ASKIM

Devit i tok em “i no lukim God i givim baksait long wanpela stretpela man. Na [em i] no lukim ol pikinini bilong stretpela man i sot long kaikai.” Devit i stori long samting em yet i bin lukim. Em i save olsem oltaim God i save lukautim gut ol wokman bilong em. (Sng. 37:25) Tasol tok bilong Devit i no makim olsem man i lotuim Jehova i no bin sot long kaikai, o bihain tu em i no inap sot long kaikai, nogat.

Sampela taim ol hevi i painim Devit na em i sot long kaikai. Wanpela taim em i ranawe long Sol na em i sot tru long kaikai, na em i askim sampela lain long givim bret long em na ol man i stap wantaim em. (1 Sml. 21:1-6) Long dispela taim, Devit “i sot long kaikai.” Tasol long dispela taim nogut, em i save olsem Jehova i no lusim em. I no gat wanpela tok long Baibel i soim olsem Devit i sot olgeta na em i mas singaut singaut long kaikai bambai em inap i stap laip.

Long Matyu 6:33, Jisas i tok olsem sapos ol wokman bilong God i putim wok bilong Kingdom i stap namba 1 samting long laip bilong ol, God bai lukautim ol long ol samting ol i nidim. Jisas i tok: “Wok yet long painim Kingdom pastaim na stretpela pasin bilong God na em bai givim olgeta dispela samting [olsem kaikai, wara, na klos] long yupela.” Tasol Jisas i tok tu olsem “ol brata” bilong em inap hangre, long wanem, ol man bai mekim nogut long ol na dispela bai putim hevi long ol. (Mat. 25:35, 37, 40) Dispela samting i bin painim aposel Pol. Sampela taim em i no gat kaikai na wara.—2 Kor. 11:27.

Jehova i tok ol man bai mekim nogut long yumi long kain kain rot. Ating em inap larim yumi i sot tru long kaikai na long dispela rot yumi helpim em long stretim bikpela tok Satan i bin sutim long em. (Jop 2:3-5) Yumi ken tingim sampela wanbilip em ol i bin kalabus long ol banis kalabus nogut bilong ol Natsi. Ol Natsi i mekim nogut tru long ol na i luk olsem bagarap bai painim ol. Ol Natsi i strong long ol Witnes i mas lusim Jehova, olsem na ol i givim liklik hap pipia kaikai tasol long ol Witnes. Tasol ol Witnes i bihainim tok bilong Jehova na ol i stap gut long em, olsem na em i no lusim ol. Em i larim dispela hevi i painim ol wankain olsem em i larim kain kain hevi i painim olgeta Kristen. Tasol yumi save tru olsem Jehova i save sambai long olgeta Kristen em ol i kisim hevi long nem bilong em. (1 Kor. 10:13) Yumi ken tingim tok bilong Filipai 1:29: “Yupela i kisim gutpela samting, olsem yupela i ken bilip long Krais, na tu, yupela i ken karim pen na hevi long nem bilong en.”

Jehova i tok promis olsem em bai stap wantaim ol wokman bilong em. Aisaia 54:17 i tok: “I no gat wanpela bilong ol dispela samting bilong pait inap bagarapim yu.” Dispela promis na ol narapela promis i makim olsem Jehova bai lukautim lain olgeta bilong em. Tasol em inap larim ol traim i painim ol Kristen, na ol inap lusim laip bilong ol.