“Tok Bilong Jehova i Wok Long Kamap Bikpela Moa”

1-4. Wanem bikpela hevi i painim Pita? Bai yu pilim olsem wanem sapos wankain samting i painim yu?

BIKPELA pairap i kamap taim traipela ain geit i pas baksait long Pita. Ol i pasim em long sen namel long 2-pela gad bilong Rom, na ol i bringim em i go long sel bilong em. Em i mas wet planti aua, o ating sampela de, bilong kisim save long samting bai painim em. Insait long sel, em i lukim tasol ol wol bilong kalabus na ol ain ba, ol sen i pasim em, na ol gad.

² Pita i kisim save olsem samting nogut bai painim em. King Herot Agripa 1 i tingting strong long kilim Pita i dai.a Em i laik sanapim Pita long ai bilong ol manmeri bihain long Pasova, na bilong amamasim ol, em bai tokaut olsem Pita i mas i dai. Dispela i no wanpela tok nating, em bai mekim dispela samting. I no longtaim i go pinis, dispela king i bin kilim i dai aposel Jems, em wanwok bilong Pita.

³ Nau em nait paslain long ol bai kilim Pita i dai. Em i wok long tingting long wanem samting insait long sel bilong em i tudak? Ating em i wok long tingim bek ol tok Jisas i bin mekim long em inap sampela yia i go pinis, olsem ol bai kalabusim em na mekim samting em i no laikim tru—kilim em i dai. (Jon 21:18, 19) Ating Pita i tingting olsem dispela taim i kamap nau.

⁴ Sapos kain samting olsem i painim yu, bai yu pilim olsem wanem? Planti bai bel hevi na ting i no gat wanpela gutpela samting bai kamap. Tasol maski wanem kain hevi i painim disaipel tru bilong Jisas Krais, yu ting gutpela samting i no inap kamap? Yumi ken kisim wanem skul long samting Pita na ol wanbilip Kristen i mekim taim ol man i mekim nogut long ol? Orait nau bai yumi skelim dispela.

5, 6. (a) Bilong wanem King Herot Agripa 1 i mekim nogut long kongrigesen Kristen? Olsem wanem em i mekim? (b) Bilong wanem dai bilong Jems i traim tru bilip bilong kongrigesen?

⁵ Olsem Sapta 9 i stori pinis, gutpela samting i bin kamap long kongrigesen Kristen taim Kornilius em man bilong arapela lain, na famili bilong em i kamap Kristen. Tasol ol Juda em ol i no insait long kongrigesen Kristen, ol i kirap nogut long lukim olsem planti Kristen Juda i lotu wantaim ol manmeri bilong ol arapela lain.

⁶ Herot, em wanpela kleva politisen, i lukim dispela olsem wanpela gutpela rot bilong kirapim ol Juda long laikim em, olsem na em i kirap long mekim nogut long ol Kristen. Em i kisim save olsem aposel Jems i bin pas gut wantaim Jisas Krais, olsem na Herot i “kilim i dai Jems, em brata bilong Jon, long bainat.” (Apo. 12:2) Man! Dispela i mas traim tru bilip bilong kongrigesen! Jems em wanpela bilong ol 3-pela man husat i bin lukim Jisas i kamap narakain na i lukim ol narapela mirakel em ol arapela aposel i no bin lukim. (Mat. 17:1, 2; Mak 5:37-42) Jisas i bin kolim Jems na brata bilong em Jon olsem “Ol Pikinini Bilong Klaut i Pairap,” bikos tupela i man bilong givim bel tru long mekim samting. (Mak 3:17) Olsem na wanpela gutpela aposel na witnes husat i no save pret, i no stap moa wantaim kongrigesen.

7, 8. Kongrigesen i mekim wanem taim ol i putim Pita long kalabus?

⁷ Olsem Agripa i laikim, ol Juda i amamas taim ol i kilim Jems i dai, na dispela i kirapim em long painim Pita. Olsem kirap bilong dispela sapta i kamapim, em i arestim Pita. Tasol ating Agripa i tingim olsem bipo ol kalabus i no bin pasim ol aposel, olsem Sapta 5 i kamapim. Herot i no laik bai kain samting i kamap gen, olsem na em i tokim ol man long pasim Pita long sen namel long tupela gad, na 16 gad i senis senis long was long em long san na long nait, nogut em i ranawe. Sapos em i ranawe, Herot bai kilim ol dispela gad i dai. Long kain taim olsem, ol wanbilip Kristen bilong Pita bai mekim wanem?

