Sapta 34

Bikpela Tok Hait i Kamap Ples Klia

 1. (a) Jon i mekim wanem long taim em i lukim bikpela pamukmeri wantaim animal nogut tru em meri i sindaun long en? Olsem wanem na Jon i mekim olsem? (b) Na lain em Jon i piksa bilong ol, ol i mekim wanem long taim ol i lukim truim bilong dispela driman?

TAIM Jon i lukim bikpela pamukmeri wantaim animal nogut em i sindaun long en, em i ting olsem wanem? Em i tok: “Mi lukim dispela na mi kirap nogut tru na mi tingting planti.” (KTH 17⁠:6b) Samting Jon i lukim hia em i narapela kain olgeta! Em wanpela pamukmeri nogut i sindaun antap long wanpela retpela wel animal nogut i stap long hap i no gat man! (KTH 17⁠:⁠3) Na liklik lain em Jon i piksa bilong ol, ol tu i kirap nogut long ol samting i wok long kamap na i truim ol dispela samting Jon i bin lukim long driman. Sapos ol man bilong graun i lukim dispela samting Jon i bin lukim, ating ol bai kirap nogut na tok, “Olaman! Em narapela kain samting!” Na sapos ol bikman bilong ol gavman i lukim, ating ol bai tok, “Em i no tru!” Tasol long nau ol samting dispela driman i makim, ol i wok long kamap tru, na lain bilong God i insait long en, olsem na ol i save, truim bilong en bai wok long kamap yet i go inap long truim bilong olgeta samting bilong driman i kamap.

 2. (a) Jon i bin kirap nogut, olsem na ensel i givim wanem tok long em? (b) God i givim wanem save long lain bilong em? Em i mekim olsem wanem?

² Ensel i lukim Jon i kirap nogut, olsem Jon i tok: “Orait ensel i tokim mi olsem, ‘Bilong wanem yu kirap nogut? Dispela meri wantaim dispela wel animal em i save karim meri i go, em dispela wel animal i gat 7-pela het na 10-pela kom, tupela i olsem piksa bilong ol samting. As bilong dispela piksa em i hait, tasol mi bai soim yu long en.’ ” (KTH 17⁠:⁠7) Em nau, ensel bai kamapim long ples klia dispela samting i stap hait! Em i stori long Jon long ol wan wan samting bilong driman na long ol bikpela samting i laik kamap olsem driman i makim. Na long nau tu, long rot bilong ol ensel Jehova i givim save long lain bilong em na i kamapim klia insait bilong dispela tok profet, olsem Baibel i tok: “God tasol i save soim yumi as bilong ol driman.” Gutpela wokman bilong God long bipo, em Josep, em i bilip olsem, na yumi tu. (Stat 40⁠:8; skelim wantaim Daniel 2⁠:​29, 30.) Lain bilong God i stap olsem ples klia na God i kamapim as bilong dispela driman na ol samting dispela bai mekim long ol. (Song 25⁠:14) Stret long taim bilong mekim, Jehova i givim tingting long ol na bai ol i ken save long dispela tok hait long meri na long wel animal.​—⁠Song 32⁠:⁠8.

3, 4. (a) Long 1942 N. H. Knorr i mekim wanem pablik-tok? Dispela tok i kamapim long ples klia olsem dispela retpela wel animal i wanem samting? (b) N. H. Knorr i kamapim wanem tok em ensel i mekim long Jon?

³ Long Septemba 18 i go 20 long 1942, taim Namba 2 Pait i stap yet, ol Witnes Bilong Jehova long Amerika i bung long, “Nupela Taim Kibung Bilong God.” Ol i mekim long biktaun Klivlan long Ohaio, na telefon i bringim tok i go long 50 narapela taun, na 129,699 man i harim. Kibung i kamap long sampela kantri moa em pait i no stap long en. Long dispela taim planti Witnes Bilong Jehova i ting pait bai go bikpela olgeta na Armagedon bai kamap, em pait bilong God, olsem na nem bilong pablik-tok em “Gutaim Bai Stap, o Nogat?,” na ol man i kirap nogut long harim. Olsem wanem nupela presiden bilong Sosaiti Was Taua, em N. H. Knorr, em inap long toktok long gutaim?a Long dispela taim ol man i ting pait bai kisim olgeta kantri, na gutaim nogat. Tasol lain remnan i ‘holim strong long tingting dispela tok ol i harim pinis,’ em tok profet bilong Baibel, olsem na presiden inap toktok long gutaim.​—⁠Hibru 2⁠:1; 2 Pita 1⁠:⁠19.

