Samuwele Wa Vumbirhi
7 Loko hosi yi tshamisekile endlwini+ ya yona naswona Yehovha a yi wisisile eka valala hinkwavo lava a yi akelane na vona, 2 hosi yi byela muprofeta Nathani+ yi ku: “Vona, mina ndzi tshama endlwini leyi akiweke hi mikedari,+ kasi Areka ya Xikwembu xa ntiyiso yi tshama exikarhi ka tende leri endliweke hi malapi.”+ 3 Nathani a hlamula hosi a ku: “Famba u ya endla leswi naveriwaka hi mbilu ya wena hikuva Yehovha u na wena.”+
4 Hi vusiku byebyo, rito ra Yehovha ri fika eka Nathani ri ku: 5 “Famba u ya byela nandza wa mina Davhida u ku, ‘Yehovha u ri: “Xana u fanele u ndzi akela yindlu leswaku ndzi ta tshama eka yona?+ 6 Hikuva a ndzi si tshama endlwini ku sukela esikwini leri ndzi humeseke Vaisrayele eEgipta ha rona ku fikela namuntlha,+ kambe a ndzi fambafamba ndzi ri etendeni ni le tabernakeleni.+ 7 Enkarhini hinkwawo lowu a ndzi fambafamba ni Vaisrayele hinkwavo, xana ndzi tshame ndzi byela varhangeri va tinyimba ta Israyele lava ndzi va vekeke ku risa vanhu va mina, ku nga Israyele, ndzi ku, ‘Hikwalaho ka yini mi nga ndzi akelanga yindlu ya mikedari?’”’ 8 Sweswi byela nandza wa mina Davhida u ku, ‘Yehovha wa mavuthu u ri: “Ndzi ku suse emadyelweni, eku riseni ka ntlhambi,+ leswaku u va murhangeri wa vanhu va mina, ku nga Israyele.+ 9 Naswona ndzi ta va na wena kun’wana ni kun’wana laha u yaka kona,+ ndzi ta herisa valala va wena hinkwavo emahlweni ka wena;+ ndzi ta ku endlela vito lerikulu+ ku fana ni vanhu va ndhuma emisaveni. 10 Ndzi ta hlawulela vanhu va mina, Israyele, ndhawu yo tshama eka yona, va ta tshama kwalaho hi ku rhula, a va nge he karhatiwi; vanhu vo homboloka a va nge he tlheli va va xanisa hilaha va endleke hakona,+ 11 hi nkarhi lowu ndzi hlawuleke vaavanyisi+ leswaku va rhangela vanhu va mina, Israyele. Ndzi ta ku wisisa eka valala va wena hinkwavo.+
“‘“Naswona Yehovha u ku byele leswaku Yehovha u ta ku akela yindlu.+ 12 Loko masiku ya wena ma hela,+ u lahliwa ni vakokwa wa wena, ndzi ta hlawula un’wana wa vana* va wena ndzi simeka mfumo wa yena wu tiya.+ 13 Hi yena loyi a nga ta akela vito ra mina yindlu+ naswona ndzi ta tiyisa xiluvelo xa vuhosi byakwe hilaha ku nga heriki.+ 14 Ndzi ta va tata wa yena, yena u ta va n’wana wa mina.+ Loko a dyoha ndzi ta n’wi tshinya hi nhonga ya vanhu ni hi minkhavi ya vana va vanhu.+ 15 Rirhandzu ra mina lerikulu a ri nge susiwi eka yena hi ndlela leyi ndzi ri suseke ha yona eka Sawulo,+ loyi ndzi n’wi suseke emahlweni ka wena. 16 Yindlu ya wena ni vuhosi bya wena swi ta tshama hilaha ku nga heriki; xiluvelo xa wena xi ta simekiwa xi tiya hilaha ku nga heriki.”’”+
17 Nathani a byela Davhida marito wolawo hinkwawo ni xivono xolexo hinkwaxo.+
18 Endzhaku ka sweswo Hosi Davhida a nghena a tshama emahlweni ka Yehovha, a ku: “Yehovha Hosi Leyi Tlakukeke, xana ndzo va mani? Naswona ndyangu wa mina wo va yini leswi u ndzi hlayiseke ku ta fikela namuntlha?+ 19 Ku engetela kwalaho, Yehovha Hosi Leyi Tlakukeke, u tlhela u boxa timhaka leti khumbaka vumundzuku bya ndyangu wa mina nandza wa wena. Yehovha Hosi Leyi Tlakukeke, lowu i nawu lowu yaka eka vanhu hinkwavo. 20 Xana mina Davhida nandza wa wena ndzi nga ha ku byela yini swin’wana, hikuva u ndzi tiva kahle,+ Yehovha Hosi Leyi Tlakukeke? 21 Hikwalaho ka rito ra wena ni hi ku pfumelelana ni mbilu ya wena, u endle swilo leswi hinkwaswo swo hlamarisa naswona u swi paluxele nandza wa wena.+ 22 Hi yona mhaka leyi u tlakukeke swinene,+ Yehovha Hosi Leyi Tlakukeke. A nga kona wo fana na wena,+ naswona a ku na Xikwembu handle ka wena;+ hinkwaswo leswi hi swi tweke hi tindleve ta hina swi tiyisekisa mhaka leyi. 23 Naswona hi rihi tiko rin’wana leri fanaka ni vanhu va wena, Vaisrayele, laha misaveni?+ Xikwembu xi tikutsulele vona tanihi vanhu va xona,+ xi tiendlela vito+ hi ku va endlela swilo swo hlamarisa swinene.+ U hlongole matiko ni swikwembu swa wona hikwalaho ka vanhu va wena lava u tiponiseleke vona eEgipta. 24 U endle leswaku Vaisrayele va va vanhu va wena hilaha ku nga heriki;+ kasi wena Yehovha, u ve Xikwembu xa vona.+
25 “Sweswi, Yehovha Xikwembu xanga, endla leswi u swi tshembiseke nandza wa wena ni ndyangu wakwe hilaha ku nga heriki naswona onge u nga endla hilaha u tshembiseke hakona.+ 26 Vito ra wena a ri dzunisiwe hilaha ku nga heriki,+ leswaku vanhu va ta ku, ‘Yehovha wa mavuthu i Xikwembu xa Israyele,’ ndyangu wa nandza wa wena Davhida a wu simekiwe wu tiya emahlweni ka wena.+ 27 Hikuva wena Yehovha wa mavuthu Xikwembu xa Israyele, u hlavutele nandza wa wena, u ku, ‘Ndzi ta ku akela yindlu.’*+ Hi yona mhaka nandza wa wena a nga ni xivindzi xo khongela eka wena hi mhaka leyi. 28 Yehovha Hosi Leyi Tlakukeke u Xikwembu xa ntiyiso, leswi u swi vulaka i ntiyiso+ naswona u tshembise nandza wa wena swilo leswi leswinene. 29 Kutani a swi ku tsakise ku katekisa ndyangu wa nandza wa wena naswona a wu tshame hilaha ku nga heriki emahlweni ka wena;+ hikuva Yehovha Hosi Leyi Tlakukeke u tshembisile naswona ndyangu wa nandza wa wena a wu katekisiwe hilaha ku nga heriki+ hi nkateko wa wena.”