Tikronika Ta Vumbirhi

32 Endzhaku ka swilo leswi ni ku tshembeka+ loku, Hosi Senakeribi wa Asiriya a ta a ta hlasela Yuda. A rhendzela miti leyi biyeriweke leswaku a ta yi hlasela ni ku yi teka.+

2 Loko Hezekiya a vona leswaku Senakeribi u tile naswona u lava ku lwa na muti wa Yerusalema, 3 u endle xiboho endzhaku ko vulavula ni tihosana takwe ni masocha yakwe leswaku ku seleteriwa swihlovo leswi a swi ri ehandle ka muti,+ kutani va n’wi seketela. 4 Hiloko ku hlengeletiwa vanhu vo tala va seletela swihlovo hinkwaswo ni xinambyana lexi a xi khuluka exikarhi ka tiko, va ku: “Hikwalaho ka yini tihosi ta Asiriya ti fanele ti kuma mati yo tala loko ti fika?”

5 Ku tlula kwalaho, hi ku tiyimisela a pfuxa khumbi hinkwaro leri a ri mbundzumuxiwile a aka ni swihondzo ehenhla ka rona, a tlhela a aka khumbi rin’wana ehandle. U tlhele a lunghisa Xitsunga*+ xa Muti wa Davhida a endla ni matlhari yo tala ni switlhangu. 6 Endzhaku ka sweswo a hlawula tindhuna ta nyimpi leswaku ti langutela vanhu kutani a ti hlengeleta erivaleni leri nga egedeni ya muti a ti khutaza a ku: 7 “Vanani ni xivindzi mi tiya. Mi nga chavi kumbe ku chuhisiwa hi hosi ya Asiriya+ ni ntshungu hinkwawo lowu nga na yona, hikuva hi ni vo tala ku tlula lava yi nga na vona.+ 8 Yona yi tshembe vanhu, kasi hina hi tshembe Yehovha Xikwembu xa hina loyi a hi pfunaka ni ku hi lwela tinyimpi ta hina.”+ Hiloko vanhu va sungula ku va ni xivindzi hikwalaho ka marito ya Hosi Hezekiya wa Yuda.+

9 Endzhaku ka swilo leswi, loko Hosi Senakeribi wa Asiriya a ha ri eLakixi+ ni masocha yakwe hinkwawo, a rhuma malandza yakwe eYerusalema eka Hosi Hezekiya wa Yuda ni le ka Vayudiya hinkwavo lava a va ri eYerusalema+ a ku:

10 “Hosi Senakeribi wa Asiriya u ri, ‘Xana mi tshembe yini leswi mi tamaka mi ri eYerusalema hambi leswi wu rhendzeriweke?+ 11 Xana Hezekiya a ngo mi yenga leswaku mi ta dlayiwa hi ndlala ni torha, a ku: “Yehovha Xikwembu xa hina u ta hi ponisa eka hosi ya Asiriya”?+ 12 Xana a hi yena Hezekiya loyi a suseke tindhawu leti tlakukeke+ ta Xikwembu xa n’wina ni tialtari+ ta xona, a tlhela a byela vanhu va Yuda na Yerusalema, a ku: “Mi fanele mi gandzela ealtarini yin’we mi tlhela mi endla magandzelo eka yona”?+ 13 Xana a mi swi tivi leswi mina ni vakokwana hi swi endleke eka vanhu hinkwavo va matiko?+ Xana swikwembu swa matiko wolawo swi swi kotile ku ponisa vanhu va swona eka mina?+ 14 Hi xihi exikarhi ka swikwembu swa matiko lawa vakokwa wa mina va ma loviseke, xi koteke ku ponisa vanhu va xona eka mina, lerova Xikwembu xa n’wina xi nga swi kota ku mi ponisa eka mina?+ 15 Kutani mi nga pfumeli ku xisiwa hi Hezekiya!+ Mi nga n’wi tshembi hikuva a xi kona xikwembu kumbe tiko kumbe mfumo leswi koteke ku ponisa vanhu va swona eka mina ni le ka vakokwa wa mina. Xana Xikwembu xa n’wina xi nga swi kotisa ku yini ku mi ponisa eka mina?’”+

