‘Jehova Em i God Bilong Mi, na Bai Mi Wetim Em i Helpim Mi’
EM STORI BILONG WILLI DIEHL
“Willi, bilong wanem yu laik i go wok long Betel?” Papa bilong mi i bin givim dispela askim long mi long 1931 taim mi tokim em mi laik i go mekim wok long Betel. Papamama bilong mi i stap long Salan, na ol i stap long lain bilong Jehova inap 10-pela yia pinis, na ol i bin makim gutpela pasin mipela 3-pela pikinini man bilong ol i ken bihainim. Ol i givim bel olgeta long Jehova, na mi tu mi laik mekim olsem.
TASOL olsem wanem papamama bilong mi i bin kisim save long Jehova na laik bilong em? Ol i no amamas long ol lotu i gat nem Kristen, olsem na inap longpela taim tupela i wok long painim tok i tru. Ol i bin i go long narapela narapela lotu, tasol ol i lukim olsem tok i tru i no i stap long ol dispela lotu.
Wanpela taim wanpela man i lusim wanpela pepa long haus bilong mipela i tokaut long wanpela tok bai kamap, i gat ol piksa na piksa wokabaut tu wantaim, na i stori long laik bilong God, nem bilong en Photo Drama of Creation. Papa i mas i go long wok, tasol em i tokim mama long i go. Em i tok: “Ating dispela inap helpim yumi.” Mama i lukim ol dispela piksa, na em i amamas tru. Em i tokim papa: “Mi painim pinis tok i tru! Tumora long nait yu mas i kam lukim. Em dispela tok i tru yumi bin wok longtaim long painim.” Dispela samting i bin kamap long 1921.
Papamama i bilong dispela liklik lain Kristen em God i bin makim long spirit holi, na tupela i stap gut long God i go inap long taim tupela i dai. Ol Natsi i bin putim papa long kalabus nogut bilong ol sampela taim, na long 1944 em i dai, na mama i dai long 1970. Em tu i bin i stap kalabus long taim ol Natsi i bosim Jemani.
Papamama i Givim Bel Long Mekim Wok
Taim papamama i stap laip yet, tupela i givim bel long mekim wok autim tok. Ol strongpela tokaut i bin kamap long ol kibung kirap long 1922 i go inap long 1928, na mama i givim bel moa yet long tilim ol pepa i gat ol dispela tokaut long en. Wanpela tokaut olsem i bin kamap long 1924, na i gat strongpela tok long en i daunim ol pris pasto. Ol man i laik tilim dispela pepa i gat dispela tokaut long en ol i mas strongim bel na mekim. Ol pablisa i save kirap long 4 klok bikmoning, na wok long putim dispela pepa aninit long dua bilong ol haus. Long dispela taim mi gat 12-pela krismas tasol, tasol papamama i orait long mi insait long dispela wok. Planti taim mipela kirap long 5 klok bikmoning, na kikim wilwil inap 3-pela o 4-pela aua bilong kamap long sampela longwe hap bilong tilim ol dispela pepa. Mipela haitim ol wilwil bilong mipela long bus, na mi save was long ol wilwil, na ol narapela i go tilim ol dispela pepa long ol manmeri bilong dispela hap. Long belo bek, mipela kikim wilwil i go bek long haus, na long apinun, mipela wokabaut long lek inap wanpela aua bilong i go long miting.
Bihain ol i makim wanpela manki i yangpela long mi long was long ol wilwil, na mi go wantaim ol pablisa long autim tok. No gat wanpela i lainim mi long mekim dispela wok. Ol i tokim mi tasol long hap mi mas autim tok long en! Bel bilong mi i guria, na mi wokabaut isi i go long namba wan haus. Mi laik bai i no gat man i stap. Tasol sori, taim mi paitim dua, wanpela man i kam. Mi no inap toktok. Mi makim tasol buk i stap long paus bilong mi. Dispela man i tok: “Em buk bilong Jas Rutherford, a?” Maus i hevi na mi bekim tok long em. Dispela man i tok: “Em nupela na mi no kisim yet, a?” Mi tokim em: “Em nupela.” Dispela man i tok: “Orait, mi mas kisim. Pe bilong en hamas?” Dispela samting i strongim bel bilong mi na mi inap mekim wok i go.