⁴ Dispela tok “Gutaim Bai Stap, o Nogat?” em i kamapim long ples klia olsem retpela wel animal em Kamapim Tok Hait 17⁠:3 i stori long en em Lig ov Nesen tasol, na N. H. Knorr i tok, planti hevi i mas kamap long taim bilong dispela samting, na em i kamapim tok ensel i mekim long Jon olsem: “Dispela wel animal yu lukim pinis, bipo em i stap, tasol nau em i no i stap moa. Tasol em bai i lusim dispela hul i no gat as, na em bai i kam antap, na em bai i lus olgeta.”​—⁠KTH 17⁠:8a.

 5. (a) Olsem wanem pastaim “wel animal . . . em i stap,” tasol bihain “em i no i stap moa”? (b) N. H. Knorr i tok wanem bilong bekim askim olsem: “Bai dispela Lig ov Nesen i stap tasol long dispela hul, o olsem wanem?”

⁵ “Wel animal . . . bipo em i stap.” Em i stap olsem Lig ov Nesen, kirap long Janueri 10, 1920. Inap 63 kantri i bin memba long en. Tasol Japan na Jemani na Itali i lusim, na tu, ol i rausim Rasia. Long Septemba 1939 nambawan bilong gavman Natsi long Jemani em i kirapim Namba 2 Pait.b Lig ov Nesen i no bin pasim pait na bai gutaim i stap long graun, na i olsem em i dai pinis na “em i no i stap moa,” na i olsem em i go insait long “hul i no gat as.” Long 1942 Lig ov Nesen i no stap moa. Orait, long dispela taim stret Jehova i kamapim long lain bilong em insait bilong dispela driman! Long wanpela kibung, em “Nupela Taim Kibung Bilong God,” N. H. Knorr i mekim wanpela tok i stret long dispela tok profet; em i tok olsem, “wel animal . . . nau em i no i stap moa.” Na em i askim olsem: “Bai dispela Lig ov Nesen i stap tasol long dispela hul, o olsem wanem?” Na nau em i bekim na i kolim tok bilong Kamapim Tok Hait 17⁠:8 na em i tok: “Dispela oganaisesen i gat ol gavman bilong graun insait long en, em bai kamap bek.” Na olsem em i tok, samting i kamap olsem, na dispela i truim tok profet bilong Jehova!

Em i Lusim Hul na i Kam Antap

 6. (a) Wanem taim retpela wel animal i lusim hul na i kirap bek? Wanem nupela nem bilong en? (b) Olsem wanem yumi ken tok, Yunaitet Nesen i olsem dispela retpela wel animal i kirap bek gen?

⁶ Retpela wel animal i lusim hul na i kirap bek. Long Jun 26, 1945, bikpela amamas i kamap long San Fransisko long Amerika na 50 kantri i vot na tok ol i orait long oganaisesen Yunaitet Nesen. Ol i tok, em i bilong pasim pait na bai gutaim na bel isi i ken i stap. Planti samting bilong Yunaitet Nesen i wankain olsem bilong Lig ov Nesen. Wanpela buk (The World Book Encyclopedia) i tok: ‘Sampela pasin bilong Yunaitet Nesen i wankain olsem Lig ov Nesen i bin kamap bihain long Namba Wan Pait. Planti bilong ol kantri i bin kirapim Yunaitet Nesen ol i bin kirapim Lig ov Nesen tu. Ol i bin kirapim Yunaitet Nesen bilong pasim ol kantri na bai ol i no ken pait, tasol ol i bin mekim olsem long Lig ov Nesen tu. Ol hap bilong Yunaitet Nesen i wankain olsem bilong Lig ov Nesen.’ Olsem na yumi ken tok, Yunaitet Nesen em dispela retpela wel animal i kirap bek. I gat olsem 190 kantri insait long Yunaitet Nesen, tasol Lig ov Nesen i gat 63 tasol; na Yunaitet Nesen i kisim bikpela wok moa, winim bilong Lig ov Nesen.

