Yu Ting Yumi Stap Long “Taim Bilong Las De”?

 1. Yumi inap kisim save we long ol samting bai kamap bihain?

OLSEM WANEM? Nius yu lukim long TV o harim long redio i kirapim yu long askim olsem, ‘Wanem samting bai painim dispela graun?’ Ol bikpela bagarap i save kamap wantu na yumi no ting ol kain samting olsem bai kamap, olsem na i no gat wanpela man inap tokaut long samting bai kamap long bihain. (Jems 4:14) Tasol Jehova i save long ol samting bai kamap long bihain. (Aisaia 46:10) Long bipo yet Baibel i bin tok profet long ol samting nogut i wok long kamap long taim bilong yumi, na long ol gutpela samting klostu nau bai kamap.

2, 3. Ol disaipel bilong Jisas i mekim wanem askim? Jisas i bekim olsem wanem?

² Jisas Krais i bin toktok long Kingdom Bilong God, em dispela Kingdom bai pinisim pasin nogut na mekim graun i kamap Paradais. (Luk 4:43) Ol manmeri i laik save long wanem taim Kingdom bai kamap. Ol disaipel bilong Jisas i askim em olsem: “Wanem mak bai kamap bilong makim olsem yu kam i stap na pasin bilong dispela graun i laik pinis?” (Matyu 24:​3, NW) Bilong bekim dispela askim, Jisas i tokim ol olsem God Jehova tasol i save long wanem taim pasin bilong dispela graun bai pinis. (Matyu 24:36) Tasol Jisas i tok profet long ol samting bai kamap long graun paslain liklik long Kingdom bai kamapim bel isi na gutpela sindaun long ol manmeri. Ol samting em i bin tok profet long en i wok long kamap long nau!

³ Paslain long yumi skelim ol samting i soim olsem yumi stap long taim “pasin bilong dispela graun i laik pinis,” yumi ken skelim wanpela pait i no gat wanpela man long graun i bin lukim. Em i bin kamap long ples spirit, na ol samting pait i kamapim i mekim bikpela samting long yumi.

4, 5. (a) Wanem samting i kamap long heven bihain liklik long Jisas i kamap King? (b) Olsem Kamapim Tok Hait 12:12 i tok, pait i kamap long heven i kamapim wanem samting?

⁴ Sapta i kamap paslain long dispela i soim olsem Jisas Krais i kamap King long heven long yia 1914. (Daniel 7:​13, 14) Bihain liklik long dispela, Jisas i kirap mekim ol samting. Baibel i tok: “Bikpela pait i kirap long heven. Maikel [narapela nem bilong Jisas] wantaim ol ensel bilong en ol i pait long dispela traipela snek [Satan]. Na snek wantaim ol ensel bilong en ol i bekim pait long ol.”a Satan na ol ensel bilong em, ol spirit nogut, ol i lus long pait na ol i raus long heven na i kam daun long graun. Ol gutpela ensel bilong God i amamas long Satan na ol spirit nogut bilong em i no stap moa long heven. Tasol ol manmeri bilong graun bai i no amamas. Baibel i tok: ‘Yu graun, yu lukaut. Bikpela hevi i laik kamap long yu. Satan i go daun pinis long yu, na em i belhat nogut tru. Em i save, em i gat sotpela taim tasol bilong i stap.’​—KTH 12:​7, 9, 12.

⁵ Plis lukim samting dispela pait long heven i kamapim. Satan i belhat tru, na em i kamapim ol bikpela hevi hia long graun. Olsem yu bai lukim, nau yumi stap long dispela taim bilong ol bikpela hevi. Tasol dispela haptaim i no longpela​—em “sotpela taim tasol.” Satan tu i save long dispela. Baibel i kolim dispela haptaim olsem “taim bilong las de.” (2 Timoti 3:1) Yumi ken amamas tru olsem klostu nau God bai pinisim ol wok nogut bilong Satan hia long graun! Nau yumi ken skelim sampela samting em Baibel i tok profet long en na i wok long kamap long nau stret. Ol dispela samting i kamapim klia olsem yumi stap long taim bilong las de na klostu nau Kingdom Bilong God bai kamapim ol blesing i stap oltaim bilong ol man i laikim tru Jehova. Pastaim yumi ken skelim fopela samting em Jisas i tok ol i makim haptaim yumi stap long en.

