1 Tihosi
7 Solomoni u hete malembe ya 13+ a aka yindlu yakwe, kutani a heta yindlu yakwe hinkwayo.+
2 Hiloko a aka yindlu ya Khwati ra Lebanoni+ ehenhla ka tilayini ta mune ta tiphuphu ta timhandzi ta mukedari, yi leha swisungunu swa 100, yi anama swisungunu swa 50 kasi yi tlakuka swisungunu swa 30; ehenhla ka tiphuphu a ku ri ni timhandzi+ ta mukedari. 3 A yi fuleriwe hi timhandzi ta mukedari+ ehenhla ka tinsika leti a ti ri ehenhla ka tiphuphu ta 45. A ti ri 15 eka layini yin’we. 4 Loko ku ri mafasitere lama nga ni marimba, a ma ri tilayini tinharhu, a ku ri ni mbhovo lowu nghenisaka ku vonakala+ lowu langutaneke ni mbhovo wun’wana lowu nghenisaka ku vonakala, ku ri tilayini tinharhu. 5 Tinyangwa hinkwato ni marimba a swi ri ni matlhelo ya mune lama ringanaka ni rimba,+ naswona xiphemu xa le mahlweni xa mbhovo lowu nghenisaka ku vonakala lowu langutaneke ni mbhovo wun’wana lowu nghenisaka ku vonakala ku ri minxanxamelo yinharhu.
6 Tiphuphu ta Rikupakupa u ti endle ti leha swisungunu swa 50, ni ku anama ka swisungunu swa 30; rikupakupa rin’wana a ri ri emahlweni ka tona, ri ri ni tiphuphu ni xiangamelo emahlweni ka tona.
7 Loko ku ri Rikupakupa ra Xiluvelo+ laha a a ta avanyisela kona, a endla rikupakupa ra ku avanyisela eka rona;+ va ri funengete hi timhandzi ta mukedari ku suka ehansi ku ya etimhandzini ta lwangu.+
8 Loko ku ri yindlu yakwe leyi a a ta tshama eka yona, exivaveni lexin’wana,+ a yi ri ekule ni yindlu ya Rikupakupa. Hi yona ndlela leyi a yi akiwe ha yona. Kutani a ku ri ni yindlu leyi a yi fana ni Rikupakupa, leyi a yi akeleke n’wana+ wa Faro loyi Solomoni a a n’wi tekile.
9 Hinkwaswo leswi a swi endliwe hi maribye yo durha+ hi ku landza ku pimiwa ka wona, lawa a ma vatliwile, ma sahiwe hi tisaha ta maribye, endzeni ni le handle ni ku suka emasungulweni ku ya eka xifunengeto xa khumbi, ni le handle ku ya fika eka xivava lexikulu.+ 10 Maribye yo durha lawa ma vekiweke ma va masungulo, a ma ri maribye lamakulu, maribye ya swisungunu swa khume ni maribye ya swisungunu swa nhungu. 11 Kutani ehenhla a ku ri ni maribye yo durha hi ku landza ku pimiwa ka wona, lawa a ma vatliwile, swin’we ni timhandzi ta mukedari. 12 Loko ku ri xivava lexikulu, a xi rhendzeriwe hi tilayini tinharhu+ ta maribye lama vatliweke ni layini ya timhandzi ta mukedari; leswi nakambe a swi ri exivaveni xa le mpfungwe+ xa yindlu+ ya Yehovha ni le rikupakupeni+ ra yindlu.
13 Hosi Solomoni a rhumela rito leswaku ku landziwa Hiramu+ eTiri. 14 Yena a a ri n’wana wa wansati la nga noni la humaka enyimbeni ya Neftali, tata wakwe a ku ri wanuna wa Mutiri,+ la tirhaka hi koporo;+ a a ri ni vutlhari byo tala ni ku twisisa+ ni vutivi bya ku endla ntirho wun’wana ni wun’wana wa koporo. Hiloko a fika eka Hosi Solomoni, a sungula ku endla ntirho wakwe.
