Jehova Em i “Man Bilong Kamapim Ol Samting i Hait”

“God bilong yu i winim olgeta arapela god. Em i Bikpela bilong olgeta king, na em i save kamapim as bilong [“em i Man bilong kamapim,” NW] ol samting i hait.”—DAN. 2:47.

WANEM BEKIM BILONG YU?

Jehova i tokaut long yumi long wanem samting bai kamap long bihain?

Het namba 1 i go 6 bilong wel animal i makim wanem samting?

Wanem ol het bilong wel animal na ol hap bilong imis long driman bilong Nebukatnesar i makim wankain samting?

1, 2. Jehova i kamapim wanem samting long yumi? Bilong wanem em i mekim olsem?

WANEM ol gavman bai stap na mekim bikpela wok bos long graun paslain stret long Kingdom bilong God i bagarapim olgeta gavman bilong graun? Yumi save long bekim bilong dispela askim bikos God Jehova, ‘Man bilong kamapim ol samting i hait,’ i bin tokaut long dispela long rot bilong ol tok em profet Daniel na aposel Jon i bin raitim.

² Jehova i givim sampela visen long Daniel na Jon we ol i lukim ol wel animal. Na tu, Jehova i bin tokim Daniel long mining bilong wanpela driman long traipela imis i makim ol samting bai kamap bihain. Jehova i kirapim Daniel na Jon long raitim stori bilong ol dispela visen na bai yumi ken ritim long Baibel. (Rom 15:4) Jehova i laik strongim bilip bilong yumi olsem klostu nau Kingdom bilong God bai bagarapim olgeta gavman bilong graun.—Dan. 2:44.

 3. Bilong kliagut long ol tok profet bilong Baibel, pastaim yumi mas kliagut long wanem samting? Bilong wanem i olsem?

³ Ol tok profet bilong Daniel na Jon i stori long 8-pela king, o gavman bilong ol man, na wanem gavman bai kamap pastaim na wanem gavman bai kamap bihain. Tasol bilong yumi ken kliagut long ol dispela tok profet, pastaim yumi mas kliagut long namba 1 tok profet bilong Baibel. Bilong wanem i olsem? Long wanem, Baibel olgeta na olgeta tok profet i stap long en i wok bung wantaim dispela namba 1 tok profet.

LAIN BILONG SNEK NA WEL ANIMAL

 4. Tupela hap bilong lain bilong meri i makim husat? Na dispela lain bai mekim wanem?

⁴ Bihain liklik long pasin bikhet i kamap long Iden, Jehova i tok profet olsem wanpela “meri” bai i gat wanpela “lain” o pikinini.a (Ritim Stat 3:15.) Dispela lain bai “krungutim” het bilong snek, em Satan. Bihain Jehova i kamapim olsem dispela lain bai kamap long rot bilong Abraham, na insait long lain Israel, long lain bilong Juda, na long lain famili bilong King Devit. (Stt. 22:15-18; 49:10; Sng. 89:3, 4; Luk 1:30-33) Jisas Krais em nambawan hap bilong dispela lain. (Gal. 3:16) Na kongrigesen bilong ol Kristen God i makim i olsem namba tu hap bilong dispela lain. (Gal. 3:26-29) Jisas wantaim ol dispela Kristen God i makim, olgeta bai mekim wok king insait long Kingdom bilong God. God bai yusim dispela Kingdom bilong bagarapim Satan.—Luk 12:32; Rom 16:20.

5, 6. (a) Ol visen bilong Daniel na Jon i stori long hamas strongpela gavman? (b) Ol het bilong wel animal long Revelesen i makim wanem samting?

⁵ Long dispela namba 1 tok profet Jehova i mekim long Iden, em i tok Satan tu bai i gat wanpela “lain.” Lain bilong Satan bai birua long lain bilong meri. Husat i insait long dispela lain bilong snek? Em olgeta man husat i heitim God na pait long lain bilong em olsem Satan i save mekim. Insait long lain bilong Satan, i gat ol oganaisesen bilong lotu na ami, na tu, i gat planti gavman, o kingdom, insait long en. (Luk 4:5, 6) Sampela tasol bilong ol dispela gavman i bin pait stret long lain pipol bilong God, em lain Israel bilong bipo o kongrigesen bilong ol Kristen God i bin makim long nau. Dispela i helpim yumi long kliagut long as na ol visen bilong Daniel na Jon i stori long 8-pela strongpela gavman tasol, maski i gat ol arapela gavman tu i stap.

⁶ Klostu 2,000 yia i go pinis, Jisas i givim sampela visen long aposel Jon i narapela kain tru. (Rev. 1:1) Long wanpela visen, Jon i lukim traipela snek i sanap long nambis bilong solwara. Dispela snek i makim Satan. (Ritim Revelesen 13:1, 2.) Jon i lukim tu narakain wel animal i lusim solwara na i kam antap. Em i gat 7-pela het, na Satan i givim bikpela namba long en. Bihain, Jon i lukim wanpela retpela wel animal na em tu i gat 7-pela het. Dispela em piksa bilong wel animal i stap long Revelesen 13:1. Wanpela ensel i tokim Jon olsem 7-pela het bilong dispela retpela animal i makim “7-pela king,” olsem 7-pela gavman. (Rev. 13:14, 15; 17:3, 9, 10) Taim Jon i raitim Buk Revelesen, 5-pela bilong ol dispela king i no stap moa, na wanpela i mekim wok i stap, na narapela “i no kamap yet.” Ol dispela king i makim wanem ol strongpela gavman? Nau yumi laik kisim save long ol wan wan het bilong wel animal em Revelesen sapta 13 i stori long en. Bai yumi kisim sampela save moa long ol dispela gavman taim yumi skelim Buk Daniel. Ol tok profet bilong Daniel i stori long sampela bilong ol dispela gavman planti handret yia paslain long ol i bin kamap.

