Kisim Skul Long Tok Bilong God

Olsem Wanem Yu Inap Luksave Long Lotu i Tru?

Dispela atikol i kamapim sampela askim ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.

 1. Yu ting i gat wanpela trupela lotu tasol?

Jisas i skulim ol disaipel bilong em long wanpela lotu tasol, em lotu i tru. Dispela i olsem wanpela rot i go long laip. Jisas i tok long dispela rot olsem: “Wan wan manmeri tasol i save lukim na bihainim dispela rot.” (Matyu 7:14) God i orait tasol long lotu em tok i tru bilong Baibel i as bilong en. Olgeta man i lotu tru long God ol i stap wanbel long bilip.​—Ritim Jon 4:​23, 24; 14:6; Efesus 4:​4, 5.

 2. Bilong wanem planti lotu i tok ol i Kristen?

Ol profet giaman i bin bagarapim lotu Kristen na mekim wok long en bilong helpim ol yet tasol. Olsem Jisas i bin tok profet long en, ol i giaman olsem ol i “sipsip” bilong em, tasol tru tru ol i mekim pasin olsem ol wulf i hangre tru. (Matyu 7:​13-15, 21, 23) Lotu Kristen giaman i bin kirap bihain long taim ol aposel bilong Jisas i dai pinis.​—Ritim Aposel 20:​29, 30.

 3. Wanem sampela mak bilong lotu i tru?

Ol man i lotu tru long God, ol i rispek long Baibel olsem Tok Bilong God. Ol i wok strong long bihainim ol stiatok bilong en. Olsem na lotu i tru i narapela kain long lotu em tingting bilong ol man i as bilong en. (Matyu 15:​7-9) Ol man i lotu tru long God ol i no autim wanpela tok na bihainim pasin i narapela kain long dispela tok.​—Ritim Jon 17:17; 2 Timoti 3:​16, 17.

Lotu i tru i litimapim nem bilong God, em Jehova. Jisas i bin kamapim nem bilong God long ol man. Em i helpim ol man long kisim save long God na em i skulim ol long beten olsem nem bilong God i mas i stap holi. (Matyu 6:9) Long hap yu stap long en, wanem lotu i save kirapim ol man long yusim nem bilong God?​—Ritim Jon 17:26; Rom 10:​13, 14.

 4. Olsem wanem yu inap luksave long ol man i lotu tru long God?

Ol Kristen tru i save autim tok bilong Kingdom Bilong God. God i bin salim Jisas i kam bilong autim tok bilong Kingdom. Kingdom Bilong God tasol bai kamapim ol gutpela samting long ol manmeri. Jisas i bin toktok long dispela Kingdom i go inap long de em i dai. (Luk 4:43; 8:1; 23:​42, 43) Em i tokim ol disaipel bilong em long autim tok bilong Kingdom Bilong God. Sapos wanpela man i kam bungim yu na i toktok wantaim yu long Kingdom Bilong God, yu ting em i bilong wanem lotu?​—Ritim Matyu 10:7; 24:14.

Ol disaipel bilong Jisas i no bilong dispela graun. Ol i no insait long ol wok politik na pait samting. (Jon 17:16) Na tu, ol i no insait long ol pasin na tingting nogut bilong dispela graun.​—Ritim Jems 1:27; 4:4.

 5. Wanem nambawan mak bilong lotu Kristen tru?

Ol Kristen tru i save laikim tru narapela narapela. Baibel i skulim ol long rispek tru long olgeta lain man. Planti taim ol lotu giaman i strong long sapotim ol woa long ol kantri, tasol ol man i lotu tru long God ol i no laik tru long insait long en. (Maika 4:​1-4) Ol man i insait long lotu i tru, ol i givim taim na ol samting bilong ol yet long helpim na strongim ol narapela.​—Ritim Jon 13:​34, 35; 1 Jon 4:​20, 21.

Wanem lain i save kisim olgeta tok long Baibel, litimapim nem bilong God, na autim tok olsem Kingdom Bilong God tasol i rot bilong pinisim tru ol hevi bilong ol man? Wanem lain i save mekim pasin laikim na i no save sapotim ol woa? Ol samting i kamapim klia olsem dispela lain em ol Witnes Bilong Jehova.​—1 Jon 3:​10-12.

Bilong kisim sampela save moa, lukim sapta 15 bilong dispela buk, em ol Witnes Bilong Jehova i wokim. Tru Tru Baibel i Tok Wanem?

[Piksa long pes 16]

“Long ai bilong ol man ol i tokaut olsem ol i save long God, tasol pasin ol i bihainim i soim olsem ol i givim baksait long em.”​—Taitus 1:16