Sapta 29

Ol i Mekim Nupela Singsing Bilong Winim Pait

Driman 9​​—⁠Kamapim Tok Hait 14⁠:​1-​20

Stori: 144,000 i stap wantaim Pikinini Sipsip long maunten Saion; ol ensel i autim toksave long ol man bilong olgeta hap; ol i katim ol kaikai bilong graun i redi pinis

Taim bilong truim: 1914 i go inap long taim bilong ‘bikpela hevi tru’

 1. Yumi kisim save pinis long wanem ol tok bilong Kamapim Tok Hait sapta 7 na sapta 12 na sapta 13? Orait nau bai yumi kisim save long wanem samting?

YUMI amamas tru long harim stori bilong narapela driman nau Jon i lukim. Long ol narapela driman bilong Jon, yumi bin kisim save long ol oganaisesen bilong snek, ol i olsem ol animal nogut. Tasol nau yumi kisim save long ol gutpela wokboi bilong Jehova na ol wok ol i mekim long de bilong Bikpela. (KTH 1⁠:10) Long Kamapim Tok Hait 7⁠:​1, 3 yumi kisim save pinis olsem ol ensel i holimpas 4-pela win i go inap long taim olgeta wokman em God i makim ol, em 144,000, ol i kisim pinis mak. Kamapim Tok Hait 12⁠:17 i tokaut pinis olsem dispela snek, em Satan, em i laik bagarapim ol “arapela pikinini bilong [meri]” em ol i stap yet long graun. Na yumi stori pinis long tok piksa bilong Kamapim Tok Hait sapta 13 i stori long ol oganaisesen politik em Satan i kamapim long graun bilong mekim nogut long ol gutpela wokboi bilong Jehova. Tasol dispela nambawan birua i no inap pasim laik bilong Jehova! Orait nau bai yumi kisim save olsem Jehova i bungim lain 144,000 olgeta na i no gat wanpela i lus, maski Satan i strong long bagarapim ol.

 2. Wanem gutpela piksa bilong amamas em Jon i tokim yumi long en long Kamapim Tok Hait 14⁠:1? Pikinini Sipsip em i husat?

² Jon na dispela lain bilong nau em Jon i piksa bilong ol, Jehova i soim ol long dispela samting i kamap, em samting bilong amamas tru. Jon i tok: “Mi lukluk gen, na mi lukim Pikinini Sipsip i sanap long maunten Saion, na 144,000 manmeri i sanap wantaim em. Nem bilong Pikinini Sipsip na nem bilong Papa bilong en, dispela nem God i bin raitim long pes bilong ol.” (KTH 14⁠:⁠1) Olsem yumi stori pinis, Pikinini Sipsip em dispela Maikel em i bin rausim Satan wantaim ol ensel nogut long heven. Na em dispela Maikel yet “i save lukautim . . . ol Israel [em lain bilong God],” olsem Daniel i tok, na nau em i redi long sanap na mekim wok bilong givim strafe long ol man olsem stretpela kot bilong Jehova i makim. (Daniel 12⁠:1; KTH 12⁠:​7, 9) Kirap long 1914, dispela Pikinini Sipsip bilong God em i bin givim skin bilong em olsem ofa, em i sanap long maunten Saion na em i kamap King.

 3. Wanem dispela “maunten Saion” Pikinini Sipsip na 144,000 i sanap i stap long en?

³ Dispela samting i kamap stret olsem Jehova i bin tok profet long en, em i tok: “Mi makim pinis dispela man bilong i stap king. Mi yet mi putim em i stap long Saion, dispela maunten bilong mi yet.” (Song 2⁠:6; 110⁠:⁠2) Long nau dispela maunten Saion em i no makim maunten em Jerusalem bilong graun i stap long en na ol king long lain bilong Devit i bin sindaun long en. Nogat. (1 Stori 11⁠:​4-7; 2 Stori 5⁠:⁠2) Long wanem, taim Jisas i dai na kirap bek long yia 33, Jehova i putim em olsem nambawan ston bilong strongim haus long maunten Saion bilong heven, em dispela hap Jehova i laik putim Jerusalem bilong heven long en, em “biktaun bilong God bilong i stap oltaim.” Olsem na dispela “maunten Saion” nau yumi stori long en, em i makim bikpela namba bilong Jisas wantaim ol wanlain bilong em, em ol i olsem Jerusalem i stap long heven, olsem Kingdom. (Hibru 12⁠:​22, 28; Efesus 3⁠:⁠6) Jehova i givim bikpela namba bilong king long ol long de bilong Bikpela. Inap planti planti handet yia pinis, ol Kristen em God i bin makim ol, em “ol ston i gat laip,” ol i wet long sanap long dispela maunten Saion bilong heven na bung wantaim Bikpela Krais Jisas, em i stap King long Kingdom bilong em.​—⁠1 Pita 2⁠:​4-6; Luk 22⁠:​28-​30; Jon 14⁠:​2, 3.