NAMBA 1 NA NAMBA 2 HET I MAKIM ISIP NA ASIRIA

 7. Namba 1 het i makim wanem? Bilong wanem na yumi tok olsem?

⁷ Namba 1 het bilong wel animal i makim Isip, long wanem, Isip em fes strongpela gavman i bin heitim na pait long lain pipol bilong God. God i bin promisim Abraham olsem dispela lain bilong meri bai kamap long rot bilong famili bilong em. Ol Israel em lain tumbuna bilong Abraham. Taim ol i go long Isip na kamap planti, ol Isip i kirap mekim nogut long ol. Satan i traim long bagarapim lain pipol bilong God bikos em i no laik bai lain bilong meri i ken kamap. Olsem na em i kirapim Fero long traim long kilim i dai ol nupela bebi boi bilong ol Israel. Tasol Jehova i no larim dispela samting i kamap, em i helpim ol long lusim kalabus long Isip. (Kis. 1:15-20; 14:13) Bihain, em i givim Graun Bilong Promis long ol Israel.

 8. Namba 2 het i makim wanem? Dispela namba 2 het i laik mekim wanem?

⁸ Namba 2 het bilong wel animal i makim Asiria. Dispela strongpela gavman tu i bin traim long bagarapim lain pipol bilong God. Tenpela lain bilong Israel i bin lotuim ol imis na sakim tok bilong God, olsem na Jehova i bin yusim Asiria bilong givim strafe long ol. Tasol ol Asiria i laik bagarapim Jerusalem tu. Ating Satan i laik bagarapim lain famili bilong ol king bilong Jerusalem, long wanem, Jisas bai kamap long dispela lain. Jehova i no laik bai Jerusalem i bagarap, so em i bagarapim ami bilong Asiria na kisim bek lain pipol bilong em.—2 Kin. 19:32-35; Ais. 10:5, 6, 12-15.

NAMBA 3 HET I MAKIM BABILON

9, 10. (a) Jehova i larim ol Babilon long mekim wanem? (b) Bilong sampela tok profet i ken kamap tru, wanem samting i mas kamap paslain?

⁹ Namba 3 het bilong wel animal em Jon i bin lukim i makim kingdom bilong Babilon. Jehova i larim ol Babilon long bagarapim Jerusalem na kisim ol manmeri bilong em i go kalabus long Babilon. Paslain long dispela samting i kamap, Jehova i tokim bikhet lain bilong em long ol samting kingdom bilong Babilon bai mekim long ol. (2 Kin. 20:16-18) Na tu, Jehova i tokim ol Israel olsem, em i no inap larim ol king bilong ol i sindaun moa long “sia king” bilong em long Jerusalem. (Jer. 3:17) Tasol Jehova i tok promis olsem bai i gat wanpela tumbuna pikinini bilong King Devit bai kamap husat “i gat rait” long mekim wok king bilong Jehova.—Ese. 21:25-27, NW.

¹⁰ Narapela tok profet i soim olsem ol Juda bai mekim lotu long tempel long Jerusalem taim Mesaia i kam kamap. (Dan. 9:24-27) Na paslain long ol Israel i kalabus long Babilon, narapela tok profet i tok olsem Mesaia bai bon long Betlehem. (Mai. 5:2) Bilong ol dispela tok profet i ken kamap tru, ol Juda i mas lusim Babilon na go bek long ples bilong ol na wokim gen tempel. Tasol ol Babilon i no save larim ol kalabus lain bilong ol i go fri. Olsem wanem lain pipol bilong God inap go bek long asples? Jehova i kamapim bekim bilong dispela askim long ol profet bilong en.—Amo. 3:7.

11. Wanem samting long tok profet bilong Daniel na Jon i makim kingdom bilong Babilon? (Lukim futnot.)

¹¹ Daniel em wanpela bilong ol Israel husat i bin kalabus long Babilon. (Dan. 1:1-6) Jehova i bin tokim Daniel olsem bai i gat ol arapela strongpela gavman i kamap bihain long Babilon. Jehova i yusim kain kain samting olsem piksa bilong makim ol samting bai kamap bihain. Olsem, em i givim driman long King Nebukatnesar long wanpela traipela piksa, olsem imis ol i wokim long kain kain metal. (Ritim Daniel 2:1, 19, 31-38.) Jehova i givim wok long Daniel long kamapim olsem het gol i makim kingdom bilong Babilon.b Bros na tupela han ol i wokim long silva i makim strongpela gavman bai kamap bihain long Babilon. Em wanem strongpela gavman? Na em i mekim wanem long lain pipol bilong God?