⁸ Kongrigesen i save long samting ol i mas mekim. Aposel 12:5 i tok: “Ol i holim Pita i stap long kalabus. Tasol kongrigesen i wok long beten strong long God i ken helpim em.” Yes, taim ol i beten long God bilong helpim brata bilong ol, ol i beten strong na kamapim tru bel bilong ol. Indai bilong Jems i no bin daunim ol olgeta; na i no bin kirapim ol long tingting olsem beten i no gat strong, nogat. Beten em i bikpela samting tru long Jehova. Sapos ol beten i stret wantaim laik bilong em, em bai harim. (Hib. 13:18, 19; Jems 5:16) Dispela em samting ol Kristen long nau i ken kisim skul long en.

 9. Yumi inap kisim wanem skul long pasin bilong ol wanbilip Kristen bilong Pita long beten?

⁹ Olsem wanem? Yu save long sampela wanbilip em hevi i painim ol? Ating sampela i karim hevi long ol man i mekim nogut long ol, gavman i tambuim wok bilong ol, o bikpela disasta i bagarapim sindaun bilong ol. Gutpela sapos yu beten askim God long helpim ol. Na ating yu save long sampela em ol i karim ol hevi i no stap ples klia, olsem hevi long famili, bel hevi, o sampela samting i traim bilip bilong ol. Sapos yu skelim gut ol dispela samting paslain long yu beten, ating yu inap tingim sampela brata o sista em yu inap kolim nem bilong ol taim yu beten long Jehova, em “Man Bilong Harim ol prea.” (Sng. 65:2) Tingim olsem, sapos sampela hevi i painim yu, ating yu laik bai ol bratasista tu i beten bilong helpim yu.

10, 11. Stori long olsem wanem ensel bilong Jehova i helpim Pita long lusim kalabus.

¹⁰ Yu ting Pita i tingting planti long samting nogut bai painim em? Yumi no save long dispela. Tasol long laspela nait bilong em long kalabus, em i slip i dai namel long 2-pela gad husat i was i stap. Dispela gutpela man i save olsem maski wanem samting i painim em tumora, Jehova bai tingim em. (Rom 14:7, 8) Pita i no bin tingting liklik long dispela narakain samting em klostu nau bai kamap long em. Wantu, strongpela lait i kamap long sel bilong em. Wanpela ensel i kam sanap na ol gad i no lukim em, na kwiktaim em i kirapim Pita long slip. Ol sen i pasim han bilong em—i luk olsem ol strongpela sen tru—i pundaun nating tasol!

¹¹ Ensel i tokim Pita long samting em i mas mekim: “Kirap hariap! . . . Redi na pasim sendol bilong yu. . . . Pasim saket bilong yu.” Wantu Pita i mekim. Na ensel i tok: “Bihainim mi,” na Pita i mekim olsem. Ol i lusim sel, na wokabaut i go abrusim ol gad husat i stap ausait na ol i wokabaut isi i go long traipela ain geit. Olsem wanem ol inap opim dispela geit? Sapos Pita i tingting long dispela, em i no tingting longpela taim, long wanem, taim ol i go klostu long geit, ‘geit yet i op.’ Ol samting i kamap hariap tru, ol i go ausait long geit, na bihain ensel i lusim em. Nau Pita i luksave olsem dispela samting i bin kamap tru tru na em i no wanpela visen. Em i stap fri!​—Apo. 12:7-11.

12. Bilong wanem pasin bilong tingim ol samting Jehova i bin mekim bilong helpim Pita inap mekim gut bel bilong yumi?

¹² Taim yumi tingim bikpela strong bilong Jehova long kisim bek ol wokman bilong em, dispela i save mekim gut bel bilong yumi. Wanpela king husat i gat sapot bilong wanpela strongpela gavman tru i bin putim Pita long kalabus. Tasol isi tasol Pita i wokabaut i go ausait long kalabus! Tru, Jehova i no save wokim ol kain mirakel olsem bilong helpim olgeta wokman bilong em. Em i no bin mekim olsem long Jems. Na em i no mekim olsem tu long Pita sampela yia bihain, taim tok bilong Jisas long samting bai painim Pita i kamap tru. Ol Kristen long nau i no save ting ol bai kisim helpim long rot bilong mirakel. Tasol yumi mas tingim olsem Jehova i no save senis. (Mal. 3:6) Klostu nau em bai mekim wok long Pikinini bilong em long kisim bek planti milion manmeri long kalabus bilong dai. (Jon 5:28, 29) Ol dispela promis inap strongim tru bel bilong yumi taim yumi karim ol hevi long nau.