6, 7. Olsem wanem tok bilong Jisas long ol woa na bikpela hangre i kamap tru long nau?

⁶ “Ol lain bilong sampela king bai i kirapim pait long ol lain bilong ol narapela narapela king.” (Matyu 24:7) Insait long 100 yia i go pinis, planti milion manmeri i bin dai long ol pait. Wanpela saveman bilong Briten i tok: “Kirap long 1900 i go inap 2000 samting, ol i bin kapsaitim blut bilong planti man tru, winim olgeta taim bipo. . . . Dispela haptaim em taim bilong pait tasol, wan wan taim tasol na inap sotpela taim tasol i no gat pait i stap long graun.” Ripot bilong wanpela lain (Worldwatch Institute) i tok: “Namba bilong ol manmeri i dai long ol pait long [1900 i go inap 2000], i winim tripela taim namba bilong ol man i dai long olgeta pait i bin kamap bihain long taim bilong Krais i kam inap long yia 1899.” Kirap long 1914 na i kam, winim 100 milion manmeri i bin dai long ol pait. Maski yumi save pinis long bikpela bel hevi i save kamap taim wanpela yumi laikim tru em i dai long pait, yumi no inap pilim bikpela bel hevi na pen em planti milion manmeri i karim taim wanpela ol i laikim tru em i dai long pait.

⁷ “Long sampela hap ol bai i gat taim bilong bikpela hangre.” (Matyu 24:7) Ol saveman i tok, wok bilong kamapim kaikai i go bikpela insait long 30 yia i go pinis. Tasol bikpela hangre i stap yet, long wanem, planti man i no gat mani bilong baim kaikai o ol i no gat graun bilong planim kaikai long en. Planti milion manmeri i hangre long olgeta taim. Lain Wol Helt Oganaisesen i tok, winim 5 milion pikinini i dai long olgeta yia, long wanem, ol i no kaikai gut.

8, 9. Wanem samting i soim olsem ol tok profet bilong Jisas long ol guria na bikpela sik i bin kamap tru?

⁸ “Ol bikpela bikpela guria bai i kamap.” (Luk 21:11) Wanpela lain (U.S. Geological Survey) i tok, 19 bikpela guria inap kamap long olgeta yia. Ol i bikpela inap long bagarapim ol haus na brukim graun. Na long olgeta yia ol bikpela guria tru i kamap na ol haus i save bagarap olgeta. Ol ripot i soim olsem kirap long 1990 na i kam, ol guria i bin kilim i dai winim 2 milion manmeri. Wanpela lain i tok: Ol saientis i kisim nupela save long ol samting bilong lukautim ol man long taim bilong guria, dispela i bin daunim liklik tasol namba bilong ol man i dai taim graun i guria.”

⁹ “Bai i gat taim bilong . . . bikpela sik.” (Luk 21:11) Maski ol dokta i kisim nupela save long stretim ol sik, ol olpela na nupela sik i bagarapim yet ol manmeri. Wanpela ripot i tok, 20 sik ol man i save pinis long ol​—olsem TB, malaria, na kolora​—i go bikpela long taim bilong yumi, na sampela sik i hatwok moa long oraitim long rot bilong marasin. Inap 30 nupela sik i bin kamap. Sampela bilong ol i no gat rot bilong stretim na ol i kilim man i dai.