 4. Olsem wanem na Jon i lukim olgeta 144,000 ol i sanap i stap long maunten Saion?

⁴ Long dispela driman Jon i no lukim Jisas tasol​—⁠em i lukim olgeta 144,000 wanlain bilong em bilong dispela Kingdom bilong heven ol i sanap long maunten Saion. Long hap taim dispela driman i makim, planti bilong dispela lain 144,000 ol i stap pinis long heven, tasol i no olgeta. Long dispela driman yet, Jon i kisim save olsem sampela bilong dispela lain ol i mas wok yet long karim hevi na sanap strong i go inap long ol i dai. (KTH 14⁠:​12, 13) Olsem na yumi save, sampela bilong 144,000 ol i stap yet long graun. Orait, olsem wanem na Jon i lukim 144,000 olgeta ol i sanap wantaim Jisas long maunten Saion?a Em olsem: Ol i insait long lain Kristen em God i bin makim ol long spirit holi, olsem na nau ol i “kamap pinis long maunten Saion, na long biktaun bilong God bilong i stap oltaim, em taun Jerusalem i stap long heven.” (Hibru 12⁠:22) Ol i kain olsem Pol taim em i stap yet long graun​—⁠i olsem ol i kirap bek pinis na ol i stap laip wantaim Krais Jisas long heven. (Efesus 2⁠:​5, 6) Na long 1919 ol i bihainim singaut i tok, ‘Yupela kam antap long hia,’ olsem na long tok piksa i olsem ol i “go insait long klaut na i go antap long heven.” (KTH 11⁠:12) Olsem na taim yumi skelim ol dispela tok bilong Baibel yumi save, maski sampela bilong lain 144,000 ol i stap yet long graun, i olsem olgeta i sanap pinis wantaim Jisas long maunten Saion.

 5. Nem bilong husat i stap long pes bilong 144,000? Dispela tupela nem i stap long pes bilong ol i makim wanem samting?

⁵ Dispela lain 144,000 ol i no save lotuim wel animal olsem ol narapela man i mekim, em ol i gat mak olsem 666. (KTH 13⁠:​15-​18) Dispela lain i stap gut long God ol i gat nem bilong God na nem bilong Pikinini Sipsip i stap long pes bilong ol. Jon em i wanpela Juda, olsem na taim em i lukim nem bilong God long pes bilong ol, ating em i lukim long rait Hibru, olsem יהוה.b Long tok piksa, dispela lain 144,000 ol i gat nem bilong Papa bilong Jisas i stap long pes bilong ol, na dispela i makim olsem ol i save tokaut long olgeta man olsem ol i witnes bilong Jehova, na ol i wokboi bilong Em. (KTH 3⁠:12) Na nem bilong Jisas tu i stap long pes bilong ol, na dispela i makim olsem ol i tokaut long em i baim ol pinis na ol i bilong em. Em i “man” bilong ol, na ol i “meri” bilong em; ol i olsem “nupela” manmeri ol i mekim wok bilong God na ol i gat tingting long kisim laip i stap long heven. (Efesus 5⁠:​22-​24; KTH 21⁠:​2, 9; 2 Korin 5⁠:17) Ol i pas gut tru wantaim Jehova na Krais Jisas, na dispela i bosim olgeta tingting bilong ol na olgeta samting ol i mekim.

