No Ken Ting Yu Nambawan Tru Winim Ol Narapela

 1. Olsem Filipai 2:3 i kamapim, hau bai pasin daun i helpim yumi long pas gut wantaim ol narapela?

YUMI mas daunim yumi yet na bihainim ol lo bilong Jehova, na tingim olsem oltaim Jehova i save long nambawan rot tru bilong helpim yumi. (Efe. 4:22-24) Pasin daun bai kirapim yumi long daunim laik bilong yumi yet na bihainim laik bilong Jehova, na tingim olsem ol narapela i nambawan tru winim yumi. Taim yumi mekim olsem, yumi bai pas gut wantaim Jehova na ol wanbilip.—Ritim Filipai 2:3.

 2. (a) Aposel Pol i tok yumi mas mekim wanem? (b) Long dispela atikol, yumi bai skelim wanem ol samting?

² Sapos yumi no was gut, yumi inap bihainim pasin bilong ol manmeri bilong graun em ol i gat pasin antap na ol i tingim ol yet tasol.b I luk olsem dispela samting i bin kamap long sampela Kristen long taim bilong ol aposel bikos aposel Pol i tokim ol Kristen long Rom olsem: “Mi tok long olgeta man wan wan i stap namel long yupela, yu no ken ting yu nambawan tru. Tasol yupela i mas wokim tingting long pasin i soim olsem yupela i gat gutpela tingting.” (Rom 12:3) Pol i tok yumi mas rispektim yumi yet. Pasin daun bai helpim yumi long sakim pasin antap. Dispela atikol bai stori long 3-pela samting long laip bilong yumi we pasin daun bai helpim yumi long sakim pasin antap. Ol dispela samting em (1) marit bilong yumi, (2) asainmen bilong yumi, na (3) wei bilong yumi long yusim fon na Intenet.

 3. (a) Wai na ol tok pait inap kamap insait long marit? (b) Sampela i save mekim wanem taim ol hevi i kamap?

³ Jehova i laik bai maritman na maritmeri i kisim amamas insait long marit bilong ol. Yumi olgeta i sinman, olsem na ol tok pait inap kamap. Pol i tok ol marit lain bai bungim sampela hevi. (1 Kor. 7:28) Sampela manmeri i save pait oltaim wantaim poroman marit, na ating ol i pilim olsem dispela poroman marit i no stret long ol. Sapos ol i bihainim tingting bilong graun, ol bai pilim olsem mobeta ol i katim marit. Ol bai ting olsem ol inap stap amamas moa sapos ol i katim marit.

 4. Yumi mas abrusim wanem kain tingting?

⁴ Yumi no ken kisim tingting olsem marit bilong yumi no gutpela moa. Yumi save olsem wanpela risen tasol bilong katim marit em sapos poroman marit i mekim pasin pamuk. (Mat. 5:32) Olsem na taim hevi kamap insait long marit olsem Pol i stori long en, yumi no ken kisim pasin antap na tingting olsem: ‘Poroman marit bilong mi em i no tingim mi. Em i no soim pasin laikim long mi. Ating mi bai stap amamas moa sapos mi kisim narapela poroman.’ Sapos yumi tingting olsem, yumi tingim yumi yet tasol na yumi no tingim poroman marit bilong yumi. Ol man bilong graun i pilim olsem em savetingting long bihainim laik bilong yu yet na mekim ol samting we i givim amamas long yu, maski dispela i makim olsem yu mas katim marit. Tasol Baibel i tok yu “no ken tingim laik bilong [yu] yet tasol, nogat, [yu] mas tingim tu laik bilong ol arapela.” (Fili. 2:4) Jehova i laik bai yu lukautim marit bilong yu, na i no long pinisim marit. (Mat. 19:6) God i laik bai yu tingim em pastaim, na no ken tingim yu yet.

