Tihosi Ta Vumbirhi
16 Akazi+ n’wana wa Hosi Yohatama wa Yuda u ve hosi hi lembe ra vu-17 ra ku fuma ka Peka n’wana wa Remaliya. 2 Akazi a a ri ni malembe ya 20 loko a va hosi naswona u fume eYerusalema malembe ya 16. A nga endlanga leswinene emahlweni ka Yehovha Xikwembu xakwe ku hambana na Davhida kokwa wakwe.+ 3 Kambe u tekelele mahanyelo yo biha ya tihosi ta Israyele+ naswona u kale a hisa n’wana wakwe hi ndzilo+ a endla magandzelo hi yena* a landzela mikhuva leyi nyenyetsaka ya matiko+ lawa Yehovha a ma hlongoleke emahlweni ka Vaisrayele. 4 U tlhele a endla magandzelo yo hisiwa etindhawini leti tlakukeke,+ eswintshabyanini ni le hansi ka murhi wun’wana ni wun’wana lowukulu.+
5 A ku ri hi nkarhi wolowo loko Hosi Resini wa Siriya na Peka n’wana wa Remaliya hosi ya Israyele va ta va ta lwa na Yerusalema.+ Va fike va rhendzela muti lowu Akazi a ri eka wona kambe a va swi kotanga ku wu teka. 6 Hi nkarhi wolowo, Hosi Resini wa Siriya a tlherisela Elata+ eka Vaedomu, endzhaku ka sweswo a hlongola Vayuda hinkwavo eElata. Kutani Vaedomu va nghena eElata, va ha tshama kona ku ta fikela namuntlha. 7 Hiloko Akazi a rhuma malandza eka Hosi Tiglata-pilizere+ wa Asiriya a ku: “Ndzi nandza wa wena tlhelo n’wana wa wena. Tana u ta ndzi ponisa eka hosi ya Siriya ni ya Israyele lava va ndzi hlaselaka.” 8 Kutani Akazi a xava hosi ya Asiriya hi ku yi nyika silivhere ni nsuku leswi a swi ri endlwini ya Yehovha ni leswi a swi ri endlwini ya hosi.+ 9 Hosi ya Asiriya yi yingisa xikombelo xakwe kutani yi ya eDamaska yi fika yi wu hlasela yi tlhela yi wu hlula yi teka vanhu va wona yi va yisa eKiri+ leswaku va va mahlonga, ivi yi dlaya Resini.+
10 Hiloko Hosi Akazi a ya hlangana na Hosi Tiglata-pilizere wa Asiriya eDamaska. Loko Hosi Akazi a vona altari leyi a yi ri eDamaska, u rhumele muprista Yuriya pulani ya altari yoleyo ni ndlela leyi yi endliweke ha yona.+ 11 Muprista Yuriya+ a aka altari+ hi ku landza hinkwaswo leswi Hosi Akazi a n’wi rhumeleke swona swi huma eDamaska. Muprista Yuriya u yi hete Hosi Akazi a nga si vuya hi le Damaska. 12 Loko hosi yi vuya hi le Damaska yi vona altari kutani yi ya eka yona yi fika yi endla magandzelo.+ 13 Yi ye emahlweni yi endla magandzelo ya yona yo hisiwa ni magandzelo ya yona ya mavele; yi tlhela yi endla magandzelo ya yona ya swakunwa ni ku n’wan’wasela ngati ya magandzelo ya yona yo kombela ku rhula eka yona. 14 Hiloko yi susa altari ya koporo+ leyi a yi ri emahlweni ka yindlu ya Yehovha, exikarhi ka altari ya yona ni yindlu ya Yehovha kutani yi yi veka etlhelo ra le n’walungwini ra altari ya yona. 15 Hosi Akazi a byela muprista Yuriya+ a ku: “Endla gandzelo ro hisiwa ra nimixo ehenhla ka altari leyikulu+ ni gandzelo ra mavele ra nimadyambu,+ gandzelo ro hisiwa ra hosi ni gandzelo ra yona ra mavele ni magandzelo yo hisiwa, magandzelo ya mavele ni magandzelo ya swakunwa ya vanhu hinkwavo. U fanele u tlhela u n’wan’wasela eka yona ngati hinkwayo ya gandzelo ro hisiwa ni ngati hinkwayo ya magandzelo laman’wana. Loko ku ri altari ya koporo ndzi ta vona leswaku ndzi ta endla yini hi yona.” 16 Muprista Yuriya a endla hinkwaswo leswi Hosi Akazi a n’wi leriseke swona.+
17 Ku tlula kwalaho, Hosi Akazi a tsemelela swiphemu swa le matlhelo swa swigolonyana,+ a susa swo hlambela swa swona,+ a hawula thangi lerikulu ra mati leri vuriwaka Lwandle ehenhla ka tinkuzi ta koporo+ leti a ti ri ehansi ka rona, a ri veka ehenhla ka maribye.+ 18 A susa ni lwangu leri a ri tirhisiwa hi Savata leri a ri akiwe ekusuhi ni tempele a tlhela a susa ni nyangwa leyi tihosi a ti nghena hi yona endlwini ya Yehovha; u endle tano hikwalaho ko chava hosi ya Asiriya.
19 Loko ku ri matimu ya Akazi hinkwawo, leswi a swi endleke, xana a swi tsariwanga ebukwini ya matimu ya tihosi ta Yuda?+ 20 Hiloko Akazi a fa a lahliwa ni vakokwa wakwe eMutini wa Davhida; kutani Hezekiya*+ n’wana wakwe a va hosi.