2 Vakorinto

7 Hikokwalaho, leswi hi nga ni switshembiso+ leswi, varhandziwa, a hi tibasiseni+ eka swilo hinkwaswo leswi nyamisaka nyama ni moya,+ hi hetisekisa vukwetsimi hi ku chava+ Xikwembu.

2 Hi pfuleleni ndhawu.+ A hi endlanga munhu leswi hoxeke, a hi onhanga munhu, a hi dyelelanga munhu.+ 3 Leswi a ndzi swi vuleli ku mi vona nandzu. Hikuva ndzi vurile eku sunguleni leswaku mi le timbilwini ta hina leswaku mi fa ni ku hanya na hina.+ 4 Ndzi ni ntshunxeko lowukulu wo vulavula eka n’wina. Ndzi tibuma ngopfu malunghana na n’wina.+ Ndzi tale nchavelelo,+ ndzi khapakhapa ntsako eku xanisekeni+ ka mina hinkwako.

5 Entiyisweni, loko hi fika eMakedoniya,+ nyama ya hina a yi kumanga ku wisa,+ kambe hi ye emahlweni hi xaniseka+ hi tindlela hinkwato—a ku ri ni tinyimpi ehandle, ku ri ni ku chava endzeni. 6 Nilokoswiritano Xikwembu, lexi chavelelaka+ lava tsongahatiweke, xi hi chavelerile hi vukona bya Tito; 7 kambe ku nga ri ntsena hi vukona byakwe, kambe ni hi nchavelelo lowu mi n’wi chaveleleke ha wona, hileswi a tlheleke a hi tisela rito+ ra ku navela ka n’wina, ku kolola ka n’wina, ku ndzi hisekela ka n’wina; lerova ndzi tsake hilaha ku engetelekeke.

8 Hikwalaho, hambiloko ndzi mi hlunamisile hi papila+ ra mina, a ndzi tisoli. Hambiloko ndzi tisorile eku sunguleni, (ndza swi vona leswaku papila leriya ri mi hlunamisile, kambe a swi ri swa nkarhinyana,) 9 sweswi ndza tsaka, ku nga ri ntsena hileswi a mi hlunamile, kambe hileswi a mi hlunamele eku hundzukeni;+ hikuva a mi hlunamisiwe hi ndlela+ ya vukwembu, leswaku mi nga tshuki mi vaviseka hambi ku ri hi yini hikwalaho ka hina. 10 Hikuva ku hlunama hi mukhuva wa vukwembu ku tisa ku hundzukela eku ponisiweni loku mi nga ta ka mi nga tisoli+ hakona; kambe ku hlunama ka misava ku tswala rifu.+ 11 Hikuva maswivo, nchumu lowu, ku hlunamisiwa ka n’wina hi ndlela+ ya vukwembu, ku tswale ku gingiriteka lokukulu ngopfu eka n’wina, ina, ku tibasisa ka n’wina, ina, ku hlundzuka, ina, ku chava, ina, ku navela, ina, ku hiseka, ina, ku lulamisa leswi hoxeke!+ Mi tikombise mi tengile hi tindlela hinkwato emhakeni leyi. 12 Hakunene, hambiloko ndzi mi tsalerile, a ndzi nga mi tsaleli malunghana ni la endleke leswi hoxeke,+ hambi ku ri la hoxeriweke, kambe leswaku ku gingiriteka ka n’wina ha hina ku ta kombisiwa exikarhi ka n’wina emahlweni ka Xikwembu. 13 Hi yona mhaka leyi hi nga chaveleleka.

Hambiswiritano, ku engetela eku chaveleriweni ka hina, hi vuye hi tsaka hilaha ku teleke swinene hikwalaho ka ntsako wa Tito, hikuva moya+ wakwe wu phyuphyisiwe hi n’wina hinkwenu. 14 Hikuva loko ndzi tibume hi ndlela yo karhi eka yena malunghana na n’wina, a ndzi khomisiwanga tingana; kambe leswi hi mi byeleke swilo hinkwaswo hi ntiyiso, kutani ni ku tibuma+ ka hina emahlweni ka Tito ku tikombe ku ri ntiyiso. 15 Nakambe, xinakulobye xakwe lexikulu xa andza swinene eka n’wina, loko a tsundzuka ku yingisa+ ka n’wina hinkwenu, ndlela leyi mi n’wi amukeleke ha yona hi ku chava ni ku rhurhumela. 16 Ndza tsaka leswaku hi tindlela hinkwato ndzi kota ku va ni xivindzi lexi tiyeke hikwalaho ka n’wina.+