Oganaisesen Bilong Jehova i Helpim Wok Bilong Yu Long Autim Tok
“Mi lukim narapela ensel i flai i go namel long skai. Em i gat gutnius bilong i stap oltaim oltaim, na em i gat wok bilong autim dispela gutnius long ol manmeri.”—KTH 14:6.
1. Wanem ol traim i bin painim ol Witnes Bilong Jehova? Olsem wanem na ol i stap yet?
BILONG WANEM em i bikpela samting tru long luksave long wok bilong oganaisesen bilong Jehova long heven long helpim wok Kristen bilong autim tok? Orait, yu ting ol Witnes Bilong Jehova ol inap mekim wok bilong autim gutnius long olgeta hap bilong dispela graun i save birua long ol sapos bikpela lain ensel bilong Jehova long heven i no helpim ol? Ol Witnes i bin mekim dispela wok bilong autim tok insait long wan handet yia i gat kain kain samting i bin kamap long en, olsem ol lain i strong tumas long litimapim kantri bilong ol yet, na sampela lain politik i kamap na i mekim hatpela pasin tru long ol man, na ol bikpela pait bilong olgeta hap i bin kamap, na kain kain bikpela hevi moa. Sapos Jehova i no bin helpim ol Witnes, yu ting ol inap sanap strong na winim ol hevi ol man i putim long ol, olsem olgeta lain i tingting nogut long ol na i strong long daunim ol, na planti taim ol i mekim nogut tru long ol? Nogat, a?—Song 34:7.
Ol i Sanap Strong Maski Olgeta Lain i Birua Long Ol
2. Wanem samting bilong ol Kristen tru long taim bilong ol aposel i wankain long ol Kristen tru bilong nau?
2 Nau long taim bilong yumi, ol birua, em ol lain bilong lotu na politik wantaim, ol i bin mekim kain kain samting long rot bilong lo na long ol narapela rot tu, bambai ol i ken pasim o daunim wok bilong Jehova. Ol i bin mekim kain kain samting long ol brata sista Kristen, olsem mekim nogut long ol, na sutim kain kain tok giaman long ol, na raitim tok long ol nius samting na bai ol man i no ken laikim ol, na bagarapim nem bilong ol, na kilim i dai planti—na planti taim ol pris pasto bilong Bikpela Babilon ol i bin kirapim ol man long mekim olsem. Wanpela tok ol i bin mekim long ol Kristen bilong pastaim i stret tu long ol Kristen bilong nau, olsem: “Long olgeta ples, ol manmeri i save mekim tok nogut long dispela nupela lain i bin kamap namel long yumi.” Ol pris bilong lotu Juda long taim bilong Krais ol i bin wok strong tru long painim rot bilong pasim wok bilong em long autim tok, na olsem tasol ol pris pasto bilong nau na ol man i bin lusim bilip na givim baksait long Jehova ol i wok wantaim ol pren bilong ol, em ol lain politik, long pasim dispela bikpela wok bilong lain bilong Jehova long autim tok na skulim ol man.—Aposel 28:22; Matyu 26:59, 65-67.
3. Henryka Żur i bin holimpas bilip na dispela inap lainim yumi long wanem samting?
3 Yumi ken tingim samting i bin kamap long Polan long Mas 1, 1946. Henryka Żur, em wanpela yangpela meri bilong ples Kelm i gat 15 krismas, em i go wantaim narapela Witnes, em wanpela brata, bilong lukim sampela man bilong wanpela ples klostu, em ol i gat laik long harim tok bilong Baibel. Sampela man bilong wanpela lain ami bilong ol Katolik ol i kolim Narodowe Siły Zbrojne (Lain Ami Bilong Kantri) ol i holim tupela. Ol i paitim nogut tru dispela brata, tasol em i ranawe na ol i no inap kilim em i dai. Tasol Henryka i no olsem. Ol i mekim nogut tru long em na givim bikpela pen moa yet long em inap planti aua bambai ol i ken subim em long mekim mak bilong kruse, em mak bilong ol Katolik. Wanpela man bilong givim pen long em i tokim em: “Long bel yu ken bilip long wanem samting yu laik bilip long en, tasol mipela i laik bai yu mekim mak bilong kruse, em mak bilong ol Katolik. Sapos nogat, wanpela katres i wetim yu!” Yu ting yangpela meri hia i surik na lusim bilip? Nogat. Olsem na ol dispela lain nogut bilong lotu ol i holim em na pulim em i go insait long bus na ol i sutim em long gan. Tasol em i winim dispela pait! Ol i no inap kirapim em long lusim bilip bilong em.a—Rom 8:35-39.
