Sapta 4

Jisas i Kam Wantaim Tok Bilong Strongim Bel

 1. Nau Jon i raitim tok i go long husat? Husat long nau i mas tingim tru ol dispela tok Jon i raitim?

OLGETA manmeri i bung wantaim lain bilong God long nau ol i mas tingim tru ol narapela tok Jon i raitim. “Taim i laik kamap nau,” olsem na yumi mas tingim gut dispela tok, long wanem em bilong dispela taim nau. (KTH 1⁠:⁠3) Sapos yumi bihainim dispela tok, dispela inap helpim yumi long olgeta taim bihain. Jon i raitim tok olsem: “Mi Jon, mi raitim dispela tok long yupela ol manmeri bilong 7-pela sios [kongrigesen] i stap long provins Esia. God i stap nau, na bipo tru em i stap, na bihain bai em i kam, em i ken marimari long yupela na mekim bel bilong yupela i stap isi. Na ol 7-pela spirit, ol i stap long pes bilong sia king bilong God, ol tu i ken marimari long yupela na mekim yupela i stap bel isi. Jisas Krais . . . tu i ken marimari long yupela na mekim bel bilong yupela i stap isi.”​—⁠KTH 1⁠:​4, 5b.

 2. (a) Namba “7” i makim wanem samting? (b) Long de bilong Bikpela, husat i mas bihainim ol tok Jon i bin raitim long ol ‘7-pela kongrigesen’?

² Jon i raitim dispela tok i go long ‘7-pela kongrigesen,’ na bihain em i kolim nem bilong ol dispela kongrigesen. Planti taim Kamapim Tok Hait i kolim dispela namba “7” na i makim samting em inap olgeta, olsem ol samting bilong God o ol samting bilong dispela lain God i bin makim. Nau, long de bilong Bikpela, ol kongrigesen bilong lain bilong God ol i kamap planti tru, inap planti tausen, na yumi ken save, ol dispela tok bilong ol ‘7-pela kongrigesen’ bilong lain God i makim long spirit holi, ol dispela tok em bilong olgeta manmeri bilong God long nau. (KTH 1⁠:10) Tru tumas, dispela tok bilong Jon em i bikpela tok bilong olgeta kongrigesen bilong ol Witnes Bilong Jehova na bilong olgeta manmeri i save bung wantaim ol, long olgeta hap bilong graun.

 3. (a) Taim Jon i givim gude long ol kongrigesen, em i tok husat i givim ‘marimari na bel isi’ long yumi? (b) Wanem tok bilong Pol i wankain olsem dispela tok bilong Jon?

³ Yumi laik tru long kisim ‘marimari na bel isi,’ a? Na sapos yumi save long as bilong dispela marimari na bel isi bai yumi laik moa yet long kisim! Dispela God em i givim marimari na bel isi long yumi em Nambawan Bikpela King Jehova yet, em i “King bilong olgeta taim,” em i stap “oltaim oltaim.” (1 Timoti 1⁠:17; Song 90⁠:⁠2) Ol “7-pela spirit” tu i insait long wok bilong givim marimari na bel isi long ol man. Dispela tok “7-pela spirit” i makim spirit holi bilong God i mekim wok inap tru​—⁠spirit bilong em i givim save na blesing long olgeta man i putim gut yau long dispela tok profet. Na “Jisas Krais” tu i mekim bikpela wok long givim marimari na bel isi long ol man. Jon i tok, “marimari na pasin i tru i pulap long [Jisas].” (Jon 1⁠:14) Olsem na taim Jon i givim gude long ol kongrigesen, em i mekim wankain tok olsem Pol i mekim long pinis bilong namba tu pas em i raitim long kongrigesen bilong Korin, em Pol i tok: “Bikpela Jisas Krais i ken marimari long yupela, na God i ken givim bel bilong en long yupela, na Holi Spirit i ken mekim yupela olgeta i stap wanbel tru.” (2 Korin 13⁠:13) Yumi olgeta man i laikim tumas tok i tru long nau, yumi mas kisim dispela marimari na sori na bel isi!​—⁠Song 119⁠:⁠97.

“Man Bilong Autim Stret Olgeta Tok Bilong God”

 4. Nau Jon i stori olsem wanem long Krais Jisas? Olsem wanem na ol dispela tok i makim stret Jisas?

⁴ God Jehova i gat biknem tru, winim olgeta narapela, tasol Jisas tu i gat biknem; em i namba tu long Jehova. Olsem na Jon i stori long Jisas na em i tok: “Jisas Krais em i man bilong autim stret olgeta tok bilong God. Em i namba wan man i bin kirap bek long matmat, na em i bikman bilong olgeta king i stap long graun.” (KTH 1⁠:5a) Olsem mun i stap oltaim long skai, olsem tasol Krais Jisas bai stap oltaim long heven olsem nambawan Man bilong tokaut long Jehova em i God tru. (Song 89⁠:37) Jisas i stap gut long God i go inap long em i dai, na em i namba wan man bilong kirap bek long matmat na kisim laip oltaim long heven. (Kolosi 1⁠:18) Nau em i stap wantaim Jehova na em i kisim bikpela namba tru, winim olgeta king bilong graun. Em i kisim “bikpela namba na strong bilong bosim olgeta samting long heven na long graun.” (Matyu 28⁠:18; Song 89⁠:27; 1 Timoti 6⁠:15) Long yia 1914 em i kamap King bilong bosim olgeta lain man long graun.​—⁠Song 2⁠:​6-9.

 5. (a) Jon i mekim wanem tok moa bilong litimapim nem bilong Bikpela Krais Jisas? (b) Jisas i bin givim gutpela laip bilong em olsem ofa na dispela i helpim husat? Liklik lain God i makim, olsem wanem ol i kisim narapela kain blesing?

⁵ Jon i mekim sampela tok moa bilong litimapim nem bilong Bikpela Krais Jisas, Jon i tok: “Em i save laikim yumi tru, na long blut bilong em yet em i bin tekewe olgeta sin bilong yumi. Em i bin mekim yumi i kamap ol pris bilong lain bilong king, na yumi stap lain pris bilong God, em Papa bilong Jisas. Oltaim oltaim Jisas Krais i gat biknem tru na strong bilong bosim olgeta samting. I tru.” (KTH 1⁠:5c, 6) Jisas i bin kamap man long graun na em i givim gutpela laip bilong em bilong helpim ol manmeri i bilip tru long em bambai ol i ken kisim bek laip i gutpela olgeta. Em i laik helpim yu tu! (Jon 3⁠:16) I dai bilong Jisas i opim rot bambai ol manmeri olsem Jon, em ol Kristen God i makim, ol i ken kisim narapela kain blesing. Long blut bilong Jisas, God i kolim dispela liklik lain olsem ol stretpela man. Ol i no tingting moa long kisim laip long graun; ol i redi long lusim dispela olsem Jisas i bin mekim. Spirit bilong God i mekim ol i kamap pikinini bilong God na ol i save, taim ol i dai bai God i kirapim bek ol na bai ol inap kisim laip long heven na mekim wok king na wok pris wantaim Krais Jisas long Kingdom bilong em. (Luk 12⁠:32; Rom 8⁠:18; 1 Pita 2⁠:5; KTH 20⁠:⁠6) Bai ol i kisim gutpela wok tru! Dispela samting i kirapim Jon long litimapim nem bilong Jisas na tok, em i gat biknem na strong!

“Em i Stap Namel Long Ol Klaut na i Kam”

 6. (a) Jon i mekim wanem tokaut long Jisas bai kam “namel long ol klaut”? Ating Jon i tingim wanem tok profet Jisas i bin mekim? (b) Wanem insait bilong dispela tok olsem Jisas bai “kam”? Na husat long graun bai ol i krai nogut?

