Sapta 35
Bikpela Babilon i Kisim Strafe
1. Ensel i tok wanem long retpela wel animal? Yumi mas i gat wanem kain gutpela tingting na bai yumi ken save long insait bilong ol tok piksa bilong Kamapim Tok Hait?
LONG Kamapim Tok Hait 17:3 ensel i stori moa long Jon long dispela retpela wel animal, na em i tok: “Man i gat gutpela tingting, em inap save gut long dispela samting. Dispela 7-pela het i makim 7-pela maunten. Na meri i sindaun antap long ol dispela 7-pela maunten. Na tu, dispela 7-pela het i makim 7-pela king. 5-pela ol i bagarap pinis, na wanpela nau i stap, na wanpela i no kamap king yet. Taim em i kamap pinis, orait em i mas i stap liklik taim tasol.” (KTH 17:9, 10) Dispela ensel i givim gutpela tingting bilong God long Jon, na dispela tingting tasol inap long helpim man na bai em i ken save long insait bilong ol tok piksa long Kamapim Tok Hait. (Jems 3:17) Dispela kain gutpela tingting i kam long God em i givim save long dispela liklik lain em Jon i piksa bilong ol, na i givim save long lain poroman bilong ol tu, na bai ol i ken save, nau yumi stap long wanpela bikpela taim. Na dispela gutpela tingting i helpim ol man i gat gutpela bel long pilim tru olsem strafe bilong kot bilong Jehova i stret tasol, na klostu nau bai em i kamapim, na ol i save ol i mas pret long Jehova. Olsem Sindaun 9:10 i tok: “Sapos yu laik kisim gutpela tingting, orait pastaim yu mas aninit long Bikpela. God em i gutpela na stretpela olgeta. Na sapos yu laik kisim gutpela save, orait pastaim yu mas save gut long em.” Dispela gutpela tingting i kam long Jehova em i ken givim wanem save long yumi long dispela wel animal?
2. Sevenpela het bilong retpela wel animal i makim wanem samting? Olsem wanem na “5-pela ol i bagarap pinis, na wanpela nau i stap”?
2 Sevenpela het bilong dispela wel animal nogut i olsem “7-pela maunten,” o “7-pela king,” na long Baibel dispela tupela samting i makim sampela gavman. (Jeremaia 51:24, 25; Daniel 2:34, 35, 44, 45) Baibel i stori long 6-pela gavman i bin mekim sampela samting long lain bilong God, em Isip, na Asiria, na Babilon, na Midia wantaim Persia, na Grik, na Rom. Faipela i bin kamap i stap na i pinis gen paslain long taim Jon i bin kisim dispela driman, tasol Rom i stap yet olsem strongpela gavman, olsem na Baibel i tok, “5-pela ol i bagarap pinis, na wanpela nau i stap.” Tasol olsem wanem long dispela “wanpela i no kamap king yet”?
3. (a) Olsem wanem gavman bilong Rom i bruk? (b) Wanem ol samting i bin kamap long hap bilong Wes? (c) Olsem wanem long Gavman Holi Bilong Rom?
3 Bihain long taim bilong Jon, gavman bilong Rom i stap inap sampela handet yia moa na em i go bikpela. Pastaim biktaun bilong en em taun Rom, tasol long yia 330 Bikman Konstantin i makim taun Bisantiam bilong kamap biktaun bilong kantri, na Konstantin i senisim nem bilong dispela taun na em i kolim Konstantinopel. Long yia 395 gavman bilong Rom i bruk na nau i gat hap bilong Is na hap bilong Wes. Na long yia 410 King Alarik i daunim gavman bilong Rom. (Alarik i bilong lain Visigot bilong Jemani na em i bilong lotu Arian, em wanpela lotu i gat nem “Kristen.”) Sampela lain Jeman (ol tu i bilong lotu i gat nem “Kristen”) ol i daunim ol Spen na kisim kantri bilong ol na bikpela hap bilong Not Afrika em gavman bilong Rom i bosim. Inap sampela handet yia ol gavman long Yurop i kros na pait, na bihain ol i stretim tok na mekim dai pait. Sampela bikman olsem king i bin kamap long hap bilong Wes—Salemein em wanpela. Em i wokim kontrak wantaim Pop Leo Namba 3 long yia 850 samting, na Frederik Namba 2 em i bin stap king long yia 1250 samting. Gavman bilong ol em ol i kolim Gavman Holi Bilong Rom, tasol em i no bikpela olsem olpela gavman bilong Rom; em i olsem liklik hap bilong olpela gavman bilong Rom em i go yet.
