Megido—Ples Pait Bilong Bipo Em i Olsem Piksa
“ORAIT Bikpela, olsem tasol ol birua bilong yu i ken dai.” Em laspela tok bilong wanpela singsing ol i mekim 32 handet yia bipo taim ol Isrel i winim pait klostu long biktaun Megido.
Baibel i stori long dispela pait olsem: God i tokim Barak, em hetman bilong lain Isrel, long bungim 10,000 man long Maunten Tebo. Yu ting em bikpela ami? Ating olsem. Tasol long ol dispela 10,000 man “i no gat wanpela i karim plang bilong pait na i holim spia.” (Ol Hetman 5:8) Tasol ol birua bilong ol, ol Kenan, em Sisera i kepten bilong ol, ol i gat planti samting bilong pait. Ol i gat “900 karis ain.” (Ol Hetman 4:3) Ol Kenan inap raun spid tru na i go kamap kwik long narapela narapela hap bilong pait, na ol dispela karis ain i mekim pretim ol Isrel.
Tasol i no strong bilong ami o bilong samting bilong pait bai helpim ol long winim pait. Nogat. Ol Isrel i giamanim ami bilong Sisera na pulim ol i go long ples daun klostu long Wara Kison. Long dispela taim, ples i drai. Tasol Jehova i go pas long ol Isrel. Barak i kisim dispela 10,000 man na ol i lusim maunten i go daun na nau Jehova i mekim na bikpela ren i kam daun. Wara Kison i tait na karim ol birua i go. Ol karis bilong pait na ol hos i pas insait long graun malumalum. Ol ami bilong Sisera i longlong nabaut na ol i pret nogut na ranawe i go. Ol Isrel i ronim ol na kilim i dai olgeta ami bilong Sisera. “I no gat wanpela i stap.”—Ol Hetman, sapta 4 na 5.
Ol Isrel i win tru, olsem na singsing i tok olsem: “Orait Bikpela, olsem tasol ol birua bilong yu i ken dai, tasol ol pren bilong yu i ken lait olsem lait bilong san i kamap.” (Ol Hetman 5:31) Yu lukim dispela tok “olsem tasol”? Dispela tok i makim olsem dispela pait i olsem piksa. Em piksa bilong bikpela pait bilong God i mas kamap long bihain na pinisim olgeta birua bilong God.
Ol birua i stap klostu long ol Isrel, kwiktaim ol i lusim tingting long dispela bikpela bagarap i bin kamap long hap bilong Megido. Inap 47 yia tasol bihain, sampela lain i bihainim lain bilong Midian na ol i bung na ol i “brukim wara Jodan na wokim kem long ples daun bilong Jesril,” em dispela ples daun Megido i stap long en. (Ol Hetman 6:33) Ol dispela birua i planti tru; ol i stap nabaut long ples daun “olsem bikpela lain grasop.” Long dispela taim ol Isrel i liklik lain tasol, inap olsem 300 man. Ol i “sanap raunim dispela kem” na ol i winim biugel bilong ol na brukim ol sospen graun ol i holim. Ol i holim hap mambu i lait na ol i singaut strong, olsem: “Bainat bilong [Jehova] na bilong Gidion!” Ol Midian i pret nogut tru! “Bikpela i mekim ol Midian i longlong nabaut na i katim ol poroman bilong ol long bainat.” Liklik lain ami bilong Gidion i winim ol Midian olgeta!—Ol Hetman, sapta 7.
Nogut yumi popaia olsem ol Midian bilong bipo na yumi no tingim gut ol pait i bin kamap long hap bilong Megido. Inap 12-pela taim Baibel i stori long dispela ples. Na sampela tok profet bilong Baibel i makim olsem ol samting i bin kamap long Megido i olsem piksa na i makim sampela bikpela samting i mas kamap long taim bilong yumi. Olsem na nau yumi ken skelim ol tok bilong Baibel long dispela ples, na yumi ken skelim tu tok bilong ol man i gat wok long painim ol samting bilong bipo.
Rot Bung Bilong Bipo
Biktaun Megido wantaim biktaun Hasor na Geser ol i stap long bikrot ol ami na ol man bilong bisnis i bihainim namel long Esia na Afrika. Megido i stap namel long dispela tupela narapela biktaun, olsem na em i stap long gutpela ples. Olgeta rot na ol rot namel long ol maunten i kam bung long dispela ples daun. Wanpela buk (The Geography of the Bible) i tok: “Megido i olsem rot bung bilong bipo.”
