“Larim Pasin Bilong Sanap Strong i Inapim Wok Bilong En”

1, 2. (a) Yumi inap kisim wanem skul long pasin bilong Gideon na 300 soldia bilong em long sanap strong? (Lukim piksa long kirap bilong stadi.) (b) Olsem tok i stap long Luk 21:19 i soim, bilong wanem em i bikpela samting long sanap strong na karim hevi?

PAIT i kamap na 2-pela sait wantaim i strong tru. Hetman Gideon i go pas long lain soldia bilong Israel na ol i ronim ol birua, em lain Midian na ol poroman bilong ol, na ol i ronim ol long nait olgeta inap 32 kilomita! Baibel i stori long samting i kamap bihain na i tok: “Gideon wantaim ol 300 man bilong en i kamap long Jordan na ol i brukim wara. Skin bilong ol i les tru.” Tasol Gideon na ol soldia bilong em i no winim yet pait bikos 15 tausen soldia bilong ol Midian i stap yet. Ol Midian i mekim nogut tru long ol Israel inap planti yia, olsem na lain Israel i save olsem nau em i no taim bilong givap. Ol i laik daunim ol Midian, olsem na “ol i wok yet long ranim ol birua” i go inap long ol i winim lain Midian.—Het. 7:22; 8:4, 10, 28.

² Yumi tu i mekim wanpela bikpela pait. Ol birua bilong yumi em Satan, pasin bilong dispela graun, na sin bilong yumi. Sampela bilong yumi i mekim dispela pait inap planti yia pinis, na Jehova i helpim yumi long winim ol dispela pait. Tasol sampela taim yumi inap givap long pait long ol birua, na tu, yumi inap givap long wetim pinis bilong dispela haptaim nogut bilong nau. Yumi no winim yet olgeta birua bilong yumi. Jisas i tok lukaut olsem, ol bikpela hevi bai painim yumi long haptaim bilong las de, na ol birua bai mekim nogut tru long yumi. Tasol em i tok tu olsem yumi mas sanap strong na karim hevi bambai yumi inap winim pait. (Ritim Luk 21:19.) Pasin bilong sanap strong i makim wanem samting? Wanem samting bai helpim yumi long sanap strong na karim hevi? Yumi inap kisim wanem skul long ol lain i sanap strong na karim hevi? Hau yumi inap “larim pasin bilong sanap strong i inapim wok bilong en”?—Jems 1:4.

 3. Sapos man i sanap strong na karim hevi, dispela i makim olsem em i holim wanem kain tingting?

³ Tingting na bel bilong man i save kirapim em long sanap strong na karim hevi. Em i no inap pret na surik, na tu, em i no inap les kwik. Wanpela buk i tok, sapos man i gat pasin bilong sanap strong na karim hevi, dispela i soim olsem “em i tingting strong long karim hevi na em i bilip olsem gutpela samting bai kamap, na em i no givap. Em i save sanap strong na redi long karim hevi. Maski bikpela hevi tru i painim em, em i no putim tingting i go long dispela hevi, nogat, em i putim tingting i go long gutpela samting bai kamap bihain.”

 4. Hau pasin laikim i save kirapim man long sanap strong?

⁴ Pasin laikim i kirapim Kristen long sanap strong. (Ritim 1 Korin 13:4, 7.) Taim wanpela samting i stret wantaim laik bilong God na dispela i putim hevi long yumi, yumi bai sanap strong sapos yumi laikim tru Jehova. (Luk 22:41, 42) Taim ol bratasista i rongim yumi, yumi bai sanap strong na karim hevi sapos yumi laikim ol. (1 Pita 4:8) Taim ol poroman marit i “karim pen na hevi,” ol bai sanap strong sapos ol i laikim tru narapela narapela, na dispela bai strongim marit bilong ol.—1 Kor. 7:28.

 5. Wai na Jehova tasol inap helpim yumi long sanap strong?

⁵ Askim Jehova long strongim yu. Jehova em “God husat i save helpim yumi long sanap strong na i save mekim isi bel bilong yumi.” (Rom 15:5) God tasol i save gut long sindaun bilong yumi, filings bilong yumi, na ol hevi i painim yumi. Na tu, em i save gut long olgeta pasin bilong yumi, na ol sik yumi kisim long papamama. Olsem na em tasol bai mekim yumi sanap strong na karim hevi. Baibel i tok: “Ol manmeri i save pret long [God], em i save givim ol samting long ol. Na em i save harim krai bilong ol na kisim bek ol.” (Sng. 145:19) Tasol God bai mekim wanem taim yumi beten askim em long helpim yumi long sanap strong?

