tasol, nogat. Jon i tok em i bosim “olgeta traib na olgeta lain pipol na olgeta tokples na olgeta kantri.” Dispela i soim olsem em i gat bikpela strong moa winim wanpela gavman. (Rev. 13:7) Olsem na dispela wel animal i makim olgeta gavman bilong graun em ol i bin bosim ol manmeri long bipo yet na i kam inap long nau.b—Ekl. 8:9.
7. Wan wan bilong ol dispela 7-pela het bilong wel animal i makim wanem samting?
7 Wan wan bilong ol dispela 7-pela het i makim wanem samting? Yumi kisim save taim yumi skelim tok bilong Revelesen sapta 17 bikos em i stori long piksa bilong dispela wel animal em Revelesen sapta 13 i bin stori long en. Revelesen 17:10 i tok: “I gat 7-pela king i stap: Faivpela i pundaun pinis, na 1-pela nau i stap, na narapela i no kamap yet; tasol taim em i kamap, em i mas i stap sotpela taim tasol.” Taim yumi skelim olgeta gavman bilong graun em Satan i bin kontrolim ol, 7-pela i olsem “ol het” bikos ol i gat bikpela strong. Ol dispela strongpela gavman bilong graun i bin mekim sampela samting long ol manmeri bilong God. Long taim bilong aposel Jon, 5-pela bilong ol dispela gavman i bin mekim wok bos pinis: em Isip, Asiria, Babilon, Midia-Persia, na Grik. Namba 6 strongpela gavman, em Rom, i mekim wok bos yet long taim Jon i lukim ol visen. Wanem gavman bai stap olsem namba 7 na laspela strongpela gavman long mekim wok bos?
8. Namba 7 het bilong wel animal i makim wanem gavman?
8 Yumi bai luksave olsem ol tok profet bilong Buk Daniel bai helpim yumi long save long namba 7 het bilong wel animal i makim wanem gavman. Wanem strongpela gavman i wok long mekim wok bos long dispela taim bilong pinis, em long “de bilong Bikpela”? (Rev. 1:10) Em gavman bilong Inglan wantaim Amerika em tupela i wok bung wantaim na kamapim Gavman Inglan-Amerika. Dispela i soim klia olsem dispela 2-pela gavman ol i namba 7 het bilong wel animal em Revelesen 13:1-4 i stori long en.
WEL ANIMAL I GAT 2-PELA KOM I OLSEM BILONG PIKININI SIPSIP
Em “i kam aut long graun na i kam antap” na em i toktok “olsem wanpela traipela snek.” Em i mekim “paia i lusim skai na i kam daun long graun” na em i wokim ol mirakel olsem “giaman profet.” (Rev. 13:11-15; 16:13; 19:20) Gavman Inglan-Amerika em dispela wel animal i gat 2-pela kom, na Baibel i tok em i giaman profet bikos em i giamanim ol manmeri long graun na tokim ol long “wokim wanpela piksa” bilong “dispela wel animal” i gat 7-pela het na 10-pela kom. (paragraf 9)
9. Dispela wel animal i gat “2-pela kom i olsem bilong pikinini sipsip” i makim husat?
9 Revelesen sapta 13 i tokim yumi olsem dispela namba 7 het, em Gavman Inglan-Amerika, i wankain tu olsem wanpela wel animal i gat “2-pela kom i olsem bilong pikinini sipsip, tasol em i kirap toktok olsem wanpela traipela snek.” Dispela wel animal “i wokim ol bikpela mirakel, na long ai bilong ol manmeri em i mekim tu paia i lusim skai na i kam daun long graun.” (Rev. 13:11-15) Revelesen sapta 16 na sapta 19 i tok dispela wel animal em i “giaman profet.” (Rev. 16:13; 19:20) Daniel i mekim wankain tok olsem Gavman Inglan-Amerika bai “bringim bikpela bagarap long narakain rot tru.” (Dan. 8:19, 23, 24) Dispela samting i bin kamap tru long taim bilong Wol Woa 2. Tupela atomik bom i bin pairap na i pinisim woa long Pasifik em ol atomik bom em ol saientis bilong Inglan na Amerika i wokim. Long dispela rot, Gavman Inglan-Amerika i mekim “paia i lusim skai na i kam daun long graun.”