 7. (a) Olsem wanem ol man “i kirap nogut” taim ol i lukim retpela wel animal i kirap bek? (b) Tasol Yunaitet Nesen i no kamapim wanem samting? Seketeri-jeneral bilong en i tok wanem long dispela samting?

⁷ Pastaim ol man i ting Yunaitet Nesen bai mekim gutpela wok, olsem ensel i tok: “Ol manmeri bilong graun, em ol lain nem bilong ol i no i stap long buk bilong laip long taim God i no mekim graun i kamap yet, ol bai i lukim dispela wel animal na ol bai i kirap nogut. Long wanem, bipo em i stap, na nau em i no i stap, na bihain em bai i kamap.” (KTH 17⁠:8b) Ol man i lukim nupela traipela haus olsem nambawan ofis bilong Yunaitet Nesen long arere bilong wara Is long Nu Yok na ol i kirap nogut long en. Tasol Yunaitet Nesen i no kamapim bel isi na gutaim long graun. Ol man i wokim ol samting nogut nogut bilong pait. Ol i save, sapos narapela lain i kirap long bagarapim narapela lain, dispela narapela lain bai bekim na mekim olsem long ol, na olgeta lain bai bagarap. Tasol ol i wokim yet ol samting bilong pait. Inap olsem 40 yia Yunaitet Nesen i wok strong long kamapim gutaim, na long 1985 seketeri-jeneral bilong en, Javier Pérez de Cuéllar, i tok: “Yumi stap long narapela kain taim, em taim bilong ol man i mekim pasin longlong, na yumi no save bai yumi mekim wanem.”

8, 9. (a) Bilong wanem Yunaitet Nesen i no save em bai mekim wanem bilong stretim ol hevi bilong graun? Olsem God i makim pinis, wanem samting liklik taim bai painim Yunaitet Nesen? (b) Ol bikman bilong Yunaitet Nesen na ol man i kirap nogut long en, bilong wanem nem bilong ol i no stap long buk bilong God, em “buk bilong laip”? (c) Kingdom bilong Jehova bai mekim tru wanem wok?

⁸ Yunaitet Nesen i no save ol bai mekim wanem bilong stretim ol hevi, long wanem, Man bilong givim laip long ol man em i no givim laip long Yunaitet Nesen. Yunaitet Nesen i bilong i stap liklik taim tasol; olsem God i makim pinis, Yunaitet Nesen “bai i lus olgeta.” Ol bikman i bin kirapim Yunaitet Nesen, na ol man i “kirap nogut” long en, “nem bilong ol i no i stap long buk bilong laip,” em buk bilong God. Ol dispela sinman na man bilong dai, planti bilong ol i save tok bilas long nem bilong God, na ol i laik kirapim Yunaitet Nesen long mekim wok i no samting bilong Yunaitet Nesen long mekim, nogat; em wok bilong Jehova. Jehova i tok pinis, em yet bai mekim dispela wok, na em i no ken mekim long rot bilong ol man, nogat; em bai mekim long rot bilong Kingdom, na Krais bilong em bai bosim.​—⁠Daniel 7⁠:27; KTH 11⁠:⁠15.