 6. Hau Jehova inap “wokim rot bilong helpim” yumi long karim hevi?

⁶ Ritim 1 Korin 10:13. Taim yumi askim Jehova long helpim yumi long karim hevi, em bai “wokim rot bilong helpim” yumi. Yu ting Jehova bai tekewe hevi i painim yumi? Sampela taim em inap mekim olsem. Tasol planti taim em i wokim rot bilong helpim yumi bambai yumi inap “sanap strong na bai traim i no inap daunim [yumi].” Yes, Jehova i save strongim yumi bambai yumi “ken sanap strong na i no les kwik, na [yumi] ken mekim wantaim amamas.” (Kol. 1:11) Jehova i save gut long skel bilong yumi long mekim samting, na skel bilong filings na strong bilong yumi, olsem na em i no inap larim ol hevi i kamap bikpela moa winim skel bilong yumi.

 7. Wanem tok piksa i helpim yumi long luksave olsem yumi mas kisim kaikai bilong strongim bilip?

⁷ Kaikai bilong strongim bilip. Maunten Everest em traipela maunten i stap antap tru winim olgeta narapela maunten long graun. Sapos man i laik i go antap long dispela maunten, em i mas kisim planti kaikai. Dispela bai helpim em long wokabaut i go yet na kamap long het bilong maunten. Olsem tasol, sapos yumi laik sanap strong olsem Kristen na kisim laip long bihain, oltaim yumi mas kisim planti kaikai bilong strongim bilip. Yumi mas bosim gut bel bambai yumi inap lusim sampela haptaim long ritim Baibel, mekim pesenel stadi, na go long ol miting Kristen. Ol dispela samting bai helpim yumi long “kisim kaikai i no save bagarap na i save givim laip oltaim,” na long dispela rot, yumi bai stap strong long bilip.—Jon 6:27.

8, 9. (a) Olsem Jop 2:4, 5 i tok, wanem tok giaman i insait long ol traim i painim yumi? (b) Taim bikpela hevi i painim yu, yu ken piksaim wanem samting?

⁸ Tingim tok giaman i kamap long pasin bilong i stap gut long God. Taim hevi i painim wokman bilong Jehova, pasin em i mekim long dispela taim em i bikpela samting moa. Pasin yumi mekim bai kamapim klia olsem yumi tingim Jehova olsem King Bilong Heven na Graun, o nogat. Satan i birua long wok bos bilong Jehova na sutim tok olsem: “Mi ting sapos wanpela man i laik i stap gut, em inap givim olgeta samting bilong en bilong baim bek laip bilong en. Olsem na mi laik bai yu bagarapim bodi bilong [Jop], na bai yu lukim em i tok nogut tru long yu.” (Jop 2:4, 5) Satan i sutim tok olsem ol man i mekim wok bilong Jehova bikos ol i tingim laik bilong ol yet. Yu ting Satan i lusim pinis dispela pasin? Nogat tru! Planti handret yia bihain, ol i rausim Satan long heven, na Baibel i kolim em olsem “man bilong kotim ol brata bilong yumi, em i save kotim ol long ai bilong God long san na long nait.” (Rev. 12:10) Satan i no lusim tingting long tok em i sutim long ol wokman bilong God. Em i laik tru bai yumi pundaun long traim na sakim wok bos bilong God.

⁹ Taim bikpela hevi i painim yu, piksaim dispela samting: Satan na ol bikhet ensel i stap long wanpela sait na ol i poinim pinga long yu na tok olsem yu bai givap long karim hevi na yu bai pundaun long traim. Tasol long narapela sait yu lukim Jehova, Pikinini bilong em husat i mekim wok king, ol Kristen God i makim em ol i kirap bek pinis, na planti milion ensel. Ol i sapotim yu bikos long olgeta de, yu sanap strong na karim hevi na sapotim wok bos bilong Jehova. Tingim olsem Jehova yet i tokim yu: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.”—Snd. 27:11.