10. Yu inap lukim wanem ol pasin ol man i mekim long nau, em 2 Timoti 3:​1-5 i stori long en?

¹⁰ Baibel i tok profet long ol samting bai kamap long graun, na tu, em i tok profet olsem senis bai kamap long pasin bilong ol manmeri long taim bilong las de. Aposel Pol i stori long pasin planti man bai bihainim. Namba 2 Timoti 3:​1-5 i tok: “Long taim bilong las de planti hevi nogut tru bai i kamap.” Pol i tok ol manmeri bai

• laikim ol yet tasol

• laikim tumas mani

• sakim tok bilong papamama

• givim baksait long ol pasin bilong God

• i no save long pasin bilong i stap pren

• i no bosim laik bilong bodi

• pait na bagarapim ol man

• laikim tumas ol kain kain pasin bilong amamas na i no laikim God

• bihainim pasin bilong God long skin tasol

11. Song 92:7 i tok wanem samting bai painim ol man nogut?

¹¹ Olsem wanem? Ol manmeri i gat ol dispela pasin long hap yu stap long en? Ating ol i gat. Long olgeta hap i gat ol manmeri i gat ol pasin nogut. Dispela i soim olsem klostu nau God bai mekim ol samting, olsem Baibel i tok: “Ol man nogut i ken kamap gutpela olsem gras, na ol man i save mekim pasin nogut, ol i ken kisim planti samting, na ol i ken i stap gut, tasol bai yu bagarapim ol olgeta.”​—Song 92:7.

12, 13. Olsem wanem “stretpela save” i bin go bikpela long dispela “taim bilong pinis”?

¹² Tru tumas, taim bilong las de i pulap long ol hevi, olsem Baibel i tok. Tasol long dispela graun i gat planti hevi long en, ol gutpela samting i kamap namel long lain i lotuim Jehova.

¹³ Buk Daniel long Baibel i tok profet olsem: “Stretpela save bai kamap planti.” Long wanem taim dispela bai kamap? Long “taim bilong pinis.” (Daniel 12:​4, NW) Kirap long 1914 na i kam, Jehova i bin helpim ol man i laik tru long mekim wok bilong em long kliagut moa long ol tok bilong Baibel. Ol i kliagut moa long ol stretpela save long nem bilong God na ol samting God bai mekim, ofa bilong Jisas Krais bilong baim bek ol man, ol man i dai pinis i stap olsem wanem, na kirap bek. Na tu, ol man i lotuim Jehova ol i bin lain long bihainim ol pasin i save helpim ol yet na i litimapim nem bilong God. Ol i bin kisim gutpela save moa long wok Kingdom Bilong God bai mekim na olsem wanem em bai stretim ol hevi bilong graun. Ol i mekim wanem long dispela save? Dispela askim i kirapim yumi long tingim narapela tok profet em truim bilong en i wok long kamap long dispela taim bilong las de.

14. Wok bilong autim gutnius bilong Kingdom long nau i bikpela olsem wanem? Husat i autim dispela tok?

¹⁴ “Bai ol i autim dispela gutnius bilong kingdom bilong God long olgeta hap bilong graun,” em tok Jisas Krais i mekim long tok profet bilong em long taim bilong pasin nogut bilong dispela graun bai pinis. (Matyu 24:​3, 14) Ol i autim gutnius bilong Kingdom long winim 230 kantri na winim 400 tok ples. Ol i tokim ol man long Kingdom em i wanem samting, em bai mekim wanem, na olsem wanem yumi inap kisim ol blesing bilong en. Planti milion Witnes Bilong Jehova i givim bel long autim gutnius bilong Kingdom. Ol i bilong “olgeta lain man na bilong olgeta kantri na bilong olgeta kain skin na bilong olgeta tok ples.” (KTH 7:9) Ol Witnes i save stadi long Baibel, no gat pe, wantaim planti milion manmeri husat i laik save long tru tru Baibel i tok wanem. Yumi kirap nogut long truim bilong dispela tok profet, na dispela i bikpela samting moa yet taim yumi tingim tok profet bilong Jisas olsem “olgeta man bai i bel nogut tru long” ol trupela Kristen!​—Luk 21:17.

15. (a) Yu bilip olsem yumi stap long taim bilong las de? Bilong wanem yu bilip olsem? (b) Taim “las de” i kamap, wanem samting bai painim ol man i birua long Jehova? Wanem samting bai painim ol man i daun long wok bos bilong Kingdom Bilong God?