 5. Olsem Efesus 5:33 i kamapim, maritman na maritmeri i mas soim wanem pasin long narapela narapela?

⁵ Tupela poroman marit i mas soim pasin laikim na pasin rispek long narapela narapela. (Ritim Efesus 5:33.) Baibel i tok yumi mas tingting moa long givim ol samting, na i no long kisim ol samting. (Apo. 20:35) Wanem pasin bai helpim ol marit long soim pasin laikim na pasin rispek? Em pasin daun. Sapos maritman na maritmeri i gat pasin daun, ol bai “tingim ol samting bilong helpim narapela,” na ol i no inap tingting long ol samting bilong helpim ol yet.—1 Kor. 10:24.

 6. Yu kisim wanem skul long toktok bilong Steven na Stephanie?

⁶ Pasin daun i helpim planti Kristen long stap amamas tru insait long marit bilong ol. Wanpela maritman, nem bilong em Steven, em i tok: “Sapos yutupela i stap olsem wanpela tim, yutupela bai wok bung wantaim, na moa yet taim hevi i kamap. Yu no inap tingting olsem, ‘wanem samting bai helpim mi?’ nogat, yu bai tingting olsem, ‘wanem samting bai helpim mitupela?’” Meri bilong em, Stephanie, em i holim wankain tingting. Em i tok: “I no gat man i laik stap wantaim poroman husat i save tok pait long olgeta taim. Taim wanpela hevi i kamap, mipela i save traim long painimaut long wanem samting i kamapim dispela hevi. Mipela i save beten, mekim wok painimaut, na toktok long rot bilong stretim hevi. Mipela i save mekim ol samting bilong stretim hevi, na i no long birua long narapela narapela.” Ol marit bai stap amamas moa sapos ol i tingim gut poroman marit na ol i abrusim pasin bilong tingim ol yet tasol.

 7. Sapos wanpela brata i kisim wanpela asainmen, em i mas holim wanem tingting?

⁷ Em gutpela blesing tru long yumi inap mekim wok bilong Jehova long olgeta kain rot. (Sng. 27:4; 84:10) Sapos wanpela brata i mekim sampela senis na em i stap fri long mekim wanpela asainmen, dispela em gutpela pasin tru. Baibel i tok: “Sapos wanpela man i laik kamap wasman, em i laik kisim gutpela wok.” (1 Tim. 3:1) Tasol taim em i kisim wanpela asainmen, em i no ken ting olsem em i gutpela moa winim ol narapela, nogat. (Luk 17:7-10) Em i mas tingting tasol long daunim em yet na mekim wok bilong helpim ol narapela.—2 Kor. 12:15.

 8. Yumi kisim wanem skul long eksampel bilong Diotrefes, Usia, na Apsalom?

⁸ Baibel i gat stori bilong ol manmeri husat i bin tingim ol yet tasol. Diotrefes i kisim pasin antap na em i save laik i stap “nambawan” insait long kongrigesen. (3 Jon 9) Usia i kisim pasin antap na em i laik mekim wanpela wok we Jehova i no makim em long mekim. (2 Sto. 26:16-21) Apsalom i laik bai ol manmeri i amamas long em bikos em i laik kamap king. (2 Sml. 15:2-6) Olsem ol dispela stori bilong Baibel i kamapim, Jehova i no amamas long ol manmeri husat i laik kirapim ol narapela long givim biknem long ol. (Prov. 25:27) Bihain, hevi bai painim ol manmeri husat i bihainim pasin antap na ol i laik kisim biknem.—Prov. 16:18.

 9. Jisas i soim wanem kain eksampel?

⁹ Skelim eksampel bilong Jisas; “maski em i stap olsem God, em i no tingting liklik long kisim namba, olsem em i mas i gat wankain namba olsem God.” (Fili. 2:6) Jisas i gat bikpela strong na em i stap nambatu long Jehova, tasol em i no tingim em yet olsem em i nambawan tru. Em i tokim ol disaipel: “Man i save daunim em yet namel long yupela, dispela man em i nambawan.” (Luk 9:48) Em gutpela blesing tru long wok wantaim ol painia, ol kongrigesen sevan, ol elda, na ol wasman sekit husat i bihainim pasin bilong Jisas na soim pasin daun! Taim yumi bihainim pasin daun na mekim wok bilong Jehova, yumi strongim pasin laikim insait long oganaisesen bilong God.—Jon 13:35.