NAMBA 4 HET I MAKIM MIDIA-PERSIA

12, 13. (a) Jehova i stori olsem wanem long strongpela gavman em bai daunim Babilon? (b) Bilong wanem yumi ken tok Midia-Persia em i namba 4 het bilong wel animal?

¹² Winim 100 yia paslain long taim bilong Daniel, Jehova i kirapim profet Aisaia long kamapim sampela bikpela tok i stori long strongpela gavman em bai daunim Babilon. Jehova i stori long hau ami bilong dispela gavman bai go insait long taun Babilon, na em i kolim tu nem bilong lida bilong ol. Dispela lida em Sairus, em man Persia. (Ais. 44:28–45:2) Jehova i givim tupela narapela visen long Daniel i stori long strongpela gavman Midia-Persia. Long wanpela visen, Daniel i lukim wanpela bea i sanap na dispela bea bai “kaikai planti mit.” (Dan. 7:5) Long narapela visen, Daniel i lukim sipsip man i gat tupela kom.—Dan. 8:3, 20.

¹³ Jehova i yusim Midia-Persia long daunim Babilon na larim ol Israel i go bek long asples bilong ol, olsem em i bin tok profet long en. (2 Sto. 36:22, 23) Tasol bihain Midia-Persia i traim long bagarapim lain pipol bilong God. Long Buk Esta bilong Baibel, yumi ritim olsem Haman, wanpela bikman bilong gavman Persia, i laik kilim i dai olgeta Juda husat i stap aninit long dispela kingdom. Haman i bin tokim ol manmeri insait long dispela kingdom long kilim i dai olgeta Juda long de em i bin makim. Tasol Jehova i lukautim gen lain bilong em na pasin birua bilong lain bilong Satan i no inap bagarapim ol. (Est. 1:1-3; 3:8, 9; 8:3, 9-14) Olsem na yumi ken tok Midia-Persia em i namba 4 het bilong wel animal long Revelesen.

NAMBA 5 HET I MAKIM GRIK

14, 15. Jehova i bin tokaut long wanem ol samting bilong kingdom bilong Grik bilong bipo tru?

¹⁴ Namba 5 het bilong wel animal long Revelesen i makim Grik. Na long driman bilong Nebukatnesar em Daniel i bin stori long en, namel bilong imis ol i wokim long bras i makim dispela seim strongpela gavman, em gavman Grik. Jehova i givim tupela narapela visen long Daniel we i kamapim sampela stori moa long kingdom bilong Grik na nambawan bikpela king bilong en.

¹⁵ Long wanpela visen, Daniel i lukim wanpela lepat i gat 4-pela wing. Dispela lepat i makim Grik, na kwiktaim em bai daunim ol arapela kantri. (Dan. 7:6) Long narapela visen, Daniel i lukim wanpela meme i gat wanpela traipela kom. Kwiktaim meme i kilim i dai sipsip man i gat tupela kom, dispela sipsip i makim Midia-Persia. Jehova i tokim Daniel olsem meme i makim Grik na traipela kom i makim wanpela king bilong en. Daniel i tok tu olsem traipela kom bai bruk na 4-pela liklik kom bai kamap long ples bilong en. Olgeta samting bilong dispela tok profet i kamap tru, maski Daniel i bin raitim sampela handret yia paslain long Grik i kamap wanpela strongpela gavman. Traipela kom i makim Bikpela King Aleksander. Em nambawan bikpela king bilong Grik bilong bipo tru, na em i go pas long ami bilong Grik taim ol i pait long Midia-Persia. Dispela kom i bruk taim Aleksander i dai wantu tasol. Em i gat 32 krismas tasol na em i gat bikpela strong tru. Bihain long dispela, 4-pela jeneral bilong em i kisim ol narapela narapela hap bilong kingdom.—Ritim Daniel 8:20-22.

16. Antiokus Namba 4 i bin mekim wanem?

¹⁶ Bihain long Grik i daunim Persia, Grik i bosim Israel. Long dispela taim ol Juda i stap pinis long Jerusalem na ol i bin wokim pinis tempel. Ol i stap yet olsem lain pipol bilong God, na God i gat tingting yet olsem ol i mas lotuim em long tempel. Winim 150 yia paslain long Krais, gavman Grik i kirap birua long lain pipol bilong God. Tumbuna pikinini bilong wanpela jeneral bilong Aleksander, em King Antiokus Namba 4, i sanapim wanpela alta bilong wanpela giaman god long tempel long Jerusalem. Na em i tok ol man i bihainim yet lotu Juda i mas i dai. Dispela em narapela taim gen we lain bilong Satan i pait long lain pipol bilong God. Tasol i no longtaim na narapela strongpela gavman i senisim Grik. Namba 6 het bilong wel animal i makim wanem?

NAMBA 6 HET I MAKIM ROM, EM I ‘NOGUT TRU NA I GAT BIKPELA STRONG’

17. Namba 6 het i bin truim wanem hap stret bilong tok profet bilong Stat 3:15?

¹⁷ Taim Jon i lukim visen bilong wel animal, Rom i stap pinis olsem bikpela strongpela gavman. (Rev. 17:10) Rom em namba 6 het bilong wel animal na em i truim wanpela hap stret bilong tok profet bilong Stat 3:15. Satan i yusim ol bikman bilong Rom bilong “kaikaim lek” bilong lain bilong meri. Ol Rom i tingim Jisas olsem wanpela bikhetman i pait long gavman, na ol i kotim em, na kilim em i dai. (Mat. 27:26) Tasol indai bilong Jisas, olsem snek i kaikaim lek, i no stap longpela taim, long wanem, Jehova i bin kirapim bek Jisas.