13-15. (a) Ol Kristen i bung long haus bilong Maria i mekim wanem taim Pita i kam? (b) Buk Aposel i kirap stori long husat? Wok bilong Pita i mekim wanem long ol bratasista Kristen bilong em?

¹³ Em tudak na Pita i sanap long rot, na em i wok long tingting long em bai go we. Nau em i kisim tingting. Haus bilong Maria, em wanpela meri Kristen, i stap klostu. Em i wanpela wido husat i gat gutpela sindaun, na em i gat bikpela haus we kongrigesen inap bung long en. Em i mama bilong Jon Mak, na em fes taim Buk Aposel i kolim nem bilong Jon Mak, em bihain em i kamap olsem pikinini bilong Pita. (1 Pita 5:13) Long dispela nait yet, planti bilong kongrigesen i wok long beten strong i stap long haus bilong Maria maski em i biknait pinis. Ol i wok long beten long Pita i ken lusim kalabus, tasol ol i no ting Jehova bai bekim kwik beten bilong ol!

¹⁴ Pita i paitim dua bilong geit bilong ples bung i stap long fran bilong haus. Wanpela wokmeri, nem bilong em Roda—em nem Grik i makim plaua ol i kolim Rose—i kam long geit. Em i no inap bilip olsem em i harim nek bilong Pita! Em i amamas tru, tasol em i no opim geit; em i lusim Pita i sanap ausait na ran i go insait long haus na tokim ol olsem Pita i stap ausait. Ol i tok em i longlong, tasol em i strongim sait bilong em. Em i tokim ol planti taim olsem tok bilong em i tru. Nau sampela i ting olsem, ating em wanpela ensel husat i makim Pita. (Apo. 12:12-15) Tasol Pita i paitim yet dua inap long ol i kam long geit na opim.

¹⁵ Long geit, “ol i lukim em na ol i kirap nogut tru”! (Apo. 12:16) Ol i amamas tru long lukim Pita, tasol em i tokim ol long daunim nek na bai em i ken stori long ol long samting i bin painim em. Em i tokim ol long tokim disaipel Jems na ol brata long dispela samting, na bihain em i lusim ol paslain long ol soldia bilong Herot i kam painim em. Pita i go long wanpela hap i seif bilong mekim yet wok autim tok. Aposel sapta 15 i stori long samting em i mekim bilong stretim tok bilong katim skin, na bihain long dispela Buk Aposel i no stori moa long em. Nau Buk Aposel i kirap stori long wok na raun bilong aposel Pol. Tasol yumi ken bilip olsem long olgeta hap Pita i go long en, em i strongim bilip bilong ol bratasista Kristen bilong em. Taim em i lusim ol dispela Kristen long haus bilong Maria, ol i amamas tru.

16. Bilong wanem yumi ken bilip olsem bai yumi kisim bikpela amamas tru long bihain?

¹⁶ Sampela taim Jehova i givim ol blesing long ol wokboi bilong em, em ol blesing ol i no ting ol inap kisim, na dispela i givim bikpela amamas tru long ol. Ol bratasista Kristen bilong Pita i bin pilim olsem long dispela nait. Long nau, sampela taim yumi inap pilim kain amamas olsem taim yumi kisim ol blesing i kam long Jehova. (Prov. 10:22) Long bihain, bai yumi lukim truim bilong olgeta tok promis bilong Jehova long olgeta hap bilong graun. Ol gutpela samting bai kamap long dispela taim bai winim tru ol samting em long nau yumi tingting long en. Olsem na sapos yumi stap gut yet long God, bai yumi inap wet long kisim bikpela amamas tru long bihain.

17, 18. Wanem samting i kamap na i kirapim ol manmeri long singaut bilong amamasim Herot?