WANPELA RETPELA WEL ANIMAL
Wanpela pamukmeri, em Bikpela Babilon, i sindaun antap long en. Jon i tok dispela wel animal em i namba 8 king. (Rev. 17:3-6, 8, 11) Pastaim dispela pamukmeri i kontrolim dispela wel animal, tasol bihain dispela wel animal i bagarapim na pinisim em. Dispela pamukmeri i makim olgeta lotu giaman. Dispela wel animal i makim Yunaitet Nesen long nau, em i save sapotim gut tru wok bilong olgeta gavman long graun. (paragraf 10, 14-17)
10. “Piksa bilong namba 1 wel animal” i makim husat? (Revelesen 13:14, 15; 17:3, 8, 11)
10 I gat narapela wel animal. Lukluk bilong en i klostu wankain long lukluk bilong wel animal i gat 7-pela het, tasol em i no gat retpela kala. Baibel i tok em i “piksa bilong namba 1 wel animal” na “namba 8 king.”c (Ritim Revelesen 13:14, 15; 17:3, 8, 11.) Bipo dispela “king” i bin stap, bihain em i no stap, tasol bihain em i kamap gen. Dispela tok i makim stret Yunaitet Nesen, em oganaisesen i sapotim gut tru olgeta wok politik bilong ol gavman bilong graun! Pastaim ol i kolim olsem Lig ov Nesen. Em i no bin stap long taim bilong Wol Woa 2. Tasol em i kirap gen long mekim wok olsem Yunaitet Nesen nau long dispela taim.
11. (a) Ol gavman bai kirapim ol manmeri long mekim wanem? (b) Wai na yumi no gat wok long pret long ol?
11 Long rot bilong ol tok giaman ol i mekim, ol dispela wel animal o ol gavman bai kirapim ol manmeri long birua long Jehova na ol manmeri bilong em. Jon i tok i olsem ol i bungim “ol king bilong olgeta hap graun” long bikpela pait bilong Armagedon, em “bikpela de bilong God i Gat Olgeta Strong.” (Rev. 16:13, 14, 16) Tasol yumi no gat wok long pret. Jehova, em God bilong yumi i gat bikpela strong, bai mekim ol samting hariap tru long seivim olgeta manmeri husat i sapotim wok bos bilong em.—Ese. 38:21-23.
12. Wanem samting bai kamap long olgeta wel animal?
12 Wanem samting bai kamap long olgeta wel animal? Revelesen 19:20 i tok: “Ol i holimpas dispela wel animal wantaim dispela giaman profet. Em dispela giaman profet husat i bin wokim ol mirakel long ai bilong wel animal, em i mekim olsem bilong giamanim ol manmeri husat i bin kisim mak bilong wel animal na ol manmeri husat i lotuim piksa bilong en. Taim wel animal na giaman profet i stap laip yet, ol i tromoi tupela i go daun long raunwara i gat bikpela paia i lait long ston salfa.” So taim ol dispela gavman em ol i birua long God i mekim wok bos yet, God bai bagarapim na pinisim tru olgeta bilong ol.
13. Ol gavman bilong graun i putim wanem hevi long ol Kristen?
13 Dispela i mekim wanem long yumi? Yumi ol Kristen, olsem na yumi mas stap gut long God na Kingdom bilong em. (Jon 18:36) Bilong mekim olsem, yumi no ken tru sapotim wok politik bilong ol gavman bilong dispela graun. Em hatwok tru long mekim olsem bikos ol gavman i putim presa long yumi long sapotim ol long rot bilong toktok na pasin bilong yumi. Tasol ol man husat i larim dispela presa i daunim ol na ol i sapotim ol gavman, ol bai kisim mak bilong wel animal. (Rev. 13:16, 17) Ol man i kisim dispela mak, Jehova i no inap orait long ol na ol bai no inap kisim laip oltaim. (Rev. 14:9, 10; 20:4) Olsem na em i bikpela samting tru long yumi wan wan i mas wok yet long sakim pasin bilong sapotim ol samting bilong wok politik, na sakim presa ol gavman i putim bilong pulim yumi long sapotim ol!