⁶ Nau Jon i amamas na em i tokaut olsem: “Lukim. Em i stap namel long ol klaut na i kam, na olgeta man bai i lukim em long ai bilong ol yet. Olgeta man i bin sutim em long spia samting, ol tu bai i lukim em. Na olgeta lain manmeri bilong graun bai i tingting long em, na ol bai i krai sori moa yet. Yes, dispela samting bai i kamap. I tru.” (KTH 1⁠:⁠7) Ating Jon i tingim tok profet Jisas i bin mekim long taim bilong pinis, em Jisas i tok: “Long dispela taim mak bilong Pikinini Bilong Man bai i kamap long skai na olgeta lain manmeri bilong graun bai i krai. Na ol bai i lukim Pikinini Bilong Man i stap antap long ol klaut bilong heven na i kam wantaim bikpela strong na bikpela lait bilong en.” (Matyu 24⁠:​3, 30) Olsem na insait bilong dispela tok “kam” i olsem Jisas bai lukluk i kam long ol lain man bilong givim strafe bilong God long ol. Taim em i mekim olsem, ol bikpela senis bai kamap long graun. Jisas i kamap King pinis, tasol “olgeta lain manmeri bilong graun” i sakim dispela samting, olsem na “bikpela belhat bilong God I Gat Olgeta Strong” i mas painim tru ol dispela lain.​—⁠KTH 19⁠:​11-​21; Song 2⁠:​2, 3, 8, 9.

 7. Olsem wanem “olgeta man bai i lukim” Jisas “long ai bilong ol yet” na ol man i no bihainim tok ol tu bai “lukim” em?

⁷ Long apinun paslain long Jisas i dai, em i tokim ol disaipel bilong em: “Liklik taim na bai ol manmeri bilong graun i no lukim mi moa.” (Jon 14⁠:19) Orait, olsem wanem na Jon i tok, “olgeta man bai i lukim em long ai bilong ol yet”? Yumi no ken ting ol birua bilong Jisas bai lukim em long ai bilong ol, long wanem aposel Pol i tok, taim Jisas i go antap long heven, nau em i stap “long bikpela lait tru,” na i “no gat wanpela man i bin lukim em, na i no gat wanpela man inap long lukim em.” (1 Timoti 6⁠:16) Olsem na taim Jon i tok, olgeta man bai “lukim” Jisas i kam, em i laik tok olsem olgeta man bai “save” Jisas i kam. I olsem tasol long God​—⁠yumi no inap lukim God, tasol yumi inap lukim ol samting em i bin wokim na yumi save long ol pasin bilong em. (Rom 1⁠:20) Jisas bai kam “namel long ol klaut,” olsem na ai bilong ol man i no inap lukim em olsem ol i no inap lukim san taim san i stap namel long ol klaut o smok bilong antap. Tasol maski ol klaut i haitim san, yumi save san i stap long wanem i tulait. Na olsem tasol, maski yumi no inap lukim Bikpela Krais Jisas, tasol bai em i kamap ples klia olsem ‘bikpela paia, na bai em i bekim pe nogut long ol man i no bihainim gutnius bilong em.’ Ol dispela man tu i mas “lukim” em.​—⁠2 Tesalonaika 1⁠:​6-8; 2⁠:⁠8.

 8. (a) Long yia 33 husat ol i bin ‘sutim Jisas long spia samting’? Husat long nau ol i mekim? (b) Nau Jisas i no i stap long graun, orait ol man i mekim wanem na i olsem ol i “sutim em long spia samting”?

⁸ Ol man i bin “sutim em long spia samting” ol tu bai “lukim” em. Ol dispela man i makim husat? Taim ol man i kilim i dai Jisas long yia 33 ol soldia bilong Rom i bin sutim em long spia na nil tru. Ol Juda tu i gat asua long dispela, long wanem long de Pentikos, Pita i tokim sampela Juda, olsem: “Dispela Jisas yupela i nilim em long diwai [pos], God i makim em i stap Bikpela, na man bilong kisim bek ol manmeri bilong en.” (Aposel 2⁠:​5-​11, 36; skelim wantaim Sekaraia 12⁠:10; Jon 19⁠:37.) Ol dispela Rom na Juda i dai pinis klostu 2,000 yia bipo, olsem na ol man i sutim Jisas “long spia samting” long nau i makim ol man na ol lain man em ol i birua long Jisas olsem ol dispela man bilong bipo i bin mekim taim ol i nilim em long pos na kilim em i dai. Nau Jisas i no i stap long graun. Tasol taim ol birua i mekim nogut long ol Witnes Bilong Jehova, em ol i save autim tok bilong Jisas, o ol man i orait long dispela pasin ol birua i mekim, i olsem ol dispela man i “sutim” Jisas yet long spia samting.​—⁠Matyu 25⁠:​33, 41-​46.

“Mi Stap Paslain Tru na Mi Stap Las Tru”

 9. (a) Nau husat i toktok? Long hap bilong Kamapim Tok Hait, hamas taim em yet i toktok? (b) Taim Jehova i tok, “mi stap paslain tru na mi stap las tru” na em i God I Gat Olgeta Strong, dispela i makim wanem samting?

⁹ Olaman! Nau bikpela samting tru i kamap​—⁠Nambawan Bikpela, em God Jehova yet, em i toktok! I stret dispela samting i kamap paslain long taim Jon i lukim ol samting olsem ol driman, long wanem God Jehova yet em i Bikpela Tisa bilong yumi, na em yet em i As bilong ol tok long Kamapim Tok Hait! (Aisaia 30⁠:20) God bilong yumi em i tok: “ ‘Mi tasol mi stap paslain tru na mi stap las tru.’ Em dispela God tasol, nau em i stap, na bipo tru em i stap, na bihain bai em i kam.” (KTH 1⁠:⁠8) Long hap bilong Kamapim Tok Hait, 3-pela taim Jehova yet i toktok, na dispela em i namba wan taim. (Lukim tu Kamapim Tok Hait 21⁠:​5-8; 22⁠:​12-​15.) Jehova i kolim dispela tok long em yet bilong makim olsem paslain long em i no gat wanpela god i gat olgeta strong em i bin i stap, na bihain tu bai i no gat. Em bai stretim tru dispela tok long husat i God tru na inap long olgeta taim bihain dispela tok i no ken kamap gen. Bai em i kamapim long ples klia, olsem em wanpela tasol em i God i gat olgeta strong, na em i Nambawan Bikpela King bilong olgeta samting em i bin wokim.​—⁠Lukim Aisaia 46⁠:10; 55⁠:​10, 11.

10. (a) Nau Jon i stori olsem wanem long em yet? Em i stap kalabus we? (b) Husat i mas helpim Jon na bai em i salim ol tok em i bin raitim i go long ol kongrigesen? (c) Long nau planti taim ol brata i kisim kaikai bilong spirit olsem wanem?

¹⁰ Jon i bilip tru olsem Jehova bai stiaim ol samting na kamapim laik bilong Em, olsem na Jon i tokim ol brata: “Mi Jon, mi brata bilong yupela. Mi wantaim yupela, yumi stap ol lain bilong Jisas. Mi poroman wantaim yupela long kisim hevi na pen, na mi stap long kingdom bilong God wantaim yupela. Na yumi olgeta yumi save sanap strong wantaim na karim hevi. Mi bin autim tok bilong God, na mi autim tok olsem mi bilip long Jisas. Olsem na ol i rausim mi na putim mi i stap long dispela ailan ol i kolim Patmos.” (KTH 1⁠:⁠9) Jon i kalabus long ailan Patmos, long wanem em i bin autim tok; em i karim hevi wantaim ol brata na em i wet long kisim wok wantaim ol long Kingdom bai i kam. Nau lapun hia i lukim namba wan driman bilong Kamapim Tok Hait. Ol samting Jon i lukim olsem driman i strongim em. Na dispela lain long nau em Jon i piksa bilong ol, ol i lukim ol dispela samting i kamap tru na dispela i strongim ol. Yumi no save olsem wanem Jon i bin salim ol dispela tok i go long ol kongrigesen, long wanem long dispela taim em i stap kalabus. (KTH 1⁠:11; 22⁠:​18, 19) Ol ensel bilong Jehova i mas helpim em long mekim. Ol ensel i save helpim ol gutpela Witnes Bilong Jehova long nau taim gavman i tambuim wok bilong ol o kalabusim ol na ol dispela witnes ol inap givim kaikai bilong spirit long ol brata bilong ol, em ol i hangre long kisim tok i tru.​—⁠Song 34⁠:​6, 7.

11. Lain bilong nau em Jon i piksa bilong ol, ol i kisim wanem wankain wok olsem Jon i bin kisim long bipo na ol i pilim tru?

¹¹ Jon i mas pilim tru bikpela wok Jehova i givim long em, em i olsem rot bilong givim tok bilong Jehova long ol kongrigesen! Na olsem tasol long nau, dispela lain Jon i piksa bilong ol, ol i pilim tru bikpela wok ol i kisim bilong givim kaikai bilong spirit long lain bilong God ‘long taim bilong en.’ (Matyu 24⁠:45) Mipela i laik bai dispela kaikai bilong spirit i ken strongim yu na bai yu tu inap long kisim laip i stap oltaim!​—⁠Sindaun 3⁠:​13-​18; Jon 17⁠:⁠3.

