Pasin Bilong Tok Nogat Long Pikinini

Pikinini bilong yu i laik bai yu mas tok yes long olgeta samting em i laikim. Taim yu tok nogat, em i save krai na bikmaus na dispela i mekim yu belhat. Yu no inap mekim wanpela samting bilong mekim gut bel bilong em. Olsem na yu bihainim laik bilong pikinini.

Yu inap kisim pasin bilong tok nogat long pikinini. Tasol pastaim, yumi ken skelim sampela samting yu mas save long en long pasin bilong tok nogat.

Pasin bilong tok nogat i no hatpela pasin. Sampela papamama i no wanbel long dispela tok. Ol i ting i gutpela moa long kisim tingting bilong pikinini o tokim em long as na yu tok nogat. Na ol i ting i no gutpela long tok nogat long pikinini taim em i laikim wanpela samting, long wanem, sapos yu mekim olsem pikinini bai bel hevi long yu.

Taim yu tok nogat, dispela inap mekim pikinini i bel hevi. Tasol dispela pasin bai helpim em long luksave olsem olgeta samting man i laikim em bai no inap kisim. Sapos yu bihainim laik bilong pikinini long olgeta samting, dispela bai mekim na i olsem em i bosim yu, na tu, pikinini bai ting olsem em i mas krai na bikmaus bilong kisim wanpela samting. Sapos olgeta taim yu larim pikinini i bosim yu, em bai i no rispektim yu moa.

Pasin bilong tok nogat bai helpim pikinini taim em i go bikpela man o meri. Taim yu tok nogat long pikinini, dispela i skulim em long bosim gut bel bilong em. Na taim em i kamap tineja, dispela bai helpim em long sakim pasin bilong kisim drak, o mekim pasin pamuk.

Na tu, taim yu tok nogat long pikinini, dispela bai helpim em taim em i go bikpela man o meri. Dokta David Walsh i tok: “Yumi ol manmeri i bikpela pinis i no save kisim olgeta samting yumi laikim. Sapos oltaim yumi bihainim laik bilong pikinini na givim em olgeta samting em i laikim, yumi no helpim pikinini.”a

Putim mak long helpim pikinini. Yu laik bai pikinini bilong yu i mas kamap man o meri bilong wok hat, na em inap bosim gut bel na lukautim em yet long bihain. Tasol yu no inap helpim pikinini long kamap kain man o meri olsem sapos yu givim em olgeta samting em i laikim. Baibel i tok: “Sapos man i isi tumas long wokboi [pikinini] bilong em long taim em i yangpela yet, orait bihain em bai kamap man i no save tenkyu liklik.” (Sindaun 29:21, NW ) Olsem na taim papamama i tok nogat na ol i no bihainim olgeta laik bilong pikinini, dispela bai helpim pikinini bilong ol long bihain.—Stiatok bilong Baibel: Sindaun 19:18.

Bihainim tok bilong yu. Pikinini i gat wok long bihainim tok bilong yu, olsem na i no gat as long yu mas kisim tok orait long em long mekim ol disisen. Tasol em i bikpela samting long tingim olsem taim ol pikinini i go bikpela, ol i mas “lainim gut tingting bilong ol long kliagut long wanem samting i stret na wanem samting i no stret.” (Hibru 5:14) Olsem na i nogat rong long toktok wantaim pikinini long as na yu mekim wanpela disisen. Na tu, tingim olsem i no gat as long tok pait wantaim pikinini. Sapos oltaim yu tok pait wantaim em, dispela i soim olsem yu inap senisim tingting na i no olsem yu mekim pinis disisen.—Stiatok bilong Baibel: Efesus 6:1.

No ken senisim disisen yu mekim. Ating pikinini bilong yu bai krai na bikmaus bilong fosim yu long bihainim laik bilong em. Bai yu mekim wanem long kain taim olsem? Buk Loving Without Spoiling i tok: “No ken harim tok bilong pikinini. Yu ken mekim kain tok olsem long em, ‘Mi no laik harim krai bilong yu. Go stap long rum inap long yu pinis krai.’” Ating fes taim bai i hatwok long mekim olsem, na pikinini tu bai i no amamas long samting yu mekim. Tasol sapos olgeta taim yu mekim wankain pasin na yu no senisim disisen bilong yu, isi isi pikinini bai lusim pasin bilong krai na bikmaus.—Stiatok bilong Baibel: Jems 5:12.

Bihainim gutpela tingting. No ken tok nogat long pikinini bilong soim olsem yu bosim em. I gutpela long mekim ol samting na bai ‘olgeta man i ken save olsem yu bihainim gutpela tingting.’ (Filipai 4:5) Sampela taim yu inap bihainim laik bilong pikinini. Olsem, sapos em i nidim sampela samting we yu ting i stret long em i kisim, orait i nogat rong long givim em ol dispela samting. —Stiatok bilong Baibel: Kolosi 3:21.◼