OL BAI SEMIM NA PINISIM BIKPELA PAMUKMERI
14. Aposel Jon i kirap nogut long lukim wanem samting olsem Revelesen 17:3-5 i stori long en?
14 Aposel Jon i tok em i “kirap nogut tru” long lukim narapela samting. Em i lukim wanem samting? Em i lukim wanpela meri i sindaun antap long wanpela bilong ol dispela wel animal. (Rev. 17:1, 2, 6) Em i luk olsem wanpela “bikpela pamukmeri” na nem bilong em “Bikpela Babilon.” Em i mekim “pasin pamuk” wantaim “ol king bilong graun.”—Ritim Revelesen 17:3-5.
15-16. “Bikpela Babilon” i makim husat, na bilong wanem yumi tok olsem?
15 “Bikpela Babilon” i makim husat? Dispela meri i no makim wanpela gavman bilong graun bikos Buk Revelesen i tok em i mekim pasin pamuk wantaim ol lida bilong ol gavman bilong dispela graun. (Rev. 18:9) Em i sindaun antap long dispela wel animal na dispela i soim olsem em i traim long kontrolim ol dispela lida. Na tu, em i no makim ol bikpela wok bisnis long graun bilong Satan em ol i gat gridi pasin. Long ol narapela ves bilong Buk Revelesen, ol i kolim ol olsem “ol bisnisman bilong graun.”—Rev. 18:11, 15, 16.
16 Long Baibel, dispela tok “pamukmeri” inap makim ol lain husat i tok ol i lotuim God, tasol ol i lotuim ol arapela god o long sampela narapela rot ol i kamap pren bilong ol manmeri i stap longwe long God. (1 Sto. 5:25; Jems 4:4) Ol manmeri i stap gut long God na lotuim Em, Baibel i tok ol i olsem “wanpela klinpela yangpela meri” na ol i “stap klin.” (2 Kor. 11:2; Rev. 14:4) Babilon bilong bipo em ples tru bilong mekim lotu giaman. So yumi ken tok Bikpela Babilon i makim olgeta kain lotu giaman. Tru tumas, dispela pamukmeri i makim olgeta lotu giaman i stap long nau.—Rev. 17:5, 18; lukim atikol long Intenet long jw.org, “What Is Babylon the Great?”
17. Wanem samting bai kamap long Bikpela Babilon?
17 Wanem samting bai kamap long Bikpela Babilon? Revelesen 17:16, 17 i tok: “Dispela 10-pela kom na dispela wel animal yu bin lukim, ol bai heitim dispela pamukmeri na rausim olgeta samting bilong em na mekim em i stap skin nating. Na ol bai kaikaim mit bilong em, na ol bai kukim em olgeta long paia. Long wanem, God i givim tingting long ol long mekim samting em yet i tingting pinis long en.” Yes, Jehova bai kirapim ol gavman long yusim dispela retpela wel animal, em Yunaitet Nesen, long bagarapim na pinisim tru Bikpela Babilon.—Rev. 18:21-24.
18. Hau yumi ken soim olsem yumi no sapotim Bikpela Babilon?
18 Dispela i mekim wanem long yumi? Yumi mas wok yet long bihainim “pasin bilong mekim lotu i klin na i no gat doti long en long ai bilong God.” (Jems 1:27) Yumi no ken tru larim Bikpela Babilon i yusim ol bilip giaman bilong en, ol selebresen bilong ol haiden, pasin bilong sakim ol stretpela lo, na wok bilong ol spirit nogut long stiaim ol tingting na pasin bilong yumi! Na yumi mas wok yet long tokim ol manmeri long “lusim dispela ples na kam ausait” na bai ol i no gat asua long sin bilong em long ai bilong God.—Rev. 18:4.