10. Hau yu inap bihainim pasin bilong Jisas na tingim ol blesing yu bai kisim sapos yu sanap strong?

¹⁰ Tingim ol blesing yu bai kisim sapos yu sanap strong. Tingim olsem yu wokabaut long longpela rot, na yu stop namel long wanpela tanel. Yu lukluk long olgeta hap na yu lukim olsem ples i tudak. Tasol yu bilip olsem sapos yu wokabaut yet i go long pinis bilong tanel, yu bai lukim lait gen. Olsem tasol, sampela taim yu inap pilim olsem ol hevi i laik daunim yu. Jisas i pilim wankain olsem yu. Ol man i mekim “ol hatpela tok” long Jisas, semim em, na nilim em long “diwai pos” na dispela i givim bikpela pen long em—dispela hevi i bikpela tru winim ol narapela hevi i painim em taim em i stap long graun! Tasol Jisas i sanap strong na karim hevi bikos “em i tingim amamas em bai kisim.” (Hib. 12:2, 3) Jisas i tingim ol blesing em bai kisim sapos em i sanap strong na mekim holi nem bilong God na sapotim rait bilong Jehova long i stap nambawan bos. Jisas i karim bikpela hevi tru inap sotpela haptaim, tasol blesing bilong em long heven bai i stap inap oltaim oltaim. Long nau, ol hevi i painim yu inap givim bikpela pen long yu na daunim yu. Tasol tingim olsem yu bihainim rot bilong kisim laip oltaim, na ol dispela hevi em bilong sotpela taim tasol.

11. Wai na yumi mas skelim ekspiriens bilong “ol man husat i sanap strong na karim hevi”?

¹¹ Yumi no ken ting olsem yumi tasol i karim hevi, nogat. Aposel Pita i kirapim ol Kristen long sanap strong na karim ol hevi em Satan i putim long ol, em i tok: “Yupela i mas sanap strong long bilip na sakim em. Yupela save, ol wanbilip bilong yupela i stap long olgeta hap bilong graun, ol i karim wankain pen na hevi olsem yupela.” (1 Pita 5:9) Ekspiriens bilong “ol man husat i sanap strong na karim hevi” i skulim yumi long hau yumi inap stap strong long bilip, na tu, ol dispela ekspiriens i helpim yumi long luksave olsem yumi inap winim ol hevi na kisim blesing sapos yumi stap gut long God. (Jems 5:11) Orait, yumi ken skelim sampela eksampel.^[1]

12. Yumi kisim wanem skul long eksampel bilong ol serap long gaden Iden?

¹² Ol serap. Taim yumi kisim save long stori bilong ol fes ensel husat i kam helpim ol man long graun, dispela i strongim yumi long mekim ol asainmen i gat hatwok long en. God Jehova i “makim ol strongpela ensel bilong sanap na was i stap long hap sankamap bilong gaden Iden. Na tu em i putim wanpela bainat i gat paia i lait long en na i save tanim tanim long olgeta hap. Oltaim ol dispela ensel wantaim dispela bainat i save was i stap, nogut wanpela man i go klostu long dispela diwai bilong givim laip.”^[2] (Stt. 3:24) God i no wokim ol serap long mekim dispela wok! Na tu, God i no wokim ol manmeri bilong mekim sin na bihainim pasin bikhet, nogat. Ol serap em ol ensel i gat bikpela namba, tasol i no gat wanpela tok long Baibel i soim olsem ol i komplein long wok bilong sanap na was long gaden Iden. Ol i no les long dispela asainmen. Ol i bihainim tok na mekim gut asainmen bilong ol i go inap wok bilong ol i pinis taim Bikpela Tait i kamap 1 tausen 6 handret yia bihain!

13. Wanem samting i helpim Jop long sanap strong na karim hevi?

¹³ Bilipman Jop. Sapos wanpela pren o wanfamili i mekim ol tok i bagarapim bel bilong yu, o bikpela sik i painim yu, o yu bel hevi long wanpela wanfamili o pren i dai, orait stori bilong Jop inap mekim isi bel bilong yu. (Jop 1:18, 19; 2:7, 9; 19:1-3) Maski Jop i no save long husat i givim bikpela hevi long em, em i no givap long karim hevi, long wanem, em i stap “aninit long God,” olsem stap daun long God. (Jop 1:1) Jop i tingting strong long amamasim Jehova long gutpela taim na long taim nogut. God i helpim Jop na Jop i tingim ol gutpela samting Jehova i kamapim long rot bilong holi spirit. Jop i bilip tru olsem Jehova bai pinisim hevi bilong em long taim stret. (Jop 42:1, 2) Ol samting i kamap stret olsem Jop i bilip long en. Jehova “i givim em gutpela sindaun gen. Bikpela i givim Jop planti samting tru, i dabolim olgeta samting em i bin i gat bipo.” Jop i stap laip i go inap long “em i kamap lapun tru, na em i dai.”—Jop 42:10, 17.