¹⁷ Herot tu i kirap nogut taim Pita i lusim kalabus, na em i no amamas long dispela. Kwiktaim Herot i tokim ol man long wok strong tru long painim Pita, na bihain em i kwestenim ol gad husat i bin was long Pita; na em i tokim ol man long “kisim ol i go na mekim save long ol,” ating ol i kilim ol i dai. (Apo. 12:19) Herot Agripa i no gat pasin marimari. Yu ting dispela man nogut i bin kisim strafe?

¹⁸ Ating Agripa i sem pipia olsem em i no bin kilim Pita i dai, tasol i no longtaim na em i hambak gen. Wanpela bung bilong ol bikman i kamap we sampela birua bilong Agripa i laik stretim tok bilong kamap wanbel wantaim em. I luk olsem em i amamas long sanap long ai bilong planti manmeri na mekim tok. Luk i stori olsem bilong redi long dispela de, “Herot i pasim ol klos bilong king.” Saveman Josifas bilong lain Juda i tok, ol klos Herot i pasim ol i bin wokim long silva, olsem na taim lait i kisim king, em i lait moa yet. Bihain, dispela hambak politisen i mekim tok. Ol manmeri i laik amamasim Herot, na ol i singaut olsem: “Em nek bilong wanpela god, i no bilong wanpela man!”​—Apo. 12:20-22.

19, 20. (a) Bilong wanem Jehova i givim strafe long Herot? (b) Olsem wanem stori bilong Herot Agripa inap mekim gut bel bilong yumi?

¹⁹ Dispela kain ona i mas go long God, na God i wok long lukluk i stap! I gat rot long Herot i abrusim bagarap; em inap krosim ol dispela manmeri o tokaut olsem tingting bilong ol i no stret, tasol em i no mekim olsem. Samting i kamap long em i truim dispela savetok: “Pasin hambak i bringim man i go long bagarap.” (Prov. 16:18) “Wantu ensel bilong Jehova i mekim save long em,” na dai bilong dispela hambakman i no gutpela. “Planti liklik snek i pulap long [Herot] na em i dai.” (Apo. 12:23) Josifas tu i tok olsem wantu Agripa i sik, na em i tok moa olsem dispela king yet i tokaut olsem em bai i dai bikos em i amamas long tok gris bilong ol manmeri. Josifas i tok olsem Agripa i stap 5-pela de paslain long em i dai.b

²⁰ Sampela taim i luk olsem ol man nogut i mekim olkain pasin nogut, na ol i no kisim strafe. Yumi no kirap nogut long dispela, bikos “dispela graun olgeta i stap long han bilong Satan.” (1 Jon 5:19) Tasol sampela taim ol gutpela wokman bilong God i save bel hevi taim i luk olsem ol man nogut i no kisim strafe. Olsem na kain stori olsem dispela i mekim gut bel bilong yumi. Yumi lukim Jehova i mekim sampela samting, na dispela i helpim ol wokman bilong em long save olsem Em i save laikim stretpela pasin. (Sng. 33:5) Klostu nau stretpela pasin bilong Jehova bai win.

21. Aposel sapta 12 i stori long wanem bikpela samting? Bilong wanem dispela inap mekim gut bel bilong yumi long nau?

²¹ Long pinis bilong dispela stori i gat gutpela tok i strongim tru bel bilong yumi. Baibel i tok: “Tok bilong Jehova i wok long kamap bikpela moa na i go long planti hap moa.” (Apo. 12:24) Dispela ripot bilong wok autim tok i go bikpela, inap kirapim yumi long tingim pasin bilong Jehova long blesim dispela wankain wok long nau tu. I klia tru olsem stori i stap long Aposel sapta 12 i no stori tasol long wanpela aposel i dai na narapela aposel i lusim kalabus, nogat. Em i stori long Jehova na ol samting em i mekim bilong pasim Satan long bagarapim kongrigesen Kristen na stopim wok autim tok. Ol dispela wok nogut bilong Satan i bin pundaun, na bai i wankain tu long olgeta narapela wok nogut bilong em. (Ais. 54:17) Tasol ol man husat i stap long sait bilong Jehova na Jisas Krais, ol i insait long wanpela wok i no inap pundaun. Dispela i mekim gut bel bilong yumi, a? Em i wanpela gutpela wok tru yumi inap mekim long nau bilong helpim wok bilong autim “tok bilong Jehova” i go long planti hap!