4. Sampela lain bilong politik na lotu ol i bin mekim wanem na ol i laik pasim wok bilong autim tok bilong Kingdom?
4 Winim wan handet yia pinis, ol man i bin mekim hatpela pasin long ol wokboi bilong Jehova na daunim ol. Ol Witnes bilong Jehova i no insait long ol bikpela lotu bilong Satan, na ol i no laik mekim olsem tu, olsem na ol lain bilong graun i lukim ol i olsem abus bilong ol man i laik sutim ol tok giaman long ol na ol lain i strong tumas long lotu na i laik birua long ol. Ol lain politik i bin birua nogut long ol, na sampela i bin kilim ol i dai, long wanem, ol i strong long holimpas bilip bilong ol. Na ol lain politik ol i kolim demokratik, sampela taim ol tu i bin wok strong long pasim wok bilong ol long autim gutnius long ol man. Bipo long 1917, long Kanada na Yunaitet Stets, ol pris pasto i kirapim ol man long sutim tok giaman long ol Sumatin Bilong Baibel, em nem bilong ol Witnes Bilong Jehova bipo, olsem ol i laik daunim gavman. Gavman i kalabusim ol man i lukautim wok bilong Sosaiti Was Taua, tasol bihain kot i tok ol i no bin mekim rong.—KTH 11:7-9; 12:17.
5 Satan i bin traim kain kain rot bilong pasim wok bilong ol brata bilong Krais na ol poroman bilong ol long autim tok. Tasol planti stori bilong ol samting i bin kamap i soim yumi olsem maski ol man i bin tok long kilim ol i dai, o ol i laik pretim ol, o ol i paitim ol, o putim ol long kalabus o long ol banis kalabus nogut, o kilim ol i dai, ol dispela samting i no bin pasim wok bilong ol Witnes Bilong Jehova. Long bipo tu i wankain. Tok bilong Elisa i bin strongim bel bilong planti wokboi bilong God, olsem: “Maski pret. I tru ol i gat planti soldia, tasol yumi gat bikpela lain moa bilong helpim yumi.” Wanpela as i olsem: Ol gutpela ensel i bikpela lain moa, winim lain bilong Satan!—2 King 6:16; Aposel 5:27-32, 41, 42.
Jehova i Blesim Wok Bilong Ol
6, 7. (a) Bipo ol i bin mekim wanem ol samting bilong autim gutnius? (b) Wanem senis i kamap long 1943 na i helpim wok bilong autim tok?
6 Nau long taim bilong yumi, ol Witnes Bilong Jehova i bin mekim wok long planti nupela masin samting ol man i bin kamapim bambai ol i ken hariapim dispela bikpela wok bilong autim tok paslain long las de na mekim dispela wok i go bikpela. Bipo long 1914, Pasto Russell, em namba wan presiden bilong Sosaiti Was Taua, em i kirapim pasin bilong mekim wok long ol piksa slait na piksa wokabaut na i gat ol tok bilong en i stap long pikap na i kamap wantaim piksa. Dispela piksa, nem bilong en “Photo-Drama of Creation,” em inap olsem 8-pela aua, na em i kamapim ol tok na stori bilong Baibel. Long dispela taim bipo, ol manmeri i lukim dispela piksa long planti kantri na ol i kirap nogut long en. Bihain, namel long yia 1930 samting i go inap 1949, ol Witnes i mekim bikpela wok long autim tok long ol haus long rot bilong ol pikap i gat ol tok bilong Baibel em J. F. Rutherford i mekim, em namba tu presiden bilong Sosaiti.
7 Long 1943, Nathan H. Knorr, em namba 3 presiden bilong Sosaiti, em i kirapim wanpela skul long olgeta wan wan kongrigesen. Long dispela skul, ol Witnes i lain long go long ol haus na autim tok na skulim ol man, na ol i no ken mekim wok long pikap. Bihain long dispela taim, Sosaiti i kirapim sampela skul moa bilong lainim ol misineri, ol painia oltaim, ol elda bilong kongrigesen, na ol man i gat wok long lukautim ol brens bilong Sosaiti Was Taua. Orait wanem samting i kamap long dispela wok?
