[kirap long left i go long rait] Marcelo, Yomara, na Hiver. Olgeta wan wan i holim wanpela volium bilong Baibel Nupela Taim Trenslesen long rait brel bilong tokples Spen
Ol i Pilim Tru Pasin Laikim Bilong Kongrigesen
YOMARA na 2-pela brata bilong em—Marcelo na Hiver—i save stap long wanpela liklik viles long Guatemala. Yomara i kirap long stadi long Baibel wantaim ol Witnes, na i no longtaim 2-pela brata bilong em i joinim em long stadi. Tasol i gat wanpela hevi. Olgeta 3-pela brata na susa wantaim i aipas, na ol i no inap ritim tok long rait brel. Olsem na Baibel tisa bilong ol i save ritim buk bilong stadi na ol Baibel ves bilong lesen long ol.
Na ol i hatwok tu long go long ol miting bilong kongrigesen. Ol yet i no inap long wokabaut inap 40 minit long i go long Haus Kingdom i stap long hap bilong ol. Tasol ol bratasista long kongrigesen i stretim rot bilong kisim ol i go long olgeta miting. Na taim ol i kirap long mekim ol skul tok long ol miting namel long wik, ol bratasista i save helpim ol long tingim gut ol tok ol bai mekim.
Long Me 2019, ol brata i kirap long mekim ol miting bilong kongrigesen long viles bilong ol. Long dispela taim, tupela marit i mekim wok painia oltaim i muv i go long dispela viles. Tupela i putim mak na wok strong long skulim dispela 3-pela brata na susa long ritim na raitim ol tok long rait brel, maski tupela marit yet i no save long yusim rait brel. Ol i go long wanpela laibreri na bai ol i ken lain long yusim rait brel na hau long skulim ol narapela long yusim dispela rait.
Marcelo i bekim tok long wanpela miting bilong kongrigesen
Inap sampela mun bihain, dispela 3-pela brata na susa i pilim isi moa long ritim rait brel, na dispela i opim rot long ol inap kamap strong moa long bilip.a Long nau, Yomara, Marcelo, na Hiver i mekim wok olsem painia oltaim. Marcelo em i wanpela kongrigesen sevan. Long wik olgeta, ol i save givim bel tru long mekim ol samting bilong lotu. Na dispela i kirapim ol narapela tu long givim bel long wok bilong God.
Dispela 3-pela brata na susa i tenkyu tru long helpim bilong kongrigesen. Yomara i tok: “Kirap long festaim mipela i bungim ol Witnes na i kam inap long nau, ol i soim pasin laikim tru long mipela, em ol Kristen i save mekim.” Na Marcelo i tok: “Mipela i gat ol gutpela pren long kongrigesen bilong mipela, na mipela i hap bilong wanpela bikpela lain brata em pasin laikim i mekim yumi stap wanbel.” Yomara na tupela brata bilong em i laik tru long dispela de i kamap we ol bai lukim graun olgeta i kamap wanpela Paradais.—Sng. 37:10, 11; Ais. 35:5.
a Wanpela buklet (Learn to Read Braille) em ol i bin wokim bilong helpim wanpela husat i no inap lukluk gut o aipas long kisim save long hau em inap ritim na raitim tok long rait brel.