Long 1924 ol bikpela manmeri i wok long stori planti long yia 1925. Wanpela taim mipela i go long haus bilong wanpela famili, em ol i Sumatin Bilong Baibel, na wanpela brata i askim olsem: “Sapos Bikpela i kisim mipela i go long heven, olsem wanem long ol pikinini bilong mipela?” Long olgeta taim mama i gat stretpela tingting long olgeta samting, na em i tok: “Bikpela bai save long rot bilong lukautim ol.” Mi laik save moa long dispela samting. Wanem insait bilong ol dispela tok bilong ol? Yia 1925 i kamap i go pinis, na no gat wanpela samting i kamap. Tasol papamama bilong mi i givim bel yet long mekim wok.
Gutpela Tok Bilong Papa
Long 1931 mi tokim papa long ol samting mi laik mekim. Papa i askim mi: “Bilong wanem yu laik i go wok long Betel?” Mi tokim em: “Long wanem mi laik mekim wok bilong Jehova.” Na Papa i tok moa olsem: “Sapos ol i orait long yu go long Betel, yu mas save, ol brata i wok long Betel ol i no gutpela olgeta. Ol i gat sin na ol i save popaia. Mi tingting planti, nogut dispela samting i mekim na yu laik ranawe lusim Betel na nogut bilip bilong yu i bagarap. Yu mas tingting gut pastaim long dispela samting.”
Mi kirap nogut long dispela tok bilong papa, tasol mi skelim gut dispela samting inap sampela de, na mi tokim papa gen olsem mi laik i go long Betel. Papa i tok: “Yu tokim mi gen bilong wanem yu laik i go long Betel.” Mi tokim em: “Long wanem mi laik mekim wok bilong Jehova.” Papa i tok: “Pikinini, yu no ken lusim tingting long dispela samting. Sapos ol i singautim yu i go wok long Betel, yu mas save bilong wanem yu go long Betel. Sapos yu lukim sampela samting i no stret, yu no ken bel hevi tumas. Sapos wanpela i mekim nogut long yu, yu no ken ranawe. Yu no ken lusim tingting long dispela samting i kirapim yu long i go mekim wok long Betel olsem yu laik mekim wok bilong Jehova! Yu mas mekim wok bilong yu na wetim Em i helpim yu.”
Olsem na long Novemba 17, 1931, long belo bek, mi kamap long Betel long Ben, long Swiselan. Mi stap long wanpela rum slip wantaim 3-pela narapela brata, na mi wok long ples bilong wokim ol buk. Mi lain long mekim wok long masin bilong wokim ol buk na magasin samting. Namba wan samting ol i makim mi long wokim, em Wastaua long tok Romenia.
Tok i Kam Long Heven!
Long 1933 Sosaiti i wokim wanpela buklet, nem bilong en The Crisis. Brata Rutherford i bin mekim 3-pela bikpela tok long redio long Amerika na ol dispela tok i stap long dispela buklet. Long wanpela moningtaim Brata Harbeck, em wasman bilong brens, em i tokim lain bilong Betel bai ol i mekim wanpela narapela kain samting bilong tilim dispela buklet. Sampela bai kalap long wanpela liklik balus, na taim balus i raun antap long ples Ben, ol bai tromoi ol pepa i toksave long dispela buklet, na ol pablisa bai sanap long rot na tilim dispela buklet. Em i askim ol brata olsem: “Namel long yupela ol yangpela brata, husat i laik i go antap long balus? Putim nem bilong yu long nau.” Mi putim nem bilong mi, na bihain Brata Harbeck i tok ol i makim mi bilong i go long balus.
Long de bilong go long balus, mipela kisim ol dispela pepa i go wantaim mipela long ples balus. Mi sindaun long sia baksait long kepten bilong balus, na putim ol pepa long sia klostu long mi. Ol i tok mi mas mekim olsem: Bungim ol pepa 100 100, na tromoi strong i go ausait long windo bilong balus. Sapos mi no tromoi strong, ol dispela pepa bai i go pas long tel bilong balus na bagarap inap painim mipela. Tasol olgeta samting i kamap gut. Bihain ol brata i tok, ol i amamas tru long lukim dispela ‘tok i kam long heven.’ Gutpela samting i kamap long dispela wok mipela i mekim, na mipela tilim planti buklet, maski sampela man i telefon na i tok planti pepa i pulap long gaden bilong ol.
Mi Amamas Long Olgeta Wok Mi Bin Kisim
Long olgeta de mi tok tenkyu long Jehova long bikpela amamas mi kisim long mekim wok long Betel. Long kongrigesen ol i makim mi long opim olgeta dua paslain long miting, na stretim ol sia, na putim wanpela kap kol wara bilong brata i laik mekim tok. Mi pilim olsem em gutpela wok tru.
