Las Taim Em Taim Bilong Bungim Kaikai Long Gaden
“Orait, mi lukluk gen, na mi lukim wanpela waitpela klaut i stap, na wanpela i sindaun long klaut, em i olsem Pikinini Bilong Man. Em i gat hat gol long het bilong en, na em i holim naip i sap tru long han bilong en”−REVELESEN 14:14.
1. Wanem sampela samting i bin kamap nau long taim bilong yumi, na bipo i no gat?
NAU long dispela taim bilong yumi em taim nogut tru! Tupela bikpela pait i bin kamap. Long planti kantri, ol man i pait na daunim gavman. Bikpela hangre i bin putim hevi long planti lain man; bipo i no gat bikpela hangre olsem. Hevi i painim ol kampani na bisnis na nau ol i no strong tumas. Pasin nogut i go bikpela. Ol man i bagarapim graun na wara na win. Long nau i gat sampela kain sik nogut i kamap. Ol dispela samting i bagarapim sindaun bilong yumi. Tru, ol man i bin wokim sampela masin i save mekim bikpela wok, na ol i bin kisim save long planti samting. Ol i save mekim wok long strong bilong nuklia. Ol i bin wokabaut long mun. Ol i bin mekim planti nupela bikpela samting. Tasol i gat wanpela bikpela wok i kamap na i stap nau long taim bilong yumi, na dispela i winim olgeta wok bilong ol man. Dispela wok em samting tru, na wok bilong ol man i samting nating.
2 Bipo yet profet Danyel i bin toktok long dispela bikpela samting bai kamap. God i kirapim em na em i tok: “Long nait mi wok long lukim yet ol samting olsem piksa na mi lukim wanpela man kain olsem wanpela pikinini bilong man, na em i kam wantaim smok bilong antap; na em i kam insait long ples bilong Man i bin i stap oltaim na ol i bringim em i go klostu long dispela Man. Na dispela Man i givim wok king na biknem na kingdom long em, na ol man bilong olgeta hap graun, na olgeta lain man, na ol man i gat kain kain tok ples bai ol i mekim wok bilong em.”−Danyel 7:13, 14, NW.
3 Dispela “Man i bin i stap oltaim” em God Jehova. Danyel i lukim em i stap insait long “smok bilong antap,” olsem long ples bilong ol spirit antap na yumi man bilong graun i no inap lukim. Em i givim wok king long “wanpela man kain olsem wanpela pikinini bilong man.” Dispela man em husat? Long yia 33 C.E. Jisas i bekim dispela askim taim bikpela kaunsil bilong lotu Juda i kotim em. Hetpris i askim em, “Yu Krais, Pikinini Bilong God, o nogat? Jisas i no pret liklik; em i bekim na em i kolim tok profet bilong Danyel na em i tok, dispela tok i makim em yet. Em i tokim hetpris: “Bihain bai yupela i lukim Pikinini Bilong Man i sindaun long han sut bilong God I Gat Olgeta Strong. Na em bai i stap antap long klaut bilong heven na i kam.” Tasol hetpris i no daun long Jisas, em Jehova i makim em bilong i stap King; nogat; hetpris i tok, Jisas i tok bilas long God. Olsem na ol bikman bilong lotu Juda ol i subim Pailat long tok orait long kilim Jisas i dai.−Matyu 26:63-65; 27:1, 2, 11-26.
4 Ol i daunim tok bilong Jisas, tasol wok bilong ol i lus, long wanem Jisas i kirap lusim matmat na i go antap long heven na em i wetim taim bai Jehova i givim Kingdom long em. (Aposel 2:24, 33, 34; Sam 110:1, 2) Dispela taim i kamap long yia 1914. Sapos yumi tingim ol samting i bin kamap long laspela hap bilong yia 1914, yumi save Jisas i kisim wok king long dispela “Man i bin i stap oltaim,” na em i kamap King. (Matyu 24:3-42) I gat planti birua bilong dispela nupela Kingdom. Tasol i no gat wanpela samting inap pasim laik bilong God na daunim dispela Kingdom: Ol bikpela man bilong lotu Juda i no inap, na ol gavman i no inap, na Seten wantaim ol spirit nogut i no inap. (Sam 2:2, 4-6; Revelesen 12:1-12) Stret long yia 1914 bikpela singsing i kirap long heven na ol ensel i singsing olsem: “Bikpela bilong yumi wantaim Krais tupela i kamap king bilong olgeta graun! Na em bai i stap king oltaim oltaim!” (Revelesen 11:15) Kirap long dispela taim na i kam inap long nau em “las taim” bilong pasin nogut nau i stap long graun.−2 Timoti 3:1.