⁹ Yunaitet Nesen i laik mekim wok olsem senis bilong Kingdom bilong God, olsem na em i gat bikpela rong. Krais Jisas em i “King bilong kamapim gutpela sindaun na bel isi,” na em bai bosim Kingdom bilong God na dispela samting i no ken pinis. (Aisaia 9⁠:​6, 7) Sapos Yunaitet Nesen inap long mekim dai pait, bihain liklik em pait bai kirap gen. Long wanem, ol man ol i sinman tasol, na pait em i pasin bilong ol. “Nem bilong ol i no i stap long buk bilong laip long taim God i no mekim graun i kamap yet.” Krais bai bosim Kingdom bilong Jehova, na dispela Kingdom bai kamapim gutaim na bel isi long graun na i no ken pinis. Ofa bilong Jisas i baim rong bilong ol man i dai pinis, olsem na dispela Kingdom i stap long han bilong Krais em bai kirapim bek ol, em ol stretpela man na man nogut wantaim, ol i stap long tingting bilong God. (Jon 5⁠:​28, 29; Aposel 24⁠:15) Sampela insait long dispela lain ol bai kirap bek long matmat, em olgeta man i bin sanap strong na sakim Satan na lain bilong em, na ol man i no bin kamapim yet bel bilong ol, olsem ol bai bihainim tok bilong God. Tasol ol man i strong long bihainim Bikpela Babilon o ol man i lotu yet long wel animal, nem bilong ol i no ken i stap long buk bilong God, nogat tru.​—⁠Kisim Bek 32⁠:33; Song 86⁠:​8-​10; Jon 17⁠:3; KTH 16⁠:2; 17⁠:⁠5.

Bel Isi na Gutpela Sindaun ​—⁠Ol i No Inap Painim

10, 11. (a) Yunaitet Nesen i mekim wanem long 1986? Dispela i pasim pait, o olsem wanem? (b) Hamas lain bilong lotu i bung long Asisi long Itali na ol i beten long gutaim i ken kamap? God i save harim dispela kain beten o olsem wanem? Stori long dispela samting.

¹⁰ Yunaitet Nesen i laik strongim tingting bilong ol man na bai ol i ken ting em inap pinisim ol pait, olsem na em i makim yia 1986 em “Yia Bilong Gutaim Long Olgeta Hap,” na as tok bilong dispela yia em olsem: “Bilong Pasim Pait na Helpim Ol Man na Bai Ol i Ken Stap Gut Long Bihain.” Yunaitet Nesen i tokim ol kantri i mekim pait, ol i mas lusim pait inap wanpela yia. Orait, olsem wanem? Ol i lusim pait? Ripot bilong wanpela oganaisesen (International Peace Research Institute) i tok, planti manmeri, olsem 5 milion, ol i dai long ol pait long dispela yia 1986! Tru, sampela kantri i wokim sampela mani na stem samting i gat mak bilong helpim ol man long tingim dispela yia bilong gutaim, tasol planti kantri i no mekim wanpela samting bilong daunim pait. Tasol ol lotu i laik stap gutpela long ai bilong Yunaitet Nesen, olsem na ol i mekim ol samting bilong litimapim yia 1986. Long Janueri 1, 1986, Pop John Paul Namba 2 i litimapim wok bilong Yunaitet Nesen na em i dediketim yia 1986 olsem yia bilong gutaim. Long Oktoba 27 em i singautim ol bikman bilong planti lotu na ol i bung long Asisi long Itali bilong beten long God i ken kamapim gutaim long graun.

¹¹ Yu ting God bai harim kain beten olsem bilong askim em long kamapim gutaim? Ol dispela bikman bilong lotu i beten long wanem God? Sapos yu askim ol wan wan ol bai kolim narapela narapela god. Yu ting i gat planti milion god i stap na ol inap harim ol beten bilong ol man em ol i mekim lotu long kain kain pasin? Na yu ting ol dispela god inap mekim ol samting ol dispela man i bin beten askim ol long mekim? Planti man long dispela bung ol i lotuim God Triwan bilong ol lotu i gat nem Kristen,c na sampela bilong lotu Buda na Hindu na sampela lotu moa ol i stap na ol i singsing lotu long ol bikpela lain god bilong ol. I gat lain bilong 12-pela kain lotu ol i bung, na sampela bikman bilong ol em Asbisop bilong Kantaberi, em bilong lotu Angliken, na Dalai Lama bilong lotu Buda, na bikman bilong lotu Otodoks bilong Rasia, na presiden bilong lotu Sinto bilong Japan, na sampela bilong wanpela lotu long Afrika, em ol i save lotu long ol spirit, na tupela Indian bilong Amerika, em tupela i bilasim het long gras bilong pisin. Ol dispela bikman bilong lotu ol i pasim kain kain bilas, na piksa bilong ol i kamap long televisen. Wanpela hap lain bilong ol i beten inap 12-pela aua na ol i no malolo. (Lukim Luk 20⁠:​45-​47.) Yu ting God i harim beten bilong ol? Nogat. Sampela as bilong dispela i olsem:

12. Wanem ol as na God i no harim beten bilong ol bikman bilong lotu taim ol i beten long kamapim gutaim?

¹² Baibel i tok, yumi mas “lotu long God [Jehova], . . . na bihainim em wanpela tasol,” tasol i no gat wanpela bilong ol dispela man bilong lotu i bin beten long Jehova, em dispela God i stap laip, na nem bilong em i stap 7,000 taim long Baibel bilong bipo. (Maika 4⁠:5; Aisaia 42⁠:​8, 12)d Taim ol i bung wantaim bilong beten, ol i no beten long God long nem bilong Jisas. Planti ol i no bilip long Krais Jisas. (Jon 14⁠:13; 15⁠:16) Na ol i no mekim laik bilong God long nau, olsem autim tok long olgeta hap na tokim ol man long Kingdom bilong God tasol bai stretim ol hevi bilong graun, na Yunaitet Nesen nogat. (Matyu 7⁠:​21-​23; 24⁠:14; Mak 13⁠:10) Ol dispela lotu i bin insait long ol pait nogut i bin kapsaitim blut bilong planti man, olsem dispela 2-pela bikpela pait i bin kamap long taim bilong yumi. God i tokim ol olsem: “Maski yupela i [beten] planti taim, bai mi pasim yau bilong mi. Long wanem, blut bilong ol man yupela i bin kilim, em i pas yet long ol han bilong yupela.”​—⁠Aisaia 1⁠:15; 59⁠:​1-3.

13. (a) Ol bikman bilong lotu ol i insait wantaim Yunaitet Nesen long singaut long gutaim i mas kamap, na bilong wanem dispela em i wanpela bikpela samting yumi mas tingim? (b) Ol bai singaut long gutaim i mas kamap, na ol bai mekim olsem i go inap long wanem samting i kamap olsem tok profet i makim?

¹³ Na wanpela bikpela samting yumi mas tingim, em ol bikman bilong ol lotu ol i insait wantaim Yunaitet Nesen long singaut long gutaim i mas kamap nau long dispela taim. Ol i tingim ol yet na ol i mekim olsem; long wanem, lain bilong ol i wok long lusim ol na i no givim bel moa long lotu. Ol dispela bikman i olsem ol bikman bilong lain Israel bilong bipo, ol i save tokim lain bilong ol olsem: “ ‘Yupela i no ken wari. Yumi stap gut.’ Tasol nogat. Ol i no stap gut.” (Jeremaia 6⁠:14) Ating ol bai singaut yet long gutaim i mas kamap, na ol bai mekim i go inap long samting i kamap olsem aposel Pol i tok profet long en, em i tok: “De bilong [Jehova] bai i kamap wantu tasol olsem stilman i kam long nait. Ol manmeri bai i tok olsem, ‘Nau em i gutpela taim tru. Yumi stap gut,’ na wantu tasol samting bilong bagarapim ol bai i kamap long ol, olsem pen i save kamap long meri i laik karim pikinini. Na ol bai i no inap abrusim dispela samting.”​—⁠1 Tesalonaika 5⁠:​2, 3.

14. Olsem wanem ol bai tokaut olsem ‘nau em i gutpela taim tru; yumi stap gut’? Yumi ken mekim wanem na bai dispela tok i no ken giamanim yumi?