[Blok long pes 21]

Kisim Kaikai Bilong Spirit Long Taim Bilong Hevi

Nau long las taim ol man i bin mekim nogut long ol Witnes Bilong Jehova na ol Witnes i bin karim planti hevi, olsem na i bikpela samting ol i mas kisim kaikai bilong spirit bambai ol inap i stap strong long bilip. Planti taim ol i bin kisim kaikai inap long ol na yumi mas tenkyu long Jehova, long wanem planti taim Jehova i bin kamapim strong bilong em na wokim olsem mirakel na ol i kisim.

Olsem: Taim Hitler i bosim Jemani, gavman i bin tambuim ol Witnes long wokim Wastaua na ol i bin mekim nogut tru long ol Witnes. Tasol ol Witnes i bin wokim sampela Wastaua na tilim long ol man. Long taun Hambek, lain polis bilong dispela hatpela gavman ol i go insait long wanpela haus ol brata i save wokim Wastaua long en. Haus i liklik na i hatwok long haitim gut ol samting bilong wokim Wastaua. Taipraita ol i putim insait long wanpela sarang o kabot, na masin bilong prinim Wastaua ol i haitim insait long wanpela dram i gat patete long en, em dram i stap long rum aninit long haus. Na baksait long dispela dram wanpela switkes i stap em ol Wastaua i pulap long en! Ol i ting olsem nau bai polis i lukim. Tasol wanem samting i bin kamap? Wanpela polis i opim kabot, tasol em i no lukim taipraita. Papa bilong haus i stori long ol samting i bin kamap taim ol polis i go long rum aninit long haus na em i tok: “Tripela polis i sanap namel long dispela rum long ples stret dispela dram na switkes i stap long en, tasol i olsem ol i no inap lukim; i olsem God i pasim ai bilong ol.” Dispela samting i helpim lain bilong haus na ol inap wokim yet ol Wastaua na tilim i go, maski i gat hatwok na hevi.

Long 1967-​1970 bikpela pait i bin kamap long kantri Naijiria. Provins Biafra i laik bosim ol yet na ol i pait wantaim gavman bilong kantri. Biafra i stap namel tru long ol narapela hap bilong Naijiria na i gat wanpela rot tasol bilong i go i kam long hap bilong Biafra, em wanpela ples balus. I olsem ol Witnes Bilong Jehova long Biafra bai i no gat rot bilong kisim kaikai bilong spirit. Tasol long kirap bilong yia 1968 ol hetman bilong Biafra i givim bikpela wok long wanpela wokman bilong ol long Yurop, na ol i putim narapela bilong bosim ples balus long Biafra. Dispela tupela man i Witnes Bilong Jehova, na nau tupela i kisim bikpela wok long bosim dispela wanpela rot tasol bilong i go i kam long Biafra. Tupela i pilim olsem Jehova yet i bin putim tupela long dispela wok. Olsem na maski i hatwok na tupela i mas was gut, tasol tupela yet i kirap na tok ol i laik helpim ol brata long Biafra long kisim kaikai bilong spirit. Na ol i helpim ol brata olsem i go inap long pait i pinis. Wanpela bilong tupela em i tok: ‘Wanpela Man em i gat bikpela strong, winim bilong ol man bilong graun, em i bin kamapim dispela samting.’

[Sat long pes 19]

Ol Namba Long Kamapim Tok Hait

Namba Samting Namba i Makim

 2 Dispela namba i makim samting i helpim o strongim tok. (KTH 11⁠:​3, 4; Lo 17⁠:⁠6)

 3 Taim ol i kolim wanpela tok samting 3-pela taim, em bilong strongim dispela. (KTH 4:8; 8:13; 16:​13, 19)

 4 Dispela namba i makim samting i bilong olgeta hap, o samting i gat 4-pela sait o kona na i skwea tru. (KTH 4:6; 7:​1, 2; 9:14; 20:8; 21:⁠16)

 6 Dispela namba i makim samting i kranki, na i narapela kain, na i nogut tru. (KTH 13:18; 2 Samuel 21:⁠20)

 7 Dispela namba i makim samting God yet i tok em inap olgeta, olsem wanpela wok bilong God o bilong Satan. (KTH 1:​4, 12, 16; 4:5; 5:​1, 6; 10:​3, 4; 12:⁠3)

10 Dispela namba i makim samting bilong graun em inap tru o inap olgeta. (KTH 2:10; 12:3; 13:1; 17:​3, 12, 16)

12 Dispela namba i makim wanpela oganaisesen God yet i kamapim long heven o long graun. (KTH 7:​5-8; 12:1; 21:​12, 16; 22:⁠2)

24 Dispela namba i makim olsem God i strongim (dabolim) lain hetman em i kamapim long heven (2 taims 12 em 24). (KTH 4:⁠4)

Sampela namba Kamapim Tok Hait i kolim em namba tru. Planti taim, sapos yumi kaunim ol tok klostu long en bai yumi inap save, namba i makim samting o em i namba tru. (Lukim Kamapim Tok Hait 7:​4, 9; 11:​2, 3; 12:​6, 14; 17:​3, 9-​11; 20:​3-5.)

Sapta 5

Jon i Lukim Jisas i Kisim Pinis Biknem

Driman 1​​—⁠Kamapim Tok Hait 1:​10–3:⁠22

Stori: Jisas i skelim lain Israel bilong spirit long graun na strongim ol

Taim bilong truim: Ol dispela samting i kamap long de bilong Bikpela, kirap long yia 1914 i go inap long taim laspela Kristen God i makim em i dai na kirap bek i go long heven

 1. Namba wan driman i stori long ol samting bilong wanem taim? Tasol Jon i tok wanem na em i kolim taim tru em dispela piksa i makim?

NAMBA wan driman long hap bilong Kamapim Tok Hait i kirap long KTH sapta 1 ves 10. Namba wan tok bilong dispela driman na bilong ol narapela tu i stori long Jon i harim o lukim narapela kain samting. (KTH 1⁠:​10, 12; 4⁠:1; 6⁠:⁠1) Dispela namba wan driman i stori long ol samting long taim bilong ol Kristen bilong pastaim na i go long 7-pela kongrigesen i stap long taim bilong Jon. Tasol Jon i kolim taim tru em dispela driman i makim, em i tok: “Spirit holi i kamap strong long mi, na i olsem mi stap long de bilong Bikpela.” (KTH 1⁠:10a, “NW”) Dispela “de” em wanem taim? Ol senis na ol hevi i bin kamap long taim bilong yumi, ol i samting bilong dispela “de” o olsem wanem? Sapos olsem, orait yumi mas tingim gut dispela tok profet bambai yumi ken abrusim bagarap.​—⁠1 Tesalonaika 5⁠:​20, 21.

Long De Bilong Bikpela

 2. De bilong Bikpela i kirap long wanem taim? Na i pinis long wanem taim?

² Orait, truim bilong tok profet bilong Kamapim Tok Hait i mas kamap long wanem taim? Wanem dispela de bilong Bikpela? Aposel Pol i stori long dispela De na em i tok, em i taim bilong kot na taim bilong God i truim ol tok promis bilong em. (1 Korin 1⁠:8; 2 Korin 1⁠:14; Filipai 1⁠:​6, 10; 2⁠:16) Taim dispela “de” i kamap, bai laik bilong Jehova i wok long kamap inap long ol laspela bikpela samting bilong en i kamap. Dispela “de” i kirap taim Jisas i kamap King long heven, na i stap inap long taim Jisas i givim strafe long lain bilong Satan olsem God i bin makim. Bihain long dispela taim bai dispela “de” i stap yet i go inap long taim Paradais i kamap bek long graun na ol man i kamap gutpela olgeta, na bai Jisas “i putim kingdom long han bilong God Papa” na em nau, bai dispela “de” i pinis.​—⁠1 Korin 15⁠:​24-​26; KTH 6⁠:​1, 2.

 3. (a) Olsem wanem tok profet bilong Daniel long “7-pela yia” i helpim yumi bambai yumi ken save long taim de bilong Bikpela i kirap? (b) Wanem ol samting i bin kamap long graun na i soim yumi, tru tumas de bilong Bikpela i bin kirap long yia 1914?