Taim Bilong Bungim Kaikai long Gaden
5 Danyel i tok, taim Jisas i kisim wok king “ol man bilong olgeta hap graun, na olgeta lain man, na ol man i gat kain kain tok ples bai ol i mekim wok bilong em.” Tasol olsem wanem dispela i ken kamap sapos ol man bilong graun i sakim wok king bilong Jisas? Yumi ken save sapos yumi tingim sampela samting aposel Jon i lukim olsem driman o piksa. Jon i stori long samting em i lukim na em i tok: “Mi lukim wanpela waitpela klaut i stap, na wanpela i sindaun long klaut, em i olsem Pikinini Bilong Man. Em i gat hat gol long het bilong en, na em i holim naip i sap tru long han bilong en.” (Revelesen 14:14) Danyel tu i tok, Jisas i stap long klaut o smok bilong antap na em i “kain olsem wanpela pikinini bilong man.” Em i gat hat gol bilong king, tasol han bilong em i no holim stik bilong king; nogat; “em i holim naip i sap tru long han bilong en.” Bilong wanem em i holim naip?
6 Jon i tok moa olsem: “Na narapela ensel i kam ausait long haus holi. Em i singaut strong long dispela man i sindaun long klaut, na i tok, ‘Yu katim kaikai long naip bilong yu! Olgeta kaikai bilong graun i mau pinis!” Jisas i kamap king pinis, tasol em i bihainim yet ol tok i kam long Jehova; Jehova i stap long “haus holi” na ensel i bringim tok bilong Em i kam. Olsem na taim Jehova i tokim Jisas long mekim wok na kisim kaikai bilong graun long las taim, Jisas i bihainim dispela tok: “Em i holim naip bilong en na i tromoi long graun, na em i katim kaikai mau bilong graun.”−Revelesen 14:15, 16; Hibru 9:24; 1 Korin 11:3.
7 “Kaikai bilong graun” em wanem samting? Em ol manmeri i lusim pasin nogut bilong dispela graun, em Seten i bosim, na ol i mekim wok bilong Jehova na King Krais Jisas. Namba wan hap bilong dispela “kaikai” em dispela liklik hap lain bilong 144,000; ol i mas wok king wantaim Jisas long kingdom bilong heven. (Matyu 13:37-43) Ol i olsem lain “Isrel tru bilong God,” na ol i “olsem namba wan lain God i kisim bek bilong em yet wantaim Pikinini Sipsip.” God i “baim bek” ol na ol i “bilong olgeta lain man, na bilong olgeta tok ples, na bilong olgeta kain skin, na bilong olgeta graun.” (Galesia 6:16; Revelesen 14:4; 5:9, 10) Olsem na ol manmeri “bilong olgeta hap graun, na olgeta lain man, na ol man i gat kain kain tok ples” ol i kam na kirap long mekim wok bilong King Jisas.
8 Tasol i gat sampela moa tu. Long narapela piksa o driman, Jon i lukim God i putim mak long laspela hap lain bilong dispela 144,000. (Revelesen 7:1-8) Olsem na ating long yia 1935 lain bilong ol em inap pinis. Na nau Jon i “lukim planti tumas manmeri ol i bung i stap, na i no inap man i kaunim namba bilong ol. Dispela ol manmeri ol i bilong olgeta lain man, na bilong olgeta graun, na bilong olgeta kain skin, na bilong olgeta tok ples. Ol i sanap long pes bilong sia king na long ai bilong Pikinini Sipsip.” (Revelesen 7:9-17) Olsem na dispela wok long kisim na bungim kaikai bilong graun em i go yet, na planti moa bilong “olgeta hap graun, na olgeta lain man, na ol man i gat kain kain tok ples” ol i kam na kirap long mekim wok bilong King Jisas.
