Samuwele Wa Vumbirhi

13 Absalomu n’wana wa Davhida a a ri ni makwavo wa xisati wo saseka, vito rakwe a ku ri Tamari+ naswona Aminoni+ n’wana wa Davhida a a n’wi rhandza. 2 Aminoni a swi n’wi karhata swinene lerova a vabya hikwalaho ko rhandza Tamari makwavo, hikuva a a nga si tshama a etlela ni wanuna naswona Aminoni a a swi vona leswaku a ku na lexi a nga xi endlaka hi yena. 3 Hi hala tlhelo Aminoni a a ri ni munghana, vito rakwe a ku ri Yonadabu+ n’wana wa Ximeya+ makwavo wa Davhida; Yonadabu loyi, a a ri wanuna wo tlhariha swinene. 4 Hiloko a ku eka Aminoni: “Hikwalaho ka yini wena n’wana wa hosi u tshama u karhatekile swinene mixo wun’wana ni wun’wana? Ha yini u nga byeli mina mhaka ya kona?” Aminoni a ku eka yena: “Ndzi rhandza Tamari makwavo+ wa Absalomu makwerhu.” 5 Yonadabu a ku: “Famba u ya etlela u endla onge wa vabya. Loko tata wa wena a ta a ta ku pfuxela, n’wi byele u ku, ‘Ndzi kombela u byela Tamari makwerhu a ta a ndzi tisela swakudya. Loko o ndzi swekela swakudya leswi swekeriwaka lava vabyaka ndzi n’wi langutile, ndzi ta swi dya swi huma evokweni rakwe.’”

6 Hiloko Aminoni a etlela a endla onge wa vabya, kutani hosi yi ta ku ta n’wi pfuxela. Aminoni a byela hosi a ku: “Ndzi kombela u byela Tamari makwerhu a ta, a ta ndzi bakela makhekhe mambirhi yo fana ni mbilu ndzi n’wi langutile leswaku ndzi ta ma dya ma huma evokweni rakwe.” 7 Kutani Davhida a rhumela rito eka Tamari endlwini a ku: “Ndzi kombela u ya endlwini ya Aminoni makwenu, u ya n’wi endlela swakudya.” 8 Hiloko Tamari a ya endlwini ya makwavo Aminoni laha a a etlele kona. A fika a teka mbila a yi pfuva, a endla makhekhe a n’wi langutile. 9 Kutani a teka pani a n’wi phamela. Kambe Aminoni a ala ku dya, a ku: “Humesa vanhu lava hinkwavo!” Kutani vanhu hinkwavo va huma.

10 Aminoni a ku eka Tamari: “Tisa swakudya ekamareni ndzi ta swi dya swi huma evokweni ra wena.” Kutani Tamari a teka makhekhe yo fana ni mbilu lawa a nga ma baka, a ma yisa laha makwavo Aminoni a a etlele kona. 11 Loko a tshinela leswaku a ta n’wi nyika swakudya, Aminoni a ku n’wi bvu, a ku: “Etlela na mina makwerhu.” 12 Kambe Tamari a ku: “E-e, makwerhu! U nga ndzi endli nsele, swoleswo a swi endliwi eIsrayele.+ U nga endli manyala yo tano.+ 13 Ndzi ta hanyisa ku yini ni tingana leti? Naswona wena u ta tekiwa u ri xiphukuphuku eIsrayele. Ndzi kombela u vulavula ni hosi, a yi nge ali leswaku u ndzi teka.” 14 Kambe a nga n’wi yingisanga, hiloko a n’wi hlula hi matimba, a n’wi endla nsele hi ku n’wi pfinya. 15 Kutani Aminoni a sungula ku n’wi venga swinene, a n’wi venga ku tlula ndlela leyi a a n’wi rhandza ha yona. Aminoni a ku eka yena: “Pfuka u famba!” 16 Hiloko Tamari a ku eka yena: “E-e, makwerhu, ku ndzi hlongola swi bihe ku tlula leswi u ndzi endleke swona!” Kambe a nga n’wi yingisanga.

17 Kutani a vitana jaha leri n’wi tirhelaka a ku: “Ndzi kombela u susa munhu loyi emahlweni ka mina, u tlhela u lotlela* nyangwa loko a humile.” 18 (Nhwanyana loyi a a ambale xiambalo xo hlawuleka, lexi a xi ambariwa hi vana va hosi lava nga si tshamaka va etlela ni wanuna.) Kutani jaha leri ri n’wi humesela ehandle ri tlhela ri lotlela nyangwa. 19 Endzhaku ka sweswo Tamari a tichela nkuma enhlokweni,+ a handzula xiambalo xo saseka lexi a a xi ambarile; a rhwala mavoko enhlokweni a famba a ri karhi a rila.