³ Truim bilong sampela tok profet moa bilong Baibel i helpim yumi long save wanem taim de bilong Bikpela i kirap. Olsem: Daniel i stori long ol bai katim wok king long lain bilong Devit, olsem man i katim diwai na i pundaun. Na bihain long “7-pela yia” bai ol man i save, “God Antap Tru i bosim olgeta manmeri. Long laik bilong em yet, em i save mekim ol man i kamap king.” (Daniel 4⁠:​23, 24, 31, 32) Bikpela truim bilong dispela tok profet i kirap taim kingdom bilong Juda i bagarap long mun Oktoba long yia 607 paslain long Krais, olsem Baibel i makim. Kamapim Tok Hait 12⁠:​6, 14 i tok, 3 na hap yia (3 1/2) i olsem 1,260 de. Olsem na 7-pela yia (em tupela taims 3 1/2) i olsem 2,520 de. Tasol wanpela de i makim wanpela yia. (Esekiel 4⁠:⁠6) Olsem na dispela “7-pela yia” long tok profet bilong Daniel i makim tru 2,520 yia, na yumi ken save, Krais Jisas i bin kirap mekim wok king long heven klostu long pinis bilong yia 1914. Long dispela yia namba wan pait bilong olgeta hap i bin kamap na taim bilong “pen” o hevi i kirap na i stap yet. Ol samting i bin kamap long graun kirap long yia 1914 na bihain long dispela taim, ol dispela samting i soim yumi, tru tumas “de” bilong Bikpela i bin kirap long dispela yia na nau Krais Jisas i stap King pinis long heven!​—⁠Matyu 24⁠:​3-​14.a

 4. (a) Ol tok bilong Kamapim Tok Hait yet i makim truim bilong namba wan driman i mas kamap long wanem taim? (b) Wanem taim truim bilong dispela namba wan driman i pinis?

⁴ Olsem na namba wan driman na ol tok bilong en i bilong ol man i stap long de bilong Bikpela, em dispela “de” i kirap long yia 1914. Long sampela sapta bihain long sapta 1 bilong Kamapim Tok Hait, i gat sampela tok i helpim yumi long save, dispela “de” i makim tru dispela hap taim, long wanem dispela hap bilong Baibel i stori long stretpela kot bilong God na strafe bilong God i painim ol man​—⁠em tupela wok Bikpela bilong yumi, Jisas, i insait tru long en. (KTH 11⁠:18; 16⁠:15; 17⁠:1; 19⁠:​2, 11) Sapos truim bilong namba wan driman i bin kirap long yia 1914, orait wanem taim truim bilong en i pinis? Ol tok bilong ol dispela driman yet i soim yumi, ol dispela tok i go long liklik lain long graun, em God i bin makim ol. Olsem na truim bilong dispela namba wan driman i pinis taim laspela man bilong dispela lain i dai na God i kirapim em bek bilong kisim laip long heven. Tasol de bilong Bikpela i mas i stap inap long pinis bilong 1,000 yia bilong wok king bilong Krais Jisas, na dispela “de” bai kamapim planti blesing long lain arapela sipsip long graun.​—⁠Jon 10⁠:16; KTH 20⁠:​4, 5.

 5. (a) Wanpela maus i singaut tokim Jon long mekim wanem? (b) Dispela ‘7-pela kongrigesen’ i stap we na i no hatwok long salim rait i go long ol?

⁵ Long dispela namba wan driman, Jon i harim wanpela maus pastaim, na bihain em i lukim sampela samting. Em i tok: “Na baksait long mi mi harim maus bilong wanpela man i singaut strong, olsem krai bilong biugel. Dispela man i tok olsem, ‘Olgeta samting yu lukim, em yu mas raitim long buk na salim i go long ol 7-pela sios [kongrigesen]. Yu mas salim i go long ol sios [kongrigesen] i stap long taun Efesus na Smerna na Pergamum na Taiataira na Sardis na Filadelfia na Laodisia.’ ” (KTH 1⁠:10b, 11) Biugel i save krai strong, na olsem tasol dispela maus i singaut strong na tokim Jon long raitim ol dispela tok i go long ol ‘7-pela kongrigesen.’ Em bai kisim sampela tok bilong salim i go long ol na em i mas tokim ol long ol samting em i harim na lukim. Ol dispela kongrigesen Jon i kolim nem bilong ol, ol i stap tru long taim bilong Jon. Olgeta i stap long hap bilong Esia Maina. Jon i stap long ailan Patmos na ol dispela kongrigesen i stap long bikples klostu. I gat ol gutpela rot ol Rom i bin wokim long dispela hap, olsem na i no hatwok long wanpela man i kisim rait bilong Jon i go long narapela narapela kongrigesen. Dispela 7-pela kongrigesen i kain olsem hap bilong wanpela sekit bilong ol Witnes Bilong Jehova long nau.

 6. (a) Taim Jon i tok long “ol samting i stap nau,” em i tok long wanem samting? (b) Olsem wanem yumi ken save, pasin i bin stap long ol dispela kongrigesen long taim bilong Jon, wankain pasin bai stap long dispela lain bilong nau em God i bin makim ol?

⁶ Planti tok profet long Kamapim Tok Hait, truim bilong en i bilong kamap bihain long taim bilong Jon. Jon i tok, em “ol samting bai i kamap bihain.” Tasol ol tok i go long ol 7-pela kongrigesen i tok long “ol samting i stap nau,” olsem ol pasin i stap long ol dispela 7-pela kongrigesen long bipo. Ol dispela tok i helpim tru ol gutpela elda bilong dispela 7-pela kongrigesen, na i helpim tu ol elda bilong ol narapela kongrigesen bilong ol Kristen God i bin makim ol, em ol i stap long dispela taim bipo.b Tasol bikpela truim bilong ol tok bilong namba wan driman i mas kamap long de bilong Bikpela, olsem na ol tok Jisas i bin givim long ol dispela kongrigesen long bipo i soim yumi, ol wankain pasin bai stap long liklik lain Kristen bilong nau, em God i bin makim ol.​—⁠KTH 1⁠:​10, 19.

 7. Long namba wan driman Jon i lukim husat? Bilong wanem dispela i bikpela samting long yumi long nau na yumi amamas long en?

⁷ Long namba wan driman, Jon i lukim Krais Jisas i stap long bikpela lait​—⁠em i kisim pinis biknem long heven. Olsem na i stret God i laik kamapim wanpela buk bilong ol tok profet i makim dispela bikpela de bilong Krais, a? Na i bikpela samting long yumi ol man i stap nau long dispela de, yumi mas bihainim gut olgeta tok bilong em, a? Na ol man i givim bel long helpim wok king bilong Jehova, ol i amamas long dispela samting Jon i lukim, long wanem nau ol i save, dispela Pikinini em God i tok promis long salim em i kam, olsem Krais, em i winim pinis olgeta hevi na traim Satan i bin putim long em. Em i bin karim bikpela pen tru taim Satan i kaikaim “lek” bilong em, olsem kilim em i dai klostu 2,000 yia bipo. Tasol nau em i stap laip long heven na em i kisim pinis strong bilong kamapim olgeta samting God i laik mekim i go inap long pinis bilong en!​—⁠Stat 3⁠:⁠15.

 8. Jisas i redi nau bilong mekim wanem wok?

⁸ Olgeta samting i kamapim long ples klia olsem Jisas i kamap King pinis na em i redi nau bilong mekim wok. God i makim em pinis olsem Man bilong givim strafe long god giaman bilong dispela graun, em Satan, na pinisim pasin nogut Satan i bin kamapim. Na em i redi bilong skelim long kot lain bilong em, em ol manmeri God i bin makim ol, na em i redi long skelim bikpela lain poroman bilong ol, na ol manmeri bilong dispela graun.​—⁠KTH 7⁠:​4, 9; Aposel 17⁠:⁠31.

 9. (a) Jon i stori olsem wanem long Jisas i gat biknem na em i stap namel long ol lam gol? (b) I olsem Jisas i stap insait long haus lotu na em i pasim longpela klos, na dispela i makim wanem samting? (c) Em i pasim let gol na dispela i makim wanem samting?

