Mipela Wok Long Painim Kingdom Pastaim

STORI BILONG OLIVE SPRINGATE

Mama i harim pinis beten bilong mipela, na em i mekim dai kandel na em i go, na liklik susa i askim mi: “Olive, yumi stap insait long haus brik, na olsem wanem God inap lukim yumi na harim tok bilong yumi?”

MI TOKIM em: “Mama i tok em inap lukim olgeta samting, na em i ken save long wanem tingting i stap long bel bilong yumi tu.” Mama i bilip strong long God, na oltaim em i kaunim Baibel, na em i lainim mipela long daun long God na ol lo bilong Baibel.

Papamama i bilong Misin Angliken long liklik taun Satam long provins Ken long Inglan. Mama i go oltaim long lotu, tasol em i ting Kristen i mas mekim sampela samting moa​—⁠i no bilong sindaun tasol insait long haus lotu. Na em i ting wanpela misin tasol i bilong God.

Laikim Tok Bilong Baibel

Long 1918 mi gat 5-pela krismas na mama i kisim sampela buk (Studies in the Scriptures) bilong Charles T. Russell, em namba wan presiden bilong Sosaiti Was Taua. Sampela yia bihain mipela stap long liklik ples Wigmo na mama i bungim ol Sumatin Bilong Baibel, em ol Witnes Bilong Jehova, na ol i givim wanpela buk (The Harp of God) long em. Em i kisim planti save long dispela buk. Long olgeta wik em i kisim retpela kat i gat ol askim long en na i makim wanem hap long buk i gat ol bekim i stap.

Long 1926 mi wantaim papamama na liklik brata Beryl mipela i lusim Misin Angliken. Mipela les long wok politik na bilip giaman bilong misin. Misin i tok, God i save givim bikpela pen long ol man long bikpaia. Mama i wok strong long painim tok tru bilong Baibel, na nau em i save pinis, tok i tru i no stap long Misin Angliken.

Mama i bin beten strong long painim tok i tru, na bihain liklik, Misis Jackson, em wanpela Sumatin Bilong Baibel, em i kam lukim mipela. Mitupela mama i givim planti askim bilong Baibel long em na em i bekim i go inap tupela aua. Nau mipela i save, yumi no ken beten long wanpela God Triwan, nogat; yumi mas beten long God Jehova, em Papa bilong Krais Jisas. (Song 83:18; Jon 20:17) Na mama i askim em: “Olsem wanem na namba wan wok bilong yumi i bilong painim Kingdom bilong God?” Mi tingim yet dispela askim bilong em.​—⁠Matyu 6:⁠33.

Misis Jackson i kamapim tok bilong Baibel long ol samting bilong Kingdom, na mipela i bihainim dispela tok i kam inap nau. Kirap long dispela taim bipo mipela i go long ol miting bilong ol Sumatin Bilong Baibel, na ol tok mipela i lainim mipela i autim long ol narapela man. Mipela painim pinis tok i tru. Long 1927 mama i kisim baptais bilong makim dediket o tok promis bilong em long mekim wok bilong Jehova, na long 1930 mi tu mi mekim olsem.

Kirap Mekim Wok Painia

Mipela bin go long Kongrigesen Gilingham, na i gat 25 manmeri i save bung. Sampela i wok painia, na olgeta i bilong lain remnan, em ol i gat tingting long i go long heven. (Filipai 3:​14, 20) Mi lukim ol i givim bel, na dispela i kirapim mi tu. Olsem na taim mi gat 18 krismas mi kirap mekim wok painia inap liklik taim long Beljam long 1931. Dispela i kirapim tru laik bilong mi long mekim bikpela wok moa bilong Kingdom. Long dispela taim mipela tilim wanpela buklet (The Kingdom, the Hope of the World) long olgeta pris pasto.

Bihain papa i kamap birua bilong dispela wok Kristen, olsem na long 1932 mi ranawe i go long Landon na mi skul long bikpela skul koles. Bihain mi kamap tisa, na mi mekim dispela wok inap 4-pela yia, na long dispela taim mi go long Kongrigesen Blakhit. I gat 3-pela kongrigesen moa tasol long Landon long dispela taim. Mipela harim ol i mekim nogut long ol brata sista Kristen long Jemani, long wanem, ol i no laik helpim Hitler long pait.