4. Gavman bilong Is i kisim wanem ol hap? Tasol olsem wanem long ol bikpela hap bilong olpela gavman bilong Rom long Not Afrika na Spen na Siria?
4 Gavman bilong Rom long hap bilong Is long Konstantinopel em i no pren tumas wantaim gavman bilong Rom long hap bilong Wes. Long yia 550 samting Bikman Jastinian Namba 1 bilong gavman bilong Is em i kisim bek bikpela hap bilong Not Afrika, na em i go insait long Spen na Itali tu. Na long yia 690 samting Bikman Jastinian Namba 2 bilong Is em i kisim bek sampela hap bilong Masedonia, em sampela lain Slav i bin holim. Tasol long yia 710 samting nupela gavman Islam i kisim bikpela hap bilong olpela gavman bilong Rom long Not Afrika na Spen na Siria, na Konstantinopel na Rom i no bosim moa.
5. Ol man i daunim gavman bilong Rom long yia 410, tasol olsem wanem hap pasin o lo bilong dispela gavman i stap inap sampela handet yia moa?
5 Taun Konstantinopel i stap inap liklik taim moa, maski ol Persia na Arap na Balga na Rasia i laik daunim. Tasol long yia 1203 ol lain i gat nem Kristen bilong hap bilong Wes ol i kam na daunim. Na long yia 1453 wanpela Muslim, em Mehmet Namba 2 bilong Turki, i kirap long bosim Konstantinopel, na em i kamap nambawan biktaun bilong ol Turki. Ol man i daunim gavman bilong Rom long yia 410, tasol hap pasin o lo bilong dispela gavman em i stap inap sampela handet yia moa, na i pinis. Tasol sampela gavman em lotu i insait long en ol i bihainim yet sampela hap pasin bilong lotu bilong Rom na bilong lotu Otodoks bilong Is.
6. Wanem sampela nupela gavman i bin kamap? Wanem gavman i kamap bikpela moa?
6 Kirap long yia 1400 samting sampela nupela kain gavman i wok long kamap long sampela kantri. Tru, bipo sampela bilong ol dispela kantri i bin stap aninit long gavman bilong Rom, tasol ol i no olsem dispela gavman. Gavman bilong Potyugal na Spen na Frans na Holan i kamap bikpela na bosim planti hap i stap longwe. Inglan i kamap bikpela moa na i bosim sampela kantri long olgeta hap bilong graun. Sampela taim dispela gavman bilong Inglan i bin bosim sampela hap long Not Amerika na Afrika na India na Saut-Is Esia na bikpela hap bilong Saut Pasifik tu.
7. Olsem wanem wanpela gavman i bin kamap, em i gat tupela hap bilong en? Jon i tok, dispela namba 7 “het,” o gavman, bai stap inap longtaim, o olsem wanem?
7 Kirap long yia 1800 samting sampela lain long Not Amerika i bruk long Inglan na ol yet i kamapim gavman, olsem gavman bilong Amerika yet. Hap kros i stap namel long dispela nupela gavman wantaim gavman bilong Inglan, tasol taim Namba Wan Pait i kirap, tupela i kamap pren, long wanem, sampela samting bilong ol Inglan i wankain olsem sampela samting bilong ol Amerika na ol i pilim olsem ol i mas pas wantaim bilong kisim strong. Ol dispela samting i mekim, na nau tupela i kamap olsem wanpela bikpela gavman. Long nau Amerika i gat planti mani kago na ol samting bilong graun, winim ol narapela kantri, na Inglan i bosim planti hap, winim ol narapela gavman; dispela tupela gavman i kamap olsem wanpela, em dispela namba 7 “het,” o bikpela gavman bilong graun, long taim bilong pinis. Em i bosim ol hap em ol Witnes Bilong Jehova long nau ol i bin kamap long en. Namba 6 “het” i bin stap longpela taim, tasol dispela namba 7 “het” “em i mas i stap liklik taim tasol,” inap long taim Kingdom bilong God i pinisim olgeta gavman bilong graun.
Olsem Wanem Em i Namba 8 King?
8, 9. Ensel i tok, retpela wel animal i olsem wanem samting? Olsem wanem “em i wanlain bilong ol [narapela] 7-pela king”?