14. Olsem 2 Korin 1:6 i stori long en, hau pasin bilong Pol long sanap strong i helpim ol arapela?

¹⁴ Aposel Pol. Olsem wanem? Ol birua bilong lotu i tru i mekim nogut long yu? Yu wanpela elda o wasman sekit, na yu pilim olsem yu gat planti wok tumas long mekim? Sapos olsem, orait yu mas tingim tingim eksampel bilong Pol. Ol birua i mekim planti “samting i putim hevi” long em, na long olgeta de em i wari long ol kongrigesen na dispela i putim presa long em. (2 Kor. 11:23-29) Maski i olsem, em i no givap, na eksampel bilong em i strongim ol arapela. (Ritim 2 Korin 1:6.) Taim yu sanap strong na karim hevi, tingim olsem eksampel bilong yu bai helpim ol narapela tu long sanap strong taim hevi i painim ol.

15, 16. (a) Taim yumi sanap strong na karim hevi, dispela bai inapim wanem “wok”? (b) Wanem ol hevi inap kamap na yumi ken “larim pasin bilong sanap strong i inapim wok bilong en”?

¹⁵ Holi spirit i kirapim Jems long tok olsem: “Larim pasin bilong sanap strong i inapim wok bilong en.” Wanem dispela “wok”? Em bai helpim yumi long “stap gutpela olgeta na inap tru long olgeta samting, na [yumi] no sot long wanpela samting.” (Jems 1:4) Ol hevi i helpim yumi long luksave long sampela pasin bilong yumi yet em yumi gat wok long stretim. Taim yumi sanap strong na karim hevi, ol pasin bilong yumi bai kamap gutpela moa. Yumi inap kamap gutpela moa long pasin bilong tok tenkyu, pasin sori, na pasin bilong i no les kwik.

¹⁶ Sapos yumi sanap strong na karim hevi, dispela bai inapim wok bilong trenim yumi long bihainim pasin Kristen. Olsem na yumi no ken kalapim ol stiatok bilong Baibel na painim rot bilong pinisim hevi. Tingim: Bai yu mekim wanem sapos oltaim yu tingting long ol samting i no stret? Yu mas beten strong na sakim ol dispela tingting, na yu no ken larim ol dispela tingting nogut i pundaunim yu. Taim yu mekim olsem, yu bai strongim pasin bilong yu long bosim gut bel. Olsem wanem sapos wanfamili i birua long yu? Strongim tingting na givim bel olgeta long sapotim lotu i tru, na no ken larim pasin birua i daunim yu. Dispela bai strongim bilip bilong yu long Jehova. Tingim: Sapos yumi laik bai God i amamas long yumi, orait yumi mas sanap strong na karim hevi.—Rom 5:3-5; Jems 1:12.

17, 18. (a) Wanem tok piksa i soim klia olsem em i bikpela samting long yumi mas sanap strong i go inap long pinis? (b) Pinis i wok long kam klostu tru, na yumi ken bilip tru olsem God bai mekim wanem?

¹⁷ Yumi mas sanap strong na karim hevi i go inap long pinis. Yumi ken tok piksa olsem: Wanpela sip i kapsait. Ol pasindia i mas swim i go long nambis bambai ol inap i stap laip. Sapos wanpela man i swim i go klostu long nambis na em i givap long swim, em bai bungim wankain hevi olsem man husat i givap long swim taim em i stap longwe yet long nambis. Olsem tasol, yumi mas holim strongpela tingting long sanap strong na karim hevi i go inap long yumi kamap long nupela taim. Yumi bai kisim laip sapos yumi sanap strong yet. Yumi mas i gat pasin em aposel Pol i kolim 2-pela taim, em i tok: “Mipela i no givap.”—2 Kor. 4:1, 16.

¹⁸ Yumi ken bilip tru olsem Jehova bai helpim yumi long sanap strong i go inap long pinis. Yumi laik holim wankain tingting olsem Pol i kamapim long Rom 8:37-39, em i tok: “Long rot bilong dispela man husat i bin laikim yumi tumas, yumi save winim tru olgeta dispela samting. Mi bilip tru olsem dai, laip, ol ensel, ol gavman, ol samting nau i stap, ol samting bai kamap bihain, ol samting i gat strong, ol samting bilong antap, ol samting bilong daunbilo, na ol arapela samting God i bin wokim, olgeta dispela samting i no inap tekewe yumi long pasin laikim bilong God, em dispela pasin i stap long Krais Jisas, Bikpela bilong yumi.” Em tru, sampela taim yumi bai pilim taiet. Tasol yumi mas sanap strong i go inap long pinis na tok Baibel i mekim long Gideon bai i stret long yumi tu. Em i tok: “Ol i wok yet long ranim ol birua.”—Het. 8:4.