Ezekiyele

23 Yehovha a tlhela a vulavula na mina a ku: 2 “N’wana wa munhu, a ku ri ni vavasati vambirhi lava a va ri vana va nsati un’we.+ 3 Va tiendle tinghwavava eEgipta;+ va ve tinghwavava ku sukela loko va ha ri vantshwa. Mavele ya vona ma khomakhomiwe kwalaho naswona va lahlekeriwe hi vunhwana bya vona. 4 Vito ra lonkulu a ku ri Ohola* kasi vito ra lontsongo a ku ri Oholiba.* Hiloko ndzi va teka va veleka vana va majaha ni va vanhwanyana. Ohola i Samariya+ kasi Oholiba i Yerusalema.

5 “Ohola u sungule ku tiendla nghwavava+ a ha ri wa mina. U navele lava a a rhandzana na vona,+ ku nga Vaasiriya lava a akelaneke na vona.+ 6 A va ri vafumi lava ambaleke swiambalo swa wasi ni tindhuna, majaha hinkwawo yo saseka lama gadeke tihanci ta wona. 7 U ye emahlweni a endla vunghwavava ni hinkwavo lava a va hlawuleke ku nga Vaasiriya naswona u tithyakise+ hi swifaniso leswi nyenyetsaka* swa lava a a navela ku endla timhaka ta masangu na vona. 8 A nga byi tshikanga vunghwavava lebyi a byi endleke eEgipta, hikuva va etlele na yena a ha ri muntshwa, va onhe vuntshwa byakwe hi ku endla timhaka ta masangu na yena.+ 9 Kutani ndzi n’wi nyikete eka lava a a rhandzana na vona, ku nga Vaasiriya,+ lava a a navela ku endla timhaka ta masangu na vona. 10 Va n’wi siye a nga ambalanga nchumu+ va teka vana vakwe va majaha ni va vanhwanyana,+ kutani va n’wi dlaya hi banga. U tiveke hi swilo swo biha exikarhi ka vavasati naswona va n’wi avanyisile.

11 “Loko makwavo wakwe Oholiba a swi vona, ku navela kakwe ka timhaka ta masangu ku nyanye ku biha naswona vunghwavava byakwe byi ve byikulu ku tlula bya makwavo.+ 12 U navele ku endla timhaka ta masangu ni Vaasiriya,+ lava nga vaakelani vakwe, vafumi ni tindhuna leti ambaleke swiambalo swo saseka ngopfu leti gadeke tihanci, majaha hinkwawo yo saseka. 13 Loko a tikhoma hi ndlela yo biha, ndzi xiye leswaku havambirhi ka vona a va ri ni mahanyelo lama fanaka.+ 14 Kambe u ye emahlweni a endla vunghwavava. U vone vavanuna lava kovotliweke ekhumbini, swifaniso swa Vakalidiya leswi kovotliweke swi tlhela swi pendiwa hi pende yo tshwuka, 15 va bohe mabandhi emasengeni, va bohe maduku etinhlokweni ta vona, va languteka ku fana ni masocha, hinkwavo ka vona va yimela vanhu va le Babilona, lava velekiweke etikweni ra Vakalidiya. 16 Loko a va vona u sungule ku navela ku endla timhaka ta masangu na vona, kutani a rhumela vanhu eka vona eKalidiya.+ 17 Vababilona a va tshamela ku ta eka yena, va endla timhaka ta masangu na yena va n’wi thyakisa. Loko va n’wi thyakisile u va fularherile a nyangatsekile.

18 “Loko a ya emahlweni a endla vunghwavava byakwe a nga chavi nchumu ni ku sala a nga ambalanga nchumu,+ ndzi n’wi fularherile hikwalaho ko nyangatseka hilaha ndzi fularheleke makwavo wakwe hakona ndzi nyangatsekile.+ 19 U ye emahlweni a endla vunghwavava,+ a tsundzuka masiku ya vuntshwa byakwe loko a endla vunghwavava etikweni ra Egipta.+ 20 U navele ku endla timhaka ta masangu ni lava a rhandzanaka na vona ku fana ni vavasati lavatsongo lava vavanuna va vona va nga ni swirho swa xinuna leswi fanaka ni swa mbhongolo ni lava swirho swa vona swa xinuna swi fanaka ni swa hanci. 21 U swi navele ngopfu ku endla manyala loko wa ha ri muntshwa eEgipta+ loko va ku khomakhoma mavele, mavele ya vuntshwa bya wena.+

22 “Hikwalaho, wena Oholiba, Yehovha Hosi Leyi Tlakukeke u ri: ‘Ndzi endla leswaku lava u rhandzaneke+ na vona lava u va fularheleke hikwalaho ko nyangatseka, va lwa na wena ku suka ematlhelweni hinkwawo,+ 23 Vababilona+ ni Vakalidiya hinkwavo,+ vavanuna va le Pekodi,+ Xowa, Kowa swin’we ni Vaasiriya hinkwavo. Hinkwavo ka vona i majaha yo saseka, vafumi ni tindhuna, tinhenha ni lava nga lo hlawuriwa, hinkwavo ka vona va gade tihanci. 24 Va ta ku hlasela hi makalichi yo tala ya nyimpi ni masocha yo tala lama khomeke switlhangu leswikulu ni leswitsongo ma ambale ni magondolo* ya nyimpi. Ma ta ku rhendzela naswona ndzi ta ma pfumelela ma ku avanyisa, ma ta ku avanyisa hilaha ma rhandzaka hakona.+ 25 Ndzi ta ku komba vukarhi bya mina naswona ma ta lwa na wena hi tihanyi. Ma ta ku tsema nhompfu ni tindleve naswona lava nga ta pona va ta dlayiwa hi banga. Ma ta teka vana va wena va majaha ni va vanhwanyana naswona lava nga ta pona va ta hisiwa hi ndzilo.+ 26 Ma ta ku hluvula swiambalo+ ma tlhela ma ku tekela ni swilo leswi u tisasekisaka ha swona.+ 27 Ndzi ta endla leswaku u tshika ku endla manyala ni vunghwavava+ lebyi u byi sunguleke etikweni ra Egipta.+ U ta tshika ku va languta naswona a wu nge he ri tsundzuki tiko ra Egipta.’