8 Ensel i stori moa long Jon olsem: “Na dispela wel animal bipo em i stap, na nau em i no i stap, em i olsem namba 8 king. Tasol em i wanlain bilong ol 7-pela king, na em bai i lus olgeta.” (KTH 17:11) Ol “7-pela het” i kamapim retpela wel animal, olsem na ensel i tok, “em i wanlain bilong ol 7-pela king.” Ol het bilong dispela wel animal bilong pastaim, em dispela “wel animal i kamap long solwara,” ol yet i bin kirapim retpela wel animal, na em i olsem piksa bilong dispela wel animal bilong solwara. Olsem wanem 7-pela het i bin kirapim retpela wel animal? Em olsem: Long 1919 gavman bilong Inglan wantaim Amerika i stap nambawan strongpela het—ol 6-pela narapela i pundaun pinis, na Inglan tupela Amerika i stap bikpela gavman bilong graun, olsem namba 7 het, na em i olsem maus bilong olgeta 7-pela, na em i bin wok long kirapim Lig ov Nesen, na long nau em i go pas long strongim Yunaitet Nesen na helpim em long bikpela mani samting. Olsem na retpela wel animal—em namba 8 king—“em i wanlain bilong ol [narapela] 7-pela king,” o gavman. Dispela tok i stret wantaim narapela tok bilong pastaim, em i stori long wanpela wel animal i gat tupela kom olsem bilong sipsip (em Inglan wantaim Amerika, em namba 7 het bilong namba wan wel animal) na em i kirapim ol man long kamapim piksa bilong namba wan wel animal na givim strong long en.—KTH 13:1, 11, 14, 15.
9 Sampela memba bilong pastaim long Lig ov Nesen, em gavman bilong Inglan wantaim sampela gavman i bin i stap long bipo na nau ol i stap yet, olsem gavman bilong Grik na Iran (olsem Persia) na Itali (olsem Rom). Ol kantri em 6-pela bikpela gavman i bin bosim bipo, nau ol narapela gavman i bosim, na ol dispela gavman ol i memba bilong piksa bilong wel animal. Olsem na yumi ken tok, retpela wel animal “em i wanlain bilong ol [narapela] 7-pela king.”
10. (a) Dispela retpela wel animal, olsem wanem “em i olsem namba 8 king” tu? (b) Olsem wanem wanpela bikman bilong Rasia i bin helpim Yunaitet Nesen?
10 Na dispela retpela wel animal “em i olsem namba 8 king” tu, long wanem, Yunaitet Nesen em i kain olsem wanpela bikpela gavman. Sampela taim em i bin mekim wok olsem bilong king, o gavman: Em i bin salim ol ami i go bilong stretim kros i bin kamap namel long sampela kantri, olsem long Korea, na Poin Bilong Sainai, na sampela kantri long Afrika, na Lebanon. Tasol em i piksa tasol bilong king, o gavman. Em i kain olsem wanpela piksa bilong lotu; em yet i no gat strong—strong bilong en em i kisim long ol dispela lain i bin kirapim em na ol i lotuim em. Sampela taim i olsem dispela wel animal i no gat strong, tasol i no planti memba bilong en i givim baksait long en na lusim em olgeta olsem ol i bin mekim long Lig ov Nesen na em i bin bagarap, nogat. (KTH 17:8) Wanpela bikman bilong Rasia i no gat wankain tingting olsem bilong ol pop bilong Rom, tasol long 1987 em i helpim Yunaitet Nesen olsem ol pop i save mekim. Em i tok, Yunaitet Nesen i mas i stap olsem wanpela samting bilong helpim olgeta kantri long i stap gut. Na olsem ensel i tokim Jon, bihain Yunaitet Nesen bai kisim bikpela strong na mekim wanpela bikpela samting, tasol bihain moa “em bai i lus olgeta.”