¹⁵ Planti tok profet bilong Baibel i wok long kamap tru long nau, olsem na ating yu wanbel long tok olsem yumi stap long taim bilong las de, a? Taim ol i autim gutnius inap long mak Jehova i laikim, pinis olsem “las de” bai kamap. (Matyu 24:14) Dispela “las de” i makim taim God bai pinisim pasin nogut long graun. Jehova bai mekim wok long Jisas na ol strongpela ensel, bilong pinisim olgeta lain husat i bikhet na birua long Em. (2 Tesalonaika 1:​6-9) Satan na ol spirit nogut bai i no giamanim moa ol manmeri. Bihain long dispela, Kingdom Bilong God bai givim ol blesing long olgeta lain husat i daun long wok bos bilong en.​—KTH 20:​1-3; 21:​3-5.

16. I gutpela long yu mekim wanem?

¹⁶ Klostu nau pasin nogut bilong graun bilong Satan bai pinis, olsem na yumi mas askim yumi yet olsem, ‘Mi mas wok long mekim wanem?’ Em i savetingting long wok long kisim sampela save moa long Jehova na ol samting em i laik bai yumi mas mekim. (Jon 17:3) Givim bel long stadi long Baibel. Kisim pasin bilong bung oltaim wantaim ol narapela husat i wok strong long mekim laik bilong Jehova. (Hibru 10:​24, 25) Kisim dispela bikpela save em God Jehova i bin opim rot long ol manmeri long olgeta hap i ken kisim, na mekim ol senis long laip bilong yu na bai God i ken orait long yu.​—Jems 4:8.

17. Bilong wanem planti man bai kirap nogut taim ol man nogut i bagarap?

¹⁷ Jisas i tok profet olsem planti man bai i no tingim ol mak i kamapim klia olsem yumi stap long taim bilong las de. Bagarap bilong ol man nogut bai kamap wantu na long taim ol i no ting em bai kamap. Planti man bai kirap nogut taim dispela samting i kamap, olsem ol i save kirap nogut taim stilman i kam long nait. (1 Tesalonaika 5:2) Jisas i mekim tok lukaut: “Kain pasin ol i bin mekim long taim bilong Noa, ol bai i mekim wankain pasin tasol long taim Pikinini Bilong Man i kamap. Taim bikpela tait i no kamap yet, ol i wok long kaikai na dring, na ol man i maritim ol meri, i go inap long taim Noa i go insait long sip. Ol i no save long dispela samting bai i kamap long ol, na ol i stap olsem tasol i go inap long taim bikpela tait i kamap na i pinisim olgeta dispela manmeri. Orait wankain pasin tasol bai i kamap long taim Pikinini Bilong Man i kamap.”​—Matyu 24:​37-39.

18. Yumi mas pilim tru wanem tok lukaut bilong Jisas?

¹⁸ Olsem na Jisas i tokim ol man: “Yupela lukaut gut. Nogut yupela i dring nabaut oltaim na yupela i spak. Na nogut yupela i wari long ol samting bilong bodi. Sapos kain pasin olsem i daunim yupela, orait dispela de bilong Bikpela bai i kamap long yupela wantu tasol, olsem umben i save holimpas abus, long wanem, dispela de bai i kamap long olgeta manmeri i stap long olgeta hap bilong graun. Oltaim oltaim yupela i mas was i stap. Na yupela i mas beten oltaim long God i givim strong long yupela. Olsem na bai yupela i abrusim olgeta dispela samting i laik kamap, na bai yupela i sanap long ai bilong Pikinini Bilong Man [na em i orait long yupela].” (Luk 21:​34-36) Em i savetingting long pilim tru tok bilong Jisas. Bilong wanem? Long wanem, ol man em God Jehova na “Pikinini Bilong Man,” em Jisas Krais, i orait long ol, ol inap abrusim bagarap taim pasin nogut bilong dispela graun em Satan i bosim i pinis na ol inap i stap oltaim oltaim long nupela taim em klostu nau bai kamap!​—Jon 3:16; 2 Pita 3:13.