⁹ Jon i harim dispela maus i singaut strong baksait long em, na nau em i tanim na em i lukim wanem samting? Em i tok: “Orait mi tanim bilong lukim dispela man i givim tok long mi. Mi tanim pinis, na mi lukim 7-pela lam gol i stap.” (KTH 1⁠:12) Bihain Jon i save long ol samting dispela 7-pela lam i makim. Tasol nau em i lukim narapela samting, em i tok: “Na mi lukim wanpela man i stap namel long ol dispela lam. Em i olsem Pikinini Bilong Man. Em i bin putim longpela klos i karamapim lek bilong en, na em i pasim let gol i raunim bros bilong en.” (KTH 1⁠:13) Jisas em i dispela “Pikinini Bilong Man,” na em i soim Jon olsem em i stap long bikpela lait namel long ol lam gol. I olsem Jisas i stap insait long haus lotu, na dispela i kirapim Jon long tingim bikpela wok Jisas i holim, olsem Jehova i bin makim em i stap Hetpris na em i gat strong o namba bilong skelim ol man long kot. (Hibru 4⁠:14; 7⁠:​21-​25) Jisas i putim longpela klos na dispela i stret long wok pris em i holim. Na em i pasim let gol i raunim bros bilong em antap long bel, olsem ol hetpris bilong lain Juda i mekim long bipo. Dispela i makim olsem em i givim bel olgeta long mekim wok God Jehova i bin givim long em.​—⁠Kisim Bek 28⁠:⁠8, 30; Hibru 8⁠:​1, 2.

10. (a) Gras bilong Jisas i waitpela tru na dispela i makim wanem samting? Ai bilong em i lait olsem paia na dispela i makim wanem samting? (b) Lek bilong Jisas i lait tru olsem bras na dispela i makim wanem samting?

¹⁰ Jon i stori moa olsem: “Het wantaim gras bilong en i waitpela tru, olsem gras bilong sipsip, na olsem waitpela klaut. Na ai bilong en i lait olsem paia i lait strong moa.” (KTH 1⁠:14) Gras bilong em i waitpela tru na dispela i makim olsem em i bin i stap longtaim na em i gat gutpela save na tingting. (Lukim Sindaun 16⁠:31.) Na ai bilong em i lait olsem paia, dispela i makim olsem ai bilong em i sap tru taim em i skelim o traim ol samting o em i kamapim kros bilong em. Jon i lukim lek bilong Jisas tu: “Lek bilong en i lait tru, olsem bras ol i bin kukim long bikpela paia. Na mi harim nek bilong en i pairap olsem bikpela wara i pairap.” (KTH 1⁠:15) Long dispela driman, lek bilong Jisas i lait tru, olsem bras, na dispela i makim stret olsem em i save wokabaut strong long mekim ol wok bilong em long ai bilong God Jehova na em i stap gutpela long ai bilong God. Planti taim Baibel i stori long samting ol i wokim long gol bilong makim samting bilong God, na sampela taim Baibel i stori long samting ol i wokim long bras bilong makim samting bilong ol man.c Olsem na taim yumi tingim lek bilong Jisas i lait olsem bras, dispela i kirapim yumi long tingim lek bilong em i ‘gutpela’ taim em i wokabaut hia long graun na autim tok.​—⁠Aisaia 52⁠:7; Rom 10⁠:⁠15.

11. (a) Gutpela lek bilong Jisas i kirapim yumi long tingim wanem samting? (b) Nek bilong Jisas i “pairap olsem bikpela wara i pairap” na dispela i makim wanem samting?

¹¹ Tru tumas, Jisas em i kamap man i gutpela olgeta na ol ensel na ol man inap lukim em i gat biknem olsem gutpela lait. (Jon 1⁠:14) Gutpela lek bilong em i kirapim yumi long tingim em i wokabaut long graun i holi insait long oganaisesen bilong Jehova em i Hetpris bilong en. (Lukim Kisim Bek 3⁠:⁠5.) Na nek bilong em i pairap olsem bikpela wara i kapsait i kam daun long maunten. Em samting bilong kirap nogut tru long en na i mekim man i guria, na dispela i stret, long wanem dispela bikpela man ol i kolim Tok bilong God em i kam bilong “skelim pasin bilong olgeta manmeri” long stretpela kot.​—⁠Aposel 17⁠:31; Jon 1⁠:⁠1.

12. “Bainat i gat tupela sap na i sap tru,” em i makim wanem samting?

¹² “Em i holim 7-pela sta long han sut bilong en. Na wanpela bainat i gat tupela sap na i sap tru, em i stap long maus bilong en na i kam ausait. Na pes bilong en i lait tumas, olsem san i lait strong moa. Mi lukim em na mi pundaun klostu long lek bilong en, na mi stap olsem man i dai pinis.” (KTH 1⁠:​16, 17a) Bihain liklik Jisas yet i stori long ol sta i makim wanem samting. Tasol lukim dispela samting i stap long maus bilong em na i kam ausait, em “wanpela bainat i gat tupela sap na i sap tru.” I stret tru long dispela samting i mas i stap long maus bilong Jisas! Long wanem God Jehova i bin makim Jisas bilong tokaut long strafe bilong Em bai painim ol birua bilong Em. Strongpela tok bai lusim maus bilong Jisas na i kam ausait​—⁠bai em yet i tok na ol i kilim i dai olgeta man nogut.​—⁠KTH 19⁠:​13, 15.

13. (a) Pes bilong Jisas i lait tru na dispela i kirapim yumi long tingim wanem samting? (b) Ol stori Jon i mekim long Jisas, olsem em i lukim long driman, dispela i givim wanem save long yumi?

¹³ Pes bilong Jisas i lait kain olsem pes bilong Moses i mekim taim Jehova i bin toktok wantaim em long maunten Sainai. (Kisim Bek 34⁠:​29, 30) Na taim bodi bilong Jisas i senis long ai bilong 3-pela aposel bilong em klostu 2,000 yia bipo na em i kamap narapela kain, long dispela taim tu “pes bilong en i lait olsem san, na laplap samting bilong en i kamap waitpela olsem lait.” (Matyu 17⁠:⁠2) Nau long driman Jon i lukim Jisas i stap long de bilong Bikpela na pes bilong Jisas i lait olsem pes bilong man i bin stap long ai bilong God. (2 Korin 3⁠:18) Olgeta samting Jon i lukim i givim save long yumi olsem Jisas i gat biknem na em i stap long bikpela lait. Gras bilong em i waitpela tru, na ai bilong em i lait olsem paia, na pes na lek bilong em i lait tru​—⁠dispela driman i makim stret dispela Man nau em i stap “long bikpela lait tru, na yumi no inap i go klostu long em.” (1 Timoti 6⁠:16) Dispela driman i makim stret samting i stap tru! Jon i pilim tru na em i mekim wanem? Em i tok: “Mi lukim em na mi pundaun klostu long lek bilong en, na mi stap olsem man i dai pinis.”​—⁠KTH 1⁠:⁠17.

14. Taim yumi kaunim stori Jon i mekim long Jisas taim Jisas i kisim pinis biknem, dispela i mas mekim wanem long yumi?

¹⁴ Taim lain bilong God long nau ol i kaunim stori bilong Jon long dispela driman Jisas i bin givim long em, bel bilong ol i pilim tru. Nau yumi stap long de bilong Bikpela na 90 yia samting i bin kamap i go pinis, na truim bilong dispela driman i wok long kamap yet. Yumi save Kingdom bilong Krais i kamap pinis na i wok i stap​—⁠yumi no wetim i kamap long bihain. Dispela Kingdom i bosim yumi long nau na yumi stap gut long lo bilong en, olsem na i stret yumi laik kisim sampela save moa long dispela namba wan driman Jon i lukim, na yumi mas bihainim gut ol tok bilong Jisas, em Man i kisim pinis biknem.

[Ol Futnot]

[Ol Piksa long pes 23]

Ol man i painim pinis ol brukpela banis samting bilong ol taun bipo ol 7-pela kongrigesen i bin stap long en na dispela i strongim stori bilong Baibel. Ol Kristen bilong pastaim long ol dispela 7-pela kongrigesen i bin kisim ol tok Jisas i bin salim long ol bilong strongim ol, na ol dispela tok i strongim tu ol kongrigesen i stap long olgeta hap bilong graun

PERGAMUM

SMERNA

TAIATAIRA

SARDIS

EFESUS

FILADELFIA

LAODISIA

Sapta 6

Kamapim As Bilong Tok Hait

 1. Gutpela driman em Kamapim Tok Hait 1⁠:​10-​17 i stori long en i mas kirapim yumi long mekim wanem?

LONG driman Jon i lukim Jisas i kisim pinis biknem na Jon i pilim tru. Sapos yumi bin i stap long dispela taim na yumi tu i lukim Jisas i stap long bikpela lait na em i gat biknem, ating bai yumi tu i pundaun klostu long lek bilong em olsem Jon i bin mekim. (KTH 1⁠:​10-​17) Stori bilong dispela driman i stap long Baibel inap long nau bilong kirapim yumi long mekim wok. Olsem Jon, yumi tu i mas pilim tru ol samting dispela driman i makim. Yumi mas tingim gut bikpela namba Jisas i bin kisim​—⁠em i stap King pinis, na em i Hetpris na Jas​—⁠na yumi mas daun long em.​—⁠Filipai 2⁠:​5-​11.