Tenpela i Stap King Inap Wanpela Aua
11. Ensel bilong Jehova i tok wanem long 10-pela kom bilong retpela wel animal?
11 Kamapim Tok Hait sapta 16 i tok, namba 6 na namba 7 ensel i kapsaitim ol dis i gat belhat bilong God i stap insait long en, olsem na yumi save, God i bungim ol king bilong graun long pait bilong em long Armagedon, na em bai “tingim pasin bilong bikpela taun Babilon.” (KTH 16:1, 14, 19) Orait, nau bai yumi kisim sampela save moa long olsem wanem God bai givim strafe long ol dispela lain olsem kot bilong em i bin makim. Yumi harim gen ensel bilong Jehova i toktok moa long Jon: “Na dispela 10-pela kom yu bin lukim i kamap long ol het bilong dispela wel animal, ol i makim 10-pela king. Ol i no kamap king yet. Tasol ol bai i kisim strong wantaim dispela wel animal, na ol bai i stap king inap olsem wanpela aua tasol. Ol dispela king bai i gat wanpela tingting tasol, na ol bai i givim olgeta strong na namba bilong ol yet long wel animal. Ol bai i pait long Pikinini Sipsip, na Pikinini Sipsip bai i winim ol tru. Em i Bikpela bilong olgeta bikman, na em i King bilong olgeta king. Na olgeta man i stap wantaim em, em ol lain em i bin singautim ol na em i bin makim ol bilong em yet na ol i save bihainim tru tok bilong em, ol dispela man bai i win wantaim Pikinini Sipsip long dispela pait.”—KTH 17:12-14.
12. (a) Tenpela kom i makim wanem samting? (b) Olsem wanem “10-pela kom . . . i no kamap king yet”? (c) Olsem wanem na long nau 10-pela kom i kamap king pinis? Ol bai holim wok gavman inap long wanem taim?
12 Tenpela kom i makim olgeta wok gavman long graun long dispela taim na ol i givim bel long piksa bilong wel animal. Planti gavman bilong nau ol i no bin stap long taim bilong Jon. Sampela i bin stap, olsem Isip na Persia (Iran), tasol long nau wok politik bilong ol i narapela kain. Olsem na long taim bilong Jon dispela “10-pela kom . . . i no kamap king yet.” Tasol long nau long de bilong Bikpela ol i kisim namba long wok politik, olsem na nau ol i “kamap king” pinis. Ol bikpela gavman bilong bipo i pundaun pinis, olsem bihain long Namba 2 Pait samting, na planti nupela gavman i kamap. Ol dispela nupela gavman wantaim ol gavman bilong pastaim ol i mas holim wok gavman wantaim wel animal inap sotpela taim—“inap olsem wanpela aua tasol”—na bihain Jehova bai pinisim olgeta wok politik bilong dispela graun long Armagedon.
13. Olsem wanem na 10-pela kom “bai i gat wanpela tingting tasol”? Na dispela tingting bai kirapim ol long mekim wanem long Pikinini Sipsip?
13 Long nau ol dispela wan wan kom i strong long litimapim nem na gavman na kantri bilong ol yet. Ol “i gat wanpela tingting tasol,” em bilong holimpas wok king, o wok gavman, bilong ol yet na maski long Kingdom bilong God. Dispela tingting i bin kirapim ol long kamapim Lig ov Nesen na Yunaitet Nesen na bai dispela samting i ken daunim ol pait na olgeta kantri ol i ken stap bel isi wantaim na ol i no ken bagarap. Na dispela tingting bai kirapim ol dispela kom long “pait long Pikinini Sipsip, . . . em i Bikpela bilong olgeta bikman, na em i King bilong olgeta king”; ol dispela kom i mas mekim olsem, long wanem, Jehova i tok pinis, klostu nau bai Kingdom bilong em, em Krais Jisas i bosim, em bai senisim olgeta dispela narapela gavman.—Daniel 7:13, 14; Matyu 24:30; 25:31-33, 46.
14. Olsem wanem ol gavman bilong graun inap pait wantaim Pikinini Sipsip? Husat bai win?
14 Tasol ol dispela gavman bilong graun i no inap mekim wanpela samting long Jisas yet, long wanem, em i stap long heven. Tasol ol brata bilong em, olsem lain pikinini bilong “meri,” ol i stap yet long graun na i olsem ol i stap ples klia long ai bilong ol dispela birua. (KTH 12:17) Planti bilong ol dispela kom, olsem gavman, i bin mekim pasin birua long ol dispela brata bilong Jisas, na long dispela rot i olsem ol “i pait long Pikinini Sipsip.” (Matyu 25:40, 45) Tasol klostu nau Kingdom bilong God “bai i daunim ol na bagarapim ol [dispela] arapela king na kingdom.” (Daniel 2:44) Long dispela taim ol dispela gavman, o king, bilong graun ol bai pait wantaim Pikinini Sipsip, tasol ol bai lus, na bihain bai yumi stori gut long dispela samting. (KTH 19:11-21) Em nau, yumi save pinis olsem ol lain bilong graun bai i no inap win. Ol dispela lain wantaim Yunaitet Nesen, em dispela retpela wel animal, ol “i gat wanpela tingting tasol,” tasol ol i no inap daunim “Bikpela bilong olgeta bikman, na . . . King bilong olgeta king,” na ol i no inap daunim “ol lain em i bin singautim ol na em i bin makim ol bilong em yet na ol i save bihainim tru tok bilong em.” Sampela bilong dispela lain em God i bin makim ol, ol i stap yet long graun. Satan i sutim tok nogut long ol, tasol ol tu bai winim pait sapos ol i stap strong.—Rom 8:37-39; KTH 12:10, 11.