18. (a) Jehova i bin makim wanem nupela lain? Bilong wanem em i mekim olsem? (b) Olsem wanem lain bilong snek i bin birua na pait yet long lain bilong meri?

¹⁸ Ol hetman bilong lotu long Israel i bin helpim Rom long mekim nogut long Jisas. Klostu olgeta lain Israel i sakim Jisas olsem Mesaia. So Jehova i sakim lain Israel olsem lain pipol bilong em. (Mat. 23:38; Apo. 2:22, 23) Em i makim nupela lain, em “lain Israel bilong God.” (Gal. 3:26-29; 6:16) Dispela nupela lain em kongrigesen bilong ol Kristen God i bin makim, na i gat ol Juda na ol man bilong ol arapela lain i stap insait long en. (Efe. 2:11-18) Bihain long dai na kirap bek bilong Jisas, lain bilong Satan i wok yet long birua na pait long lain bilong meri. Planti taim liklik, Rom i bin traim long bagarapim kongrigesen bilong ol Kristen God i bin makim. Ol dispela Kristen ol i insait long lain bilong meri.c

19. (a) Daniel i stori olsem wanem long namba 6 strongpela gavman? (b) Stadi i kamap bihain bai bekim wanem ol askim?

¹⁹ Long driman bilong Nebukatnesar em Daniel i bin stori long en, tupela lek ain i makim Rom. (Dan. 2:33) Na Daniel i lukim wanpela visen i stori long Gavman Rom, na visen i stori tu long narapela strongpela gavman bai kamap bihain long Rom, em dispela gavman i kamap long wanpela hap em Rom i bin bosim. (Ritim Daniel 7:7, 8.) Inap planti handret yia, Rom i stap olsem wanpela animal i “nogut tru na em i gat bikpela strong moa.” Dispela tok profet i tok “10-pela kom” bai kamap long en. Na bihain, “wanpela liklik kom” bai kamap na strong bilong en bai winim ol arapela kom. Tenpela kom i makim wanem samting? Na liklik kom i makim wanem samting? Na wanem hap bilong imis bilong driman bilong Nebukatnesar i makim dispela liklik kom? Stadi i kirap long pes 14 bai bekim ol dispela askim.

Jehova i Save Kamapim Ol Samting “i No Longtaim Bai Kamap”

“Jisas Krais i kamapim wanpela tok hait em God i bin givim long em. God i mekim olsem bai em i ken soim ol wokboi bilong en long ol samting i no longtaim bai kamap.”—REV. 1:1.

WANEM BEKIM BILONG YU?

Wanem hap bilong traipela imis i makim Gavman Briten-Amerika?

Wanem hap bilong visen Jon i lukim i soim olsem Yunaitet Nesen i kisim strong bilong en long Gavman Briten-Amerika?

Olsem wanem ol visen bilong Daniel na Jon i soim olsem olgeta gavman bilong graun bai kisim bagarap?

1, 2. (a) Yumi inap kliagut long wanem samting taim yumi skelim ol tok profet bilong Daniel wantaim ol tok profet bilong Jon? (b) Het namba 1 i go inap het namba 6 bilong dispela wel animal i makim wanem samting?

TAIM yumi skelim ol tok profet bilong Daniel wantaim ol tok profet bilong Jon, yumi kliagut long planti samting i wok long kamap long nau na wanem samting bai kamap long bihain. Yumi inap kisim wanem skul long visen bilong Jon long wel animal i gat 7-pela het, na long visen bilong Daniel long animal i gat 10-pela kom, na long tok bilong Daniel long traipela imis i stap long driman bilong Nebukatnesar? Na ol dispela tok profet i mas kirapim yumi long mekim wanem?

² Long stadi paslain long dispela, yumi bin kisim save long visen bilong Jon long wel animal i stap long Revelesen sapta 13. Het namba 1 i go inap het namba 6 bilong dispela wel animal i makim Isip, Asiria, Babilon, Midia-Persia, Grik, na Rom. Satan i yusim ol dispela strongpela gavman long pait long lain pipol bilong God, long wanem, em i heitim lain bilong meri. (Stt. 3:15) Taim Jon i raitim stori bilong visen em i lukim, Rom i stap olsem bikpela strongpela gavman. Dispela gavman i bin stap strong inap planti handret yia. Tasol namba 7 het bilong wel animal bai kamap na kisim ples bilong Rom. Namba 7 het i makim wanem strongpela gavman, na em i mekim wanem kain pasin long lain bilong meri?