8. Long 1943, olsem wanem ol Witnes i kamapim klia olsem ol i gat strongpela bilip?
8 Long 1943, taim Namba Tu Pait i stap yet, i gat 129,000 Witnes tasol i autim tok long 54 kantri. Tasol ol i bilip na tingting strong olsem tok bilong Matyu 24:14 bai kamap tru olgeta paslain long las de. Ol i bilip tru olsem Jehova bai kirapim lain bilong em long givim bikpela tok lukaut long olgeta lain pastaim na bihain ol samting bai kamap bilong pinisim dispela pasin nogut i stap long graun. (Matyu 24:21; KTH 16:16; 19:11-16, 19-21; 20:1-3) Olsem wanem? Ol gutpela samting i kamap long wok bilong ol?
9. Wanem ol samting i bin kamap na yumi save, wok bilong autim tok i kamap gutpela?
9 Nau long dispela taim long 13 kantri, i gat olsem 100,000 Witnes i autim tok long olgeta wan wan bilong ol dispela kantri. Long sampela bilong ol dispela kantri, Misin Katolik i bosim lotu bilong ol man. Tasol lukim samting i kamap long sampela kantri olsem: Long Brasil i gat olsem 450,000 manmeri i autim gutnius, na long 1997, winim 1,200,000 ol i kam long bung bilong tingim indai bilong Krais, olsem Memorial. Meksiko i gat klostu olsem 500,000 Witnes, na winim 1,600,000 ol i kam long Memorial. Sampela kantri Katolik moa em Itali (i gat olsem 225,000 Witnes), Frans (olsem 125,000), Spen (winim 105,000), Ajentina (winim 115,000). Long Yunaitet Stets, ol bikpela lotu em lotu Talatala, na Katolik, na Juda, tasol long dispela hap i gat olsem 975,000 Witnes, na winim 2,000,000 ol i bin kam long Memorial. Tru tumas, planti manmeri moa yet ol i wok long lusim Bikpela Babilon, em olgeta lotu giaman i save skulim ol man long ol tok i olsem stori nating tasol, na ol dispela lain i kisim save long ol tok promis bilong God long “nupela skai na nupela graun.”—2 Pita 3:13; Aisaia 2:3, 4; 65:17; KTH 18:4, 5; 21:1-4.
Ol Rot Bilong Helpim Ol Man
10. Long sampela hap, wanem ol senis i kamap long i stap bilong ol man?
10 Planti namel long ol manmeri i bin kam long Jehova long rot bilong Krais Jisas, ol Witnes i bin painim ol taim ol i go long ol haus na autim tok. (Jon 3:16; Aposel 20:20) Tasol ol i bin mekim long ol narapela rot tu. Long nau ol samting i wok long senis, na tu, pe bilong ol samting i go antap na mani i sot, olsem na nau planti meri ol i save go mekim wok mani. Planti taim, long ol de namel long wik, i no gat planti manmeri ol i stap long haus. Olsem na ol Witnes Bilong Jehova i traim ol narapela rot bilong bungim ol man. Olsem Jisas wantaim ol disaipel bilong em long bipo, ol i save go long ol hap ol man i save stap long en, na ol i go long taim ol inap painim ol.—Matyu 5:1, 2; 9:35; Mak 6:34; 10:1; Aposel 2:14; 17:16, 17.
11. Long nau ol Witnes Bilong Jehova i save autim tok long wanem ol hap? Wanem samting i kamap long dispela wok?
11 Ol Witnes i save tingim rot bilong painim ol man, na long pasin bilong gutpela tingting ol i save autim tok long ol man i save stap long ol ples bilong putim ol ka, ples i gat planti stua, ol haus faktori, ol ofis, ol bisnis, ol skul, polis-tesin, ples bilong kisim bensin, ol hotel, ol haus kaikai, na long ol rot. Ol i save autim tok long olgeta hap i gat ol man i stap long en. Na taim ol man i stap long haus, orait ol Witnes i save wok yet long go lukim ol long haus bilong ol. Ol dispela kain rot bilong autim tok i mekim na ol i save tilim planti buk na nius moa i kamapim ol tok bilong Baibel. Ol i wok long painim ol manmeri i gat pasin olsem sipsip. Ol i wok long kirapim ol nupela Baibel-stadi. Winim 5 milion 500 tausen manmeri ol i givim bel long mekim wanpela bikpela wok tru bilong skulim ol man, em kain bikpela wok olsem i no bin kamap bipo! Olsem wanem long yu? Yu wanpela bilong dispela lain?—2 Korin 2:14-17; 3:5, 6.
Wanem Samting i Kirapim Ol Witnes?
12. (a) Olsem wanem Jehova i save skulim lain bilong em? (b) Dispela skul ol i kisim, em i mekim wanem long ol?