“Mi Man i Stap Namba Wan Tru na i Stap Bihain Tru”

 2. (a) Jisas i kolim wanem nem long em yet? (b) Taim Jehova i tok, “Mi bin i stap pastaim tru” na “las tru,” wanem insait bilong dispela tok? (c) Taim Jisas i tok, “Mi man i stap namba wan tru” na “bihain tru,” dispela i bilong makim wanem samting?

² Tasol yumi no ken guria nogut. Jisas i tok promis long Jon, olsem nau Jon i stori: “Em i putim han sut bilong en long mi, na em i tok olsem, ‘Yu no ken pret. Mi man i stap namba wan tru na i stap bihain tru. Na mi man bilong i stap laip.’ ” (KTH 1⁠:17b, 18a) Long Aisaia 44⁠:6 Jehova i stori long bikpela namba bilong em yet, em wanpela tasol em i God i gat olgeta strong, na i stret em i tok olsem: “Mi bin i stap pastaim tru na bihain bai mi stap las tru. Na i no gat narapela god moa i stap, mi wanpela tasol.”a Taim Jisas i stori long em yet na em i tok, em i “man i stap namba wan tru na i stap bihain tru,” i no olsem em i tok em i bikpela olsem Jehova, em Bikpela Man bilong wokim olgeta samting. Nogat. Em i kolim dispela olsem wanpela bikpela nem bilong em, em God yet i bin givim long em. Long hap bilong Aisaia, Jehova i tokaut tasol olsem em wanpela tasol em i God tru. Em i stap God oltaim na i no gat narapela god. (1 Timoti 1⁠:17) Long hap bilong Kamapim Tok Hait, Jisas i kolim dispela tok olsem wanpela nem bilong em bilong makim kirap bek bilong em.

 3. (a) Olsem wanem Jisas em i “namba wan tru” na “bihain tru” o las tru? (b) Wanem insait bilong dispela tok olsem Jisas i holim “ki bilong Dai na bilong Ples bilong ol man i dai pinis”?

³ Jisas em i “namba wan tru” bilong kirap bek na kamap spirit long heven na i no inap i dai moa. (Kolosi 1⁠:18) Na em i “bihain tru,” olsem laspela man tru em Jehova yet i kirapim bek olsem. Olsem na nau em i “stap laip oltaim oltaim.” Nau em i no inap i dai, olsem Papa bilong em Jehova i no save dai, em Baibel i kolim Jehova olsem “God i save stap laip oltaim.” (KTH 7⁠:2; Song 42⁠:⁠2) Jisas yet bai kirapim bek ol narapela man. Em i tok, “Kirap bek, em mi yet. Na laip, em mi yet.” (Jon 11⁠:25) Na em i tokim Jon: “Bipo mi dai pinis, tasol lukim, nau mi stap laip oltaim oltaim. Na mi holim ol ki bilong Dai na bilong Ples bilong ol man i dai pinis.” (KTH 1⁠:18b) Jehova i givim strong long Jisas bilong kirapim bek ol man i dai pinis. Olsem na Jisas inap tok, em i holim ki bilong opim dua long ol man i kalabus long matmat (“ples bilong ol man i dai pinis”).​—⁠Lukim Matyu 16⁠:⁠18.

 4. Nau Jisas i kolim gen wanem tok em i bin givim long Jon? Em bilong helpim husat?

⁴ Nau Jisas i kolim gen dispela tok em i bin givim long Jon, em i tok: “Yu mas raitim tok bilong ol dispela samting yu lukim, em ol samting i stap nau na ol samting bai i kamap bihain.” (KTH 1⁠:19) Jon bai stori long wanem samting moa bilong givim save long yumi na bai yumi amamas long en?

Ol Sta na Ol Lam

 5. Jisas i stori olsem wanem long ol “7-pela sta” na ol “7-pela lam”?

⁵ Jon i bin lukim Jisas i sanap namel long 7-pela lam gol na em i holim 7-pela sta long han sut bilong em. (KTH 1⁠:​12, 13, 16) Nau Jisas i kamapim as bilong dispela, em i tok: “Yu bin lukim dispela 7-pela sta i stap long han sut bilong mi, na dispela 7-pela lam gol. Dispela em i olsem tok hait, na as bilong en i olsem: Dispela 7-pela sta, em ol ensel bilong ol 7-pela sios [kongrigesen]. Na dispela 7-pela lam, em ol 7-pela sios [kongrigesen] yet.”​—⁠KTH 1⁠:⁠20.

 6. Ol “7-pela sta” i makim wanem samting? Bilong wanem Jisas i tok Jon i mas raitim ol dispela tok i go long dispela lain stret?

⁶ Ol “sta” i olsem “ol ensel bilong ol 7-pela sios [kongrigesen].” Long Kamapim Tok Hait sampela taim ol sta i makim ol ensel tru, tasol Jisas i no ken givim wok long wanpela man bilong graun bilong raitim tok i go long ol ensel long heven. Olsem na dispela “7-pela sta” i mas makim ol man ol i wasman o elda long ol dispela kongrigesen, em ol i olsem ol man bilong givim tok bilong Jisas long ol kongrigesen.b Jisas i tokim Jon long raitim ol tok i go long ol “sta,” long wanem ol i gat wok olsem wasman bilong lukautim ol sipsip bilong Jehova.​—⁠Aposel 20⁠:⁠28.

 7. (a) Jisas i givim tok long wanpela ensel tasol bilong olgeta wan wan kongrigesen, tasol olsem wanem yumi save, dispela i no makim olsem olgeta wan wan kongrigesen i gat wanpela elda tasol long en? (b) Orait, dispela 7-pela sta i stap long han sut bilong Jisas ol i makim husat tru?

⁷ Jisas i givim tok long wanpela “ensel” tasol long olgeta wan wan kongrigesen, olsem na ating olgeta wan wan kongrigesen i gat wanpela elda tasol long en? Nogat. Long taim bilong Pol, kongrigesen bilong Efesus i gat sampela elda long en, i no wanpela tasol. (KTH 2⁠:1; Aposel 20⁠:17) Olsem na long taim bilong Jon, taim em i salim ol dispela tok i go long ol 7-pela sta bambai ol i ken kaunim long ol kongrigesen (em kongrigesen long Efesus tu), ol sta i makim olgeta wan wan insait long ol lain elda bilong liklik lain Kristen God i bin makim. Na long nau tu ol wasman i save kaunim ol pas long kongrigesen bilong ol, em ol pas Lain Bilong Bosim Ol Witnes i bin salim. Ol wasman long Lain Bilong Bosim Ol Witnes ol i man em God i bin makim ol na ol i wok aninit long Jisas. Lain elda long olgeta wan wan kongrigesen ol i gat wok bilong helpim kongrigesen long bihainim ol tok bilong Jisas. Ol dispela tok ol i kisim i no bilong helpim ol elda tasol. Nogat. Em bilong helpim olgeta manmeri i bung wantaim kongrigesen.​—⁠Lukim Kamapim Tok Hait 2⁠:11a.

 8. Ol elda i stap long han sut bilong Jisas na dispela i makim wanem samting?

⁸ Jisas em i Het bilong kongrigesen, olsem na i stret Baibel i tok ol elda i stap long han sut bilong em​—⁠em i bosim ol na stiaim ol. (Kolosi 1⁠:18) Em i Nambawan Wasman bilong sipsip na ol elda i olsem ol nambatu wasman.​—⁠1 Pita 5⁠:​2-4.

 9. (a) Ol 7-pela lam i makim wanem samting? Olsem wanem na lam i makim stret dispela lain? (b) Dispela samting Jon i lukim, ating dispela i kirapim em long tingim wanem samting?