Ol i Mekim Nupela Singsing

 6. Jon i harim wanem singsing i kamap? Em i tok, dispela singsing i olsem pairap bilong wanem samting?

⁶ Nau Jon i tokaut long gutpela samting em i harim. Em i tok: “Na mi harim gutpela nois i kam long heven, em i olsem nois bilong bikpela wara i pairap, na olsem bikpela nois bilong klaut i pairap. Mi harim dispela nois em i olsem musik. Em i olsem ol man i paitim gita na musik i kamap. Ol dispela manmeri i sanap long pes bilong sia king bilong God na long ai bilong ol 4-pela samting i stap laip na long ai bilong ol hetman, na ol i singim wanpela nupela song. Dispela 144,000 manmeri God i bin baim bek ol namel long olgeta manmeri bilong graun, ol tasol inap long kisim save long dispela song.” (KTH 14⁠:​2, 3) Olsem na taim Jon i harim nek bilong ol dispela 144,000 ol i mekim dispela gutpela singsing wantaim, em i tingim bikpela pairap bilong ol wara i kalap i go daun long maunten na ol klaut i pairap. Na taim ol i paitim samting olsem gita, gutpela musik tru i kamap! (Song 81⁠:⁠2) I no gat wanpela lain bilong singsing long dispela graun ol inap mekim gutpela singsing olsem dispela lain 144,000 ol i mekim.

 7. (a) Wanem dispela nupela singsing em Kamapim Tok Hait 14⁠:3 i kolim? (b) Olsem wanem na dispela singsing bilong Song 149⁠:1 em i nupela singsing long taim bilong yumi?

⁷ Wanem dispela “nupela song”? Olsem yumi bin lukim taim yumi stori long Kamapim Tok Hait 5⁠:​9, 10, em i wanpela singsing bilong ol samting Jehova i laik mekim long rot bilong Kingdom, na gutpela samting Jehova i mekim long rot bilong Jisas, olsem em i laik mekim lain Israel bilong spirit i kamap “lain pris bilong God bilong mipela. Na bai ol i stap king.” Em i singsing bilong litimapim nem bilong Jehova na tokaut long ol nupela samting em i mekim long rot bilong ol Israel bilong God na bilong helpim ol. (Galesia 6⁠:16) Lain Israel bilong spirit ol i bihainim singaut bilong wanpela man bilong raitim Song, em i tok: “Litimapim nem bilong Bikpela [Ja]! Singim nupela song long em. Yupela . . . litimapim nem bilong em long taim yupela i bung bilong lotu. . . . Yupela ol manmeri bilong Saion, amamas long king bilong yupela.” (Song 149⁠:​1, 2) Tru em i bin raitim dispela tok long Baibel inap planti handet handet yia bipo, tasol long nau ol inap mekim gut dispela singsing, long wanem ol i kisim nupela save long ol tok bilong en. Long 1914 Kingdom bilong God i kamap nupela. (KTH 12⁠:10) Long 1919 lain bilong Jehova long graun ol i kirap gen long autim strong ‘tok bilong kingdom.’ (Matyu 13⁠:19) Wanpela tok bilong Baibel ol i makim bilong yia 1919 (Aisaia 54⁠:17) i kirapim ol na strongim bel bilong ol na ol i kamap strong gen long ol samting bilong spirit. Olsem na long 1919 ol i kirap long ‘mekim singsing long Jehova, long maus na long bel bilong ol.’​—⁠Efesus 5⁠:⁠19.

 8. Olsem wanem na dispela 144,000 tasol ol inap lainim dispela nupela singsing em Kamapim Tok Hait 14⁠:3 i kolim?

⁸ Olsem wanem na lain 144,000 tasol ol inap lainim dispela nupela singsing i stap long Kamapim Tok Hait 14⁠:3? Em olsem: Jehova i makim dispela lain tasol bilong i stap king long Kingdom, na ol i singsing long ol samting bilong dispela. God i kisim dispela lain tasol na ol i kamap pikinini bilong em na em i kapsaitim spirit holi long ol. Em dispela lain tasol God i bin baim ol namel long ol manmeri bilong graun bambai ol i ken i stap insait long dispela Kingdom bilong heven; ol tasol bai stap “pris” na “king” wantaim Krais Jisas inap wan tausen yia, bilong helpim ol manmeri long graun bambai ol i ken kamap gutpela olgeta. Jon i lukim dispela lain tasol ol i “singim wanpela nupela song” long pes bilong Jehova stret.c Ol dispela nupela samting i painim ol, na ol nupela samting ol i wetim, dispela i mekim na ol i pilim tru ol samting bilong Kingdom na ol i givim bel long en, olsem na ol inap mekim gut dispela singsing, na i no gat narapela lain inap mekim gut olsem.​​—⁠⁠KTH 20⁠:6; Kolosi 1⁠:13; 1 Tesalonaika 2⁠:​11, 12.