Megido i bosim wanpela bikpela hap graun i longpela inap 32 kilomita na i bihainim ol maunten Kamel long hap bilong not-is. Em i wanpela bikpela ples daun. Long taim bilong kol, bikpela ren i save kam daun na wara i kapsait i kam daun long ol maunten na mekim Wara Kison long dispela ples daun i tait. (Ol Hetman 4:13) Wanpela buk (Geography of Israel) i tok: ‘Long taim bilong kol, bikpela ren i kam daun na graun long dispela ples daun i kamap malumalum. Maus bilong Wara Kison i no bikpela na i save pas na i gat bikpela ples tais i kamap.’ Sisera wantaim ami bilong em ol i pas long graun malumalum bilong dispela ples daun. Tasol long taim bilong bikpela san, graun i drai, na dispela ples stret i kamap gutpela ples bilong raun long hos na karis na lain long pait. (Lukim Song Bilong Solomon 6:11, 12.) Em gutpela ples bung bilong ol ami.
Olsem na King Solomon i wok long mekim biktaun Megido i kamap strongpela taun. “King Solomon i kisim planti man na tokim ol long ol i mas mekim wok bilong em. Em i mekim ol i wokim . . . banis i raunim Jerusalem. . . . Na em i mekim ol i wokim gen taun Hasor na taun Megido na taun Geser.” (1 King 9:15) Nau i gat hap graun i hip i stap (em i go antap inap 21 mita) long ples bipo Megido i stap long en. Long bipo, ol i save wokim nupela haus antap long ol ston samting bilong olpela haus i bagarap pinis, olsem na ol brukpela haus samting i hip antap long ol narapela haus, mekim mekim olsem. Orait, ol man bilong painim sampela samting bilong bipo ol i kirap digim graun long antap na ol i digim i go daun, na nau ol i painim ol samting bilong narapela narapela hap taim bilong bipo i stap insait. I gat 20 hap olsem insait long dispela hap graun long Megido, olsem na yumi save planti taim ol i bin wokim gen wokim gen dispela taun. Na olsem wanem? Baibel i bin helpim ol dispela man isi isi ol i digim i go daun?
Ating wanpela bikpela wok Solomon i tokim ol man long mekim bilong strongim Megido na Hasor na Geser, em olsem: Em i tokim ol long wokim strongpela dua bilong ol taun. Liklik taim bipo ol man i painim pinis kain dua olsem long hap bilong Megido, na bihain ol i painim pinis wankain dua long hap bilong Hasor. Ol saveman i tingim dispela tok bilong Baibel, olsem na ol i go long Geser tu na ol i wok long painim kain dua olsem. Ol i painim pinis long dispela hap tu. Ol man i save stadi na lainim tok bilong Baibel, ol i ting olsem wanem long dispela samting? Wanpela man i gat nem long painim ol samting bilong bipo, em Profesa Yohanan Aharoni, em i tok:
‘Taim ol i digim graun long dispela tripela hap, ol i painim pinis ol wankain dua long hap graun em i bilong namba 10 senseri B.C.E. . . . Ol kain dua olsem, i gat 3-pela rum bilong ol man i was na 4-pela lain pos long sait sait, ol i painim pinis long 3-pela ples tasol . . . Olsem na olgeta saveman i wanbel long tok ol dispela dua long Hasor na Megido na Geser ol i bilong taim bilong King Solomon.’
Na narapela saveman, em Yigael Yadin, em tu i tok: ‘Ol i painim pinis ol dua samting Solomon i bin wokim bilong strongim Hasor na Megido na Geser, na dispela i soim yumi Baibel inap helpim tru na givim save long ol man i wok long painim ol samting bilong bipo.’
Ples Bilong Winim Tru Pait
Megido i stap long rot bung, olsem na kwiktaim em i kamap wanpela ples pait. Ol i tok, insait bilong olpela tok Hibru yumi tanim olsem “Megido,” em i olsem: ‘Ples bung bilong ami.’ Profesa Aharoni i tok:
‘Megido em i strongpela taun bilong bipo na i gat nem, maski ol buk i no stori long en i go inap long namba 15 senseri B.C. Long dispela taim i gat stori bilong en long ol rait i stori long Tatmos Namba 3. Ol rait i stori long dispela Fero i tok Megido i go pas long ol narapela taun bilong Kenan i bikhet long Fero. . . . Ol ami bilong Isip i go pait wantaim ol Kenan ol i gat ol karis bilong pait. Ol i pait klostu long Megido na ol Isip i win tru. Ol i winim ol Kenan olgeta na Fero i kisim planti samting na 924 karis bilong pait!’
Narapela saveman em i bin raitim wanpela buk (em Dr. Zev Vilnay em i raitim buk The New Israel Atlas) em i stori moa long dispela ples daun na em i tok ‘planti bikpela pait i bin kamap long dispela ples kirap long bipo yet na i kam inap long taim bilong Namba Wan Pait Bilong Olgeta Hap.’