BRITEN NA AMERIKA I KAMAP STRONG TRU

 3. Animal i gat 10-pela kom i makim wanem samting? Tenpela kom i makim wanem samting?

³ Yumi inap save long namba 7 het i makim wanem samting sapos yumi skelim tok Jon i mekim long Revelesen sapta 13 long wel animal, wantaim tok Daniel i mekim long animal i gat 10-pela kom.a (Ritim Daniel 7:7, 8, 23, 24.) Animal i gat 10-pela kom i makim gavman Rom. (Lukim sat long pes 12-13.) Inap 4 handret yia bihain long Krais, Gavman Rom i kirap bruk na ol lain em bipo ol i stap aninit long Rom ol i kamapim ol narapela narapela kingdom i no bikpela olsem Rom. Tenpela kom bilong animal em Daniel i bin lukim i makim ol dispela kingdom.

4, 5. (a) Liklik kom i bin mekim wanem? (b) Namba 7 het bilong wel animal i makim wanem samting?

⁴ Long tok profet bilong Daniel long animal i gat 10-pela kom, narapela kom, em liklik, i kamap na kisim ples bilong 3-pela kom. Dispela i kamap olsem wanem? Bipo Briten i bin stap olsem wanpela liklik hap bilong Gavman Rom, tasol bihain em i kamap wanpela kingdom. Spen, Netelan, na Frans, ol tu i bin stap hap bilong Gavman Rom. Inap long yia 1600 samting, dispela 3-pela kingdom i bin i gat bikpela strong moa, winim Briten. Tasol Briten i pait long ol wan wan na kamap strong moa na winim ol. Long 250 yia i go pinis, Briten i wok long kamap nambawan strongpela kingdom long graun. Tasol long dispela taim em i no kamap yet olsem namba 7 het bilong wel animal.

⁵ Maski Briten i bin kamap nambawan strongpela kingdom, sampela provins bilong en long Not Amerika i bikhet na ol i kamap Yunaitet Stets Bilong Amerika. Briten i larim Amerika long kamap strong, na tu, nevi bilong Briten i bin lukautim ol. Long 1914, taim de bilong Bikpela i kirap, Briten i stap nambawan bikpela gavman, winim olgeta gavman bilong bipo na Amerika i gat ol bikpela faktori, winim ol arapela kantri.b Long taim bilong Wol Woa 1, Amerika na Briten i kirap wok bung wantaim. Long dispela rot tupela gavman i kamap wanpela strongpela gavman, em Gavman Briten-Amerika. Dispela strongpela gavman i makim namba 7 het bilong wel animal. Dispela het i mekim wanem long lain bilong meri?

 6. Namba 7 het i bin mekim wanem long ol manmeri bilong God?

⁶ Bihain liklik long kirap bilong de bilong Bikpela, namba 7 het i stat long mekim nogut long lain bilong God, em ol brata bilong Krais i stap yet long graun. (Mat. 25:40) Olsem Jisas i bin tok, sampela bilong lain bilong meri bai stap yet long graun taim de bilong Bikpela i kirap na ol bai mekim wok Jisas i bin givim long ol. (Mat. 24:45-47; Gal. 3:26-29) Gavman Briten-Amerika i bin pait long ol dispela manmeri holi. (Rev. 13:3, 7) Long taim bilong Wol Woa 1, ol i bin mekim nogut long ol dispela manmeri, tambuim ol buk na nius bilong ol, na kalabusim ol man i go pas long wok bilong ol. Klostu ol i pinisim, o kilim i dai wok autim tok bilong ol. Long rot bilong wanpela visen Jehova i bin tokim Jon olsem dispela samting bai kamap. Tasol God i tok olsem ol dispela manmeri holi, em ol i insait long lain bilong meri, ol bai kirap autim tok gen, o kisim bek laip. (Rev. 11:3, 7-11) Olsem Jehova i tok, lain bilong meri husat i stap yet long graun, ol i kirap givim bel gen long autim tok.

GAVMAN BRITEN-AMERIKA NA TUPELA FUT GRAUN NA AIN

 7. Wanem hap bilong traipela imis i makim wankain samting olsem namba 7 het bilong wel animal?

⁷ Hap daunbilo bilong tupela lek, olsem tupela fut, bilong traipela imis i makim wankain samting olsem namba 7 het bilong wel animal i makim, em Gavman Briten-Amerika. Briten i bin kamap long rot bilong Gavman Rom. Na Amerika i bin kamap long rot bilong Briten, olsem na yumi ken tok i olsem Amerika tu i bin kamap long rot bilong Rom. Olsem na ain i stap insait long tupela fut, tasol graun tu i stap. (Ritim Daniel 2:41-43.) Stori bilong tupela fut na stori bilong taim namba 7 het bilong wel animal i kamap, i makim wankain samting. Em i makim taim strongpela Gavman Briten-Amerika i kamap. Ain i miks wantaim graun i no gat bikpela strong olsem ain yet. Olsem tasol Gavman Briten-Amerika i no gat bikpela strong olsem gavman em i bin kamap long en. Wanem samting i mekim na Gavman Briten-Amerika i no gat bikpela strong olsem?

8, 9. (a) Olsem wanem namba 7 strongpela gavman i soim olsem em i strong olsem ain? (b) Graun long tupela fut i makim wanem samting?

⁸ Sampela taim Gavman Briten-Amerika i soim olsem em i strong olsem ain. Olsem, em i bin kamapim klia strong bilong en taim em i winim pait bilong Wol Woa 1 na 2, na i kam inap nau em i bin mekim planti samting i soim olsem em i strong olsem ain.c Tasol kirap long taim nambawan strongpela Gavman Briten-Amerika i kamap, dispela ain i bin miks pinis wantaim graun.