28 “Yehovha Hosi Leyi Tlakukeke u ri: ‘Ndzi le kusuhi ni ku ku nyiketa eka lava u va vengaka, lava u va fularheleke hikwalaho ko nyangatseka.+ 29 Va ta lwa na wena hi tihanyi, va ku tekela swilo leswi u swi tirheleke hi matimba,+ va ku siya u nga ambalanga nchumu. Ku tikhoma ka wena loko biha loku khomisaka tingana ni manyala ni vunghwavava bya wena swi ta tiviwa hi vanhu hinkwavo.+ 30 Swilo leswi swi ta endliwa eka wena hikwalaho ka leswi u hlongorisaka matiko ku fana ni nghwavava+ hikuva u tithyakise hi swifaniso swa vona leswi nyenyetsaka.+ 31 U tikhome ku fana ni makwenu,+ ndzi ta veka xinwelo xa yena evokweni ra wena.’+

32 “Yehovha Hosi Leyi Tlakukeke u ri:

34 U ta xi nwa, u xi minya,+ u phorha swiphemu swa xona swa vumba,

Kutani u tsema mavele ya wena.

“Hikuva ndzi vurile,” ku vula Yehovha Hosi Leyi Tlakukeke.’

35 “Hikwalaho Yehovha Hosi Leyi Tlakukeke u ri: ‘Leswi u ndzi rivaleke u tlhela u ndzi fularhela,+ u ta tihlamulela hikwalaho ka manyala lama u ma endlaka ni hikwalaho ka vunghwavava bya wena.’”

36 Yehovha a ku eka mina: “N’wana wa munhu, famba u ya avanyisa Ohola na Oholiba+ u va byela swilo swo nyenyetsa leswi va swi endlaka. 37 Va endle vuoswi ni swikwembu swa vona leswi nyenyetsaka+ naswona mavoko ya vona ma tele ngati. A va endlanga vuoswi ntsena kambe va tlhele va hisa ni vana va vona hi ndzilo lava va ndzi tswaleleke vona, va va endla swakudya swa swikwembu swa vona.+ 38 Ku engetela kwalaho, va ndzi endle leswi: Va thyakise ndhawu ya mina yo kwetsima naswona a va ti xiximanga tisavata ta mina. 39 Hi siku rero loko va hete ku dlaya vana va vona va endlela swikwembu swa vona leswi nyenyetsaka magandzelo hi vona,+ va te endhawini ya mina leyi kwetsimaka va fika va yi thyakisa.+ Va endle sweswo endzeni ka yindlu ya mina. 40 Va tlhela va rhumela rito leswaku ku ya vitaniwa vanhu va le kule.+ Loko va ri karhi va ta, u hlambile u tipenda matihlo u tlhela u tisasekisa.+ 41 Kutani u tshama exitulwini xo saseka+ lexi emahlweni ka xona a ku lunghiseleriwe tafula+ leri u vekeke murhi wa mina wa risuna+ ni mafurha ya mina eka rona.+ 42 A ku twakala huwa ya vanhu lava tsakeke, exikarhi ka vona a ku ri ni swidakwa leswi a swi huma emananga. Va vehele vusenga emavokweni ya vavasati ni tiharhi to saseka etinhlokweni ta vona.

43 “Hiloko ndzi vulavula hi yena loyi a a hlakatiwe hi vuoswi ndzi ku: ‘U ta ya emahlweni a endla vunghwavava byakwe.’ 44 Va ye emahlweni va nghena eka yena, hilaha munhu a yaka eka nghwavava hakona. Va nghene tano eka Ohola na Oholiba, vavasati lava endlaka manyala. 45 Kambe vavanuna lava lulameke va ta n’wi avanyisa hi ku ya hi swiendlo swakwe, ku nga vuoswi+ ni ku halata ngati;+ hikuva i tinghwavava naswona mavoko ya vona ma tele ngati.+

46 “Yehovha Hosi Leyi Tlakukeke u ri: ‘Ku ta tisiwa vuthu leri nga ta lwa na vona, swilo swa vona swi ta phangiwa naswona vanhu va ta sala va tsemeke nhlana.+ 47 Vuthu ri ta va faya hi maribye+ ri va tsemelela hi mabanga. Ri ta dlaya vana va vona+ ri tlhela ri hisa tiyindlu ta vona hi ndzilo.+ 48 Ndzi ta herisa manyala lawa u ma endlaka etikweni naswona ku ta va dyondzo eka vavasati hinkwavo, a va nge ma tekeleli manyala ya wena.+ 49 Va ta ku khoma hi ku ya hi manyala lawa u ma endleke swin’we ni swidyoho leswi u swi endleke ni swikwembu swa wena leswi nyenyetsaka; u ta swi tiva leswaku hi mina Yehovha Hosi Leyi Tlakukeke.’”+