Stori Bilong Wanpela Man
Jehova i Lainim Mipela Long Pasin Bilong Sanap Strong na No Ken Les
STORI BILONG ARISTOTELIS APOSTOLIDIS
Long hap not bilong ol liklik maunten bilong ol maunten Caucasus, taun Pyatigorsk i stap. Em i wanpela taun bilong Rasia i gat nem, long wanem, em i gat ol gutpela hulwara na ples i no hat tumas o kol tumas. Mama i karim mi long dispela hap long 1929; papamama bilong mi ol i refiuji bilong kantri Grik. Tenpela yia bihain, taim gavman Stalin i laik rausim ol man, pretim ol, bagarapim na pinisim sampela lain, mipela i kamap refiuji gen, long wanem, mipela i mas i go na stap long kantri Grik.
TAIM mipela i kamap pinis long Piraiévs, Grik, mipela i kisim nupela tingting long dispela tok refiuji. Mipela i pilim olsem mipela i bilong narapela ples olgeta. Maski mi na brata bilong mi i gat nem bilong tupela saveman bilong kantri Grik, em Socrates na Aristotle, ol man i no kolim mipela long ol dispela nem. Olgeta i kolim mipela olsem ol liklik man bilong Rasia.
Bihain liklik long Namba Tu Pait i kirap, gutpela mama bilong mi i dai. Mipela i laikim tru mama, olsem na taim em i dai dispela i bagarapim tru bel bilong mipela. Em i bin sik inap sampela taim, olsem na em i bin lainim mi long mekim planti wok bilong haus. Dispela save mi kisim i helpim mi tru long bihain.
Pait na Kamap Fri
Long olgeta de mi pilim olsem em laspela de bilong mi long stap laip, long wanem, bikpela pait i stap, ol Natsi i bosim kantri, na ami bilong ol kantri i pait long Jemani i tromoi ol bom. Planti man i stap rabis, ol i hangre, na i dai. Kirap long taim mi gat 11-pela krismas, mi mas wok strong wantaim papa bilong helpim mipela tripela long ol samting bilong skin. Mi no skul gut, long wanem, mi no save gut long tok Grik, na tu, pait na ol samting nogut i kamap bihain long en i bagarapim skul bilong mi.
Long Oktoba 1944, Jemani i no bosim moa kantri Grik. Bihain liklik mi bungim ol Witnes Bilong Jehova. Long dispela taim bilong bikpela hevi, mi pilim tru long bel ol gutpela samting Baibel i tok bai kamap bihain, taim Kingdom bilong God i bosim graun. (Song 37:29) Tok promis bilong God long ol man inap kisim laip oltaim na stap bel isi hia long graun, dispela i mekim gut bel bilong mi. (Aisaia 9:7) Long 1946, mi na papa i kisim baptais bilong makim olsem mipela i dediket pinis long Jehova.
Long yia bihain, mi kisim namba wan wok bilong mi long lukautim ol magasin long namba tu kongrigesen ol i kamapim long Piraiévs. Teritori bilong mipela i kirap long Piraiévs i go daun long Eleusis, em longwe inap 50 kilomita. Long dispela taim long kongrigesen i gat planti Kristen God i bin makim long spirit holi. Mi inap wok wantaim ol na ol i lainim mi long ol samting. Mi amamas long wok wantaim ol, long wanem, ol i save stori long planti ekspiriens bilong ol long bikpela hatwok ol i mekim bilong mekim wok autim tok. Ol samting ol i bin mekim i kamapim klia olsem bilong man i ken stap gut long wok bilong Jehova, em i mas i gat pasin bilong isi na no ken les kwik. (Aposel 14:22) Mi amamas tru, long wanem, nau long dispela hap i gat inap olsem 50 kongrigesen bilong ol Witnes Bilong Jehova!
Wanpela Bikpela Hevi
Bihain, mi bungim Eleni, em i wanpela naispela yangpela meri Kristen long taun Patras. Long pinis bilong 1952, mipela i pasim tok long marit. Tasol bihain long sampela mun, Eleni i kisim bikpela sik. Ol dokta i painimaut olsem em i gat buk nogut long kru bilong em, na klostu em i bagarap olgeta. Ol dokta i mas katim em hariap. Mipela i hatwok tru, na bihain mipela i painim wanpela dokta long Atens, em i tingim bilip bilong mipela na em i orait long katim Eleni na i no givim blut long em, maski long dispela taim ol haus sik i no gat ol gutpela masin samting bilong mekim wok long en. (Wok Pris 17:10-14; Aposel 15:28, 29) Bihain long operesen, ol dokta i ting Eleni inap kamap orait, tasol ol i tok dispela sik inap kamap gen.