⁹ Inap longpela taim, ol wokboi bilong Jehova i laik kliagut long tupela fut bilong imis i makim wanem samting. Daniel 2:41 i tok long “ol manmeri dispela king i bosim,” dispela i soim olsem tupela fut we ain i miks wantaim graun i makim wanpela kingdom tasol, i no planti. So yumi inap kliagut olsem graun i makim samting insait long Gavman Briten-Amerika we i mekim na em i no gat bikpela strong olsem Gavman Rom, em tupela lek ain i makim. Tok profet bilong Daniel i tok graun i makim “ol pikinini bilong ol man,” olsem ol man nating. (Dan. 2:43, NW) Ol man i daunim strong bilong Gavman Briten-Amerika taim ol i bin pait strong long kisim ol raits bilong ol olsem sitisen, na ol raits bilong ol long ples wok, na rait bilong ol kantri long kisim indipendens. Ol man nating i mekim na dispela gavman i hatwok long stap strong olsem ain. Ol manmeri i gat narapela narapela tingting long pasin bilong mekim wok gavman. Na taim wanpela i winim ileksen we klostu em i bin lus, em i no gat bikpela sapot long mekim ol samting em i bin promis long mekim. Daniel i tok: “Hap bilong dispela kantri bai i strong olsem ain, tasol narapela hap bai i no gat strong, olsem graun.”—Dan. 2:42; 2 Tim. 3:1-3.

10, 11. (a) Wanem samting bai painim 2-pela fut bilong imis? (b) Yumi gat wanem save long ol tou bilong imis?

¹⁰ Long taim bilong yumi, Briten na Amerika ol i pas gut yet wantaim. Planti taim ol i wok bung long stretim ol bikpela samting. Long tok profet bilong traipela imis, tupela fut em laspela hap bilong imis. Long tok profet bilong wel animal, namba 7 het em laspela het. Dispela i makim olsem i no gat narapela strongpela gavman bai kamap na senisim Gavman Briten-Amerika. Na maski em i no strong olsem Rom, em tupela lek ain i makim, Gavman Briten-Amerika bai i no inap pinis nating.

¹¹ Olsem wanem? Namba bilong ol pinga bilong lek bilong imis, olsem ol tou, i makim sampela samting? Long ol arapela visen, Daniel i kolim stret sampela namba. Olsem, taim em i stori long sampela animal, em i kolim stret namba bilong ol kom bilong ol. Ol dispela namba i bikpela samting. Tasol Daniel i no tok imis i gat hamas tou. So yumi ken ting olsem namba bilong ol tou i no bikpela samting, kain olsem namba bilong ol han, pinga, lek, na fut bilong imis i no bikpela samting. Tasol Daniel i tokaut stret olsem ol i bin wokim ol tou long ain na graun. Tok bilong em i helpim yumi long kliagut olsem Gavman Briten-Amerika bai stap nambawan bikpela gavman taim “ston,” em Kingdom Bilong God, i paitim tupela fut bilong imis.—Daniel 2:45.

GAVMAN BRITEN-AMERIKA NA WEL ANIMAL I GAT 2-PELA KOM

12, 13. Wel animal i gat 2-pela kom i makim wanem samting? Em i mekim wanem?

¹² Ol visen Jisas i bin givim long Jon i soim olsem Gavman Briten-Amerika bai mekim bikpela samting long taim bilong las de, maski dispela gavman i olsem ain i miks wantaim graun. Jon i bin lukim wanpela wel animal i gat 2-pela kom na i mekim toktok olsem wanpela traipela snek. Dispela narakain animal i makim wanem samting? Em i gat 2-pela kom, olsem na dispela i makim tupela gavman i wok bung wantaim. Dispela animal tu i makim Gavman Briten-Amerika, tasol nau em i mekim narapela kain samting.—Ritim Revelesen 13:11-15.

¹³ Animal i gat 2-pela kom i “tokim” ol manmeri long wokim wanpela piksa bilong dispela wel animal i gat 7-pela het. Jon i tok dispela piksa bilong wel animal bai i stap, na bihain i no stap, na bihain em bai kamap gen. Dispela samting i painim wanpela oganaisesen i bin kamap bihain long Wol Woa 1. Briten na Amerika i bin kirapim ol arapela gavman long joinim dispela oganaisesen. Wok bilong dispela oganaisesen em bilong i stap mausman bilong ol gavman na bilong helpim ol long i stap wanbel.d Ol i kolim dispela oganaisesen olsem Lig ov Nesen. Taim Wol Woa 2 i kirap, Lig ov Nesen i pinis. Long taim bilong woa, ol manmeri bilong God i stori olsem tok profet bilong Buk Revelesen, i soim olsem dispela oganaisesen bai kamap gen. Na tru tru dispela samting i bin kamap, na nau ol i kolim dispela oganaisesen olsem Yunaitet Nesen.—Rev. 17:8.

