Tikronika Ta Vumbirhi

2 Hiloko Solomoni a humesa xileriso xa leswaku ku akiwa yindlu leyi nga ta vangamisa vito+ ra Yehovha ni yindlu yakwe ya vuhosi.+ 2 Solomoni a hlawula vavanuna va 70 000 lava nga ta rhwala mindzhwalo, vavanuna va 80 000 lava nga ta tsema maribye etintshaveni+ ni vavanuna va 3 600 lava a va ta va tindhuna ta vatirhi.+ 3 Kutani Solomoni a rhumela rito eka Hiramu+ hosi ya Tiri a ku: “Ndzi kombela u ndzi rhumela timhandzi ta mukedari hilaha a wu endla hakona eka Davhida tata wa mina loko a aka yindlu yakwe.+ 4 Sweswi ndzi aka yindlu ya vito ra Yehovha Xikwembu xa mina, ndzi yi hlawulekisela yena, leswaku ndzi ta hisa mirhi yo nun’hwela,+ ndzi veka swinkwa swo hlawuleka*+ ni magandzelo yo hisiwa ya nimixo ni ya nimadyambu,+ hi Tisavata,+ loko ku huma n’weti+ ni hi mikarhi ya mikhuvo+ ya Yehovha Xikwembu xa hina. Leswi swi fanele swi endliwa hi Vaisrayele hilaha ku nga heriki. 5 Yindlu leyi ndzi nga ta yi aka yi ta va yikulu, hikuva Xikwembu xa hina i xikulu eka swikwembu leswin’wana hinkwaswo. 6 I mani loyi a nga kotaka ku xi akela yindlu? Hikuva hambi ku ri matilo, tilo ra matilo a xi eneli eka wona,+ xana mina ndzo va mani lerova ndzi nga xi akela yindlu? Ndzi nga kota ntsena ku endla ndhawu yo xi endlela magandzelo. 7 Sweswi ndzi kombela u rhumela munhu loyi a nga ni vuswikoti byo tirha hi nsuku, silivhere, koporo,+ nsimbhi, voya bya phephulu,* harhani ya krimsoni* ni ya wasi, a tlhela a tiva ni ku kovotla. U ta tirha eYuda ni le Yerusalema ni vanhu va mina lava nga ni vuswikoti lava Davhida tata wa mina a va hlawuleke.+ 8 Ndzi rhumele ni timhandzi ta mukedari, yunipa+ ni algama+ leti nga eLebanoni, hikuva ndzi swi tiva kahle leswaku malandza ya wena ma ni ntokoto wo tsema mirhi ya le Lebanoni.+ Malandza ya mina ma ta tirhisana ni malandza ya wena+ 9 leswaku ma ndzi lulamisela timhandzi to tala hikuva yindlu leyi ndzi nga ta yi aka yi ta va yikulu swinene. 10 Languta! Ndzi ta nyika malandza ya wena lama tsemaka mirhi swakudya:+ tikoro* ta 20 000 ta koroni, tikoro ta 20 000 ta maxalana, tibati* ta 20 000 ta vhinyo ni tibati ta 20 000 ta mafurha.”

11 Hiloko Hiramu hosi ya Tiri a tsalela Solomoni papila a ku: “Yehovha u ku veke leswaku u va hosi hikwalaho ka leswi a rhandzaka vanhu vakwe.” 12 Hiramu a tlhela a ku: “A ku dzunisiwe Yehovha Xikwembu xa Israyele loyi a endleke matilo ni misava, hikuva u nyike Hosi Davhida n’wana wo tlhariha+ ni wo twisisa,+ loyi a nga ta akela Yehovha yindlu ni yindlu yakwe ya vuhosi. 13 Sweswi ndzi rhumela Hiramu-abi+ loyi a nga ni vuswikoti ni ku twisisa, 14 n’wana wa wansati wa le Dani kambe tata wakwe i wa le Tiri; u ni vuswikoti byo tirha hi nsuku, silivhere, koporo, nsimbhi, maribye, timhandzi, voya bya phephulu,* harhani ya wasi, lapi ro vevuka ni ra krimsoni.*+ U kota ku kovotla swin’wana ni swin’wana leswi a nyikiwaka swona.+ U ta tirha ni vatirhi va wena ni vatirhi va hosi yanga Davhida tata wa wena, lava nga ni vutshila. 15 Ndzi kombela leswaku hosi yanga yi rhumela koroni, maxalana, mafurha ni vhinyo leswi yi swi tshembiseke malandza ya yona.+ 16 Hina hi ta tsema mirhi leyi u yi lavaka eLebanoni+ hi ku tisela yona eYopa+ hi le lwandle, kutani wena u ta yi yisa eYerusalema.”+

17 Hiloko Solomoni a tlhela a hlaya vanhu hinkwavo lava a va ri valuveri lava a va tshama etikweni ra Israyele+ lava Davhida tata wakwe+ a va hlayile naswona a va ri 153 600. 18 Kutani a hlawula vavanuna va 70 000 exikarhi ka vona lava nga ta rhwala mindzhwalo, vavanuna va 80 000 lava nga ta tsema maribye+ etintshaveni ni vavanuna va 3 600 lava a va ta va tindhuna ta vatirhi.+