⁹ Ol 7-pela lam i makim ol 7-pela kongrigesen Jon i raitim ol tok bilong Kamapim Tok Hait i go long ol. Dispela 7-pela kongrigesen em Efesus, Smerna, Pergamum, Taiataira, Sardis, Filadelfia, Laodisia. Olsem wanem na ol lam i makim ol kongrigesen? Long wanem ol Kristen wan wan na olgeta Kristen wantaim long wanpela kongrigesen ol i mas i stap ‘olsem lait long ai bilong ol manmeri’ long tudak bilong dispela graun. (Matyu 5⁠:​14-​16) Na tu, long haus lotu Solomon i bin wokim i gat ol lam i stap. Olsem na taim Jon i lukim ol dispela lam, ating em i tingim ol kongrigesen bilong dispela lain em God i bin makim ol, na long tok piksa olgeta wan wan kongrigesen i olsem “haus bilong God yet,” olsem ples em spirit bilong God i stap long en. (1 Korin 3⁠:16) Na ol samting bilong haus lotu bilong ol Juda i olsem piksa na i makim ol wok samting bilong dispela lain em God i bin makim ol​—⁠ol i bilong i stap “lain pris” long bikpela haus holi bilong Jehova long heven, na bai ol i mekim wok king. Jisas em i Hetpris bilong dispela haus holi na Jehova yet i stap long Rum Holi Tru bilong dispela haus.​—⁠1 Pita 2⁠:​4, 5, 9; Hibru 3⁠:1; 6⁠:20; 9⁠:​9-​14, 24.

Ol i Lusim Lotu Kristen Tru

10. Long yia 70, wanem samting i bin painim lain Juda na ol man bilong lotu Juda, em ol i no bin tanim bel?

¹⁰ Taim Jon i raitim Kamapim Tok Hait, lotu Kristen i bin i stap inap olsem 60 yia pinis. Taim lotu Kristen i kamap nupela, ol Juda i kirap birua long en i go i go inap 40 yia. Na bihain, olsem long yia 70, bikpela bagarap i painim lain Juda. Ol Juda i no bin tanim bel ol i no i stap moa olsem wanpela lain i gat kantri bilong ol, na samting i holi tru long ai bilong ol, em haus lotu long Jerusalem, em i bagarap.

11. Bilong wanem i stret Nambawan Wasman i givim toksave long ol kongrigesen long bipo long sampela pasin i wok long kamap?

¹¹ Tasol aposel Pol i tok pinis, sampela Kristen em God i bin makim ol, bai ol i lusim lotu Kristen tru. Na ol tok Jisas i givim long lapun Jon i kamapim long ples klia olsem dispela samting nogut i wok long kamap long taim bilong Jon. Jon em i laspela man bilong dispela lain i bin pasim wok bilong Satan long bagarapim lain bilong meri. (2 Tesalonaika 2⁠:​3-​12; 2 Pita 2⁠:​1-3; 2 Jon 7-​11) Olsem na i stret Nambawan Wasman bilong ol sipsip bilong Jehova em i mas salim tok i go long ol elda long ol dispela kongrigesen na toksave long ol long dispela pasin bilong lusim bilip em i wok long kamap. Olsem bai ol Kristen i gat stretpela bel ol i ken sanap strong na bihainim yet stretpela pasin.

12. (a) Bihain long taim bilong Jon, ol Kristen i wok long kisim wanem ol bilip giaman? (b) Lotu giaman i gat nem Kristen i bin kamap olsem wanem?

¹² Ol kongrigesen long yia 96, ol i harim gut ol tok bilong Jisas o nogat, em yumi no save. Tasol yumi save, taim Jon i dai pinis, kwiktaim dispela pasin bilong lusim bilip em i kamap strong. Ol man i tok ol i “Kristen,” ol i no kolim moa nem bilong Jehova; ol i senisim dispela nem na raitim “Bikpela” o “God” tasol long Baibel. Na inap olsem 350 yia bihain long Krais, dispela bilip bilong God Triwan i bin kam insait long ol kongrigesen. Na ol i wok long kisim bilip olsem yumi gat tewel. Na bihain King Konstantin bilong Rom i orait long lotu “Kristen,” na dispela i kamapim Kristendom, we Gavman na Lotu i wok wantaim inap 1,000 yia. I no hatwok long kamap kain “Kristen” olsem. Sampela lain olgeta ol i stretim liklik sampela bilip haiden bilong ol na ol i kisim dispela nupela lotu. Planti bikpela man bilong dispela lotu giaman i gat nem Kristen ol i kamap hatpela bos bilong gavman, na ol i subim ol man long bihainim ol bilip giaman bilong ol​—⁠sapos ol man i no laik bihainim, ol i save kirapim pait long ol na kilim ol i dai long bainat.

13. Jisas i tokim ol Kristen ol i no ken brukim lain, tasol ol man i lusim pinis lotu Kristen tru ol i bin mekim wanem?

¹³ Ol dispela man i lusim pinis lotu Kristen tru ol i sakim stret ol tok Jisas i bin givim long ol 7-pela kongrigesen. Jisas i bin toksave long ol Efesus long ol i mas holimpas pasin bilong laikim tru God olsem long taim ol i bilip nupela. (KTH 2⁠:⁠4) Tasol ol dispela Kristen giaman i no givim bel long Jehova na ol i no stap wanbel​—⁠ol i kirapim ol pait na narapela i mekim nogut tru long narapela. (1 Jon 4⁠:20) Jisas i bin toksave long kongrigesen bilong Pergamum long ol i no ken brukim lain. Tasol 150 yia samting bihain long Krais i gat kain kain lain bilong lotu, na long nau tu i gat planti tausen kain kain lain bilong lotu i gat nem Kristen, tasol ol i save birua birua.​—⁠KTH 2⁠:⁠15.

14. (a) Jisas i tokim ol Kristen ol i mas was gut, nogut ol i dai pinis long ol samting bilong spirit, tasol ol man i holim nating nem Kristen ol i bin mekim wanem? (b) Jisas i tambuim pasin bilong lotuim god giaman na pasin pamuk, tasol ol man i gat nem Kristen, ol i bin mekim wanem?

¹⁴ Jisas i bin tokim kongrigesen long Sardis ol i mas was gut, nogut ol i dai pinis long ol samting bilong spirit. (KTH 3⁠:⁠1) Ol man i holim nating nem Kristen ol i kain olsem ol dispela Kristen long Sardis long bipo​—⁠kwiktaim ol i lusim tingting long ol wok Kristen ol i mas mekim na ol i givim wok long sampela man tasol bilong autim tok, em ol pris na pasto, na ol i baim ol bilong mekim dispela wok. Jisas i tokim kongrigesen long Taiataira ol i mas was gut long pasin bilong lotuim god giaman na pasin pamuk. (KTH 2⁠:20) Tasol ol lotu i gat nem Kristen ol i orait long ol man i lotuim ol piksa na ol god giaman. Na ol i kirapim ol man long laikim tumas mani kago na long litimapim kantri​—⁠ol dispela pasin tu i olsem pasin bilong lotuim god giaman. Tru, sampela tisa bilong lotu ol i tokaut olsem pamuk i samting nogut, tasol ol dispela lotu i no gat tok long ol manmeri i mekim ol kain pasin sem​—⁠ol i larim ol tasol.

15. Ol tok Jisas i bin givim long ol 7-pela kongrigesen i kamapim long ples klia wanem samting bilong ol lotu i holim nating nem Kristen? Ol pris pasto bilong ol dispela misin i bin kamap wanem samting?

¹⁵ Olsem na ol tok Jisas i bin givim long ol 7-pela kongrigesen i kamapim long ples klia olsem olgeta misin i holim nating nem Kristen ol i no lain tru bilong God Jehova. Tru tumas, ol pris pasto bilong ol i nambawan lain bilong Satan. Aposel Pol i kolim ol dispela pris pasto olsem “man bilong sakim lo” na em i tok, bai ol i “kamap ples klia long strong bilong Satan tasol. Na long pasin giaman bilong Satan [ol] bai i mekim olgeta kain strongpela wok na . . . giamanim ol dispela manmeri.”​—⁠2 Tesalonaika 2⁠:​9, 10.

16. (a) Ol hetman bilong ol lain i gat nem Kristen ol i bin birua tru long husat? (b) Namel long yia 476-​1450 wanem samting i bin kamap long hap bilong ol lain i gat nem Kristen? (c) Taim ol man i lusim Misin Katolik na kamapim ol lotu Talatala, senis i bin kamap na ol i kirap bihainim gen lotu Kristen tru o nogat?