Bihain ol i makim mi bilong mekim narapela wok long Betel. Mi mekim wok long narapela kain masin bilong wokim ol buk samting, em masin bilong wokim nius Kirap! long tok Polan. Long 1934 mipela kirap mekim wok long ol pikap, na mi helpim ol brata long wokim. Mi save amamas tru long i go long ol haus wantaim pikap na ol plet i gat tok bilong Baibel long en. Planti man i laik save long ol pikap, na planti taim famili olgeta bai kam sindaun harim tok bilong en, tasol bihain isi isi bai ol i lusim mi na i go. Taim olgeta i go pinis, mi go long narapela haus.
Autim Tok Long Taim Bilong Pait
Bihain long Namba Wan Pait, as ples bilong mi, em Salan, i bruk long Jemani, na lain bilong Lig ov Nesen i lukautim. Nau Salan i givim ID kat long olgeta man long dispela kantri. Long 1935 ol i vot bambai ol i ken save, ol manmeri bilong Salan i laik bung gen wantaim Jemani o nogat. Rot i op na mi go lukim famili bilong mi, long wanem mi save, sapos Salan i bung gen wantaim Jemani bai mi no inap i go lukim ol moa. Na tru tumas, dispela samting i kamap, na inap planti yia mi no kisim tok long papamama o ol brata bilong mi.
Swiselan i no insait long Namba 2 Pait, tasol Jemani i kirap daunim na bosim ol kantri i raunim Swiselan. Mipela i bin wokim ol magasin samting bilong olgeta kantri long Yurop, Jemani tasol nogat, tasol nau mipela i no inap mekim moa. Brata Zürcher, em wasman bilong brens long dispela taim, i tokim mipela mani bilong brens i sot, na em i tok i gutpela sapos mipela painim wok mani inap liklik hap taim. Ol i orait long mi stap long brens, long wanem ol i laik bai mi wokim ol samting bilong ol 1,000 samting pablisa bilong Swiselan.
Lain bilong Betel bai i no inap lusim tingting long ol samting i bin kamap long Julai 5, 1940. Mipela kaikai pinis long belo, na trak bilong ami i kam. Ol soldia i kalap i go daun lusim trak na resis i kam insait long Betel. Ol i tokim mipela long sanap i stap, na i gat soldia bilong was long mipela olgeta wan wan. Ol i subim mipela i go long ples kaikai, na ol i lukim olgeta samting long Betel. Gavman i ting mipela i bin tokim ol man ol i no ken insait long ami, tasol ol i no painim wanpela samting bilong helpim dispela tingting bilong ol.
Long taim bilong dispela pait, mi mekim wok olsem wasman bilong kongrigesen long Tun na long Frutegen. Olsem na long olgeta Sarere Sande mi gat bikpela wok. Long olgeta Sarere, taim mi kaikai pinis long belo, mi kikim wilwil inap 50 kilomita i go long Frutegen, na long apinun mi lukautim Stadi Wastaua long dispela hap. Sande long moningtaim mi raun autim tok wantaim ol pablisa. Na long belo bek mi go long Intelaken bilong mekim Buk-Stadi na bihain long dispela mi mekim Baibel-stadi wantaim wanpela famili long Spies. Na long apinun, mi lukautim Stadi Wastaua long Tun.
Long biknait, taim olgeta wok bilong mi i pinis na mi kikim wilwil bilong mi i go bek long Ben, mi wok long singsing na wisel, long wanem mi amamas long ol wok mi bin mekim. I no gat planti ka i ran long rot. I gat planti liklik maunten na olgeta haus samting long en i stap olsem tudak, long wanem em i taim bilong pait. Olgeta samting i stap isi na i gat lait bilong mun tasol. Dispela ol raun bilong mi long Sarere na Sande i bin helpim na strongim mi!
Wanpela Man i Kam Lukim Mipela, na Gutpela Samting i Kamap
Long 1945 Brata Knorr i kam lukim mipela. Wanpela taim em i kam long haus faktori na em i lukim mi i mekim wok long wanpela masin bilong wokim ol magasin samting. Em i tokim mi: “Yu kam pastaim! Olsem wanem? Yu laik i go long Skul Gileat?” Mi kirap nogut. Mi tokim em: “Sapos yu ting mi inap mekim ol wok bilong en, orait bai mi amamas long i go.” Long 1946, mi wantaim Brata Fred Borys na Sista Alice Berner i kisim pas i singautim mipela i go long Skul Gileat. Mama i bin karim mi long Salan, na Jemani i kisim pinis dispela kantri, olsem na mi no gat pepa bilong tokaut long as ples tru bilong mi, olsem na ol i mas raitim pas i go long Wosington, long Amerika, bilong kisim tok orait long mi ken i go long Skul.
