11. Belhat bilong God i stap long namba 4 dis, ensel i kapsaitim long wanem samting? Taim ensel i mekim olsem, wanem samting i kamap?

¹¹ Belhat bilong God i stap long namba 4 dis, em ensel i kapsaitim long san, olsem Jon i tok: “Orait namba 4 ensel i kapsaitim dis bilong en antap long san, na God i larim paia bilong san i kamap strong tru na i kukim ol man. Dispela bikpela paia bilong san em i hat moa yet, na i kukim nogut ol dispela man. Na ol i tok nogut long nem bilong God, em God i gat strong bilong bosim ol dispela samting nogut i kamap long ol. Tasol ol i no tanim bel na litimapim nem bilong em.”​—⁠KTH 16⁠:​8, 9.

13. Ol bikman i stap olsem “san” bilong ol man, na ol i bin mekim wanem na i olsem ol i “kukim” ol man?

¹³ Bihain long Namba Wan Pait ol bikman bilong graun i kamapim Lig ov Nesen bilong pasim pait na bai i no ken kamap moa, tasol em i no mekim. Olsem na ol i traim sampela kain gavman moa, olsem gavman Fasis, na gavman Natsi bilong Hitler. Na gavman Komyunis tu i bin kamap bikpela. Ol bikman bilong ol dispela gavman ol i olsem “san” bilong ol man, tasol ol i no stretim hevi bilong ol, nogat; ol i kirap long “kukim ol man. Dispela bikpela paia bilong san em i hat moa yet, na i kukim nogut ol.” Pait i kamap long Spen na Itiopia na Mansuria, na bihain Namba 2 Pait i kirap. Ol samting i kamap long dispela taim i kamapim klia olsem Mussolini na Hitler na Stalin, em ol bikman bilong ol gavman, ol yet i as na planti milion man i bagarap. Na pait i bin kamap tu long Vietnam na Kampusia na Iran na Lebanon na Aialan na sampela kantri long hap bilong Saut Amerika na Afrika. Na tupela bikpela gavman bilong Amerika na Rasia i kros i stap, na ol i gat ol bom samting nogut tru bilong pait na em inap “kukim” na bagarapim olgeta man long graun. Tru tumas, nau long las taim ol bikman nogut bilong graun i stap olsem “san” bilong ol man na ol i “kukim nogut” ol man. Namba 4 dis i gat belhat bilong God i stap long en na ensel i kapsaitim i go long “san” bilong ol man, na nau ol dispela samting i kamap ples klia na lain bilong God i autim long olgeta hap bilong graun.

14. Long olgeta taim ol Witnes Bilong Jehova i bin kolim wanem samting tasol inap long stretim ol hevi bilong graun? Tasol ol man i mekim wanem?

¹⁴ Long olgeta taim ol Witnes Bilong Jehova i bin tokaut olsem, Kingdom bilong Jehova tasol inap stretim ol hevi bilong ol man, na long rot bilong dispela Kingdom Jehova bai mekim nem bilong em i stap holi. (Song 83⁠:​4, 17, 18; Matyu 6⁠:​9, 10) Tasol ol man i no bilip long dispela tok. Ol i givim baksait long Kingdom na planti ol i tok bilas long nem bilong God olsem king bilong Isip i bin mekim long taim em i no laik daun long wok king bilong Jehova. (Kisim Bek 1⁠:​8-​10; 5⁠:⁠2) Ol dispela birua i no tingim Kingdom liklik, nogat; ol i laik i stap aninit long hatpela “san” bilong ol yet, em ol dispela gavman bilong graun i save “kukim” ol man.