Eksoda
1 Lawa i mavito ya vana va Israyele lava va teke aEgipta na Yakobe; wanuna un’wana ni un’wana u te ni vandyangu wa yena:+ 2 I Ruveni,+ Simiyoni,+ Levhi+ na Yuda,+ 3 Isakara,+ Zebuloni+ na Benjamini,+ 4 Dani+ na Neftali,+ Gadi+ na Axere.+ 5 Mimoya-xiviri hinkwayo leyi humeke emasengeni+ ya Yakobe a yi ri mimoya-xiviri ya 70, kambe Yosefa ana se a a ri aEgipta.+ 6 Eku heteleleni Yosefa a fa,+ ni vamakwavo hinkwavo ni xitukulwana xexo hinkwaxo. 7 Vana va Israyele va tswalana kutani va sungula ku tala; va hambeta va andza naswona va va ni matimba hi mpimo lowukulu ngopfu lerova va tala+ etikweni.
8 Hi ku famba ka nkarhi ku humelela hosi leyintshwa aEgipta leyi a yi nga n’wi tivi Yosefa.+ 9 Yi byela vanhu va yona yi ku: “Maswivo! Vanhu va vana va Israyele va tele ngopfu naswona va ni matimba ku hi tlula.+ 10 Tanani! A hi va tlhariheleni,+ hikuva va nga tshuka va andza, kutani loko ho weriwa hi nyimpi, kunene va ta engetela lava va hi vengaka va lwa na hina kutani va tlhandluka va huma etikweni.”
11 Hikwalaho va va vekela varhangeri va ntirho wo sindzisiwa hi xikongomelo xa ku va tshikilela emintirhweni ya vona yo nonon’hwa+ leyi a va yi endla; kutani va aka miti yi va tindhawu ta vuhlayiselo ta Faro, ku nga Pitomu na Ramsese.+ 12 Kambe loko va va tshikilela ngopfu, a va ya va andza ngopfu ni ku hangalaka hinkwako-nkwako, lerova va va ni ku chava lokukulu hikwalaho ka vana va Israyele.+ 13 Hikwalaho Vaegipta va tirhisa vana va Israyele hi tihanyi.+ 14 Va hambeta va va tikisela vutomi hi vuhlonga byo nonon’hwa, va va pfuvisa+ vumba byo aka ni ku baka switina ni muxaka wun’wana ni wun’wana wa vuhlonga emasin’wini,+ ina, muxaka wun’wana ni wun’wana wa vuhlonga bya vona lowu ha wona va va endleke mahlonga hi tihanyi.+
15 Endzhaku hosi ya Egipta yi byela tisungukati+ ta Vaheveru, vito ra yin’wana a ku ri Xifira kasi vito ra leyin’wana a ku ri Puwa, 16 ina, yi tlhele yi ku: “Loko mi pfuna vavasati va Vaheveru ku veleka kutani mi va vona va ri exitulwini xo velekela eka xona, loko ku ri n’wana wa jaha mi fanele mi n’wi dlaya; kambe loko ku ri n’wana wa nhwanyana u fanele a hanya.” 17 Hambiswiritano, tisungukati a ti chava Xikwembu+ xa ntiyiso, a ti endlanga hilaha hosi ya Egipta yi ti byeleke hakona,+ kambe a ti londzovota vana vaxinuna va hanya.+ 18 Hi ku famba ka nkarhi hosi ya Egipta yi vitana tisungukati yi ku eka tona: “Ha yini mi endle nchumu lowu, hikuva mi londzovote vana vaxinuna va hanya?”+ 19 Hiloko tisungukati ti ku eka Faro: “Hikuva vavasati va Vaheveru a va fani ni vavasati va Vaegipta. Hikuva va tiyerile, va veleka sungukati yi nga si fika eka vona.”
20 Hikwalaho Xikwembu xi tirhisana kahle ni tisungukati;+ vanhu lava va ya va tala naswona va va ni matimba ngopfu. 21 Kutani leswi tisungukati ti chaveke Xikwembu xa ntiyiso, endzhakunyana xi ti nyika mindyangu.+ 22 Eku heteleleni Faro a lerisa vanhu vakwe hinkwavo a ku: “N’wana un’wana ni un’wana wa jaha loyi a ha ku velekiwaka mi ta n’wi lahlela enambyeni wa Nayili, kambe n’wana un’wana ni un’wana wa nhwanyana mi ta n’wi londzovota a hanya.”+