10. Yu mas mekim wanem sapos i gat ol hevi insait long kongrigesen na yu pilim olsem ol elda i no stretim ol dispela hevi?

¹⁰ Yu mas mekim wanem sapos i gat ol hevi insait long kongrigesen na yu pilim olsem ol elda i no stretim ol dispela hevi? No ken komplein; mobeta yu bihainim pasin daun na sapotim wok bilong ol elda. (Hib. 13:17) Yu ken askim yu yet olsem: ‘Tru tru ol dispela hevi em bikpela tru na i gat nid long stretim? Nau em rait taim long stretim ol dispela hevi? Em wok bilong mi long stretim ol dispela hevi? Tru tru mi laik strongim pasin wanbel, o mi laik apim nem bilong mi yet?’

11. Olsem Efesus 4:2, 3 i kamapim, wanem ol gutpela samting bai kamap taim yumi daunim yumi yet na mekim wok bilong Jehova?

¹¹ Maski yumi gat save, Jehova i laik bai yumi bihainim pasin daun, na maski yumi inap mekim planti wok, em i laik bai yumi gat pasin wanbel. Olsem na yu mas bihainim pasin daun taim yu mekim wok bilong Jehova. Taim yu mekim olsem, yu bai strongim pasin wanbel insait long kongrigesen. (Ritim Efesus 4:2, 3.) Yu mas givim bel tru long autim tok. Painim rot bilong mekim olgeta kain samting bilong helpim ol narapela. Mekim gut long olgeta lain, na mekim gut tu long ol lain i no holim wok insait long kongrigesen. (Mat. 6:1-4; Luk 14:12-14) Taim yu daunim yu yet na yu wok bung wantaim kongrigesen, ol narapela bai lukim olsem yu gat save long mekim wok, na ol bai luksave tu olsem yu gat pasin daun.

12. Baibel i tok wanem long sait bilong ol poroman? Eksplenim.

¹² Jehova i laik bai yumi amamas long bung wantaim ol pren na ol wanfamili. (Sng. 133:1) Jisas i gat ol gutpela pren. (Jon 15:15) Baibel i stori long ol gutpela samting inap kamap sapos yumi gat ol gutpela pren. (Prov. 17:17; 18:24) Na Baibel i tok i no gutpela long yumi stap yumi yet. (Prov. 18:1) Planti manmeri i pilim olsem fon na Intenet em rot bilong kisim planti pren na man i no inap pilim olsem em i stap wanpis. Tasol yumi mas lukaut taim yumi yusim fon na Intenet.

13. Taim ol manmeri i lukim ol piksa long fon na Intenet, wai na ol i save pilim olsem ol i stap wanpis na ol i bel hevi?

¹³ Ol ripot i soim olsem taim ol manmeri i lusim bikpela haptaim long lukim ol piksa long fon na Intenet, dispela i save mekim ol i pilim olsem ol i stap wanpis na ol i bel hevi. Wai? Wanpela risen em olsem, ol narapela i save putim ol piksa i soim ol bikpela samting i bin kamap long laip bilong ol, na ol naispela piksa bilong ol yet, ol pren bilong ol, na ol naispela ples ol i go raun long en. Taim man i lukim ol dispela piksa, em inap pilim olsem laip bilong em yet i no gat amamas na i no gat wanpela spesel samting long en. Wanpela sista i gat 19 krismas i tok: “Mi stat long bel hevi taim mi lukim olsem ol narapela i kisim amamas long wiken, na mi stap tasol long haus na pilim skin les.”