¹⁶ Ol hetman bilong ol lotu na gavman long ol lain i gat nem Kristen, ol i tok ol i wasman bilong lain sipsip bilong God, tasol ol i bin birua tru long ol man i laik kirapim ol man long kaunim Baibel, na long ol man i kamapim klia ol pasin kranki bilong ol i no stret long Baibel. Ol i bin mekim nogut long Jon Hus na long man bilong tanim tok bilong Baibel, em Wiliam Tindel, na ol i kilim tupela i dai. Namel long yia 476-​1450 ol man i stap olsem long tudak na ol dispela hetman i bin lusim lotu Kristen tru ol i bosim nogut ol man na ol i mekim nogut tru long ol man i no laik bihainim lotu Katolik. Ol i daunim tru ol man i gat tok long bilip o wok o strong bilong Misin. Ol i kalabusim ol na givim bikpela pen tru long ol i go inap long ol i dai, o ol i pasim ol long pos na kukim ol long paia na kilim ol i dai. Long dispela rot Satan i laik daunim kwik ol manmeri ol inap kamap lain tru bilong “meri” o oganaisesen bilong God. Taim ol man i kirap lusim lotu Katolik na kamapim ol lotu Talatala (olsem long yia 1517 samting), planti lotu Talatala tu i mekim pasin nogut long ol man i gat narapela bilip. Ol tu i gat asua long blut, long wanem ol i bin kilim i dai sampela man ol i wok long i stap gut long God na Krais.​—⁠KTH 16⁠:6; skelim wantaim Matyu 23⁠:​33-​36.

Lain Bilong Meri i No Bagarap

17. (a) Tok piksa bilong Jisas long wit na gras nogut i makim wanem samting i mas kamap bihain? (b) Wanem samting i bin kamap long yia 1918? Na Jisas i bin sakim husat? Em i makim wanpela “wokboi” bilong mekim wanem wok?

¹⁷ Jisas i bin mekim wanpela tok piksa long wit na gras nogut, na em i makim olsem taim ol dispela lain i gat nem Kristen ol i bosim graun bai i olsem taim bilong tudak. Tasol kirap long taim ol i lusim lotu Kristen tru inap long nau, i gat sampela Kristen ol i olsem wit​—⁠ol i Kristen tru na God i bin makim ol. (Matyu 13⁠:​24-​29, 36-​43) Olsem na taim de bilong Bikpela i kirap long Oktoba 1914, i gat sampela Kristen tru i stap long graun. (KTH 1⁠:10) Long yia 1918, em 3-pela yia hap bihain, i olsem Jehova i bin i kam long haus lotu spirit bilong em bilong skelim lain bilong em. Em i kam wantaim Jisas, em i “man bilong autim tok.” (Malakai 3⁠:1; Matyu 13⁠:​47-​50) Em taim bilong Bikman i mas sakim ol Kristen giaman, na em i mas makim wanpela ‘gutpela wokboi’ na putim em bilong ‘bosim olgeta samting bilong Bikman bilong em.’​—⁠Matyu 7⁠:​22, 23; 24⁠:​45-​47.

18. Wanem “traim” i kamap long 1914? Em taim bilong wokboi i mas mekim wanem?

¹⁸ Na em i taim bilong dispela wokboi i mas tingim gut ol tok Jisas i bin tokim Jon long raitim i go long ol 7-pela kongrigesen, olsem ol dispela tok yet i makim. Olsem: Jisas i tok em bai kamap long ol bilong skelim ol, na dispela samting i bin kamap long yia 1918. (KTH 2⁠:​5, 16, 22, 23; 3⁠:⁠3) Em i tok long lukautim kongrigesen bilong Filadelfia taim “dispela traim i laik kamap na traim olgeta manmeri long olgeta hap bilong graun.” (KTH 3⁠:​10, 11) “Dispela traim” i bin kamap taim de bilong Bikpela i kirap long yia 1914, na bihain traim i painim ol Kristen bambai ol i ken kamapim bel bilong ol, ol i givim bel tru long Kingdom bilong Krais i kamap pinis long heven, o nogat?​—⁠Lukim Matyu 24⁠:​3, 9-​13.

19. (a) Ol 7-pela kongrigesen i makim wanem samting long nau? (b) Wanem bikpela lain i bin kam bung wantaim liklik lain em God i makim? Olsem wanem tok bilong Jisas i stret long dispela lain tu? (c) Yumi mas ting olsem wanem long ol tok Jisas i bin givim long ol 7-pela kongrigesen bilong ol Kristen bilong pastaim?

¹⁹ Olsem na bikpela truim bilong ol tok bilong Jisas long ol 7-pela kongrigesen em i bin kamap long 1914 na bihain long dispela taim. Nau yumi save, dispela 7-pela kongrigesen i olsem piksa bilong olgeta kongrigesen bilong dispela liklik lain God i bin makim, em olgeta kongrigesen i stap long de bilong Bikpela. Jon em i olsem piksa bilong liklik lain Kristen em God i bin makim. Insait long 70 yia i go pinis bikpela lain bilipman i bin bung wantaim dispela liklik lain, na ol dispela bilipman i wet long kisim laip oltaim long Paradais long graun. Ol tok Krais Jisas i bin givim long ol 7-pela kongrigesen bilong stretim sampela pasin bilong ol, ol dispela tok i stret tu long dispela bikpela lain bilipman, long wanem i gat wanpela kain lo tasol bilong olgeta wokboi bilong Jehova​—⁠olgeta i mas bihainim stretpela pasin na i stap gut long Jehova. (Kisim Bek 12⁠:49; Kolosi 3⁠:11) Olsem na ol tok Jisas i bin givim long ol 7-pela kongrigesen bilong Esia Maina i no samting bilong bipo tasol. Nogat. Ol dispela tok inap helpim yumi olgeta wan wan long abrusim bagarap. Yumi mas harim gut ol dispela tok.

[Ol Futnot]

[Blok long pes 32]

Taim Bilong Traim na Skelim Man

Jisas i kisim baptais long Oktoba samting long yia 29 na God i makim em bilong kamap King. Tripela yia hap bihain, long yia 33, em i kam long haus bilong God long Jerusalem na rausim ol man i mekim dispela haus i kamap olsem ples hait bilong ol stilman. Olsem na ating i gat 3-pela yia hap namel long taim Jisas i kamap King long Oktoba 1914 na taim em i kam bilong skelim ol man i gat nem Kristen, long wanem, em i mas skelim lain o ‘haus’ bilong God pastaim. (Matyu 21⁠:​12, 13; 1 Pita 4⁠:17) Long kirap bilong yia 1918 ol man i birua tru long wok bilong lain bilong Jehova. Traim i painim olgeta na sampela i pret na lusim lain bilong Em. Long Me 1918 ol pris pasto i kirapim gavman long putim sampela hetman bilong Sosaiti Was Taua long kalabus, tasol 9-pela mun bihain ol i lusim kalabus. Bihain, ol i no kotim ol moa long dispela samting. Ol dispela traim i painim lain bilong Jehova i olsem paia i kukim ol na ol i kamap klin, olsem na kirap long yia 1919 ol i kamap strong na ol i wok strong long autim tok bilong Kingdom na tokim ol man, dispela Kingdom tasol inap helpim ol.​—⁠Malakai 3⁠:​1-3.

Taim Jisas i kirap mekim dispela kot long 1918, ol pris pasto i gat nem Kristen i lus long kot. Ol i bin kirapim ol man long mekim nogut long lain bilong God, na ol i gat bikpela asua long blut, long wanem ol i bin helpim ol lain i insait long Namba Wan Pait. (KTH 18⁠:​21, 24) Ol dispela pris pasto i givim bel long oganaisesen ol man i bin kamapim, em Lig ov Nesen, na ol i tok, em rot bilong kamapim gutaim long graun. I kam inap long yia 1919, ol misin i gat nem Kristen wantaim olgeta narapela lotu giaman, ol i lus olgeta long ai bilong God.

[Mep long pes 28, 29]

(Bilong save ol dispela rait i stap we long pes, lukim buk o magasin)

EFESUS

SMERNA

PERGAMUM

TAIATAIRA

SARDIS

FILADELFIA

LAODISIA

[Ol Piksa long pes 31]

Ol misin i gat bikpela asua long blut, long wanem ol i bin mekim nogut long ol man i tanim tok bilong Baibel o kaunim Baibel o holim wanpela Baibel, na ol i bin kilim ol i dai