Mi bin baim sampela buk, na long 1938 mi pinisim dinau bilong dispela, olsem na mi lusim wok mani na bai mi ken kamap painia. Brata bilong mi Beryl em tu i kirap mekim wok painia long Landon long dispela taim, tasol em i stap long narapela haus painia wantaim sampela moa. Namba wan poroman painia bilong mi, em Mildred Willett. Bihain em i maritim John Barr, nau em i memba bilong Lain Bilong Bosim Ol Witnes. Mitupela na sampela moa long grup i save raun long wilwil na autim tok i go inap apinun, maski i gat ren.

Pait i laik kamap long Yurop. Ol man i lain long putim wanpela samting long pes bilong pasim ges nogut, na ol i redi long kisim ol pikinini long taun na karim ol i go long narapela hap. Mi gat liklik mani tasol inap long baim su, na papamama i no inap helpim mi long mani. Tasol Jisas i bin tok, sapos yumi givim bel long wok bilong Kingdom, Jehova bai lukautim yumi long ol samting bilong skin. (Matyu 6:33) Mi bilip tru long em bai mekim olsem, na em i bin lukautim mi gut olsem inap long nau. Long taim bilong pait mi bin kisim kaikai bilong gaden i bin pundaun long rot long taim ol trak i ran long rot, na mi givim buk long sampela man na ol i bekim kaikai long mi.

Mama i karim liklik brata bilong mi, Sonia, long 1928. Taim em i gat 7-pela krismas em i dediket long Jehova na em i tok, em i gat laik long kamap painia. Long 1941 em i kisim baptais, na em wantaim mama i go mekim wok painia long Kefele long Saut Wels.

Autim Tok Long Taim Bilong Pait

Namba 2 Pait i kirap long Septemba 1939, na ol i kalabusim ol brata sista bilong yumi long Briten wankain olsem ol i mekim long ol Witnes long Natsi Jemani​—⁠ol i no laik insait long pait bilong ol dispela kantri. Long 1940 Jemani i kirap long tromoi ol bom long Inglan, na long olgeta nait i gat bikpela pairap. Tasol Jehova i helpim mipela long kisim slip inap long mipela i gat strong long moningtaim na bai mipela i ken i go autim tok long olgeta de.

Sampela taim mipela i go bilong autim tok, tasol bom i bagarapim planti haus. Long Novemba wanpela bom i pundaun na i pairap klostu long haus mipela i slip long en, na glas long ol windo i bruk olgeta, na strongpela dua i pundaun, na bikpela paip bilong stov tu i bagarap. Mipela go hait long wanpela hap, na bihain mipela i bruk na i go slip nabaut wantaim ol narapela Witnes.

Bihain liklik Sosaiti i salim mi i go long Kroidon long hap bilong Landon, na Ann Parkin i poroman bilong mi. Ron Parkin em susa bilong Ann, na bihain em i kamap kodineta bilong Komiti Bilong Brens long Pueto Riko. Bihain moa mi go i stap long Brijen long Saut Wels inap 6-pela mun na mekim wok painia, na mi slip long haus ka em hos i pulim. Mipela save kisim wilwil na i go inap 4-pela mail long bikpela kongrigesen long Pot Talbot.

Long dispela taim ol man i bel nogut long mipela na ol i tok bilas long mipela, long wanem, mipela i no laik helpim pait. Olsem na i hatwok long painim ples slip. Tasol Jehova i lukautim mipela olsem em i bin tok promis long mekim.

Bihain Sosaiti i salim mipela 8-pela i go mekim wok painia salim long Swonsi long Saut Wels. Pait i go bikpela, na ol man i bel nogut moa yet long mipela, na ol i kolim mipela olsem “ol rat” na “pretman” na ol i raitim tok olsem long haus painia bilong mipela. Ol nius tu i toknogutim mipela, long wanem, mipela i no laik i go long pait. Bihain ol i kalabusim mipela, na long 1942 mi stap wanpela mun long haus kalabus long Kadif, na bihain brata bilong mi Beryl em tu i kalabus long dispela haus kalabus. Mipela i rabis long ol samting bilong skin, na ol man i tok bilas long mipela tu, tasol mipela i gat planti gutpela samting bilong spirit.

Mama tupela Sonia i wok painia long Kefele na wankain hevi i painim ol. Sonia i gat 13 krismas tasol, na long Fraide long apinun em i laik bai mama i go wantaim em long namba wan Baibel-stadi bilong em long wanpela meri, tasol mama i tok: “Mi no inap. Mi pasim tok pinis long i go lukim wanpela meri. Yu wanpela yu mas i go.” Sonia i mekim, na dispela meri i kamap strong na bihain em i dediket na kamap wanpela Witnes.