14. Olsem wanem tok bilong Baibel long 1 Pita 3:8 inap helpim yumi long sait bilong yusim fon na Intenet?

¹⁴ Em tru olsem yumi inap yusim fon na Intenet long mekim gutpela samting—yumi inap stori wantaim ol wanfamili na ol pren. Tasol ating yu luksave olsem sampela manmeri i save putim ol piksa long fon na Intenet bikos ol i laik kirapim ol narapela long laikim ol, a? I olsem ol i laik tok, “Lukim mi.” Sampela manmeri i save raitim ol tok nogut long poto bilong ol yet o long ol poto bilong ol narapela lain. Dispela i no stret long ol Kristen bikos Baibel i kirapim yumi long bihainim pasin daun na pilim hevi bilong ol narapela.—Ritim 1 Pita 3:8.

15. Olsem wanem Baibel inap helpim yumi long abrusim pasin bilong graun long apim nem bilong yumi yet?

¹⁵ Sapos yu save yusim fon na Intenet, orait askim yu yet: ‘Nogut ol toktok, poto, na vidio mi putim i kirapim ol narapela long kisim tingting olsem mi gat pasin hambak? Nogut mi mekim ol narapela i jeles?’ Baibel i tok: “Olgeta samting bilong dispela graun, olsem laik nogut bilong bel na pasin bilong aigris na pasin bilong hambak long mani kago, ol i no kam long Papa, nogat, ol i kam long dispela graun.” (1 Jon 2:16) Wanpela Baibel i trensletim dispela hap tok “hambak long mani kago” olsem “laik bilong kisim biknem.” Ol Kristen i no tingting long apim nem bilong ol yet. Ol i bihainim stiatok bilong Baibel: “Yumi no ken hambak, na yumi no ken kirapim pasin bilong resis wantaim ol arapela, na no ken bel nogut long ol arapela.” (Gal. 5:26) Pasin daun bai lukautim yumi na yumi no inap bihainim pasin bilong graun long apim nem bilong yumi yet.

16. Wai na yumi no ken kisim pasin antap?

¹⁶ Yumi mas kisim pasin daun bikos ol manmeri i gat pasin antap, ol i no gat “gutpela tingting.” (Rom 12:3) Ol manmeri i gat pasin antap, ol i save tok pait na mekim pasin bikhet. Tingting na pasin bilong ol i save givim pen long ol yet na long ol narapela. Sapos ol i no holim gutpela tingting, Satan inap pasim tingting bilong ol na bagarapim ol. (2 Kor. 4:4; 11:3) Tasol man i gat pasin daun, em i gat gutpela tingting. Em i save holim stretpela tingting long em yet, na em i luksave olsem ol narapela i gutpela moa na winim em long planti samting. (Fili. 2:3) Na em i save olsem “God i save sakim ol man i mekim pasin antap. Tasol em i save kamapim bikpela pasin helpim long ol man i gat pasin daun.” (1 Pita 5:5) Ol manmeri i gat gutpela tingting, ol i no laik bai ol i stap olsem birua bilong Jehova.

17. Yumi mas mekim wanem na bai yumi inap bihainim yet pasin daun?

¹⁷ Sapos yumi laik bihainim yet pasin daun, orait yumi mas bihainim tok bilong Baibel na “rausim olpela pasin wantaim ol samting [yumi] bin mekim bipo, na [yumi] mas werim nupela pasin olsem [yumi] werim klos.” Dispela i makim olsem yumi mas wok hat. Yumi mas stadi long eksampel bilong Jisas na traim bes tru long bihainim pasin bilong em. (Kol. 3:9, 10; 1 Pita 2:21) Dispela bai helpim tru yumi. Taim yumi kisim pasin daun, famili bilong yumi bai stap amamas moa, yumi bai strongim pasin wanbel insait long kongrigesen, na yumi no inap yusim Intenet long rong wei. Na moa yet, yumi bai kisim blesing i kam long Jehova na em bai wanbel long yumi.