9 Ol dispela nupela lain i kam ol i wet long kisim laip i stap oltaim long paradais bai kamap long graun aninit long dispela King em Jehova i makim pinis. (Sam 37:11, 29; 72:7-9) Sampela ol narapela tok profet i stori long wok bilong bungim dispela lain. Aisaia i bin tok, “long taim bilong bihain tru” ol lain man bai kam bung long haus bilong Jehova. (Aisaia 2:2, 3, NW) Na Hagai i tok, Jehova bai seksekim ol lain man na em bai kisim “ol gutpela samting” olsem ol gutpela man bilong ol dispela lain. (Hagai 2:7, NW) Na Sekaraia i stori long “10-pela man bilong olgeta tok ples” ol bai kam bung wantaim lain bilong God. (Sekaraia 8:23, NW) Na Jisas yet i tok profet long dispela “planti tumas manmeri.”Em i tok: “Bihain bai Pikinini Bilong Man i kam bek olsem king, na olgeta ensel wantaim em, long dispela taim bai em i sindaun long sia king bilong en. Na olgeta lain manmeri bai ol i bung long pes bilong em. Na em bai i tilim ol na i putim long tupela lain, olsem wasman i save tilim ol sipsip i go long hap na ol meme i go long hap. Em bai i putim ol sipsip long han sut bilong en, na ol meme long han kais.”−Matyu 25:31-33.
10 Tru tumas, nau Jisas i wok long skelim olgeta lain manmeri, husat ol i “sipsip” na husat ol i “meme.” Em i skelim ol olsem wanem? Long piksa o driman Jon i lukim, ol ensel i autim sampela strongpela tok na nau ol i kisim “kaikai bilong graun.” Wanpela ensel i autim “gutnius bilong i stap oltaim oltaim.” Narapela ensel, em namba 2, em i toksave long “Bikpela taun Babilon” bai bagarap. Na namba 3 ensel i tokaut na i tok, no ken lotuim “wel abus,” em ol wok politik Seten i bosim. (Revelesen 14:6-10) I no gat wanpela man i harim tru nek bilong ol dispela ensel, tasol ol man i harim maus bilong sampela gutpela man ol i autim ol dispela kain tok. (Matyu 24:14; Aisaia 48:20; Sekaraia 2:7; Jems 1:27; 1 Jon 2:15-17) Tru tumas, maus bilong sampela man i autim dispela tok, na ol ensel i bosim dispela wok bilong ol. Sapos man i givim yau na bihainim dispela tok, dispela i makim em i olsem wanpela “sipsip”; na sapos em i sakim, dispela i makim em i olsem wanpela “meme.” Nau long dispela taim ol Witnes Bilong Jehova tasol i insait long dispela bikpela wok na ol i wok wantaim ol dispela ensel.
11 Wok bilong autim ol dispela tok em i bikpela wok tru, winim ol narapela wok bilong ol man bilong graun. Dispela wok i namba wan wok, na ol narapela wok i namba tu. Ol wok politik na wok saiens i samting nating sapos yumi skelim wantaim dispela bikpela wok bilong autim tok. Dispela ol tok ol i autim em i makim rot bilong pinisim olgeta hevi bilong ol man na helpim ol gutpela man bambai ol i ken i stap laip oltaim. Na narapela samting i bikpela moa: Ol dispela tok ol i autim em insait long wok bilong mekim nem bilong Jehova i kamap holi.
Ripot Bilong Yia
12 Olsem na long olgeta yia ol Witnes Bilong Jehova i gat bikpela tingting long lukim na kaunim ripot bilong oganaisesen bilong Jehova. Ol i amamas tru taim ol i kaunim ripot na ol i save Jehova i blesim wok bilong ol. Sapos yu lukim ripot bilong yia 1987 i stap long pes 12 inap pes 15 long dispela Wastaua bai yu save, ol ensel wantaim ol wanwok bilong ol long graun ol i bin mekim bikpela wok long yia i go pinis.
