Kisim Bek Man Long Ailan Robinson Kruso

ROBINSON KRUSO em i wanpela bilong 3-pela ailan ol i insait long lain ailan ol i kolim Juan Fernandes i stap long solwara Pasifik, inap olsem 640 kilomita longwe long kantri Sili.a Dispela ailan i bikpela olsem 93 skwe kilomita, na em i kisim nem bilong en long wanpela stori planti man i save long en, nem bilong stori em Robinson Crusoe, em Daniel Defoe bilong Inglan i bin raitim long yia 1719. As bilong stori em ol samting i bin painim wanpela man bilong Skotlan, em Aleksander Selkurk. Em i stap wanpis long dispela ailan inap fopela yia.

Wanpela toksave ol i raitim long hap plang i stap long ailan i tok: “Long dispela hap, long olgeta wan wan de inap fopela yia, boskru bilong sip, em Aleksander Selkurk bilong Skotlan, i lukluk i go long solwara bilong lukim wanpela sip i kam bilong kisim em bek na bai em inap lusim dispela hap em i stap wanpis long en.” Bihain wanpela sip i kam kisim Selkurk na em i go bek long as ples bilong em, tasol em i no amamas moa long as ples, long wanem, em i tingim dispela ailan em i bin stap long en i olsem liklik paradais bilong em yet. Bihain em i tok: “Sori, ailan mi laikim tumas! Mobeta mi no bin lusim yu!”

Bihain dispela ailan i kamap ples kalabus bilong ol man nogut, na sampela ol i kalabus, long wanem, ol i lusim bilip bilong Misin Katolik. Bikpela senis i kamap na ailan i no ples paradais moa olsem long taim bilong Selkurk! Tasol lain i stap nau long dispela ailan ol i stap bel isi tru, winim planti narapela hap bilong graun. I no hatwok long kirap toktok wantaim ol manmeri bilong dispela ailan, long wanem, ol i gat wankain pasin olsem planti lain i stap long ol ailan, em pasin bilong i stap isi.

Gavman i tok namba bilong ol man i stap long ailan Robinson Kruso em 500, tasol klostu long yia olgeta, inap olsem 400 manmeri tasol i stap. Wanpela as bilong dispela em i olsem, sampela mama na pikinini ol i save stap long bikples Sili bambai ol pikinini i ken skul, na ol i save kam bek long ailan na stap wantaim famili olgeta long taim bilong malolo bilong skul.

Maski ailan Robinson Kruso i stap olsem naispela gaden, sampela manmeri bilong dispela ailan ol i pilim olsem ol i sot long samting bilong spirit na ol i wok long painim bekim bilong ol askim bilong ol. Na sampela i pilim olsem ol i laik bagarap long ol samting bilong spirit na i mas i gat man bilong helpim ol.

Helpim Ol Long Samting Bilong Spirit

Wanpela wok bilong helpim man long ol samting bilong spirit i bin kirap long yia 1979. Wanpela meri i stap long Santiago, Sili, i wok long stadi long Baibel wantaim Ol Witnes Bilong Jehova, na em i lusim Santiago na i go sindaun long dispela ailan na em i kirap skulim sampela long ol samting em i bin lainim. Bihain wanpela elda bilong wanpela kongrigesen i go raun long dispela ailan bilong mekim sampela wok skin na em i kirap nogut long painim wanpela liklik lain sumatin bilong Baibel i stap, em dispela meri i helpim ol, na ol i wok long kamap strong long ol samting bilong spirit. Tripela mun bihain, taim elda i go bek lukim ol gen, dispela meri wantaim tupela sumatin bilong em ol i redi long kisim baptais, olsem na dispela elda i baptaisim ol. Bihain wanpela bilong ol dispela nupela Kristen i baptais pinis em i marit, na em wantaim man bilong em ol i wok long painim sampela manmeri moa bilong helpim ol long ol samting bilong spirit. Man bilong dispela meri i go pas long wokim wanpela liklik Haus Kingdom, na liklik grup i stap long ailan i mekim wok yet long en. Bihain tupela i gat hevi long wok mani, olsem na ol i mas lusim Robinson Kruso na go stap long wanpela kongrigesen i stap namel long kantri Sili, na long dispela hap ol i mekim yet wok bilong Jehova.