 9. Taim bikpela lain manmeri i harim singsing bilong liklik lain God i bin makim, ol i mekim wanem? Taim bikpela lain i mekim olsem, ol i truim wanem tok bilong Baibel?

⁹ Tasol i gat narapela lain ol i harim dispela singsing na ol i givim bel long en. Kirap long 1935, ol arapela sipsip, em ol i wok long kamap bikpela lain tru, ol i harim dispela singsing bilong winim pait na dispela i kirapim ol na ol i kam bung wantaim lain bilong mekim dispela singsing, na ol i wok wantaim ol long autim tok bilong Kingdom. (Jon 10⁠:16; KTH 7⁠:⁠9) Tru, ol dispela nupela manmeri ol i no inap lain long mekim dispela nupela singsing wankain stret olsem dispela lain ol bai i stap king long Kingdom. Tasol ol tu i mekim gutpela singsing bilong litimapim nem bilong Jehova​—⁠em wanpela singsing lotu bilong givim biknem long Jehova long ol nupela nupela samting em i mekim. Olsem na ol i truim wanpela tok bilong Baibel long Song i tok: “Yupela i mas singim nupela song long Bikpela [Jehova]. Yupela olgeta manmeri bilong graun i mas singim song long Bikpela [Jehova]. . . . Em i bin kisim bek yumi. Long olgeta de yumi mas autim tok long dispela long ol manmeri. Yupela tokaut long biknem bilong em long ol lain manmeri. Tokim olgeta manmeri long ol gutpela bikpela wok em i bin mekim. . . . Yupela i mas tokim olgeta lain manmeri olsem: ‘Bikpela [Jehova] i stap king.’ ”​—⁠Song 96⁠:​1-3, 7, 10; 98⁠:​1-9.

10. Olsem wanem ol 144,000 ol inap mekim singsing long “ai” bilong 24 hetman?

¹⁰ Tasol Baibel i tok, ol 144,000 i mekim dispela singsing long “ai” bilong ol hetman. Orait olsem wanem ol inap mekim olsem sapos dispela 24 hetman i makim ol dispela 144,000 yet, em ol i stap king long heven? Bihain liklik long taim de bilong Bikpela i kirap, “ol man i bilip long Jisas na i dai pinis” ol i kirap bek na i kamap spirit. Olsem na ol Kristen em God i bin makim ol na ol i stap gut long em i go inap long taim ol i dai, nau ol i stap pinis long heven na ol i mekim wok pris kain olsem 24 lain hetman bilong Israel. Ol i insait long driman Jon i lukim, em piksa bilong oganaisesen bilong Jehova long heven. (1 Tesalonaika 4⁠:​15, 16; 1 Stori 24⁠:​1-​18; KTH 4⁠:4; 6⁠:11) Olsem na dispela hap lain bilong 144,000 ol i stap yet long graun ol i mekim dispela nupela singsing long ai bilong ol brata bilong ol, em ol i kirap bek pinis na i stap long heven.

11. Ol manmeri God i makim ol long spirit holi na ol i dai pinis na i kirap bek, bilong wanem Baibel i kolim ol olsem 24 hetman na i kolim ol tu olsem lain 144,000?