13 Ol man bilong 210 kantri ol i harim pinis gutpela tok bilong Kingdom−em ‘olgeta lain na olgeta kain skin na olgeta tok ples’ ol brata inap i go long ol na autim tok. (Mak 13:10) Inap 3,395,612 manmeri i bin autim tok−winim bilong olgeta taim bipo, kirap long taim lotu Kristen i bin kamap na i kam inap long nau. Sapos yumi lukim namba bilong sampela wan wan kantri, em tu i go antap. Long Amerika 773,219 i bin autim tok, winim bilong bipo. Brasil i gat 216,216 pablisa, na Meksiko 222,168; bipo i no bikpela olsem. Na long 6-pela kantri moa, em Englan na Jemani na Itali na Japan na Naijiria na Filapin, lain pablisa long ol dispela wan wan kantri i winim 100,000. Tasol i gat sampela kantri, planti man i stap long en na i no gat planti pablisa−long sampela kantri olsem ol man bilong autim tok ol inap olsem 2,000 o 3,000 tasol, na long sampela kantri i aninit long dispela. Tasol maski ol i no planti, wok ol dispela gutpela brata sista i save mekim em bikpela samting; ol hevi i stap long hap bilong ol, tasol ol i wok strong long autim tok i tru na i stap olsem lait.−Matyu 5:14-16.
14 Tasol lain bilong God i no tingting tasol long lain bilong ol i go bikpela. Ol i save, olgeta dispela nupela man i kapsait i kam insait long lain bilong Jehova ol i olsem “ol gutpela samting” long ai bilong Jehova. Bipo planti ol i bin “krai na bel hevi long ol samting nogut nogut ol man i mekim” insait long ol misin ol i tok ol i Kristen. (Esikiel 9:4, NW) Olgeta ol i kam long “maunten bilong Jehova,” long wanem ol i laik lain long ol pasin na lo bilong Jehova. (Aisaia 2:2, 3) Dispela bikpela lain nupela man i olsem mak bilong Jehova i blesim wok bilong ol Witnes. Long nau pasin nogut i pulap long graun na ol man i tingting tasol long ol samting bilong skin, tasol long olgeta yia planti handet tausen man i lukim ol dispela pasin nogut na ol i kamap olsem “ol gutpela samting” bilong Jehova!
Nau Em Bikpela Taim
15 Dispela wok bilong ol Witnes Bilong Jehova long autim tok em i bikpela samting. Bilong wanem? Long wanem ol i gat bikpela hap teritori; ol i mas i go long olgeta hap bilong graun bilong painim ol man. Ol i mas autim “dispela gutnius” long “olgeta lain man bilong olgeta graun, na bilong olgeta tok ples, na bilong olgeta kain skin”. (Revelesen 14:6) Long tok piksa bilong Jisas, em i tok em bai skelim “olgeta lain manmeri” na makim sampela i olsem “sipsip” na sampela i olsem “meme.” Bikpela wok i stap. Olsem na i stret dispela “planti tumas manmeri” i lotu long God “long haus holi bilong en” na litimapim nem bilong em “long san na long nait.” (Revelesen 7:15) Ol i truim ol samting Jon i lukim olsem piksa o driman. Ol i wok wantaim lain brata God i bin makim ol long spirit holi, na long yia i go pinis ol i bin autim tok inap 739,019,286 aua, em planti aua tru. Sapos yumi skelim namba bilong ol pablisa wantaim namba bilong ol aua, i olsem ol wan wan pablisa i autim tok inap 19 aua long olgeta mun (bungim ol painia wantaim). Tenpela yia bipo ol i bin autim tok inap 12-pela aua tasol long olgeta mun. Olsem na yu ken save, wok bilong autim tok i wok long i go bikpela. Olsem wanem long yu? Yu save autim tok inap hamas aua long ol mun?
16 Na lukim namba bilong ol painia haptaim na painia oltaim: Em inap olsem 650,095. Long yia i go pinis namba bilong ol painia i winim namba bilong ol pablisa long yia 1955. Olsem wanem? Yu bin wok painia long yia i go pinis? Sapos olsem, yu bin bihainim tok bilong Pol, em i tok: “Oltaim yu mas wok strong long autim tok.” (2 Timoti 4:2) Yu ting olsem wanem? Yu inap mekim wok painia long yia 1988 inap wanpela mun o sampela mun?