Isi isi dispela liklik lain long ailan i wok long go bikpela taim ol i helpim sampela moa long lusim ol lotu giaman. Tasol ol skulmanki i mas lusim ailan na go long bikples bilong i go long haiskul, olsem na lain i go liklik na tupela sista i baptais pinis na wanpela yangpela meri tasol i stap. Lain i save go bikpela liklik long taim bilong malolo bilong skul, taim sampela mama i kam bek long ailan. Dispela i save givim nupela strong long 3-pela Kristen ol i stap long ailan long yia olgeta. Ol sista i save wok strong, olsem na ol lain long Robinson Kruso ol i save gut long Ol Witnes Bilong Jehova. Tru, sampela manmeri bilong ailan ol i birua long wok ol Witnes i mekim na ol i traim kirapim ol narapela long givim baksait long tok bilong Kingdom. Tasol tok i tru bilong Baibel i wok long kru insait long bel bilong ol manmeri em ol i gat gutpela bel.

Strongim Lain Ol i Helpim Ol Pinis

Wanpela taim long yia wanpela wasman bilong raun i save go lukim ol. Ol i mekim wanem long taim ol i go lukim wanpela liklik lain Witnes long wanpela ailan i stap longwe long ol narapela? Wanpela wasman sekit i stori long namba wan taim em i bin go lukim ol Witnes long ailan Robinson Kruso:

“Raun bilong mipela i gutpela tru. Long 7 klok moningtaim mipela i kisim ka na lusim Valparaiso na go long Ples Balus Sereyos long Santiago. Mipela kalap long wanpela liklik balus i save karim 7-pela man. Mipela stap long balus 2-pela aua na 45 minit na mipela i lukluk longwe na lukim het bilong wanpela maunten i stap antap long ol klaut. Mipela i kam klostu moa na mipela inap lukim ailan​—⁠em i wanpela traipela hap ston i stap namel long solwara. I olsem em i drip antap long wara olsem wanpela sip i lus long solwara.

“Balus i pundaun pinis na wanpela bot i kisim mipela i go long ples. Sampela bikpela hap ston i sanap long solwara na ol i stap olsem ol liklik ailan na ol i ples malolo bilong ol animal bilong solwara ol i kolim Juan Fernandes sil. Gavman i putim tambu long kilim i dai ol dispela sil, long wanem, i no gat planti bilong ol i stap. Mipela i kirap nogut taim wanpela samting i lusim solwara na flai i go arere long bot na bihain em i go bek gen insait long wara. Em i wanpela pis i save flai, na pul bilong en i luk olsem pul bilong pisin. Ating em i amamas long kalap lusim wara bilong kisim sampela binatang bilong kaikai. Tasol sampela taim i gat wanpela pis samting i lukim em i kalap na i wetim em i pundaun gen long wara na em bai daunim em.

“Mipela i kamap pinis long ples San Juan Bautista (Santu Jon Bilong Baptais). I gat planti manmeri bilong dispela ailan i sanap i stap long bris, sampela i wetim sampela man na sampela i laik lukluk tasol long husat i kam. Mipela i amamas tru long lukim ol samting bilong dispela ples​—⁠gutpela maunten ol i kolim El Yunka, na baksait long en skai i blupela na planti waitpela klaut i stap.

“Long bris mipela i lukim ol sista Kristen wantaim ol pikinini bilong ol i wetim mipela. Em i taim bilong malolo bilong skul, olsem na lain i bikpela, winim ol narapela taim. Mipela i amamas na sekan na tok gude na bihain ol i kisim mipela i go long wanpela liklik haus em mipela bai stap long en inap wanpela wik.

“Em i wanpela bikpela wik bilong mipela, na mipela i save em bai pinis hariap. Mipela i mas mekim gutpela wok long taim mipela i stap long dispela ailan. Long dispela de stret, bihain long belo kaikai, mipela i go lukim wanpela sumatin bilong Baibel em liklik taim bai kamap sista spirit bilong mipela na em bai insait long paradais bilong spirit em God i kamapim. Em i amamas nogut tru, tasol em i pret liklik. Samting em i wet longtaim long winim, em mak bilong kisim baptais, em i kam klostu. Mipela skelim sampela tok wantaim em em i mas save long en bilong winim mak bilong kamap pablisa bilong gutnius. Long de bihain em i mekim wok autim tok long namba wan taim. Long de namba tri mipela i kirap skelim ol mak em i mas winim bilong kisim baptais. Taim wik i no pinis yet em i kisim baptais.