Megido—Ples Bilong Laspela Pait?
Laspela hap bilong Baibel, em Revelesen, i stori long “ol king bilong olgeta man bilong graun” ol i bung bilong “kirapim pait long dispela bikpela de bilong God I Gat Olgeta Strong.” Ol i bung long dispela hap “long tok Hibru ol i kolim Amagedon [maunten bilong Megido].” (Revelesen 16:14, 16) Dispela nem i wankain liklik long Megido, olsem na sampela man i ting dispela pait bai kamap long ples tru bilong Megido. Tasol dispela graun nau i hip i stap long ples bipo Megido i stap long en, yumi no ken kolim olsem wanpela “maunten.” Na tu, yu ting ples daun bilong Megido i bikpela inap long olgeta king na hetman bilong graun wantaim ami bilong ol na ol planti samting bilong pait, olgeta i ken bung long dispela ples? Wanpela buk (International Standard Bible Encyclopedia) i tok, dispela nem Amagedon em i no makim wanpela ples tru; em i olsem tok piksa na i makim laspela pait em bai kamap.
Orait, “Amagedon” em wanem samting? Em i olsem tok piksa na i makim sampela samting. Revelesen i stori long Megido, long wanem ol man i winim pait long dispela hap long bipo ol i win tru, olsem na dispela ples i makim gut ol samting bai kamap klostu nau na bai “olgeta lain manmeri” i bel nogut tru long lain bilong God. (Matyu 24:9, 14) Ol Kristen tru bai ol i stap gut long Kingdom bilong God na bai ol king na hetman bilong graun i bung bilong bagarapim ol. Tasol ol Witnes Bilong Jehova i no ken bekim pait. (Aisaia 2:1-4) God i makim King bilong ol, em Bikpela bilong yumi, Krais Jisas, bilong mekim pait bilong helpim ol. Taim bagarap i laik painim ol, wantu dispela King bilong heven wantaim “ol ami bilong heven” bai kirapim pait long “ol king bilong graun, wantaim ol ami bilong ol.” Ol man i win long dispela pait bilong olgeta hap ol bai win tru olsem long ol pait bilong Megido long bipo. Olgeta birua long graun ol bai “dai” olsem singsing bilong Debora na Barak i makim pinis!—Revelesen 19:11-21; Ol Hetman 5:31.
Bai yu stap wantaim ol pren bilong Jehova—o ol birua bilong Em? Baibel i tok klia olsem: Ol man i no givim bel long Jehova na wok wantaim lain bilong em, ol inap lus; bai ol i no ken kisim laip. (Sefanaia 2:3; 2 Tesalonaika 1:7-9) Olsem na yumi no ken lusim taim! Krais Jisas i kisim pinis biknem long heven na em i toksave long yumi, olsem: “Harim! Bai mi kamap long yupela olsem stilman i save kamap.” Em i tok long pinis bilong taim bilong “bikpela hevi tru,” em Amagedon.—Revelesen 16:15; Matyu 24:21.
Pait bilong “bikpela de bilong God I Gat Olgeta Strong” bai kamapim gutpela wok tru. Em bai opim rot bilong Kingdom bilong God i ken mekim graun i kamap gutpela ples paradais gen. (Matyu 6:9, 10; Revelesen 21:3-5) Tasol nambawan gutpela wok em bai mekim, em olsem: Em bai stretim bek nambawan bikpela nem long heven na graun, olsem dispela beten bipo i makim:
“Yu mas mekim wankain pasin long ol, olsem bipo yu bin mekim long ol Midian, na long Sisera na Jabin long bikpela wara Kison. Olsem tasol yu salim bikpela ren na ranim ol dispela lain bai ol i ranawe. Na yu salim strongpela win tru i go long ol bai ol i pret. Bikpela, yu daunim ol tru na bai ol i sem nogut na bai ol i laik bihainim yu. Mi laik bai yu winim ol na bai ol i pret nogut oltaim. Yu mekim ol i sem na kilim ol i dai. Mi laik bai yu mekim olsem, orait bai ol i ken save tru, yu wanpela tasol, [nem bilong yu Jehova] yu God Antap Tru, na yu save bosim olgeta graun.”—Sam 83:9, 15-18.
[Ol Mep long pes 30]
(Bilong save ol dispela rait i stap we long pes, lukim buk o magasin)
Megido i bosim wanpela bikrot ol ami na man bilong bisnis i save bihainim namel long Esia na Afrika
Rot Bilong Bisnis-------
Hasor
Megido
Geser
Jerusalem
[Mep]
ESIA
AFRIKA
[Piksa long pes 31]
Long Amagedon wanpela lain bai win tru, kain olsem long ol pait i bin kamap long Megido long bipo. Olgeta birua bilong God long graun bai bagarap