14. Bilong wanem Jon i kolim piksa bilong wel animal olsem “namba 8 king”?

¹⁴ Jon i kolim dispela piksa bilong wel animal i gat 7-pela het olsem “namba 8 king.” Bilong wanem Jon i kolim em olsem wanpela “king”? Em i no stap olsem namba 8 het bilong wel animal, nogat. Em piksa tasol bilong wel animal. Dispela piksa i kisim strong bilong em long ol gavman i insait long Yunaitet Nesen, na moa yet long Gavman Briten-Amerika. (Rev. 17:10, 11) So Jon i kolim dispela piksa olsem wanpela “king,” long wanem, piksa i kisim namba long mekim wanpela wok we em bai mekim bikpela samting long olgeta manmeri bilong graun.

PIKSA BILONG WEL ANIMAL I BAGARAPIM PAMUKMERI

15, 16. Pamukmeri long visen bilong Jon i makim wanem samting? Wanem samting i wok long kamap long ol lotu long nau?

¹⁵ Jon i stori tu long wanpela pamukmeri husat i sindaun long wanpela retpela wel animal. Dispela retpela animal em dispela piksa bilong wel animal i gat 7-pela het. Nem bilong dispela pamukmeri em “Bikpela Babilon.” (Rev. 17:1-6) Dispela pamukmeri i makim olgeta lotu giaman. Ol lotu bilong Kristendom i insait long Bikpela Babilon. Ol lotu giaman i bin sapotim dispela piksa bilong wel animal, em Lig ov Nesen na Yunaitet Nesen, na ol i bin traim long bosim ol.

¹⁶ Jon i tok Bikpela Babilon i sindaun antap long “planti wara.” Dispela planti wara i makim ol manmeri i sapotim Bikpela Babilon. Tasol long de bilong Bikpela, ol manmeri i no givim bikpela sapot long em olsem ol i bin mekim long bipo. I kain olsem wara i “drai olgeta.” (Rev. 16:12; 17:15) Olsem, namba 1 taim piksa bilong wel animal i kamap, ol lotu bilong Kristendom i gat bikpela strong long Yurop na Amerika. Tasol long nau, planti manmeri i no rispektim moa ol dispela lotu na ol pris pasto bilong ol. Planti i ting olsem lotu em i as bilong ol hevi bilong nau. Na sampela i tokaut olsem yumi mas pinisim olgeta lotu.

17. Klostu nau wanem samting bai kamap long lotu giaman? Bilong wanem dispela samting bai kamap?

¹⁷ Strong bilong lotu giaman i no inap lus isi isi na bihain lotu bai pinis, nogat. Pamukmeri bai i stap strong yet na em bai traim long kirapim ol king long bihainim laik bilong em. Tasol klostu nau God bai “givim tingting long ol long mekim samting em yet i tingting pinis long en.” (Ritim Revelesen 17:16, 17.) Jehova bai kirapim ol gavman bilong dispela graun em Satan i bosim, olsem Yunaitet Nesen, long bagarapim ol lotu giaman. Pamukmeri bai i no inap kontrolim moa ol dispela gavman, na olgeta mani kago bilong em bai lus. Ating 20 o 30 yia i go pinis, klostu olgeta manmeri i ting olsem oltaim ol lotu bai stap strong na ol man bai rispektim ol. Tasol nau dispela tingting i wok long senis. Tasol strong bilong dispela pamukmeri bai i no lus isi isi tasol, nogat. Wantu em bai kisim bagarap.—Rev. 18:7, 8, 15-19.

OL ANIMAL I BAGARAP

18. (a) Wel animal bai mekim wanem? Dispela i kamapim wanem samting? (b) Olsem Daniel 2:44 i tok, Kingdom bilong God bai bagarapim wanem ol kingdom? ( Lukim blok long pes 17.)

¹⁸ Bihain long lotu giaman i kisim bagarap, wel animal, em ol gavman bilong graun Satan i bosim, bai pait long Kingdom Bilong God. Ol king bilong graun bai i no inap pait long Kingdom Bilong God long heven, olsem na ol bai traim long pait long ol manmeri bilong graun husat i sapotim dispela Kingdom. Dispela i kamapim laspela pait wantaim God. (Rev. 16:13-16; 17:12-14) Daniel i bin stori long dispela laspela pait. (Ritim Daniel 2:44.) Wel animal bilong Revelesen 13:1, piksa bilong en, na wel animal i gat 2-pela kom, ol bai bagarap.

19. Yumi ken save gut long wanem samting? Nau yet yumi mas mekim wanem?

¹⁹ Yumi stap long taim we namba 7 het bilong wel animal bilong Revelesen sapta 13 i bosim ol samting. Bai i no gat nupela het i kamap long dispela animal paslain long em i bagarap. Gavman Briten-Amerika bai stap nambawan strongpela gavman taim lotu giaman i bagarap. Truim bilong ol tok profet bilong Daniel na Jon i bin kamap stret olsem Baibel i makim. Yumi ken save gut olsem, klostu nau lotu giaman bai bagarap na Armagedon bai kam. God i tokim yumi pinis long wanem samting stret bai kamap. Tasol bai yumi bihainim ol tok lukaut bilong ol dispela tok profet? (2 Pita 1:19) Nau yet yumi mas bihainim tok bilong Jehova na sapotim Kingdom bilong en.—Rev. 14:6, 7.

[Ol Futnot]

[Blok long pes 17]

“OL DISPELA KING” BILONG DANIEL 2:44 I MAKIM HUSAT?