I Go Bikpela Yet
17 Lain pablisa inap go antap moa, long wanem long 1987 i gat 3,005,048 Baibel-stadi, na ol dispela Baibel-stadi inap kamap “gutpela samting”! Na 8,965,221 manmeri i bin kam long Memorial long Epril 1987. Bikpela hap lain bilong ol dispela manmeri ol i no Witnes Bilong Jehova. Sampela ol i nupela long harim tok i tru. Ol Witnes i amamas long ol i kam, na ol Witnes i laik bai ol i wok yet long kamap strong long bilip. Na ating sampela i bin kam long Memorial bipo, na ol i amamas long bung wantaim ol Witnes, olsem na ol i kam gen long 1987, tasol ating ol i no gat tingting long mekim sampela samting moa bilong strongim bilip bilong ol.
18 Tasol i gutpela ol i kam; ol i laik harim tok i tru bilong Baibel na em gutpela. Tasol ol i mas tingim tok bilong Jisas, em i bin tok, ol dispela “sipsip” i kisim laip oltaim ol i mas helpim lain brata bilong Jisas em spirit holi i bin makim ol, na ol i mas wok wantaim ol. (Matyu 25:34-40, 46) Na Sekaraia i tok “10-pela man” i givim bel na tok: “Mipela bai go wantaim yupela, long wanem mipela harim ol i tok God i stap wantaim yupela.” (Sekaraia 8:23, NW) Ol i amamas long kam bung wantaim ol Witnes, na ol i pren gut wantaim ol; tasol ol i mas mekim sampela samting moa: Ol i mas olsem “holim” lain bilong God na go wantaim ol, na ol i mas dediket long God bilong dispela lain. Long nau ol i mas insait olgeta long wok bilong lain bilong Jehova.
Liklik Taim Tasol
19 Na i gat narapela as tu na yumi save dispela wok bilong ‘bungim kaikai long gaden’ em i bikpela wok long nau. Em olsem: Liklik taim tasol na bai dispela wok i pinis. (Matyu 24:32-34) Pinis, na nau wanem samting bai kamap? Jon i tok: “Na narapela ensel i kam ausait long haus holi i stap long heven. Em tu i holim naip i sap tumas. Na narapela ensel moa em i lusim alta na kam. Em dispela ensel i gat strong bilong bosim paia. Em i singaut strong long ensel i holim naip i sap tru. Em i tok, ‘Yu kisim dispela naip bilong yu em i sap moa, na yu katim olgeta kaikai bilong rop wain bilong graun, na bungim na i stap! Olgeta kaikai bilong en i mau pinis!’ Orait, dispela ensel em i holim naip bilong en na i tromoi long graun, na i katim olgeta kaikai bilong rop wain, na i bungim i stap. Na em i tromoi dispela kaikai i go insait long bikpela tang ston bilong krungutim wain. Dispela em i olsem belhat bilong God.”−Revelesen 14:17-19.
20 Taim ol i bungim pinis “ol gutpela samting,” dispela pasin nogut nau i stap long graun em i no ken i stap moa. “Rop wain bilong graun” i makim pasin bilong graun em Seten i bos bilong en, na Jisas bai katim dispela rop na rop bai pundaun na bagarap, na long dispela taim ol man i bin biruaim Kingdom ol i mas daun long dispela King em Jehova i bin makim. Jon i tok: “Harim! Em [Jisas] i laik i kam namel long klaut, na olgeta man bai ol i lukim em long ai bilong ol yet. Olgeta man i bin sutim em long spia na nil, bai ol i lukim em tu. Na olgeta man bilong graun bai ol i tingting planti long em, na bai ol i paitim bros bilong ol yet na krai nogut.” (Revelesen 1:7; Matyu 24:30) Na nau truim bilong wanpela tok bilong Jisas bai kamap, em tok em i bin mekim long ol bikman bilong lotu Juda, em ol “man i bin sutim em long spia na nil.” (Matyu 26:64) Tasol ol dispela man bilong tupela maus ol i no ken “lukim” tru Jisas, long wanem ol i no ken lusim dai na kirap bek. (Matyu 23:33) Tasol ol man bilong nau ol i gat wankain tingting na pasin bilong ol dispela Juda na ol i bikhet long dispela King em Jehova i bin makim, ol i mas daun long dispela King taim em i kam bilong bagarapim ol lain man long Amagedon.−Revelesen 19:11-16, 19-21.