¹⁴ Long taim bilong yumi, sampela man politik i bin mekim wok long tok olsem ‘nau em i gutpela taim tru; yumi stap gut’ bilong stori long sampela wok ol i mekim. Yu ting ol dispela wok ol hetman i mekim i makim olsem truim bilong tok bilong 1 Tesalonaika 5:3 i kirap pinis? O Pol i toktok long wanpela bikpela samting bai kamap na olgeta man bilong graun bai tingim dispela samting? Planti taim yumi klia tasol long ol tok profet bilong Baibel taim truim bilong ol i kamap pinis o taim truim bilong ol i wok long kamap. Olsem na yumi mas wet yet bilong save long dispela samting. Ol Kristen i save bel isi na gutaim ol lain manmeri i bin kamapim, i no bin senisim tru wanpela samting. Ol man i tingim laik bilong ol yet tasol, narapela i bel nogut long narapela, pasin birua, ol famili i bruk, pasin pamuk, planti sik, bel hevi, na dai tu, ol dispela samting bai painim yet ol man. Olsem na taim ol i tokaut long gutaim i laik kamap, dispela tok i no ken giamanim yu. Yu mas was gut na tingim ol samting nau i wok long kamap na bihainim ol toksave bilong Baibel.​​—⁠Mak 13:​32-​37; Luk 21:​34-​36.

[Ol Futnot]

[Blok long pes 250]

Olsem Wanem Long “Gutaim”?

Yunaitet Nesen i tok, 1986 em Yia Bilong Gutaim Long Olgeta Hap, tasol ol kantri i resis long wokim planti samting bilong pait. Wanpela oganaisesen (World Military and Social Expenditures 1986) i tok olsem:

Long 1986 ol kantri i tromoi 900 tausen milion kina long kisim ol samting bilong pait.

Mani ol i bin tromoi long ol samting bilong pait long wanpela aua tasol em inap helpim 3,500,000 man i bin dai long ol kain kain sik long olgeta yia long wanem ol i no gat marasin.

Long olgeta hap, wanpela bilong ol 5-pela 5-pela man i no bin i gat kaikai. Mani ol kantri i bin tromoi long tupela de long ol samting bilong pait em inap baim kaikai bilong ol dispela man inap wanpela yia.

Ol bom nuklia ol i bin bungim long olgeta kantri, strong bilong en i winim pairap i bin kamap long Senobil na i strong moa inap 160,000,000 taim.

Long 1945 ol i tromoi bom nuklia long Hirosima, tasol long 1986 i gat sampela bom em strong bilong ol i winim strong bilong bom ol i bin tromoi long Hirosima inap 500 taim.

Strong bilong ol bom nuklia i bin winim bilong Hirosima inap 1 milion taim. Ol bom bilong Namba 2 Pait i kilim i dai 38 milion man, tasol strong bilong ol bom i bin winim strong bilong ol dispela bom inap 2,700 taim.

Planti pait moa i bin kamap, na moa moa man i dai. Long yia 1700 inap 1799 em 4,400,000 i dai long pait. Long yia 1800 inap 1899 em 8,300,000 i dai long pait. Tasol long yia 1900 inap 1986 em 98,800,000 i dai long pait. Long yia 1700 na inap nau, planti man i dai long pait, winim ol nupela pikinini i kamap. Long ol yia namel long 1900 na 2000 planti man moa i dai long pait, winim bilong yia 1800 i go inap 1900.

[Ol Piksa long pes 247]

Olsem tok profet i makim, retpela wel animal, em Lig ov Nesen, em i go insait long hul long taim bilong Namba 2 Pait, na i olsem em i dai pinis; tasol bihain em i kirap bek na nau em i stap olsem Yunaitet Nesen

[Ol Piksa long pes 249]

Ol bikman bilong ol lotu ol i laik helpim “Yia Bilong Gutaim” bilong Yunaitet Nesen, na ol i bung long Asisi long Itali na ol i beten, tasol i no gat wanpela i beten long God Jehova