Baibel New World Translation of the Holy Scriptures i tanim tok profet bilong Daniel 2:44 olsem Kingdom Bilong God bai “daunim ol na bagarapim ol dispela king.” Dispela tok profet i stori tasol long ol kingdom em ol i hap bilong dispela imis.

Daniel 2:44 i no stori long samting bai kamap long ol arapela kingdom. Tasol tok profet long Revelesen i stori long seim samting na i givim sampela save moa long yumi. Em i tok “ol king bilong olgeta hap graun” bai bung bilong pait long Jehova long “dispela bikpela de bilong God i Gat Olgeta Strong.” (Rev. 16:14; 19:19-21) Olsem na ol kingdom em ol narapela narapela hap bilong imis i makim, wantaim olgeta arapela gavman bilong graun, bai kisim bagarap long Armagedon.

Etpela King

Buk Daniel na Buk Revelesen i stori long 8-pela king, olsem 8-pela gavman bilong graun, na tu, ol i tokaut long wanem gavman bai kamap pastaim na wanem gavman bai kamap bihain. Yumi inap save long mining bilong ol tok profet bilong ol sapos yumi kliagut long namba 1 tok profet long Baibel.

Kirap long bipo yet, Satan i bin stretim rot we lain bilong em i kamapim ol narapela narapela gavman, o kingdom. (Luk 4:5, 6) Tasol wan wan kingdom bilong ol man i bin mekim bikpela samting long lain pipol bilong God, em lain Israel na kongrigesen bilong ol Kristen em God i bin makim. Ol visen bilong Daniel na Jon i stori long 8-pela strongpela gavman tasol.

[Sat/Ol Piksa long pes 12, 13]

(Bilong save ol dispela rait i stap we long pes, lukim buk o magasin)

1. Isip

2. Asiria

3. Babilon

5. Grik

6. Rom

LAIN PIPOL BILONG GOD

2000 B.C.E.

Abraham

1500

Lain Israel

1000

Daniel 500

B.C.E./​C.E.

Jon

Lain Israel Bilong God 500

1000

1500

2000 C.E.

[Futnot]

[Ol Piksa]

Traipela piksa olsem imis (Dan. 2:31-45)

Fopela wel animal i lusim solwara (Dan. 7:3-8, 17, 25)

Sipsip man na meme (Dan., sapta 8)

Wel animal i gat 7-pela het (Rev. 13:1-10, 16-18)

Wel animal i gat 2-pela kom i kirapim ol man long wokim piksa bilong wel animal i gat 7-pela het (Rev. 13:11-15)

[Ol Kredit Lain]

Photo credits: Egypt and Rome: Photograph taken by courtesy of the British Museum; Medo-Persia: Musée du Louvre, Paris

Askim

Wanem taim Gavman Briten-Amerika i bin kamap namba  7 strongpela gavman em Baibel i stori long en?

▪ Traipela imis King Nebukatnesar i lukim long driman, i no makim olgeta strongpela gavman i bin i stap long graun. (Dan. 2:31-45) Dispela imis i makim tasol 5-pela strongpela gavman em ol i bin pait long lain pipol bilong God kirap long taim bilong Daniel na i kam.

Stori bilong Daniel long imis i lainim yumi olsem Gavman Briten-Amerika bai kamap long rot bilong Rom, em i no pait na daunim Rom, nogat. Daniel i tok olsem hap bilong imis ol i wokim long ain i kirap long lek na i go inap long fut na tou. (Long tupela fut na ol tou, ain i miks wantaim graun.)a Dispela i makim olsem Gavman Briten-Amerika bai kamap long rot bilong Rom, em lek ain bilong imis. Dispela samting stret i bin kamap. Briten em liklik hap bilong Gavman Rom, tasol klostu long 250 yia i go pinis, Briten i kirap kamap wanpela strongpela kingdom. Bihain, Amerika i kamap strongpela kantri. Tasol Briten na Amerika i no kamap yet olsem namba 7 strongpela gavman em Baibel i stori long en. Bilong wanem? Long wanem, ol i no kirap yet long wok bung wantaim. Dispela i kamap long taim bilong Wol Woa 1.

Long dispela taim, “ol pikinini bilong Kingdom” husat i stap na mekim wok, planti bilong ol i stap long Amerika. Hetkota bilong ol i stap long Brooklyn, New York. (Mat. 13:36-43) Ol lain God i makim i wok long autim tok tu long ol kantri em Briten i bosim. Long taim bilong Wol Woa 1, Briten na Amerika i kirap wok bung wantaim. Ol i wok wantaim long pait long ol birua bilong ol. Woa i kirapim Briten na Amerika long strong moa long litimapim kantri, olsem na ol i pait tu long ol manmeri husat ol i hap bilong lain bilong “meri” bilong God. Tupela gavman i tambuim sampela buk em lain bilong meri i kamapim, na ol i kalabusim ol brata husat i go pas long mekim wok autim tok.—Rev. 12:17.

Olsem na ol tok profet bilong Baibel i skulim yumi olsem namba 7 strongpela gavman i no bin kamap 250 yia i go pinis, taim Briten i kirap kamap wanpela strongpela kingdom, nogat. Namba 7 strongpela gavman i bin kamap long kirap bilong de bilong Bikpela.b