15 Kutani a vumba tiphuphu timbirhi ta koporo,+ phuphu ha yin’we yi tlakuke swisungunu swa 18, kutani ngoti ya swisungunu swa 12 a yi pima yin’wana ni yin’wana ya tiphuphu leti timbirhi,+ yi ti rhendzela. 16 A endla swidlodlo swimbirhi swa tiphuphu leswaku a swi veka ehenhla ka tiphuphu leti, ti vumbiwe hi koporo.+ Xidlodlo xin’wana xa phuphu a xi tlakuke swisungunu swa ntlhanu kasi xidlodlo lexin’wana xa phuphu a xi tlakuke swisungunu swa ntlhanu. 17 A ku ri ni tinkoka leti lukiweke, swin’wetsin’wetsi leswi lukiweke hi mukhaviso wa tinketana,+ swi ri swa swidlodlo swa tiphuphu leswi a swi ri ehenhla ka tiphuphu;+ nkombo wa swona swi ri swa xidlodlo xin’we xa phuphu kasi nkombo wa swona swi ri swa xidlodlo lexin’wana xa phuphu. 18 A ya emahlweni a endla magrenada ni tilayini timbirhi ti rhendzela ehenhla ka rikoka rin’we, leswaku swi funengeta swidlodlo swa tiphuphu leswi a swi ri ehenhla ka tiphuphu; leswi hi swona a swi endleke eka xidlodlo xa phuphu leyin’wana.+ 19 Kutani swidlodlo swa tiphuphu leswi a swi ri ehenhla ka tiphuphu, erikupakupeni a swi endliwe ku fana ni khon’wa,+ swi ri swisungunu swa mune. 20 Swidlodlo swa tiphuphu a swi ri ehenhla ka tiphuphu leti timbirhi, swi ri ekusuhi swinene ni laha ku endliweke ku kukumuka ku khumba rikoka; a ku ri ni magrenada ya 200+ lawa ma endleke tilayini ematlhelo hinkwawo, ehenhla ka xidlodlo xin’wana ni xin’wana.
21 Kutani a yimisa tiphuphu+ ta rikupakupa+ ra tempele. A yimisa phuphu ya le xineneni, a yi thya vito ra Yakini naswona a yimisa phuphu ya le ximatsini, a yi thya vito ra Bowasi. 22 Ehenhla ka tiphuphu a ku ri ni leswi endliweke ku fana ni makhon’wa. Ntirho wa tiphuphu wu hetiwile hakatsongo-tsongo.
23 Hiloko a vumba lwandle+ leri endliweke hi ku n’okisiwa, ri va swisungunu swa khume ku suka emakumu man’wana ya rona ku ya emakumu laman’wana ya rona, ri ri xirhendzevutana matlhelo hinkwawo; ku tlakuka ka rona a ku ri swisungunu swa ntlhanu, a ri rhendzeriwe hi ngoti ya swisungunu swa 30 matlhelo hinkwawo.+ 24 A ku ri ni swin’wetsin’wetsi+ swa xivumbeko xa rhanga+ ehansi ka nomu wa rona matlhelo hinkwawo, swi ri rhendzela, swi ri khume eka xisungunu, swi rhendzela+ lwandle matlhelo hinkwawo hi tilayini timbirhi ta swin’wetsin’wetsi swa xivumbeko xa rhanga leswi nga eswivumbelweni swa swona. 25 A ri yime ehenhla ka tinkunzi ta 12,+ tinharhu ti langute en’walungwini, tinharhu ti langute evupela-dyambu, tinharhu ti langute edzongeni, tinharhu ti langute evuxeni; lwandle a ri ri ehenhla ka tona, swisuti swa tona hinkwaswo a swi ri endzeni.+ 26 Ku bumbula ka rona a ku ri ku anama ka voko;+ nomu wa rona a wu fana ni leswi nomu wa xinwelo wu endlisiweke xiswona, ku fana ni xiluva xa khon’wa.+ A ri tamela+ mimpimo ya tibati ta 2 000.+