Bai mi mekim wanem nau? Ol samting i senis nau, olsem na i gutpela sapos mi lusim Eleni na stap fri? Nogat! Taim mipela i pasim tok long marit, mi bin mekim tok promis, na mi laik truim tok promis bilong mi. (Matyu 5:37, NW ) Mi no tingting liklik long mekim narapela samting. Bikpela susa bilong Eleni i lukautim em na Eleni i kamap orait liklik, na mipela i marit long Disemba 1954.
Tripela yia bihain, sik bilong Eleni i kamap gen, na wankain dokta i mas katim em gen. Long dispela taim em i katim i go insait moa long kru bilong rausim dispela buk nogut olgeta. Dispela i mekim na hap skin bilong meri bilong mi i dai, na hap bilong kru i save bosim toktok i bagarap. Nau ol nupela kain hevi i painim mitupela, em ol bikpela hevi tru. Ol liklik wok i kamap olsem bikpela hatwok long gutpela meri bilong mi. Skin bilong em i wok long bagarap, olsem na mipela i mas mekim ol bikpela senis long ol wok mipela i save mekim long wan wan de. Na bikpela samting tru, mipela i mas i gat pasin bilong sanap strong na no ken les.
Long dispela taim ol samting mama i bin lainim mi long en i helpim tru mipela. Long olgeta moning, mi redim ol samting bilong wokim kaikai na Eleni i kukim. Planti taim mipela i singautim ol man i kam, ol painia, ol man mipela i stadi long Baibel wantaim ol, na ol Kristen long kongrigesen i sot long ol samting. Olgeta i wanbel long tok olsem kaikai mipela i kukim i swit tru! Mitupela Eleni i wok wantaim long mekim ol narapela wok bilong haus tu, olsem na haus bilong mipela i klin na ol samting i stap stret. Dispela bikpela hatwok bai stap inap 30 yia.
Givim Bel Maski i Gat Sik
Meri bilong mi i no larim wanpela samting i daunim pasin bilong em long laikim tru Jehova na givim bel long mekim wok bilong em, na mi wantaim ol narapela i pilim tru dispela samting. Eleni i wok strong tru, na bihain em inap mekim wan wan tok bilong kamapim tingting bilong em. Em i save amamas long autim gutnius bilong Baibel long ol man long rot. Taim mi go mekim wok bisnis, mi save kisim em i go wantaim mi na mi putim ka klostu long wanpela rot em planti man i wokabaut i go i kam long en. Em i opim windo bilong ka na singautim ol man long kisim nius Wastaua na Kirap! Wanpela taim em i tilim 80 nius insait long tupela aua. Planti taim em i tilim olgeta olpela nius i stap long kongrigesen. Eleni i save autim tok long ol narapela rot tu.
Insait long olgeta dispela yia em skin bilong Eleni i bagarap, em i bin kam oltaim wantaim mi long ol miting. Em i no lusim wanpela kibung. Taim ol man i birua long ol Witnes Bilong Jehova long Grik na mipela i mas i go long ol kibung long narapela kantri, em i save kam long ol dispela kibung tu. Maski skin bilong em i bagarap, em i amamas long i go long ol kibung long Ostria, Jemani, Saiprus, na ol narapela kantri. Eleni i no toktok planti o tok olsem mi mas stap wantaim em long olgeta taim. Em i no mekim olsem, maski mi mekim sampela wok moa bilong Jehova na sampela taim dispela i givim hatwok long em.
Dispela ol samting i mekim na mi lain long pasin bilong sanap strong na no ken les. Planti taim mi pilim olsem Jehova i helpim mi. Ol brata sista i mekim bikpela samting bilong helpim mipela long ol samting ol inap mekim, na ol dokta tu i strongim mipela. Insait long ol dispela yia mipela i hatwok, mipela i no sot long ol samting bilong skin, maski sindaun bilong mipela i mekim na mi no inap mekim wok mani fultaim. Oltaim mipela i putim laik na wok bilong Jehova i stap namba wan.—Matyu 6:33.
