Luka

5 Hi nkarhi lowu ntshungu a wu kamanyetanela eka yena ni ku yingisa rito ra Xikwembu, a a yime etlhelo ka tiva ra Genesareta.+ 2 Kutani a vona mabyatso mambirhi ma yimisiwe eribuweni ra tiva, kambe vaphasi va tinhlampfi a va humile eka wona naswona a va hlantswa tinkoka ta vona.+ 3 Loko a khandziya rin’wana ra mabyatso ya kona, leri a ri ri ra Simoni, a n’wi kombela leswaku a tlhentlhanyana eribuweni. Kutani a tshama ehansi, a sungula ku dyondzisa mintshungu a ri ebyatsweni.+ 4 Loko a heta ku vulavula, a byela Simoni a ku: “Yana laha ku enteke, kutani n’wina petani tinkoka+ ta n’wina leswaku mi ta phasa.” 5 Kambe Simoni a angula a ku: “Muleteri, hi tirhe hi matimba vusiku hinkwabyo kambe a hi phasanga nchumu,+ kambe hi ku lerisa ka wena ndzi ta peta tinkoka.” 6 Xisweswo, loko va endla leswi, va phase tinhlampfi to tala ngopfu. Entiyisweni, tinkoka ta vona ti sungula ku handzuka hi le xikarhi. 7 Kutani va koweta vaphasi-kulobye lava nga le byatsweni lebyin’wana leswaku va ta va pfuna;+ ivi va ta, kutani va tata mabyatso hamambirhi, lerova ma sungula ku mbombomela. 8 Hi ku vona leswi, Simoni Petro+ a wela hansi ematsolweni ya Yesu, a ku: “Suka eka mina, hikuva ndzi munhu wa vudyoho, Hosi.”+ 9 Hikuva yena ni hinkwavo lava a va ri na yena va hlamarisiwe ngopfu hi tinhlampfi leti va ti phaseke, 10 na Yakobo na Yohane, vana va Zebediya,+ lava a va phasa swin’we na Simoni. Kambe Yesu a byela Simoni a ku: “Tshika ku chava. Ku sukela sweswi u ta phasa vanhu va ri karhi va hanya.”+ 11 Kutani va vuyisela mabyatso eribuweni, ivi va tshika hinkwaswo, va n’wi landzela.+

12 Siku rin’wana loko a ri emutini wo karhi, waswivo, ku humelela wanuna loyi a teleke nhlokonho! Kuteloko a vona Yesu, hiloko a wa hi xikandza xa yena a n’wi kombela, a ku: “Hosi, loko u swi lava, u nga ndzi basisa.”+ 13 A tshambuluta voko rakwe, a n’wi khumba, a ku: “Ndza swi lava. Basisiwa.” Kutani hi ku hatlisa nhlokonho yi nyamalala eka yena.+ 14 Hiloko a lerisa wanuna loyi leswaku a nga byeli munhu:+ “Kambe famba u ya tikombisa eka muprista,+ u endla gandzelo+ malunghana ni ku basisiwa ka wena, hilaha Muxe a leriseke hakona, leswaku byi va vumbhoni eka vona.”+ 15 Kambe rito leri khumbaka yena a ri hangalaka ngopfu, naswona mintshungu leyikulu a yi hlengeletana swin’we yi ta yingisa ni ku hanyisiwa emavabyini ya yona.+ 16 Hambiswiritano, a hambeta a tshama a ri yexe emakwandzasini, a khongela.+