27 A ya emahlweni a endla makalichi ya koporo ya khume,+ kalichi yin’wana ni yin’wana a yi lehe swisungunu swa mune, yi aname swisungunu swa mune kasi yi tlakuke swisungunu swinharhu. 28 Leyi a ku ri ndlela leyi makalichi a ma endliwe ha yona: a ma ri ni swisirhelelo swa le matlhelo, swisirhelelo swa le matlhelo a swi ri exikarhi ka timhandzi leti hingakanyaka. 29 Ehenhla ka swisirhelelo swa le matlhelo leswi a swi ri exikarhi ka timhandzi leti hingakanyaka a ku ri ni tinghala,+ tinkunzi,+ makerubu,+ hi yona ndlela leyi a swi ri ha yona ehenhla ka timhandzi leti hingakanyaka. A ku ri ni tiharhi+ leti lengalengaka ehenhla ni le hansi ka tinghala ni tinkunzi. 30 Kalichi rin’wana ni rin’wana a ri ri ni mavhilwa ya mune ya koporo, ri ri ni tiansi ta koporo; tinhla ta rona ta mune a ti ri swiseketelo swa wona. Etshakwini ra xihlambelo lexi a ku ri ni swiseketelo, swi vumbiwe hi tiharhi swi hingakanyana. 31 Kutani nomu wa rona ku suka endzeni ku ya eswiseketelweni ni ku ya ehenhla a ku ri swisungunu swa [?]; nomu wa rona a wu ri xirhendzevutana, ndlela leyi xiangamo xa xisungunu xin’we ni hafu xi endliwaka ha yona, naswona enon’wini wa rona a ku ri ni swifaniso leswi vatliweke. Swisirhelelo swa le matlhelo a swi ri tinhla ta mune leti ringanaka, a swi nga ri xirhendzevutana. 32 Mavhilwa ya mune a ma ri ehansi ka swisirhelelo swa le matlhelo naswona swiseketelo swa mavhilwa a swi ri ekalichini; ku tlakuka ka vhilwa rin’wana ni rin’wana a ku ri xisungunu xin’we ni hafu. 33 Ndlela leyi mavhilwa a ma endliwe ha yona a ma fana ni ndlela leyi vhilwa+ ra kalichi ri endliwaka ha yona. Swiseketelo swa wona ni makumu ya wona ni swipoko swa wona ni xiphemu xa le xikarhi xa wona, a swi vumbiwile hinkwaswo. 34 A ku ri ni swiseketelo swa mune etinhleni ta mune ta kalichi yin’wana ni yin’wana; swiseketelo swa tona a swi endliwe hi nchumu wun’we ni kalichi leyi. 35 Ehenhla ka kalichi a ku ri ni xiangamo, xi tlakuke hafu ya xisungunu, xi ri xirhendzevutana matlhelo hinkwawo; ehenhla ka kalichi, matlhelo ya rona ni swisirhelelo swa le matlhelo a swi endliwe hi nchumu wun’we na rona. 36 Nakambe, u kovotle+ makerubu, tinghala ni swifaniso swa murhi wa ncindzu hi ku ya hi ndhawu leyi nga kona eka xin’wana ni xin’wana xa swona, ni tiharhi ematlhelo hinkwawo, eswiphepherheleni swa le matlhelo ya rona ni le ka swisirhelelo swa le matlhelo.+ 37 Makalichi ya khume+ u ma endle hi ndlela leyi; hinkwawo a ma vumbiwe hi ndlela yin’we,+ hi mpimo wun’we ni hi xivumbeko xin’we.