¹¹ Orait, ol dispela manmeri bilong 144,000 ol i kirap bek na i go long heven, olsem wanem na Baibel i tok piksa na i kolim ol olsem 24 hetman na i kolim ol tu olsem 144,000? Long wanem, Kamapim Tok Hait i stori long tupela samting bilong dispela wanpela lain, olsem: Long ol driman Jon i lukim, em i lukim 24 hetman ol i stap king na pris pinis long heven na ol i sindaun long ol sia i raunim sia king bilong Jehova. Ol i olsem piksa na i makim olgeta 144,000 wantaim ol i bilong i stap king na pris long heven, maski liklik hap lain bilong ol i stap yet long graun. (KTH 4⁠:​4, 10; 5⁠:​5-​14; 7⁠:​11-​13; 11⁠:​16-​18) Tasol taim Kamapim Tok Hait sapta 7 i stori long 144,000, em i stori long God i bin kisim ol namel long ol manmeri bilong graun, na i stori tu long Jehova i laik putim mak long olgeta wan wan bilong lain Israel bilong spirit, na em i laik kisim bek wanpela bikpela lain manmeri i no inap man i kaunim namba bilong ol. Na long Kamapim Tok Hait sapta 14 i gat wanpela piksa i makim klia olsem lain bilong Kingdom, em olgeta wan wan bilong 144,000 ol i stap gut long Jehova, bai ol i sanap wantaim Pikinini Sipsip long maunten Saion. Na dispela hap bilong Baibel i kolim tu ol mak ol i mas winim bambai ol i ken insait long dispela lain 144,000. Nau bai yumi stori long dispela samting.d

Ol Man i Bihainim Pikinini Sipsip

12. (a) Jon i mekim wanem stori moa long 144,000? (b) Wanem insait bilong dispela tok olsem 144,000 ol i stap klin tru na ol i no bin slip wantaim meri?

¹² Jon i stori moa long lain 144,000 em God i bin “baim bek ol namel long olgeta manmeri bilong graun,” na Jon i tok: “Dispela ol man ol i no bin slip wantaim ol meri na kamap doti. Nogat. Ol i stap klin tru. Olgeta ples Pikinini Sipsip i laik i go long en, orait ol dispela man i save bihainim em i go. God i bin baim bek ol dispela lain namel long olgeta manmeri bilong graun, na ol i stap olsem namba wan lain God i kisim bek, bai ol i stap ol lain bilong em yet na bilong Pikinini Sipsip. Ol i no bin mekim tok giaman. Nogat. Ol i no gat asua long wanpela samting.” (KTH 14⁠:​4, 5) Dispela tok olsem 144,000 ol i “no bin slip wantaim ol meri” i no makim olsem ol manmeri bilong dispela lain ol i no bin marit taim ol i stap long graun. Nogat. Aposel Pol i bin tokim ol Kristen em ol i bilong i go long heven, sapos Kristen i stap singel, em gutpela, tasol sampela, i gutpela sapos ol i marit. (1 Korin 7⁠:​1, 2, 36, 37) Tasol dispela lain ol i stap klin long ol samting bilong spirit. Ol i no bin mekim pasin pamuk bilong spirit wantaim ol lain politik bilong graun na ol lotu giaman. (Jems 4⁠:4; KTH 17⁠:⁠5) Ol i bilong kamap meri bilong Krais, olsem na ol i stap stret tru na “i no gat asua . . . namel long ol lain manmeri . . . em ol i bin lusim stretpela pasin na mekim planti rong.”​—⁠Filipai 2⁠:⁠15.

13. Bilong wanem i stret tru long dispela 144,000 ol i kamap meri bilong Krais Jisas? Ol i mekim wanem na i olsem ‘long olgeta ples Pikinini Sipsip i laik i go long en, ol i bihainim em i go’?

¹³ Ol i bihainim pasin bilong King bilong ol, em Krais Jisas, na “ol i no bin mekim tok giaman.” Taim Jisas i stap man long graun, em i gutpela olgeta, na “em i no bin mekim sin, na tu em i no bin mekim wanpela tok giaman.” (1 Pita 2:​21, 22) Lain 144,000 ol i no gat asua long wanpela samting na ol i save tok tru oltaim, na dispela i redim ol long kamap meri bilong bikpela Hetpris bilong Jehova. Taim Jisas i stap long graun, em i singautim ol man i gat stretpela bel long ol i ken bihainim em. (Mak 8⁠:34; 10⁠:21; Jon 1⁠:43) Ol man i givim bel long tok bilong em, ol i bihainim wokabaut bilong em na ol i bihainim ol tok bilong em. Olsem na taim ol i stap long graun, “olgeta ples Pikinini Sipsip i laik i go long en, orait ol dispela man i save bihainim em i go,” na em i soim rot long ol taim ol i wokabaut namel long ol manmeri em Satan i bosim ol.