12 Yumi laik save, oganaisesen bilong heven i gat wanem wok insait long dispela samting? Aisaia i tok profet olsem: “Bai mi yet [Jehova] mi skulim ol pikinini bilong yu, na bai ol i gat gutpela sindaun [olsem stap bel isi] tru.” (Aisaia 54:13) Dispela bikpela lain brata i stap long olgeta hap, Jehova i wok long skulim ol long rot bilong oganaisesen bilong em i stap long graun—long ol Haus Kingdom, na long ol bikpela na liklik kibung. Olsem na ol i stap wanbel na stap bel isi wantaim. Ol tok Jehova i save skulim ol man long en i kamapim wanpela lain i narapela kain tru, em ol i bin skul long laikim tru ol narapela insait long lain bilong ol, na laikim tru ol man i stap klostu long ol olsem ol i laikim ol yet, na ol i no ken bel nogut long ol man, maski ol i sindaun long wanem wanem hap bilong dispela graun ol man i bruk na stap birua birua.—Matyu 22:36-40.
13. Olsem wanem yumi inap save tru olsem ol ensel i stiaim wok bilong autim tok?
13 Pasin bilong laikim tru ol narapela i save kirapim ol Witnes Bilong Jehova long wok yet long autim tok, maski ol man i les long harim o ol i mekim nogut long ol. (1 Korin 13:1-8) Ol i save, ol ensel long heven i stiaim dispela wok bilong ol long helpim ol man long abrusim bagarap na i stap laip, olsem Kamapim Tok Hait 14:6 i tok. Wanem dispela tok ol i autim long nau? “Taim i kamap pinis bilong God i skelim pasin bilong olgeta man long kot. Olsem na yupela i mas pret long em na litimapim nem bilong em. Yupela i mas lotu long God, em i bin wokim heven na graun na solwara na olgeta hul wara.” Wok bilong autim gutnius bilong Kingdom i save litimapim nem bilong Jehova. Singaut i go long ol man bambai ol i ken givim biknem long Man bilong wokim ol, em God, na ol i no ken givim biknem long ol man yet o long stori nating olsem ol man i bin kamap long rot bilong ol binatang samting. Na bilong wanem ol i mas mekim hariap dispela wok autim tok? Long wanem, taim bilong skelim ol man long kot i kamap pinis—God bai givim strafe bilong kot long Bikpela Babilon na olgeta narapela lain bilong Satan hia long graun.—KTH 14:7; 18:8-10.
14. Husat ol i insait long dispela bikpela wok bilong skulim ol man?
14 Olgeta Kristen i dediket pinis ol i mas mekim dispela wok bilong autim tok. Ol elda i save go pas long mekim wok autim tok wantaim kongrigesen. Ol painia i bin skul long mekim dispela wok ol i save mekim long olgeta de. Ol pablisa i givim bel long autim tok bilong Kingdom, maski ol inap lusim liklik aua o planti aua long olgeta mun long autim tok, tasol ol i wok long bringim dispela tok long olgeta hap bilong graun.—Matyu 28:19, 20; Hibru 13:7, 17.
15. Wanem samting i makim olsem wok bilong ol Witnes Bilong Jehova long autim tok i bin mekim sampela samting long ol man?
15 Dispela bikpela wok ol i mekim, em i bin mekim sampela samting long ol man o olsem wanem? Yumi ken tok yes, long wanem, planti taim ol i bin kamapim sampela stori bilong ol Witnes Bilong Jehova long televisen na long ol nius. Long ol dispela stori, planti taim ol i tokaut olsem yumi save strong tru long autim tok long olgeta man. Tru tumas, yumi save wok strong na oltaim ol i lukim yumi i mekim dispela wok, na dispela i mekim na bel bilong ol i pilim tru, maski planti man i sakim dispela tok na ol i sakim ol man i bringim dispela tok long ol!