38 Kutani a endla swihlambelo swa khume+ swa koporo. Xihlambelo xin’we a xi tamela mpimo wa tibati ta 40. Xihlambelo xin’we a xi ri swisungunu swa mune. A ku ri ni xihlambelo xin’we ehenhla ka kalichi yin’we ya makalichi lawa ya khume. 39 Hiloko a veka makalichi ya ntlhanu etlhelweni ra xinene ra yindlu, ni ya ntlhanu etlhelweni ra ximatsi ra yindlu;+ lwandle a ri veka etlhelweni ra xinene ra yindlu hi le vuxeni, ku ya edzongeni.+
40 Hakatsongo-tsongo Hiramu+ a endla swihlambelo+ ni mafoxolo+ ni minkambana.+ Hi ku famba ka nkarhi Hiramu a heta+ ku endla ntirho hinkwawo lowu a wu endleleke Hosi Solomoni malunghana ni yindlu ya Yehovha: 41 Tiphuphu timbirhi+ ni swidlodlo swa tiphuphu leswi vumbekeke ku fana ni nkambana,+ leswi a swi ri ehenhla ka tiphuphu timbirhi, ni tinkoka timbirhi+ ta ku funengeta swidlodlo swimbirhi swa tiphuphu ta xirhendzevutana leti a ti ri ehenhla ka tiphuphu, 42 ni tigrenada ta 400+ ta tinkoka, tilayini timbirhi ta tigrenada eka rikoka ha rin’we, ta ku funengeta swidlodlo swimbirhi swa tiphuphu leswi vumbekeke ku fana ni nkambana, leswi a swi ri ehenhla ka tiphuphu timbirhi; 43 ni makalichi ya khume+ ni swihlambelo+ swa khume ehenhla ka makalichi, 44 ni lwandle+ rin’we ni tinkunzi ta 12 ehansi ka lwandle;+ 45 ni swiolelo ni mafoxolo ni minkambana ni swingolongondzwana leswi hinkwaswo,+ leswi Hiramu a swi endleleke Hosi Solomoni, a swi endlela yindlu ya Yehovha hi koporo leyi hatimisiweke. 46 Hosi yi swi vumbele eMugangeni wa Yordani+ hi foromo ya vumba, exikarhi ka Sukoti+ na Saretana.+
47 Kutani Solomoni a tshika swingolongondzwana+ leswi hinkwaswo swi nga pimiwanga hikwalaho ka leswi a swi tele ngopfu.+ Ntiko wa koporo a wu nga tiveki.+ 48 Hakatsongo-tsongo Solomoni a endla swingolongondzwana hinkwaswo leswi swi nga swa yindlu ya Yehovha, alitari+ ya nsuku ni tafula+ ra nsuku, leri a ri ri ra xinkwa xa nkombiso, 49 ni swo tlhoma timboni+ swa nsuku wo tenga,+ ntlhanu wa swona etlhelweni ra xinene ni ntlhanu wa swona etlhelweni ra ximatsi emahlweni ka kamara ra le ndzeni-ndzeni, ni swiluva+ ni timboni+ ni swo tamela ngoti ya rivoni+ swa nsuku, 50 ni swihlambelo ni swo tima timboni+ ni minkambana+ ni swinwelo+ ni swo tamela ndzilo,+ swa nsuku wo tenga, ni swiangarhelo swa tinyangwa+ ta yindlu ya le mpfungwe, ku nga Ndhawu yo Kwetsima Ngopfu, ni swa tinyangwa+ ta yindlu ya tempele,+ swa nsuku.
51 Eku heteleleni ntirho hinkwawo lowu Hosi Solomoni a a fanele a wu endla malunghana ni yindlu ya Yehovha, wu hela;+ kutani Solomoni a sungula ku nghenisa swilo leswi Davhida tata wakwe a swi endleke swi kwetsima;+ silivhere ni nsuku ni swilo swin’wana, a swi veka exumeni xa yindlu ya Yehovha.+