Ol i Bagarapim Pamukmeri
15. Ensel i tok wanem long pamukmeri na long tingting bilong 10-pela kom na wel animal, na ol samting ol bai mekim long em?
15 Na 10-pela kom i no biruaim lain bilong God tasol. Nau ensel i stori gen long dispela pamukmeri, olsem Jon i tok: “Na ensel i tokim mi moa olsem, ‘Ol dispela bikpela wara yu bin lukim pamukmeri i sindaun antap long ol, ol i makim ol manmeri bilong olgeta lain man na bilong olgeta kain skin na bilong olgeta tok ples na bilong ol bikpela bikpela lain ol i bung i stap. Na ol dispela 10-pela kom yu bin lukim, ol dispela kom wantaim dispela wel animal ol bai i birua long pamukmeri. Ol bai i bagarapim em tru na rausim olgeta klos samting bilong en. Na ol bai i kaikai mit bilong bodi bilong en, na kukim em olgeta long paia.’ ”—KTH 17:15, 16.
16. Taim ol gavman i kirap biruaim Bikpela Babilon, olsem wanem na ol wara bilong en i no inap helpim em?
16 Ol bikpela wara i bin helpim Babilon bilong bipo long sakim ol birua, na olsem tasol long Babilon bilong nau, em i tingim bikpela lain bilong em bai lukautim em bambai em i no ken kisim bagarap, em ol dispela “manmeri bilong olgeta lain man na bilong olgeta kain skin na bilong olgeta tok ples na bilong ol bikpela bikpela lain.” Ensel i stori long ol dispela lain pastaim, na nau em i kolim wanpela bikpela samting bai kamap: Ol gavman bilong graun bai kirap biruaim Bikpela Babilon. Long dispela taim, olsem wanem long ol dispela “manmeri bilong olgeta lain man na bilong olgeta kain skin na bilong olgeta tok ples na bilong ol bikpela bikpela lain” i bin helpim em? Long nau lain bilong God i wok long toksave long Bikpela Babilon, ol i tok, wara Yufretis bai drai. (KTH 16:12) Ol dispela wara bai pinis olgeta. Olsem na bihain bai ol i no inap lukautim dispela pamukmeri nogut long taim em i sot tru long sampela bilong helpim em.—Aisaia 44:27; Jeremaia 50:38; 51:36, 37.
17. (a) Olsem wanem na ol mani kago bilong Bikpela Babilon bai i no inap helpim em? (b) Taim Bikpela Babilon i kisim bagarap, olsem wanem em bai kisim sem? (c) Tenpela kom, olsem ol gavman, ol bai bagarapim Bikpela Babilon, tasol wanem samting moa bai helpim ol?
17 Bikpela mani kago bilong Bikpela Babilon, dispela tu i no inap helpim em. Ating mani kago yet bilong em i wanpela as na em bai kisim bagarap, long wanem, ensel i tok, wel animal wantaim 10-pela kom bai mekim save long dispela meri na ol bai rausim ol klos na bilas bilong em i dia tumas. Ol bai stilim ol dispela mani kago bilong em, olsem “rausim olgeta klos samting bilong en,” na pasin tru bilong em bai kamap ples klia. Em bai bagarap tru! Na em bai kisim sem long dispela kain bagarap i painim em, long wanem, “ol bai i kaikai mit bilong bodi bilong en,” na em bai kamap olsem ol bun bilong man i dai pinis bipo. Na ol bai “kukim em olgeta long paia,” olsem wanpela samting i gat sik nogut long en, na ol i no ken planim em gut long matmat! Na i no ol gavman tasol, olsem 10-pela kom hia bai bagarapim dispela pamukmeri, nogat; wel animal tu, em Yunaitet Nesen, em bai helpim ol long mekim dispela samting. Em bai orait long bagarapim ol lotu giaman. I gat 190 gavman insait long Yunaitet Nesen, na planti bilong ol i mekim sampela samting i makim olsem ol i no laikim ol lotu, na ol i moa bel nogut long ol lotu i gat nem Kristen.