16 Malandza yakwe ma ya emahlweni ma rhukana Yehovha Xikwembu xa ntiyiso na Hezekiya nandza wa yena. 17 U tlhele a tsala mapapila+ a rhukana Yehovha Xikwembu xa Israyele+ a ku: “Xikwembu xa Hezekiya a xi nge swi koti ku ponisa vanhu va xona eka mina, hilaha swikwembu swa matiko swi tsandzekeke hakona ku ponisa vanhu va swona eka mina.”+ 18 Va ya emahlweni va huwelela vanhu va Yerusalema lava a va ri ehenhla ka khumbi hi ririmi ra Vayuda, va va chavisa leswaku va ta kota ku teka muti.+ 19 Va rhukane Xikwembu xa Yerusalema ku fana ni loko va rhukana swikwembu swa vanhu va misava, leswi nga lo endliwa hi vanhu. 20 Kambe Hosi Hezekiya na muprofeta Esaya+ n’wana wa Amotsi va ya emahlweni va khongela hi mhaka leyi, va rilela Xikwembu leswaku xi va pfuna.+

21 Hiloko Yehovha a rhumela ntsumi kutani yi dlaya nhenha yin’wana ni yin’wana ya matimba,+ murhangeri ni ndhuna enxaxeni wa hosi ya Asiriya, lerova yi tlhelela etikweni ra yona yi khomiwe hi tingana. Endzhaku ka sweswo yi ya endlwini* ya xikwembu xa yona, hiloko van’wana va vana va yona va yi dlaya hi banga.+ 22 Yehovha a ponisa Hezekiya ni vanhu va Yerusalema eka Hosi Senakeribi wa Asiriya ni le ka lavan’wana hinkwavo, a va wisisa eka valala va vona. 23 Vanhu vo tala va tisa tinyiko eka Yehovha eYerusalema ni swilo swo hlawuleka eka Hosi Hezekiya wa Yuda+ naswona matiko hinkwawo ma n’wi xiximile swinene endzhaku ka xiendlakalo xolexo.

24 Emasikwini wolawo Hezekiya a vabyela ku fa, hiloko a khongela eka Yehovha,+ kutani a n’wi hlamula a n’wi nyika xikombiso.+ 25 Kambe Hezekiya a nga swi tlangelanga swilo leswinene leswi a endleriweke swona, u tikukumuxile kutani Xikwembu xi n’wi hlundzukela ku katsa ni tiko ra Yuda ni ra Yerusalema. 26 Hambiswiritano, Hezekiya a titsongahata eku titlakuseni kakwe,+ yena ni vanhu va Yerusalema kutani Yehovha a nga va xupulanga enkarhini wa Hezekiya.+

27 Hiloko Hezekiya a va ni rifuwo ro tala ni ku tlhela a xiximiwa swinene;+ a tiendlela tindhawu+ to veka silivhere, nsuku, maribye ya risima, mafurha ya balsama, switlhangu ni swilo hinkwaswo swo saseka. 28 U tlhele a endla switlati swo hlayisela mavele, vhinyo leyintshwa ni mafurha, ku katsa ni swivala swa swifuwo swo hambanahambana ni swivala swa tinyimpfu. 29 U tlhele a va ni miti, swifuwo swo tala, tinyimpfu ni tihomu to tala, hikuva Xikwembu a xi n’wi nyike swilo swo tala ngopfu. 30 Hezekiya hi yena a pfaleke xihlovo+ xa le henhla xa Gihoni+ ivi a cela leswaku mati ya xona ma khulukela evupeladyambu ma ya eMutini wa Davhida,+ naswona Hezekiya a a humelela eka hinkwaswo leswi a swi endla. 31 Hambiswiritano, loko malandza ya tihosana ta Babilona ma rhumiwe eka yena leswaku ma ta vutisa hi xikombiso+ lexi endlekeke etikweni,+ Xikwembu xa ntiyiso xi n’wi tshikile leswaku xi ta n’wi kambela+ ku vona leswi nga embilwini yakwe.+

32 Loko ku ri matimu ya Hezekiya hinkwawo ni mitirho leyi a yi endleke hi rirhandzu,+ swi tsariwile ebukwini ya swivono swa muprofeta Esaya+ n’wana wa Amotsi, eBukwini ya Tihosi ta Yuda ni ta Israyele.+ 33 Hiloko Hezekiya a fa, a lahliwa ni vakokwa wakwe, va n’wi lahla endhawini leyi tlhandlukaka yi ya eswilahlweni swa vana va Davhida;+ vanhu hinkwavo va Yuda ni va Yerusalema va n’wi lahle hi ndlela leyi xiximekaka. Kutani Manase n’wana wakwe a va hosi.