Genesa
6 Loko nhlayo ya vanhu yi sungula ku andza ehenhla ka vuandlalo bya misava naswona va velekeriwe vana va vanhwanyana,+ 2 kutani vana va Xikwembu+ xa ntiyiso va sungula ku vona+ leswaku vana va vanhwanyana va vanhu va sasekile; hiloko va ya teka vasati eka vona, ku nga hinkwavo lava va va hlawuleke. 3 Endzhaku ka sweswo Yehovha a ku: “Moya+ wa mina a wu nge he tirhi hilaha ku nga heriki+ eka munhu hikuva na yena i nyama.+ Hikwalaho masiku yakwe ma ta va malembe+ ya 120.”
4 Emasikwini wolawo a ku ri ni Manefilimi emisaveni, ni le ndzhaku ka sweswo, loko vana va Xikwembu xa ntiyiso va tivane ni vana va vanhu kutani va va tswalela vana, a ku ri khale va ri kona naswona va ri ni matimba, va ri vavanuna va ndhuma.
5 Kutani Yehovha a vona leswaku vubihi bya munhu byi andzile emisaveni nileswaku mboyamelo+ hinkwawo wa miehleketo ya mbilu yakwe wu bihile nkarhi hinkwawo.+ 6 Yehovha a tisola+ leswi a endleke vanhu emisaveni, kutani a vaviseka embilwini+ yakwe. 7 Hikokwalaho Yehovha a ku: “Ndzi ta herisa vanhu lava ndzi va tumbuluxeke+ ehenhla ka vuandlalo bya misava, ku sukela eka munhu ku ya eka swifuwo, ni ku ya eka swiharhi leswi famba-fambaka ni swivumbiwa leswi hahaka swa matilo,+ hikuva ndza tisola leswi ndzi endleke swilo leswi.”+ 8 Kambe Nowa a kuma tintswalo ematihlweni ya Yehovha.
9 Lawa i matimu ya Nowa.
Nowa a a ri munhu+ wo lulama. U tikombise a pfumala xihoxo exikarhi ka lava a a hanya swin’we na vona. Nowa a a famba ni Xikwembu+ xa ntiyiso. 10 Hi ku famba ka nkarhi Nowa a va tata wa vana vanharhu, Xeme, Hamu na Yafeta.+ 11 Kutani misava yi onhaka emahlweni ka Xikwembu+ xa ntiyiso, misava yi tala madzolonga.+ 12 Hikwalaho Xikwembu xi languta misava, kutani waswivo, a yi onhakile,+ hikuva nyama hinkwayo a yi onhe ndlela ya yona emisaveni.+
13 Endzhaku ka sweswo Xikwembu xi ku eka Nowa: “Makumu ya nyama hinkwayo ma fikile emahlweni ka mina,+ hikuva misava yi tale madzolonga hikwalaho ka vona; sweswi ndzi ta va lovisa swin’we ni misava.+ 14 Tiendlele ngalava hi ntsandza wa murhi wa nhlaka.+ U ta endla makamara endzeni ka ngalava, naswona u ta yi funengeta endzeni ni le handle hi xikontiri.+ 15 U ta yi endla hi ndlela leyi: ku leha ka ngalava ku ta va swisungunu+ swa 300, ku anama ka yona ku va swisungunu swa 50 ni ku tlakuka ka yona ku va swisungunu swa 30. 16 U ta endlela ngalava tsohari [lwangu; kumbe fasitere] naswona u ta yi endla yi ringana xisungunu xin’we ku ya ehenhla, nyangwa ya ngalava u ta yi endla etlhelo+ ka yona; u ta yi endla yi va ni xithezi xa le hansi ni xithezi xa vumbirhi ni xithezi xa vunharhu.
17 “Loko ku ri mina, ndzi tisa ndhambi+ ya mati ehenhla ka misava leswaku yi lovisa nyama hinkwayo ehansi ka matilo, leyi nga ni matimba ya vutomi+ eka yona. Hinkwaswo leswi nga emisaveni swi ta lova.+ 18 Ndzi simeka ntwanano wa mina na wena; u ta nghena engalaveni, wena ni vana va wena ni nsati wa wena ni vasati va vana va wena lava nga na wena.+ 19 Kutani eka xivumbiwa xin’wana ni xin’wana lexi hanyaka xa muxaka wun’wana ni wun’wana wa nyama,+ u ta tisa swimbirhi engalaveni leswaku u swi londzovota swi hanya na wena.+ Swi ta va xa xinuna ni xa xisati. 20 Swivumbiwa leswi hahaka hi ku ya hi mixaka ya swona ni swifuwo hi ku ya hi mixaka ya swona, eka swiharhi hinkwaswo leswi famba-fambaka swa misava hi ku ya hi mixaka+ ya swona, ku ta nghena swimbirhi swa swona na wena, leswaku u swi londzovota swi hanya.+ 21 Loko ku ri wena, teka mixaka hinkwayo ya swakudya leswi dyiwaka;+ u swi hlengeleta swi va swakudya swa wena ni swa swona.”+
22 Kutani Nowa a endla hinkwaswo hilaha Xikwembu xi n’wi leriseke hakona. U endle tano.+