Bihain Long Pait, na Gileat

Pait i pinis long 1945, na long dispela taim mi wok painia long Wali Bris long Dabisaia. Ol man i les pinis long pait. Planti man i bagarap, na nau planti meri i stap wanpis, na planti pikinini i no gat papa. Mipela raun na mekim gut bel bilong ol.

Sampela mun bihain Sosaiti i singaut long sampela volantia i ken i go long Aialan na wok painia. Aialan i gutpela kantri. I gat ol gutpela grinpela diwai i stap, olsem na sampela man i kolim olsem ailan Grinpela. Long dispela taim i gat 140 Witnes tasol long Aialan, na i olsem ples ol misineri i mas wok long en. Sosaiti i salim 40 painia salim i go, na mi wanpela bilong ol.

Pastaim mi wok long Kolran na Kukstaun long hap bilong not, na bihain ol i salim mipela 4-pela i go long Drogeda long nambis long hap bilong is. Ol man bilong Aialan i gat gutpela pasin pren, tasol ol i birua long ol narapela lotu, olsem na insait long wanpela yia mipela tilim wanpela buk na sampela buklet tasol.

Taim mi bin stap long Drogeda mi raun long wilwil na go long ol fam, na wanpela taim wanpela yangpela man i hait insait long diwai arere long rot na i sut i kam ausait. Em i lukluk raun, na i no gat man i lukim em, na em i tok isi olsem: “Yu wanpela Witnes?” Mi tok mi wanpela Witnes. Em i tok: “Asde long nait mi kros wantaim meri mi laik marit long em, na nau mipela i bruk. Em i tok, yupela i Komyunis, olsem ol pris Katolik na nius i tok, tasol mi tok, Nogat, long wanem, yupela raun long ples klia na go long ol haus.”

Mi givim liklik buk long em bilong kaunim, na em i haitim long poket, na mi stretim tok wantaim em long bungim em long tudak, long wanem, em i bin tok: “Sapos ol i lukim yumi i toktok wantaim, ol bai rausim mi long wok.” Long nait mi wantaim narapela Witnes i bungim em na bekim planti ol askim bilong em, na em i bilipim dispela tok, na em i tok promis long kam long haus bilong mipela long narapela nait na lainim sampela tok moa. Tasol em i no kam. Ating sampela i bin lukim em i kam long haus, na ol i rausim em long wok. Mipela save tingting, bihain em i kamap Witnes o nogat.

Long 1949 kibung distrik i kamap long Braiton long Inglan, na bihain Sosaiti i singautim mipela sampela long i go long Skul Gileat bilong Sosaiti Wastaua long Nu Yok. Inap 26 bilong Briten i go long namba 15 klas, na ol i mekim bung bilong winim skul long Julai 30, 1950, long taim bilong kibung intenesenel long Yanki Stediam.

Wok Misineri Long Brasil

Long yia bihain ol i salim mi i go long Sau Paulo long Brasil. Dispela taun i go bikpela hariap. Long dispela taim i gat 5-pela kongrigesen bilong ol Witnes i stap, tasol long nau i gat 600! Long Aialan i no olsem! Planti haus i olsem bilong ol bikman, na i gat bikpela banis ain, na dua bilong banis em ain i gat ol piksa long en. Bilong singautim papa bilong haus o wokmeri, mipela mas paitim han na bai ol i kam.

Bihain ol i salim mi i go long ol narapela narapela hap, na mi bin mekim gutpela wok long helpim sampela nupela kongrigesen long kamap insait long provins Sau Paulo, na wanpela long Jundia long 1955, na wanpela long Pirasakaba long 1958. Long 1960 Sonia i kamap poroman misineri bilong mi, na ol i salim mipela long Poto Alegre, em biktaun bilong provins Rio Grande do Sul. Ating yu laik save, olsem wanem na Sonia i kam long Brasil, a?

Bihain long Namba 2 Pait Sonia tupela mama i bin mekim wok painia long Inglan, tasol bihain long 1950 sik kensa i kisim mama na dokta i katim em, na em i no gat strong moa inap long raun autim tok, tasol em inap mekim ol Baibel-stadi na raitim pas na autim tok long ol man. Sonia i wok painia na lukautim mama tu. Long 1959 Sonia i go long namba 33 klas long Gileat, na bihain ol i salim em i kam long Brasil. Beryl i lukautim mama inap long taim mama i dai long 1962. Beryl i marit, na em wantaim famili bilong em i mekim wok bilong Jehova.