Tupela narapela i go long Amerika long taim stret, tasol mi mas wet long kisim tok orait long gavman pastaim. Skul i kirap long Septemba 4 na mi stap yet long Swiselan. Mi pilim olsem mi no inap i go. Nau ambasedo bilong gavman bilong Amerika em i stap long Swiselan em i tokim mi, mi kisim pinis tok orait. Wantu mi kirap stretim rot bilong i go, na bihain mi baim rot long wanpela sip bilong ami em bai lusim Masei na i go long Nu Yok. Nem bilong dispela sip em Athos. Ol manmeri i pas pas insait long sip, olsem na ol i makim mi bilong slip long wanpela bikpela rum wantaim planti ol narapela manmeri. Mipela lusim Masei na tupela de bihain, ensin bilong sip i bagarap na sip i trip nating tasol long solwara. Olgeta pasindia na boskru i pret, nogut sip i go daun insait long solwara. Olsem na rot i op long mi autim tok na tokim ol olsem man i dai pinis bai ol i kirap bek.
Ol boskru i wok inap tupela de na ol i stretim ensin bilong sip, na nau sip i ran gen, tasol i no ran hariap olsem bilong pastaim. Inap olsem 18 de bihain mipela kamap long Nu Yok, na ol man i wok long bris ol i straik, olsem na mipela i mas i stap tasol long sip. Ol bikman i toktok i go i kam, na bihain ol i orait long mipela i lusim sip. Mi bin salim toksave i go long Sosaiti na tokim ol long ol samting i bin painim mi, na taim mi lusim ofis bilong kastam, wanpela man i askim mi, “Nem bilong yu Diehl, a?” Em wanpela helpim bilong Brata Knorr na em i kisim mi i go long ples bilong kisim tren na mi kalap long tren i go long Itaka, klostu long hap em Skul Gileat i stap long en, na long de bihain, long 8 klok long moningtaim mi kamap long dispela hap. Mi amamas tru long kam kamap na i go long dispela skul. Em namba wan taim Sosaiti i singautim ol sumatin bilong ol narapela narapela kantri long i go long dispela skul.
Sanap Strong na Karim Hevi
Long Februeri 9, 1947, mipela pinis long Skul Gileat, na mipela olgeta i tingting planti, Sosaiti bai salim mipela i go long wanem ol hap. Sosaiti i makim mi bilong i go mekim wok long nupela haus faktori bilong Sosaiti long Wisbaden, long Jemani. (Buk Song 16:6) Mi go bek long Ben bambai mi inap raitim ol pepa bilong kisim tok orait long i go long Jemani, tasol lain bilong Amerika i bosim Jemani na ol i orait tasol long ol man i bin i stap long Jemani paslain long taim bilong pait. Mi no bin i stap long Jemani long dispela taim, olsem na mi no inap i go long Jemani na namba wan ofis long Bruklin i mas makim narapela ples bilong mi ken i go long en. Ol i makim mi bilong mekim wok wasman sekit long Swiselan, na mi orait long mekim dispela wok, long wanem mi save Jehova bai helpim mi long mekim. Tasol taim mi wet i stap bilong i go mekim dispela wok, 3-pela sista i kam long Betel, na ol i makim mi bilong kisim ol i go raun long Betel bilong lukim ples. Wanpela bilong ol dispela sista i mekim wok painia, nem bilong em Marthe Mehl.
Long Me 1949, mi tokim brens-ofis long Ben olsem mitupela Marthe i laik marit, na mipela i laik mekim yet wok painia. Sosaiti i tok wanem? Ol i tok, mipela i ken mekim wok painia oltaim tasol, na mipela i no ken kisim narapela wok insait long wok bilong Jehova. Mitupela i marit long Jun 1949, na mipela kirap mekim wok painia long Biel. Ol i tambuim mi long mekim ol pablik-tok samting, na ol i pasim mipela long wok long painim rum slip bilong ol brata i laik i kam long wanpela kibung, maski wasman sekit i orait long mipela i mekim dispela wok. Mipela i mekim yet wok painia, tasol planti brata ol i no tok gude moa long mipela, na ol i mekim long mipela olsem mipela i raus long kongrigesen.