18. (a) Wanem pasin i bin kamap na dispela i olsem as na ol gavman bai kirap biruaim ol lotu bilong Bikpela Babilon? (b) Tasol wanem as tru na ol bai biruaim dispela pamukmeri?
18 Ol gavman i bin prenim dispela meri, tasol olsem wanem yumi ken save, bihain bai ol i biruaim em? Yumi lukim sampela pasin i bin kamap, na dispela i olsem wanpela as bilong kirapim ol long bagarapim ol dispela lotu bilong Bikpela Babilon. Planti gavman i no laikim moa ol lotu, olsem na ol lotu i no gat strong moa, olsem long Rasia na Saina samting. Na lain bilong ol lotu Talatala long Yurop i no givim bel moa long lotu, na planti ol i no bilip moa, na wan wan tasol i save go lotu, na i olsem lotu bilong ol i dai pinis. Na long hap bilong ol Katolik ol man i no stap wanbel. Ol i bikhet, na ol i bruk, na hetman bilong ol i no inap mekim ol i kamap wanbel. Tasol yumi mas save, as tru bilong Bikpela Babilon i mas bagarap em i olsem: God i skelim em pinis long kot na God i pasim tok pinis long bagarapim dispela bikpela pamukmeri.
Ol i Bihainim Tingting Bilong God
19. (a) Taim Jehova i bin givim strafe long ol bikhetman bilong Jerusalem long yia 607 paslain long Krais, olsem wanem dispela i makim samting bai painim bikpela pamukmeri? (b) Taim Jerusalem i bagarap long yia 607 paslain long Krais na ples i stap nating na i no gat man, dispela i makim wanem samting bilong nau?
19 Jehova bai givim dispela strafe long ol olsem wanem? Yumi ken tingim ol samting em i bin mekim long lain bikhetman bilong em long bipo. Em i bin tok long ol olsem: “Mi lukim ol profet bilong Jerusalem i mekim stingpela pasin tru. Ol i bihainim pasin bilong brukim marit na pasin bilong giaman. Ol i save strongim ol man bilong mekim pasin nogut. Olsem na i no gat wanpela man i givim baksait long ol dispela kain pasin. Mi lukim olgeta Jerusalem i manmeri nogut olsem ol Sodom na ol Gomora.” (Jeremaia 23:14) Long yia 607 paslain long Krais, long rot bilong Nebukatnesar, Jehova i ‘rausim ol klos bilong ol na kisim ol bis na ring samting bilong ol na ol i stap nating,’ na pasin nogut bilong Jerusalem i kamap ples klia. (Esekiel 23:4, 26, 29) Jerusalem long dispela taim bipo i makim ol lotu bilong nau ol i gat nem Kristen, na olsem Jon i bin lukim long ol narapela driman, Jehova bai givim strafe long ol dispela lotu giaman i gat nem Kristen na ol narapela lotu giaman tu olsem em i bin mekim long Jerusalem. Taim Jerusalem i kisim bagarap long yia 607 paslain long Krais, ples i stap nating na i no gat man; orait, ol lotu giaman i gat nem Kristen ol bai kamap olsem tasol taim Jehova i tekewe ol mani kago na ol gutpela gutpela samting bilong ol na rong bilong ol i kamap ples klia long ai bilong ol man. Na ol narapela hap bilong Bikpela Babilon bai kisim wankain strafe.
20. (a) Jon i tok wanem na yumi save, Jehova bai mekim wok gen long ol gavman long givim strafe long ol lotu giaman? (b) Wanem dispela “tingting” bilong God? (c) Ol gavman bai mekim wanem na bai ol i bihainim dispela “wanpela tingting tasol” bilong ol? Tasol taim ol i mekim dispela samting, ol i bihainim tingting na laik bilong husat tru?