“Ol i givim bel long kam long ol miting mipela i mekim long dispela wik, na long wanpela miting i gat 14 i bung. Long olgeta de mipela i bung bilong autim tok, mekim ol gobek na ol Baibel-stadi, na i go lukim ol sista bilong strongim ol. Dispela i strongim tru ol sista em ol tasol i save stap na mekim wok long yia olgeta!”

Em i hatwok moa long ol man long dispela ailan long kisim tok i tru, na as bilong dispela, ating wok mani ol i mekim em i hatwok tru. Planti ol i save mekim wok mani long kisim ol bikpela kindam, na bilong mekim dispela wok ol i mas taitim bun tru long mekim. Pasin bilong tingting nogut long ol Witnes i mekim na sampela i no laik harim tok bilong ol. Tasol yumi laik bai sampela moa bilong dispela ailan, ol man na meri wantaim, ol inap kisim tok i tru long bihain.

I kam inap long nau, ol i bin helpim 10-pela manmeri long kisim save long tok i tru na long laik bilong God Jehova. Sampela bilong ol i lusim ailan pinis. Tasol maski ol i stap long ailan o nogat, long samting bilong spirit God i kisim bek ol na dispela em i bikpela samting moa i winim taim wanpela sip i bin kisim bek Aleksander Selkurk long dispela ailan. Na maski ol i stap we, ol i stap long wanpela paradais bilong spirit. Ol sista wantaim ol pikinini i stap yet long ailan ol i amamas long stap long wanpela naispela ples, tasol ol i amamas moa long tingim taim bihain, taim graun olgeta bai i stap paradais tru long olgeta samting.

Wok Bilong Helpim Man Long Abrusim Bagarap i Go Yet

Dispela liklik lain Witnes Bilong Jehova long ailan Robinson Kruso ol i stap longwe long ol brata sista spirit bilong ol. Tasol ol i no pilim olsem ol man i lusim ol o lusim tingting long ol olsem Selkurk bilong Skotlan i bin pilim. Long olgeta taim, brens bilong Sosaiti Was Taua long Sili i save salim ol samting long ol olsem ol buk na nius bilong Baibel, na ol video bilong ol kibung sekit na kibung distrik em ol i save kisim 3-pela taim long yia, na wasman sekit i save kam lukim ol wanpela taim long yia, na long dispela rot ol i save stap klostu long oganaisesen bilong Jehova. Olsem na ol i stap na mekim wok yet wantaim “ol arapela manmeri bilong God, ol i stap long olgeta hap bilong graun.”​—⁠1 Pita 5:⁠9.

[Futnot]

[Ol Mep/Piksa long pes 9]

(Bilong save ol dispela rait i stap we long pes, lukim buk o magasin)

SILI

Santiago

AILAN ROBINSON KRUSO

San Juan Bautista

El Yunka

SOLWARA PASIFIK

AILAN SANTA KLARA

[Piksa]

Taim mipela i kam klostu long ailan, mipela i lukim olsem em i wanpela traipela hap ston i stap namel long solwara

[Kredit Lain]

Map of Chile: Mountain High Maps® Copyright © 1997 Digital Wisdom, Inc.

[Piksa long pes 8, 9]

Naispela maunten ol i kolim El Yunka

[Piksa long pes 9]

Ples San Juan Bautista (Santu Jon Bilong Baptais)

[Piksa long pes 9]

Ol liklik ailan i stap olsem ples malolo bilong ol sil na ol si laion

[Piksa long pes 10]

Mipela kalap long wanpela liklik balus long Santiago, Sili

[Piksa long pes 10]

Nambis bilong ailan Robinson Kruso i gat ol bikpela ston

[Piksa long pes 10]

Liklik Haus Kingdom i stap long ailan