Tasol mipela i save, i no gat rong long mitupela i marit, olsem na mipela i beten long Jehova na wetim em i helpim mipela. Pasin ol brata sista i mekim long mipela i no stret wantaim tingting bilong Sosaiti. Ol i kisim tingting kranki long sampela tok bilong Sosaiti na ol i mekim olsem.
Brata Knorr i Kam Bek
Long 1951, Brata Knorr i kam gen long Swiselan. Em i mekim pinis wanpela tok, na wanpela brata i kam tokim mi, Brata Knorr i laik toktok wantaim mi. Mi pret liklik, tasol mi amamas em i laik toktok wantaim mi. Em i laik save, mipela laik i go i stap long wanpela haus misineri long Jeniva o nogat. Mipela amamas long mekim olsem, tasol mipela i bel hevi liklik long lusim Biel. Long de bihain, Brata Knorr i salim narapela tok i kam long mipela. Em i laik save, mi laik mekim gen wok wasman sekit long Swiselan, long wanem i gat bikpela wok bilong mekim. Wantu mipela i orait long dispela. Tingting bilong mi i olsem, sapos Sosaiti i makim mi long mekim wanpela wok, mi mas mekim tasol.
Mipela mekim wok sekit long hap bilong is bilong Swiselan, na mipela i kisim planti blesing. Taim mipela i laik lusim wanpela kongrigesen na i go long narapela kongrigesen, mipela save raun long tren, na olgeta kago bilong mipela i pulap long tupela switkes tasol. Ol brata i save kikim wilwil bilong ol i kam bungim mipela long ples bilong tren, long wanem wan wan tasol i gat ka. Sampela yia bihain, wanpela brata i givim ka long mipela, na nau i no hatwok tumas long mipela i raun lukim ol kongrigesen.
Sampela Nupela Samting!
Long 1964 mitupela i amamas tru long wanem Sosaiti i singautim mipela i go long namba 40 klas bilong Skul Gileat. Em laspela taim bilong kos bilong 10-pela mun—bihain dispela kos em bilong 8-pela mun tasol. Marthe i mas hariap na lain long tok Inglis, na em i lain gut. Taim mipela i skul, mipela olgeta i tingting planti, bai ol i salim mipela i go long we? Tingting bilong mi i olsem: ‘Maski Sosaiti i laik salim mi i go long wanem wanem hap, bai mi amamas long i go, tasol mi no laik mekim wok long ofis!’
Tasol sori tru! Ol i makim mi bilong mekim wok long ofis! Taim mipela pinis skul long Septemba 13, 1965, ol i makim mi bilong mekim wok olsem wasman bilong brens long Swiselan. Em namba wan taim bilong Marthe long mekim wok long Betel. Mi bin mekim wok long Betel o “Haus Bilong God” kirap long 1931 i go inap 1946—tasol nau mi no wok moa long faktori; nogat; nau mi mekim wok long ofis. I gat planti nupela samting mi mas kisim save long en, tasol Jehova i helpim mi na mi inap mekim wok bilong mi.
Mi Tingim Ol Wok Mi Bin Mekim
Inap 60 yia pinis mi wok oltaim long wok bilong Jehova, na insait long dispela hap taim mi bin bilip tru long Jehova na wetim em i helpim na strongim mi, olsem papa i tok mi mas mekim. Na Jehova i bin givim planti blesing long mi. Taim bikpela hevi i painim mi, o mi pilim olsem mi gat planti wok tumas, Marthe i bin strongim mi. Em gutpela poroman tru bilong mi na em tu i bilip tru long Jehova inap helpim mipela.
Mi laik tok tenkyu tru long Jehova long olgeta wok bilong em mi bin mekim! Mi mekim yet wok olsem kodineta bilong Komiti Bilong Brens long Tun, na sampela taim ol i bin makim mi bilong mekim wok olsem wasman bilong son. Maski ol i makim mi long mekim wanem wanem wok, mi save askim Jehova long helpim mi. Mi bin popaia planti taim, tasol mi bilip tru olsem Jehova i bin lusim tingting long ol rong bilong mi long rot bilong Krais. Mi laik wok strong yet bambai Jehova i ken amamas long ol samting mi mekim. Na mi laik bai Jehova i bosim yet wokabaut bilong mi, long wanem oltaim mi save wetim em i helpim mi, em i ‘God bilong mi, na mi save bilip long em.’—Buk Song 91:2.
[Piksa bilong Willi na Marthe Diehl long pes 25]
[Piksa long pes 27]
Brata Diehl taim em i kirap mekim wok long Betel