Tikronika Ta Vumbirhi
1 Vuhosi bya Solomoni n’wana wa Davhida byi ye emahlweni byi tiya naswona Yehovha Xikwembu xakwe a a n’wi seketela lerova a xiximiwa swinene.+
2 Solomoni a vitana Vaisrayele hinkwavo, tindhuna ta vanhu va magidi ni tindhuna ta vanhu va madzana, vaavanyisi, tindhuna hinkwato ta tiko ra Israyele ni ta mindyangu. 3 Hiloko Solomoni ni vanhu hinkwavo va ya endhawini leyi tlakukeke leyi a yi ri eGibiyoni,+ laha a ku ri ni tende ra nhlengeletano ra Xikwembu xa ntiyiso, ku nga tende leri Muxe nandza wa Yehovha a ri endleke emananga. 4 Hambiswiritano, Davhida u teke Areka ya Xikwembu xa ntiyiso eKiriyati-yeyarimi+ a yi yisa endhawini leyi a yi lunghiseleleke yona; a a yi dzimele tende eYerusalema.+ 5 Altari+ ya koporo leyi Bezalele+ n’wana wa Uri, n’wana wa Huru a yi endleke a yi vekiwe emahlweni ka tabernakela ya Yehovha; Solomoni ni Vaisrayele a va khongela emahlweni ka yona. 6 Hiloko Solomoni a endlela Yehovha magandzelo kwalaho, a endla magandzelo yo hisiwa hi swifuwo swa 1 000 ehenhla ka altari+ ya koporo ya tende ra nhlengeletano.
7 Evusikwini byebyo Xikwembu xi humelela eka Solomoni xi fika xi ku: “Kombela lexi u lavaka ndzi ku nyika xona.”+ 8 Hiloko Solomoni a hlamula Xikwembu a ku: “U rhandze tata wa mina Davhida+ swinene naswona u ndzi nyike vuhosi byakwe.+ 9 Yehovha Xikwembu xanga, ndzi kombela leswi u tshembiseke Davhida tata wa mina swi endleka,+ hikuva u ndzi endle hosi ya vanhu vo tala swinene ku fana ni ntshuri wa misava.+ 10 Ndzi kombela u ndzi nyika vutlhari ni vutivi+ leswaku ndzi ta kota ku rhangela vanhu lava, hikuva i mani la nga kotaka ku avanyisa vanhu lava va wena vo tarisa xileswi?”+
11 Kutani Xikwembu xi byela Solomoni xi ku: “Leswi u lavaka sweswo naswona u nga kombelangiki rifuwo, xuma, ku xiximiwa kumbe leswaku ku lovisiwa lava ku vengaka kumbe ku hanya malembe yo tala,* kambe u kombeleke vutlhari ni vutivi leswaku u ta avanyisa vanhu va mina lava ndzi ku endleke hosi ya vona,+ 12 ndzi ta ku nyika vutlhari ni vutivi; ndzi ta tlhela ndzi ku nyika rifuwo, xuma ni ku xiximiwa, leswi nga si tshamaka swi kumiwa hi tihosi leti veke kona u nga si va hosi naswona a ku nge he vi na hosi leyi nga ta va na sweswo endzhaku ka wena.”+
13 Kutani Solomoni a suka endhawini leyi tlakukeke eGibiyoni+ emahlweni ka tende ra nhlengeletano, a tlhelela eYerusalema; a fuma Israyele. 14 Solomoni a ya emahlweni a hlengeleta makalichi ni tihanci;* a a ri ni makalichi ya 1 400 ni tihanci*+ ta 12 000, leswi a swi vekeke emitini ya makalichi+ ni le kusuhi ni hosi eYerusalema.+ 15 Hosi yi endla leswaku silivhere ni nsuku swi tala ngopfu eYerusalema ku fana ni maribye,+ timhandzi ta mukedari na tona a ti tele ku fana ni mirhi ya makuwa leyi nga eXefela.+ 16 Solomoni a a xava tihanci eEgipta,+ vaxavisi lava tirhelaka hosi a va ti xava ti tele* hi mali yo karhi.+ 17 Kalichi yin’we leyi a yi xaviwa eEgipta, a yi xaviwa hi swiphemu swa silivhere swa 600, kasi hanci a yi xaviwa hi swiphemu swa 150; kutani vona a va ti xavisela tihosi hinkwato ta Vaheti ni tihosi ta Siriya.