Planti ol i askim mipela long wanem samting i strongim mipela long ol dispela yia mipela i karim hevi. Taim mi tingting i go bek, mi save olsem pasin bilong stadi long Baibel, beten long God, go oltaim long ol miting Kristen, na givim bel long wok autim tok i bin strongim pasin bilong mipela long sanap strong na no ken les. Oltaim mipela i tingim gutpela tok i stap long Song 37:3-5: “Yu mas bilip tru long God, na mekim gutpela pasin. . . . Yu mas amamas long Bikpela . . . Yu mas putim laip bilong yu long han bilong Bikpela. Bilip strong long em, na em bai i helpim yu.” Narapela ves i helpim tru mipela em Song 55:22: “Olgeta hevi yu karim, em yu mas putim long han bilong Bikpela, bai em i karim na bai em i strongim yu.” Olsem pikinini i bilip tru long papa bilong em, mipela i putim ol hevi bilong mipela long han bilong Jehova na lusim i stap long em.—Jems 1:6.
Long Epril 12, 1987, taim meri bilong mi i autim tok long ai bilong haus bilong mipela, wanpela dua ol i wokim long ain na i hevi tru i paitim em na em i pundaun long rot, na em i kisim bikpela bagarap. Olsem na tingting bilong em i dai na em i stap olsem inap 3-pela yia. Em i dai long kirap bilong 1990.
Mekim Wok Bilong Jehova Inap Long Skel Bilong Mi
Long 1960, ol i makim mi long kamap wasman bilong kongrigesen long Nikaia, Piraiévs. Kirap long dispela taim mi bin mekim wok wasman long planti narapela kongrigesen long Piraiévs. Mi no gat ol pikinini bilong mi yet, tasol mi bin kisim amamas long helpim planti pikinini bilong spirit long kamap strong long tok i tru. Long nau sampela bilong ol i mekim wok olsem ol elda long kongrigesen, kongrigesen sevent, painia, o wok long Betel.
Taim gavman Demokratik i kamap gen long Grik long 1975, ol Witnes Bilong Jehova i stap fri long mekim gen ol kibung bilong ol, na ol i no hait moa long ol bus na mekim kibung. Mipela sampela i bin kisim save long wok bilong stretim ol kibung long ol narapela kantri, na nau dispela save i helpim mipela. Olsem na inap planti yia mi kisim gutpela wok insait long narapela narapela komiti bilong kibung.
Long 1979, ol i kirap stretim ol samting bilong wokim namba wan Haus Kibung long Grik, long arere bilong taun Atens. Ol i makim mi long helpim wok bilong stretim na bosim dispela bikpela wok. Bilong mekim dispela wok tu mi mas i gat pasin bilong sanap strong na no ken les. Mi wok inap 3-pela yia wantaim planti handet brata na sista em ol i daunim laik bilong ol yet, na dispela i mekim na narapela i laikim tru narapela na stap wanbel wantaim. Mi no inap lusim tingting long ol gutpela samting bilong dispela taim bilong wokim Haus Kibung.
Inapim Ol Kalabus Long Ol Samting Bilong Spirit
Sampela yia bihain, rot i op long mekim nupela wok. Klostu long teritori bilong kongrigesen bilong mi long Korydallos, i gat wanpela bikpela haus kalabus i winim klostu olgeta kalabus long Grik. Kirap long Epril 1991, ol i makim mi long go long dispela kalabus long olgeta wik olsem wanpela wokman bilong ol Witnes Bilong Jehova. Ol i orait long mi mekim Baibel-stadi na ol miting Kristen wantaim ol kalabusman i gat laik long harim tok. Planti bilong ol i bin senisim tru pasin bilong ol, na dispela i soim bikpela strong bilong Tok Bilong God. (Hibru 4:12) Ol lain i wok long kalabus na ol narapela kalabusman i kirap nogut long lukim dispela. Sampela kalabusman mi bin stadi long Baibel wantaim ol, ol i lusim pinis kalabus na kamap pablisa bilong autim gutnius.
Inap sampela taim mi stadi wantaim 3-pela man i gat nem nogut na ol i man bilong maketim ol drak. Ol i wok long kamap strong na taim ol i kam stadi long Baibel, ol i sev, komim gut gras, na putim siot na nektai namel long mun Ogas—em taim san i hat nogut tru long Grik! Bikman bilong haus kalabus, nambawan woda, na sampela wokman i lusim hariap ofis bilong ol bilong lukim ol dispela man i senis tru. Ol i no inap bilipim samting ol i lukim!