Yumi Strong Long Pinisim Dispela Wok
16. Yumi mas kamapim wanem tingting nau long dispela liklik hap taim i stap yet?
16 Yumi no save hamas taim i stap yet bilong dispela pasin i stap long graun, na yumi no gat wok long save long dispela samting sapos stretpela tingting i kirapim yumi long mekim wok bilong Jehova. (Matyu 24:36; 1 Korin 13:1-3) Tasol yumi save pinis, yumi mas autim dispela gutnius “pastaim” bambai pasin bilong Jehova long laikim tru ol man, na bikpela strong bilong em, na stretpela pasin bilong em, i ken kamap ples klia long ol man. (Mak 13:10) Olsem na maski yumi bin wet inap hamas yia long lukim pinis bilong dispela pasin nogut bilong graun i gat pasin i no stret na pait na bagarapim man, yumi mas wok strong yet long bihainim dediket bilong yumi inap long mak i stret wantaim ol samting bilong i stap bilong yumi. Maski yumi lapun o yumi gat sik, yumi inap givim bel yet long mekim wok bilong Jehova, wankain olsem yumi bin mekim taim yumi yangpela yet o taim skin bilong yumi i strong. Tru, ating yumi no inap lusim planti aua long wok autim tok olsem yumi bin mekim bipo, tasol yumi inap wok yet long givim gutpela ofa long Jehova, olsem mekim gut wok bilong litimapim nem bilong em.—Hibru 13:15.
17. Kamapim stori bilong wanpela brata o sista em inap strongim na helpim yumi olgeta.
17 Olsem na maski yumi yangpela o yumi lapun, yumi mas givim bel na autim gutpela tok bilong nupela taim long olgeta man yumi save bungim ol. Yumi ken bihainim pasin bilong wanpela pikinini meri long Ostrelia i gat 7-pela krismas, em i bin go wantaim mama bilong em long stua. Long Haus Kingdom em i bin harim olsem yumi olgeta i mas autim tok, olsem na em i pulimapim tupela buklet long paus bilong em. Taim mama i wok long baim ol samting, pikinini i soim buklet long wanpela meri! Mama i lukim na em i ting nogut meri i kros, olsem na em i tok sori long meri, tasol meri i kisim pinis dispela buklet. Bihain mama i askim pikinini, olsem wanem em i bin strongim bel na i go toktok wantaim wanpela meri em i no save long em. Pikinini i tokim em: “Mi tokim skin bilong mi, Wan, tu, tri, Ran! Em nau, mi ran!”
18. Olsem wanem yumi inap soim olsem tingting bilong yumi i gutpela?
18 Yumi olgeta i mas kisim kain tingting olsem bilong dispela pikinini meri bilong Ostrelia, na yumi mas kisim dispela tingting moa yet bambai yumi ken go na givim gutnius long ol man yumi no save long ol na ol man i gat namba long gavman samting. Ating bai yumi pret, nogut ol i sakim yumi. Tasol yumi no ken lusim tingting long tok bilong Jisas, em i tok: “Yupela i no ken pret na ting, ‘Mipela bai i bekim tok olsem wanem? Mipela bai i mekim wanem kain tok?’ Nogat. Long dispela taim stret Holi Spirit bai i soim yupela long tok yupela i mas autim long ol.”—Luk 12:11, 12.
19. Yu ting olsem wanem long wok bilong yu long autim tok?
19 Olsem na yu mas bilip olsem spirit bilong God bai helpim yu taim yu kamap long wanpela man na long gutpela pasin isi yu autim gutnius long em. Planti milion ol i save bilip long ol man na meri em ol i save stap liklik taim tasol na ol i dai, na planti ol i no gat gutpela pasin. Tasol yumi save bilip long Jehova na oganaisesen bilong em long heven—em Krais Jisas, ol ensel holi, na ol Kristen God i bin makim na ol i kirap bek pinis—em ol i stap laip inap oltaim oltaim! Olsem na yu no ken lusim tingting: “I tru ol i gat planti soldia, tasol yumi gat bikpela lain moa bilong helpim yumi.”—2 King 6:16.
[Futnot]
a Bilong kaunim sampela stori moa olsem, lukim yiabuk bilong ol Witnes Bilong Jehova bilong 1994, pes 217-220.
Bai Yu Bekim Olsem Wanem?
◻ Oganaisesen bilong God long heven i bin mekim wanem wok na nau lain bilong Jehova i stap yet?
◻ Wanem ol lain bilong politik na lotu ol i bin mekim pait long ol Witnes Bilong Jehova nau long taim bilong yumi?
◻ Long nau ol samting i wok long senis, olsem na ol Witnes Bilong Jehova i traim wanem ol narapela rot bilong bungim ol man?
◻ Wanem samting i save kirapim yu long autim tok?
5. Wanem tok i bin strongim bel bilong ol wokboi bilong Jehova?
[Piksa long pes 17]
Henryka Żur
[Ol Piksa long pes 18]
Japan
Matinik
Yunaitet Stets
Kenya
Yunaitet Stets
Ol Witnes Bilong Jehova i save autim tok long wanem hap na wanem taim ol inap painim ol man
[Piksa long pes 20]
Kirap long 1930 samting, ol i bin mekim wok long ol pikap bilong bringim tok bilong Kingdom long ol man