KOT BAI PAINIM NAMBAWAN BIRUA BILONG GOD
TRAIPELA RETPELA SNEK
Satan i givim namba long dispela wel animal. (Rev. 12:3, 9, 13; 13:4; 20:2, 10) Satan em i nambawan birua bilong Jehova, olsem na em bai stap kalabus inap 1,000 yia. Bihain ol bai tromoi em i go daun long “raunwara i gat bikpela paia i lait long ston salfa.” (paragraf 19-20)
19. Dispela “traipela retpela snek” i makim husat?
19 Buk Revelesen i stori tu long “wanpela traipela retpela snek.” (Rev. 12:3) Dispela traipela snek i pait long Jisas na ol ensel bilong em. (Rev. 12:7-9) Em i mekim nogut long ol manmeri bilong God na em i givim namba long ol dispela wel animal, em ol gavman bilong graun. (Rev. 12:17; 13:4) Husat dispela traipela snek? “Em dispela snek bilong bipo yet, ol i kolim em Devil na Satan.” (Rev. 12:9; 20:2) Em tasol i kontrolim olgeta narapela birua bilong Jehova.
20. Wanem samting bai kamap long dispela traipela snek?
20 Wanem samting bai kamap long dispela traipela snek? Revelesen 20:1-3 i tok wanpela ensel bai tromoi Satan i go daun long hul i no gat as, i olsem em bai stap kalabus. Insait long dispela haptaim, Satan “i no ken giamanim moa olgeta lain manmeri i go inap dispela 1,000 yia i pinis.” Bihain ol bai tromoi Satan na ol dimon bilong em i go daun long “raunwara i gat bikpela paia i lait long ston salfa,” dispela i makim olsem ol bai bagarap na pinis olgeta. (Rev. 20:10) Tingim, laip bai olsem wanem taim Satan na ol dimon bilong em i no stap moa? Em bai gutpela taim tru!
21. Wai na yumi ken amamas long ol tok yumi ritim long Buk Revelesen?
21 Yumi amamas tru long kliagut long mining bilong ol dispela piksa em Buk Revelesen i stori long en! Nau yumi save long ol birua bilong Jehova ol i husat na yumi save tu long wanem samting bai kamap long ol long bihain. Tru tumas, “man i ritim ol tok bilong dispela tok profet long ol arapela, na ol man i harim dispela tok, . . . ol i ken amamas”! (Rev. 1:3) Tasol taim ol birua bilong God i bagarap na pinis, ol manmeri i stap gut long God bai kisim wanem ol blesing? Yumi bai stori long dispela samting long laspela atikol bilong 3-pela atikol i stori long Buk Revelesen.
SINGSING 23 [30] Jehova i Kirap Mekim Wok Bos
a Buk Revelesen i yusim ol piksa bilong helpim yumi long save long ol birua bilong God ol i husat. Buk Daniel i helpim yumi long kliagut long ol dispela piksa i makim wanem samting. Long dispela atikol, yumi bai skelim sampela tok profet long Buk Daniel wantaim ol wankain tok profet long Buk Revelesen. Long dispela rot, yumi bai save long ol birua bilong God ol i husat. Bihain, yumi bai stori long wanem samting bai painim ol.
b Narapela evidens i soim olsem dispela wel animal i gat 7-pela het i makim olgeta gavman bilong graun em olsem, em i gat “10-pela kom.” Planti taim long Baibel namba 10 i makim samting em inap tru o inap olgeta.
c Dispela wel animal i no olsem namba 1 wel animal, em i no gat ol “kraun” long ol kom bilong en. (Rev. 13:1) Dispela i olsem bikos “em i kamap long rot bilong dispela 7-pela king” na em i kisim namba long ol long mekim wok.—Lukim atikol long Intenet long jw.org, “What Is the Scarlet-Colored Beast of Revelation Chapter 17?”