Vaheveru
3 Hikwalaho, vamakwerhu lava kwetsimaka, lava vitaniweke ku ya etilweni,+ ehleketani hi muapostola ni muprista lonkulu loyi hi kombisaka ripfumelo eka yena ku nga Yesu.+ 2 A a tshembekile eka Loyi a nga n’wi hlawula,+ ku fana na Muxe loyi a a tshembekile endlwini hinkwayo ya Xikwembu.+ 3 Hikuva u* tekiwa a ri loyi a faneriwaka hi ku vangama lokukulu+ ku tlula Muxe, tanihi leswi loyi a akaka yindlu a xiximiwaka ngopfu ku tlula yona. 4 Entiyisweni, yindlu yin’wana ni yin’wana yi akiwe hi munhu, kambe loyi a akeke swilo hinkwaswo i Xikwembu. 5 Muxe a a ri nandza wo tshembeka endlwini hinkwayo ya Xikwembu, ntirho wakwe a ku ri vumbhoni bya swilo leswi a swi ta vuriwa endzhaku, 6 kambe Kreste a a tshembekile tanihi n’wana+ loyi a hlayisaka yindlu ya Xikwembu. Hina hi yindlu ya xona+ loko hakunene hi khomelela swi tiya eka ntshunxeko wa hina wo vulavula ni le ka ntshembo lowu hi tibumaka ha wona ku ya fika emakumu.
7 Hilaha moya lowo kwetsima wu vulaka hakona,+ “Loko namuntlha mi yingisa rito rakwe, 8 mi nga nonon’hwisi timbilu ta n’wina ku fana ni le nkarhini lowu vakokwa wa n’wina va ndzi hlundzukiseke ngopfu, ku fana ni le sikwini ra ndzingo emananga,+ 9 leri va ndzi ringeke hambiloko va vone mitirho ya mina ku ringana malembe ya 40.+ 10 Leswi hi swona swi endleke leswaku vanhu va nkarhi wolowo va ndzi nyenyetsa kutani ndzi ku: ‘Va tshamela ku hambuka etimbilwini ta vona naswona a va ti tivi tindlela ta mina.’ 11 Hikwalaho ndzi hlambanyile ndzi hlundzukile ndzi ku: ‘A va nge ngheni eku wiseni ka mina.’”+
12 Tivoneleni, vamakwerhu, hi ku chava leswaku ku nga tshuka ku va ni un’wana wa n’wina loyi a vaka ni mbilu yo homboloka leyi pfumalaka ripfumelo, hi ku suka eka Xikwembu lexi hanyaka;+ 13 kambe yanani emahlweni mi khutazana siku ni siku, ntsena loko ri vuriwa “Namuntlha,”+ leswaku ku nga vi ni munhu eka n’wina loyi a nonon’hwisiwaka hi matimba lama kanganyisaka ya xidyoho. 14 Hikuva entiyisweni hi ta kuma leswi Kreste a swi kumeke loko ntsena hi khomelela swi tiya eka ntshembo lowu a hi ri na wona eku sunguleni, ku fika emakumu.+ 15 Hilaha ku vuriweke hakona va ku, “Loko namuntlha mi yingisa rito rakwe, mi nga nonon’hwisi timbilu ta n’wina ku fana ni le nkarhini lowu vakokwa wa n’wina va ndzi hlundzukiseke ngopfu ha wona.”+
16 Hikuva a ku ri vamani lava swi tweke kambe va tlhontlheke Xikwembu leswaku xi hlundzuka ngopfu? Xana a ku nga ri hinkwavo lava humeke eEgipta va rhangeriwa hi Muxe?+ 17 Ku tlula kwalaho, i vamani lava nyenyetseke Xikwembu ku ringana malembe ya 40?+ Xana a ku nga ri lava dyoheke, lava feleke emananga?+ 18 Kutani i vamani lava xi va hlambanyeleke leswaku a va nge ngheni eku wiseni ka xona? Xana a ku nga ri lava nga yingisangiki? 19 Kutani ha swi vona leswaku a va nghenanga hikwalaho ko pfumala ripfumelo.+