Wanpela Hevi Long Olgeta Hap

Ol saveman i tok long yia 2030, sapos ol man i no lusim pasin bilong smok, namba bilong ol man i dai long olgeta wan wan yia bai go antap winim 8 milion. Ol i ting long yia 2100, namba bilong ol man i dai long smok bai inap olsem 1 bilion.

Ol man i no save smok ol tu i kisim hevi long pasin bilong smok. Olsem, ol famili bilong ol man i dai long pasin bilong smok, ol i save bel hevi na karim hevi long sait bilong mani. Na tu, inap olsem 600,000 man husat i no smok i dai bikos ol i pulim win bilong smok bilong ol narapela. Olgeta man i kisim hevi long dispela bikos pe bilong baim marasin samting i go antap.

Dispela hevi i no olsem ol bikpela sik we ol dokta i mas hariap long painim marasin bilong pinisim, nogat. I gat rot bilong pinisim dispela hevi na ol man i save gut long en. Dairekta-jeneral bilong World Health Organization, Dokta Margaret Chan i tok: “Ol man yet i as bilong ol bikpela sik em smok i kamapim, na ol gavman na ol man inap mekim ol samting bilong stopim dispela hevi.”

Long olgeta hap, planti man i wok strong long daunim ol bikpela sik em pasin bilong smok i kamapim. Long Ogas 2012, inap olsem 175 kantri i wok bung wantaim long daunim dispela pasin.a Tasol ol edvetaismen na marasin nogut insait long smok tabak i mekim na planti man i kalabus long smok. Long olgeta yia, ol kampani bilong wokim smok i tromoi planti bilion dola long edvetaismen bilong kisim ol nupela kastama, moa yet em ol meri na ol tineja long ol kantri i no gat planti wok bisnis. Pasin bilong smok tabak i kalabusim planti man, olsem na planti man namel long dispela wan bilion husat i save smok ol bai dai. Sapos ol man i no lusim smok, bihain long 40 yia namba bilong ol man i dai bai i go antap.

Ol edvetaismen na pasin bilong kalabus long smok i mekim na planti i hatwok long lusim smok. Kain samting olsem i bin painim Naoko. Em i kirap smok taim em i tineja. Em i bihainim pasin em i lukim long edvetaismen na dispela i mekim em i pilim olsem em i winim ol narapela. Maski papamama bilong en i dai long sik kensa na em i mas lukautim 2-pela pikinini meri bilong em, em i wok yet long smok. Em i tok: “Mi tingting planti olsem bai mi kisim kensa bilong waitlewa na mi wari long helt bilong ol pikinini bilong mi, tasol mi hatwok long lusim smok. Mi ting mi no inap tru long lusim dispela pasin.”

Tasol bihain Naoko i lusim pasin bilong smok. Samting i helpim em long lusim smok i bin helpim tu planti milion manmeri. Wanem dispela samting? Neks atikol bai stori long dispela.