14. (a) Olsem wanem na 144,000 ol i olsem “namba wan lain God i kisim bek, bai ol i stap ol lain bilong em yet na bilong Pikinini Sipsip”? (b) Olsem wanem yumi ken tok, bikpela lain tu i olsem namba wan lain God i kisim bek?

¹⁴ Dispela lain 144,000 em God “i bin baim bek ol namel long olgeta manmeri bilong graun.” Ol i kamap pikinini bilong God, na taim ol i kirap bek pinis long matmat, bai ol i no i stap moa olsem ol man i gat skin bilong graun. Nogat. Olsem KTH 14 ves 4 i tok, ol i kamap “namba wan lain God i kisim bek, bai ol i stap ol lain bilong em yet na bilong Pikinini Sipsip.” Tru, Jisas em i “kirap paslain long ol arapela man i dai pinis, olsem namba wan kaikai i redi long gaden.” (1 Korin 15⁠:​20, 23) Tasol dispela lain 144,000 ol tu i olsem “namba wan kaikai i redi long gaden” olsem “namba wan lain bilong olgeta manmeri” em ol i gat sin, na God i bin baim bek ol long blut bilong Jisas. (Jems 1⁠:18) Tasol God i no bungim dispela lain tasol. Yumi stori pinis long tok bilong Kamapim Tok Hait i tok long God i wok long bungim wanpela bikpela lain tru, i no gat man inap kaunim namba bilong ol. Ol dispela “planti manmeri tru” ol i singaut strong olsem: “God bilong yumi em i save sindaun long sia king bilong en, na Pikinini Sipsip, tupela tasol i save kisim bek yumi.” Dispela bikpela lain bai abrusim bagarap long taim bilong bikpela hevi tru, na bai ol i dring long “ol hul i gat wara i kamap, em wara bilong givim laip.” Taim ol i mekim olsem, isi isi bai ol i wok long kamap gutpela olgeta, na bai ol i stap man na meri bilong graun i gutpela olgeta. Taim ‘bikpela hevi tru’ i pinis na nupela taim i stap, planti milion manmeri i stap long matmat bai ol i kirap bek, na bai ol tu i gat rot bilong kisim dispela wara bilong givim laip. I stret yumi ken kolim dispela bikpela lain manmeri olsem “namba wan kaikai i redi long gaden” olsem namba wan lain bilong ol arapela sipsip​—⁠long wanem ol i namba wan lain i bin “wasim ol klos bilong ol long blut bilong Pikinini Sipsip, na ol klos i kamap waitpela,” na ol i gat tingting long i stap oltaim oltaim long graun.​—⁠KTH 7⁠:​9, 10, 14, 17; 20⁠:​12, 13.

15. Long Lo Bilong Moses i gat 3-pela bikpela de bilong lotu, na wanem ol samting bilong ol i olsem piksa bilong 3-pela “namba wan kaikai i redi long gaden”?

¹⁵ Long Lo Bilong Moses bipo ol Israel i gat sampela bikpela de bilong lotu, na sampela samting bilong ol dispela bung i olsem piksa bilong dispela 3-pela “namba wan kaikai i redi long gaden” (em Krais Jisas, na 144,000, na bikpela lain). Long Nisan 16, long Bikpela De Bilong Bret I No Gat Yis, ol Israel i mas kisim namba wan mekpas bali (olsem wit) bilong gaden na givim olsem ofa long Jehova. (Wok Pris 23⁠:​6-​14) Long Nisan 16 Jisas i bin kirap bek long matmat. Orait long namba 50 de bihain long Nisan 16, long namba 3 mun, ol Israel i mekim bung bilong bikpela de bilong kisim ol namba wan wit i redi long gaden. (Kisim Bek 23⁠:16; Wok Pris 23⁠:​15, 16) Bihain ol i kolim dispela bikpela de olsem Pentikos, na long de Pentikos long yia 33 God i kapsaitim spirit holi long namba wan hap bilong lain 144,000. Orait, long namba 7 mun, taim ol i bungim pinis olgeta kaikai bilong gaden, ol i mekim bung bilong Ol Bikpela De Bilong I Stap Long Haus Win. Inap wanpela wik ol Israel i mas i stap long ol liklik haus win ol i wokim long han bilong diwai pam samting. Em i taim bilong amamas na tok tenkyu long Jehova. (Wok Pris 23⁠:​33-​43) Dispela i olsem piksa bilong bikpela lain manmeri bilong nau em Jehova i wok long bungim ol na ol i amamas na tok tenkyu long Jehova, na ol i sanap long pes bilong sia king bilong em, na “ol i holim ol lip bilong diwai pam.”​—⁠KTH 7⁠:⁠9.