Narapela gutpela ekspiriens i kamap long banis bilong ol kalabusmeri. Ol i kirapim Baibel-stadi wantaim wanpela meri i bin kilim i dai man na kot i makim em bilong kalabus i go inap long em i dai. Em i gat nem olsem meri bilong bikhet. Tasol i no longtaim na tok i tru bilong Baibel em i wok long lainim i senisim tru pasin bilong em, na planti ol i tok em i olsem laion i senis i kamap sipsip! (Aisaia 11:6, 7) I no longtaim na dairekta bilong haus kalabus i bilip na rispektim dispela meri. Mi amamas long lukim olsem em i wok long kamap strong long ol samting bilong spirit na em i dediket long Jehova.
Helpim Ol Sikman na Lapun
Mi lukim meri bilong mi i karim hevi bilong sik inap planti yia, olsem na mi save pilim tru hevi bilong ol sikman na lapun i stap namel long yumi. Taim ol buk na nius bilong yumi i gat ol stori i strongim yumi long mekim pasin sori na helpim ol kain man olsem, dispela i save kirapim tingting bilong mi. Mi bungim ol dispela kain stori. Insait long planti yia, mi bin kamapim wanpela folda i gat inap wan handet pes long en—kirap long stori “Consideration for Older Persons and Afflicted Ones,” long Wastaua (tok Inglis) bilong Julai 15, 1962. Planti bilong ol dispela stori i soim olsem em i gutpela long olgeta kongrigesen i stretim wok bilong helpim ol sikman na lapun.—1 Jon 3:17, 18.
Ol elda i kamapim wanpela grup bilong ol brata na sista i redi long helpim ol sikman na lapun long kongrigesen bilong mipela. Mipela i putim ol dispela volantia long narapela narapela grup—olsem grup bilong helpim ol sikman long san, grup bilong helpim ol long nait, grup bilong trenspot, na grup i redi long helpim ol long san na nait.
Ol samting dispela wok i kamapim i gutpela tru. Olsem: Long olgeta de mipela i save go lukim wanpela sista i sik na i stap wanpis, na long wanpela de taim mipela i go lukim em sista ya i hap i dai na slip long plua. Mipela i toksave long sista i stap klostu na i gat ka. Insait long 10-pela minit tasol, em i kisim sista i sik i go long haus sik i stap klostu. Ol dokta i tok dispela i mekim na sista i no dai.
Ol sikman na lapun i amamas tru long dispela grup i helpim ol, na dispela i mekim gut bel bilong mipela. Mi wet long taim mi ken stap wantaim ol dispela brata sista long nupela taim bilong God i gat gutpela sindaun long en, na dispela i mekim gut bel bilong mi. Na mi save olsem wok bilong helpim ol sikman i bin helpim ol long karim hevi bilong ol, na dispela tu i mekim gut bel bilong mi.
Pasin Bilong No Ken Les i Givim Gutpela Pe
Nau mi mekim wok elda long wanpela kongrigesen long Piraiévs. Mi lapun na mi gat sampela sik tu, tasol mi amamas long mi inap mekim yet ol wok bilong kongrigesen.
Inap planti yia, ol hevi na traim, na taim nogut i bin painim mi, olsem na mi mas sanap strong tru na no ken les. Tasol oltaim Jehova i bin strongim mi long winim ol dispela hevi. Planti taim mi pilim olsem tok bilong man bilong raitim song em i tru. Em i tok: “Mi tingting olsem, ‘Lek bilong mi i wel. Bai mi pundaun nau.’ Tasol nogat. Bikpela, yu sori tumas long mi na yu holim mi na mi no pundaun long sin. Na taim mi bel hevi na mi gat planti tingting long ol samting, yu save mekim bel bilong mi i stap isi na yu mekim mi i amamas.”—Song 94:18, 19.
[Piksa long pes 25]
Mi wantaim meri bilong mi, Eleni, bihain long ol i katim em namba tu taim long 1957
[Piksa long pes 26]
Long kibung long Nuremberg, Jemani, long 1969
[Piksa long pes 28]
Ol brata na sista i helpim ol sikman na lapun