17 Siku rin’wana loko a ri karhi a dyondzisa, Vafarisi ni vadyondzisi va nawu lava a va huma eka ximutana xin’wana ni xin’wana xa Galeliya, Yudiya na Yerusalema a va tshame kwalaho; naswona a a ri ni matimba ya Yehovha leswaku a horisa ha wona.+ 18 Kutani waswivo, a ku ri ni vavanuna lava a va rhwele munhu hi sangu, loyi a a ome swirho, naswona a va lava ndlela ya ku n’wi nghenisa, va n’wi veka emahlweni ka yena.+ 19 Xisweswo, loko va nga yi kumi ndlela ya ku n’wi nghenisa hikwalaho ka ntshungu, va khandziya ehenhla ka lwangu, kutani va n’wi lengeleta hi le lwangwini ra switina hi sangu leritsongo exikarhi ka lava a va ri emahlweni ka Yesu.+ 20 Kuteloko a vona ripfumelo ra vona a ku: “Nandzuwe, swidyoho swa wena swi rivaleriwile.”+ 21 Hi nkarhi wolowo, vatsari ni Vafarisi va sungula ku kanela, va ku: “Xana i mani loyi a vulavulaka swisandzu?+ Xana i mani loyi a nga rivalelaka swidyoho handle ka Xikwembu ntsena?”+ 22 Kambe Yesu, hi ku xiya ku anakanya ka vona, a va hlamula a ku: “Xana mi anakanya yini etimbilwini ta n’wina?+ 23 Xana hi swihi leswi olovaka swinene, i ku vula u ku, ‘U rivaleriwile swidyoho swa wena,’ kumbe i ku vula u ku, ‘Pfuka u famba’?+ 24 Kambe ku endlela leswaku n’wina mi tiva leswaku N’wana wa munhu u ni mfanelo yo rivalela swidyoho emisaveni—” a byela munhu la omeke swirho a ku: “Ndzi ri eka wena, Pfuka u teka xisangwana xa wena, u khoma ndlela u muka.”+ 25 Kutani hi ku hatlisa a suka a yima emahlweni ka vona, a teka lexi a a hamba a etlela eka xona a famba, a muka, a vangamisa Xikwembu.+ 26 Kutani va tshuka+ hinkwavo, va sungula ku vangamisa Xikwembu, va chava ngopfu, va ku: “Hi vone swilo leswi nga tolovelekangiki namuntlha!”+

27 Endzhaku ka swilo leswi a huma, a vona muluvisi loyi a vuriwaka Levhi a tshame ehofisini ya xibalo, hiloko a ku eka yena: “Vana mulandzeri wa mina.”+ 28 Kutani a siya hinkwaswo+ endzhaku a suka a yima, a n’wi landzela. 29 Kutani, Levhi a endla nkhuvo lowukulu wa ku n’wi amukela endlwini yakwe; a ku ri ni ntshungu lowukulu wa valuvisi ni van’wana lava a va ri na vona va vurhame eswakudyeni.+ 30 Hikwalaho ka leswi Vafarisi ni vatsari va vona, va sungula ku n’unun’uta eka vadyondzisiwa va yena, va ku: “Ha yini mi dya mi tlhela mi nwa ni valuvisi ni vadyohi?”+ 31 Yesu a va angula a ku: “Lava hanyeke a va lavi n’anga,+ kambe yi laviwa hi lava va vabyaka.+ 32 Ndzi tele ku ta vitanela vadyohi eku hundzukeni, ku nga ri vanhu lava lulameke.”+

33 Va ku eka yena: “Vadyondzisiwa va Yohane va titsona swakudya nkarhi na nkarhi naswona va endla swikombelo, ni lava va Vafarisi va endla tano, kambe va wena va dya va tlhela va nwa.”+ 34 Yesu a ku eka vona: “Mi nga ka mi nga endli leswaku vanakulobye va muteki va titsona swakudya loko muteki a ha ri na vona, a swi tano ke?+ 35 Kambe masiku ma ta lawa ha wona muteki+ a nga ta susiwa eka vona;+ kutani va ta titsona swakudya emasikwini wolawo.”+

36 Ku tlula kwalaho, a ya emahlweni a va nyika xifaniso: “A nga kona loyi a tsemaka xitiva engubyeni ya le handle leyintshwa a xi rhungelela engubyeni ya le handle ya khale; kambe loko o xi rhungelela, xitiva lexintshwa xi ta handzuka naswona xitiva xa nguvu leyintshwa a xi nge yi faneli leya khale.+ 37 Ku tlula sweswo, a nga kona loyi a chelaka vhinyo leyintshwa emaguleni ya khale ya vhinyo; kambe loko o yi chela, vhinyo leyintshwa yi ta boxa magula ya vhinyo,+ naswona yi ta halaka kutani magula ya vhinyo ma ta onhaka.+ 38 Kambe vhinyo leyintshwa yi fanele ku cheriwa emaguleni lamantshwa ya vhinyo. 39 A nga kona loyi a nweke vhinyo ya khale loyi a lavaka leyintshwa; hikuva u ri, ‘Leya khale+ ya nandziha.’”