Long Brasil mitupela Sonia i bin helpim sampela manmeri long kamap strong na dediket na kisim baptais. Tasol i gat wanpela hevi long sampela Brasil long stretim marit bilong ol, long wanem, long dispela hap i hatwok long katim marit. Olsem na man tupela meri i save stap nating wantaim. Planti ol i bin mekim olsem taim ol i lusim olpela poroman ol i bin marit tru long em. I hatwok long ol i stretim ol dispela samting.

Mi bungim wanpela meri olsem, em Eva, na em i gat dispela hevi. Namba wan man bilong em i bin lusim em, na mipela putim toksave long redio na bai mipela i ken painim em. Ol i painim em pinis, na mitupela Eva i go long taun em i stap long en na bai em i ken sainim pepa bilong katim dispela namba wan marit na nau Eva i ken maritim dispela man singel em i stap wantaim em. Long kot jas i askim mitupela Eva, bilong wanem Eva i laik stretim marit bilong em. Mipela tokim em, na em i kirap nogut, na em i ting mipela i mekim gutpela samting.

Na narapela Baibel-stadi bilong mi tu i gat dispela hevi, na mi kisim em i go long wanpela loya bilong stretim. Mipela tokim loya long ol samting bilong marit na ol stretpela lo bilong God. I gat bikpela pe bilong katim marit, na man wantaim meri i mas wok long kisim mani bilong stretim. Tasol dispela tupela nupela sumatin bilong Baibel i amamas long mekim olsem. Mitupela Sonia i go lukim ol i marit, na bihain mipela wantaim 3-pela pikinini bilong ol i go long haus bilong ol na harim wanpela tok bilong Baibel long marit.

Planti Bikpela Amamas

Taim mitupela Sonia i bin dediket long Jehova mipela i gat laik long i stap painia long olgeta taim, na mipela i no bin tingting long olsem wanem sapos sik samting o narapela hevi i painim mipela taim mipela i lapun. Tasol Jehova i bin truim tok promis bilong em na em i no lusim mipela liklik.​—⁠Hibru 13:⁠6.

Tru, sampela taim mipela i sot long mani. Wanpela taim mipela i bin kaikai bret wantaim kumu pasli long belo inap wanpela yia, tasol mipela i no bin hangre, na mipela i no bin rabis olgeta long ol samting bilong skin.

Nau mipela i no gat strong olsem bilong pastaim. Long 1985 samting bikpela sik i painim mitupela, na dokta i katim mipela, na wok autim tok bilong mipela i go liklik. Long Janueri 1987 Sosaiti i singautim mipela i go i stap long hetkota bilong ol Witnes Bilong Jehova long Brasil.

I gat olsem 1,000 Witnes hia long hetkota, na i gat ol gutpela haus i stap. Em i stap longwe long Sau Paulo inap 90 mail samting. Ol i wokim ol buk hia i gat ol tok bilong Baibel na i bilong Brasil na sampela hap bilong Saut Amerika. Ol i givim bel long wok bilong God na ol i lukautim gut mipela. Taim mi kam pastaim long Brasil long 1951 i gat 4,000 i autim tok bilong Kingdom, tasol long nau i gat 366,000! Gutpela Papa long heven i bin mekim gutpela pasin tru long mipela, long wanem, mipela i bin wok long painim Kingdom pastaim.​—⁠Matyu 6:33.

[Piksa long pes 22]

Olive wantaim Mildred Willett i sanap klostu long wilka ol i putim toksave long en​—⁠1939

[Piksa long pes 25]

Olive na Sonia Springate

Taim Yu Givim Tok Long Narapela Yu Save Mekim Gut Long Em?

SAPOS long pasin sori ol i givim tok long yumi bilong stretim yumi, em gutpela tru! Edward i tok: “Sapos ol i tingim yu na givim tok long yu bilong stretim yu, bai yu stap wanbel wantaim ol.” Na Warren i tok: “Sapos brata i harim tok bilong yu taim em i stretim yu na em i no daunim yu, bai yu amamas long bihainim tok bilong em.” Na Norman i tok: “Sapos mi save elda i no ken daunim mi, bai mi amamas long askim em long helpim mi.”

No Ken Daunim Man

Sapos sampela i givim tok long yumi bilong stretim yumi, yumi laik bai ol i mekim long gutpela pasin pren. Sapos yu laik givim tok long narapela, yu mas mekim long pasin yu yet yu laik bai ol i mekim long yu