Autim Gutnius Bilong i Stap Oltaim

16, 17. (a) Jon i lukim wanpela ensel i flai i go we? Ensel i autim wanem tok? (b) Husat ol i insait long dispela wok bilong autim tok bilong Kingdom? Wanem samting i save kamap na yumi inap save long dispela?

¹⁶ Nau Jon i tok: “Mi lukim narapela ensel i flai i go namel long skai. Em i gat gutnius bilong i stap oltaim oltaim, na em i gat wok bilong autim dispela gutnius long . . . ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin. Em i singaut strong olsem, ‘Taim i kamap pinis bilong God i skelim pasin bilong olgeta man long kot. Olsem na yupela i mas pret long em na litimapim nem bilong em. Yupela i mas lotu long God, em i bin wokim heven na graun na solwara na olgeta hul wara.’ ” (KTH 14⁠:​6, 7) Dispela ensel i flai “namel long skai,” em ples ol pisin i save flai long en. (Lukim Kamapim Tok Hait 19⁠:17.) Olsem na ol man i stap long olgeta hap bilong graun ol inap harim nek bilong dispela ensel. I no gat wanpela tok bilong televisen inap i go long ol manmeri bilong olgeta hap graun olsem tok dispela ensel i autim!

¹⁷ Em i tokim olgeta man long ol i no ken pret long wel animal na piksa bilong en​—⁠ol i mas pret long Jehova tasol, long wanem em i gat bikpela strong moa, winim tru ol dispela wel animal em Baibel i tok piksa long ol na Satan i bosim ol. Jehova yet i bin wokim heven na graun, na nau taim i kamap pinis bilong em i mas skelim olgeta man long kot! (Lukim Stat 1⁠:1; Kamapim Tok Hait 11⁠:18.) Taim Jisas i stap long graun em i bin mekim wanpela tok profet long taim bilong yumi, olsem: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24⁠:14) Liklik lain Kristen em God i bin makim ol, ol i mekim dispela wok em Jisas i bin tok profet long en. (1 Korin 9⁠:16; Efesus 6⁠:15) Dispela tok bilong Kamapim Tok Hait 14⁠:​6, 7 i kamapim long ples klia olsem ol ensel tu i insait long dispela wok bilong autim tok. Planti taim wok bilong ol dispela ensel i kamap ples klia, olsem ol i bin bringim wanpela Witnes Bilong Jehova long haus i gat wanpela man o meri i bel hevi i stap, na em i gat bikpela laik tru long wanpela man i ken i kam helpim em long ol tok bilong Baibel, na em i wok long beten long dispela samting!

18. Olsem dispela ensel i flai i go namel long skai i tokaut long en, wanem taim i kamap pinis? Husat moa ol bai mekim toksave?

¹⁸ Olsem dispela ensel i flai i go namel long skai em i tokaut long en, nau taim i kamap pinis bilong God i skelim olgeta man long kot. Orait taim em i skelim ol pinis, em bai kamapim wanem tok bilong kot? Bai yumi kirap nogut tru long ol toksave em namba 2 na namba 3 na namba 4 na namba 5 ensel bai mekim.​—⁠Jeremaia 19⁠:⁠3.

[Ol Futnot]

[Ol Piksa long pes 202, 203]

144,000

24 hetman

Em lain bilong mekim wok king wantaim Pikinini Sipsip, em Krais Jisas, tasol yumi ken tingim ol long tupela kain pasin