20 Na olsem Jehova i bin mekim bipo, em bai kirapim ol gavman long givim strafe long ol lotu giaman. “God yet i givim tingting long ol dispela king, bai ol i ken mekim ol dispela samting i kamap, em ol samting bipo God i tok pinis long ol i mas kamap. Ol bai i gat wanpela tingting tasol, na dispela strong ol i kisim bilong i stap king, ol bai i givim dispela olgeta long wel animal. Ol bai i mekim olsem i go inap long taim God inapim pinis olgeta samting em i bin tok long en.” (KTH 17:17) Wanem dispela “tingting” bilong God em bai ‘givim long ol dispela’ gavman? Em i olsem: Em i laik bai ol gavman i mas pasim tok wantaim long bagarapim Bikpela Babilon olgeta. Tasol ol gavman bai ting ol i bihainim tingting bilong ol yet taim ol i mekim dispela samting, em dispela “wanpela tingting tasol” bilong ol. Ol bai tingting long bagarapim dispela bikpela pamukmeri na bai em i no ken i stap moa na mekim nogut long wok bilong ol. Ating ol bai ting, nogut ol dispela lotu i paulim wok gavman bilong ol o givim hevi long ol o tekewe wok king bilong ol. Tasol Jehova yet bai stiaim tingting bilong ol gavman na bai ol i mas bihainim tingting na laik bilong em yet, na wantu ol bai bagarapim dispela birua bilong em bilong bipo.—Lukim Jeremaia 7:8-11, 34.
21. Ol gavman bai mekim wok long retpela wel animal bilong bagarapim Bikpela Babilon, olsem na ol bai mekim wanem long Yunaitet Nesen?
21 Ol gavman bai mekim wok long retpela wel animal, em Yunaitet Nesen, long bagarapim Bikpela Babilon. Em i no tingting bilong ol yet, nogat. Jehova bai givim dispela tingting long ol na ol bai mekim. “Ol bai i gat wanpela tingting tasol, na dispela strong ol i kisim bilong i stap king, ol bai i givim dispela olgeta long wel animal.” Long dispela taim ating ol gavman bai pilim olsem ol i mas givim strong long Yunaitet Nesen, olsem givim tit long en, na ol bai givim namba na strong bilong ol long en bambai em i ken biruaim ol lotu giaman na daunim ol na “mekim olsem i go inap long taim God inapim pinis olgeta samting em i bin tok long en.” Olsem na dispela olpela meri pamuk bai pinis olgeta. Em gutpela tru!
22. (a) Taim ensel i mekim laspela tok bilong em long Kamapim Tok Hait 17:18, dispela i makim wanem samting bai kamap? (b) Taim ol Witnes Bilong Jehova i kisim save long ol samting bilong dispela bikpela pamukmeri na long retpela wel animal, ol i save mekim wanem?
22 Ensel i laik bai Jon i save gut olsem Jehova bai pinisim tru olgeta lotu giaman, olsem na laspela tok bilong ensel, em i tok: “Na dispela meri yu bin lukim, em i makim dispela bikpela taun i save bosim olgeta king bilong graun.” (KTH 17:18) Long taim bilong Belsasar, Jehova i skelim pasin bilong taun Babilon, na “skel bilong en i soim olsem [em i] no save mekim gutpela pasin.” Na i olsem tasol long Bikpela Babilon. (Daniel 5:27) Em bai bagarap hariap, na em bai pinis olgeta. Taim ol Witnes Bilong Jehova i kisim save long ol samting bilong dispela bikpela pamukmeri na long retpela wel animal, ol i save mekim wanem? Ol i givim bel long tokim ol man long De bilong Jehova long skelim pasin bilong ol man, na ol i “mekim gutpela tok” long ol man i laik save long tok i tru. (Kolosi 4:5, 6; KTH 17:3, 7) Sapta 36 bai stori long ol man i laik abrusim bagarap long taim bikpela pamukmeri i kisim bagarap—ol i mas mekim sampela samting, na ol i mas mekim hariap!
[Ol Piksa long pes 252]
Sevenpela Gavman i Bin Kamap Long Graun
ISIP
ASIRIA
BABILON
MIDIA na PERSIA
GRIK
ROM
INGLAN na AMERIKA
[Ol Piksa long pes 254]
“Em i olsem namba 8 king”
[Piksa long pes 255]
Ol bai givim baksait long Pikinini Sipsip “na ol bai i givim olgeta strong na namba bilong ol yet long wel animal”
[Piksa long pes 257]
Ol lotu giaman i gat nem Kristen ol i bikpela hap bilong Bikpela Babilon na ol bai bagarap olsem Jerusalem bilong bipo i bin mekim