21 Long nau olgeta wan wan man i mas tingting gut sapos ol i no laik bagarap. Yumi wok wantaim ol ensel, olsem na i gat bikpela wok yumi mas mekim. Tasol em i gutpela samting tru long mekim olsem! I gutpela sapos yumi wok strong wantaim. ol ensel bilong heven long painim ol “sipsip,” em ol dispela “gutpela samting bilong Jehova,” na yumi inapim pinis dispela wok insait long dispela hap taim bilong bungim kaikai long gaden.
Yu Inap Stori long Dispela?
◻ Wanem nambawan bikpela wok i kamap nau long taim bilong yumi?
◻ “Kaikai bilong graun” em wanem samting? Ol i bungim olsem wanem?
◻ Kolim sampela samting ol “sipsip” bilong Jehova i mekim.
◻ Olsem wanem ripot bilong yia i makim olsem Jehova i blesim wok bilong ‘bungim kaikai’?
◻ Bilong wanem wok bilong autim tok em i bikpela wok long nau?
2. Danyel i kolim wanem samting i mas kamap long taim bilong yumi?
3. (a) Husat dispela “Man i bin i stap oltaim”? Em i givim wanem samting long “wanpela man kain olsem wanpela pikinini bilong man”? (b) Husat dispela man “kain olsem wanpela pikinini bilong man”? Taim Jisas i bekim tok long ol bikman bilong lotu Juda ol i mekim wanem?
4. Jisas i kisim wok king long wanem taim? Wanem ol samting i bin biruaim wok king bilong Jisas?
5. (a) Olsem Danyel i tok, husat ol bai mekim wok bilong dispela nupela King? (b) Jon i lukim wanem samting na i makim Jisas olsem wanpela nupela king?
6. Jehova i tokim nupela King Jisas long mekim wanem wok?
7. (a) “Kaikai bilong graun”em wanem samting? (b) Husat i namba wan hap bilong dispela “kaikai”?
8. (a) Wok bilong kisim laspela hap bilong lain em Jehova i makim ol long spirit holi, ating dispela wok i pinis long wanem yia? (b) Jon i lukim wanem narapela piksa o driman na yumi save, wok bilong kisim ol man i go yet?
9. Husat dispela nupela lain? Wanem sampela tok profet moa i stori long dispela lain bai kamap “long taim bilong bihain tru”?
10. (a) Long wanem rot ol i ‘kisim kaikai bilong graun’? (b) Husat tasol i wok wantaim ol ensel long mekim dispela wok?
11. Dispela wok bilong autim tok bilong ol ensel, olsem wanem em i nambawan bikpela wok?
12, 13. Stori long ol samting bilong ripot bilong yia, em i makim olsem ol Witnes Bilong Jehova i bungim pinis planti “kaikai.”
14. Wanem kain ol man i wok long i kam insait long lain bilong Jehova?
15. (a) Teritori bilong autim tok i bikpela olsem wanem? (b) Jon i tok dispela “planti tumas manmeri” i wok strong, o olsem wanem?
16. (a) Wanem gutpela rot bilong “wok strong long autim tok”? (b) Hamas i mekim dispela wok long yia i go pinis?
17. Yumi lukim wanem ol namba na yumi ken save, bihain lain bilong autim tok inap i go bikpela?
18. Sapos man i laik i stap “sipsip” bilong Jehova em i mas mekim wanem, olsem tok profet bilong Jisas na Sekaraia i makim?
19, 20. (a) Olsem Jon i lukim long piksa o driman, taim ol i bungim pinis “kaikai bilong graun” wanem samting bai kamap? (b) Na olsem wanem long ol man i no givim bel long King Jisas?
21. Bilong wanem lain bilong God i mas wok strong wantaim ol ensel?
[Sat long pes 12-15]
RIPOT BILONG WOK BILONG OL WITNES BILONG JEHOVA LONG 1987
(Lukim Wastaua Jun 1, 1988)