20 Loko Absalomu+ makwavo a n’wi vona a n’wi vutisa a ku: “Xana i Aminoni makwenu loyi a ku endleke nsele? Miyela makwerhu. I makwenu.+ U nga vileli hi mhaka leyi.” Hiloko Tamari a ya titshamela yexe endlwini ya Absalomu makwavo. 21 Loko Hosi Davhida a twa swilo leswi hinkwaswo, a hlundzuka ngopfu.+ Kambe a a nga lavi ku khunguvanyisa n’wana wakwe Aminoni, hikuva a a n’wi rhandza hileswi a a ri mativula yakwe. 22 Absalomu a nga vulanga nchumu eka Aminoni, leswinene kumbe leswo biha; hikuva Absalomu a a venga+ Aminoni hileswi a endleke Tamari+ makwavo nsele.

23 Endzhaku ka malembe mambirhi, vatsemeti va tinyimpfu va Absalomu a va ri eBali-hazoro ekusuhi ni le Efrayimi,+ kutani Absalomu a rhamba vana hinkwavo va hosi.+ 24 Hiloko Absalomu a ya eka hosi a fika a ku: “Nandza wa wena u tsemeta voya bya tinyimpfu! Ndzi kombela hosi ni malandza ya yona va famba na mina.” 25 Kambe hosi yi ku eka Absalomu: “E-e, n’wananga! Loko ho ta hinkwerhu hi ta va ndzhwalo eka wena.” Hambileswi Absalomu a yeke emahlweni a n’wi sindzisa, a nga pfumelanga ku famba, kambe u n’wi katekisile. 26 Absalomu a ku: “Leswi wena u tsandzekaka, ndzi kombela u pfumelela Aminoni makwerhu a famba na hina.”+ Hiloko hosi yi ku: “Hikwalaho ka yini a fanele a famba na wena?” 27 Kambe Absalomu a yi sindzisa, kutani yi pfumelela Aminoni ni vana va hosi hinkwavo ku famba na yena.

28 Kutani Absalomu a lerisa vatirhi vakwe, a ku: “Mi tshama mi xalamukile, kutaku loko mbilu ya Aminoni yi tsakisiwe hi vhinyo, ndzi ta ku eka n’wina, ‘Tlhavani Aminoni!’ Mi fanele mi n’wi dlaya. Mi nga chavi. Xana a hi mina ndzi mi lerisaka? Vanani ni xivindzi mi tiya.” 29 Hiloko malandza ya Absalomu ma dlaya Aminoni hilaha Absalomu a ma leriseke hakona; kutani vana lavan’wana va hosi va baleka, un’wana ni un’wana a gada meyila yakwe a baleka. 30 Loko va ha ri endleleni, xiviko xi fika eka Davhida xi ku: “Absalomu u dlaye vana va hosi hinkwavo, a nga kona ni un’we loyi a poneke.” 31 Loko hosi yi twa sweswo yi suka yi yima, yi handzula swiambalo swa yona yi etlela ehansi, naswona malandza ya yona hinkwawo a ma yime kwalaho ma handzule swiambalo swa wona.

32 Kambe Yonadabu+ n’wana wa Ximeya,+ makwavo wa Davhida, a ku: “Hosi yanga yi nga tshuki yi anakanya leswaku vana va hosi va dlayiwile hinkwavo, hikuva ku dlayiwe Aminoni ntsena.+ Lexi a ku ri xileriso lexi humaka eka Absalomu, loyi a kunguhateke ku endla leswi+ ku sukela siku leri Aminoni a nga endla Tamari+ makwavo+ nsele. 33 Kutani hosi yanga yi nga tshuki yi yingisa mavarivari lama nge, ‘Vana va hosi hinkwavo va file’; ku lo fa Aminoni ntsena.”

34 Hi nkarhi wolowo, Absalomu u balekile.+ Endzhaku ka sweswo, murindzi a vona vanhu vo tala va ri karhi va ta hi ndlela leyi n’wi fularheleke leyi nga etlhelo ka ntshava. 35 Loko Yonadabu+ a vona sweswo, a byela hosi a ku: “Vona! Vana va hosi va vuyile, hilaha ndzi vuleke hakona.” 36 Loko a heta ku vulavula, vana va hosi va nghena va ri karhi va kalakala swinene; ni hosi ni malandza ya yona hinkwawo va rila swinene. 37 Kambe Absalomu u baleke a ya eka Talimayi+ n’wana wa Amihudi hosi ya Gexura. Davhida u rile n’wana wakwe masiku yo tala. 38 Endzhaku ka loko Absalomu a balekile a ya eGexura+ u tshame kwalaho malembe manharhu.

39 Eku heteleleni Hosi Davhida a navela ku ya eka Absalomu, hikuva se a a chavelelekile eka rifu ra Aminoni.