Vakorinto Wo Sungula
1 Hi mina Pawulo, ndzi vitaniwe ku va muapostola+ wa Kreste Yesu hi ku rhandza ka Xikwembu ndzi na Sostena makwerhu. 2 Eka vandlha ra Xikwembu leri nga eKorinto,+ n’wina lava mi hlawuriweke, lava nga ni vun’we na Kreste Yesu,+ lava mi vitaniweke leswaku mi va vakwetsimi ni hinkwavo etindhawini hinkwato lava vitanaka vito ra Hosi ya hina Yesu Kreste,+ ku nga Hosi ya vona ni ya hina:
3 Onge mi nga va ni musa lowukulu ni ku rhula leswi humaka eka Xikwembu Tata wa hina ni le ka Hosi Yesu Kreste.
4 Nkarhi hinkwawo ndzi khensa Xikwembu xa mina hikwalaho ka n’wina. Ndzi xi khensa hikwalaho ka musa wa xona lowukulu lowu mi nyikiweke wona ha Kreste Yesu. 5 Mi nyikiwe swo tala hinkwalaho ka leswi mi nga ni vun’we na Kreste, ku katsa ni ku tiva rito ra Xikwembu ni ku vulavula kahle ha rona.+ 6 Hikuva mi tshembe vumbhoni lebyi vulavulaka hi Kreste,+ 7 leswaku mi nga pfumali nyiko ni yin’we loko ma ha ku rindzele hi mahlongati ku humelela ka Hosi ya hina Yesu Kreste.+ 8 Nakambe u ta mi tiyisa ku ya fika emakumu leswaku mi nga hehliwi hi siku ra Hosi ya hina Yesu Kreste.+ 9 Xikwembu lexi mi vitaneke leswaku mi va ni vun’we ni N’wana wa xona Yesu Kreste Hosi ya hina xa tshembeka.+
10 Kutani ndza mi khutaza vamakwerhu, hi vito ra Hosi ya hina Yesu Kreste leswaku hinkwenu mi vulavula hi ku twanana ni leswaku ku nga tshuki ku va ni ku avana exikarhi ka n’wina,+ kambe mi va ni vun’we lebyi heleleke emianakanyweni ni le ka ndlela leyi mi ehleketaka ha yona.+ 11 Hikuva van’wana endyangwini wa Klowe va ndzi byele leswaku ku ni timholovo exikarhi ka n’wina vamakwerhu. 12 Leswi ndzi vulaka swona hileswaku un’wana ni un’wana wa n’wina u ri: “Mina ndzi wa Pawulo,” un’wana a ku, “Mina ndzi wa Apolosi,”+ un’wanyana a ku, “Mina ndzi wa Khefasi,”* kasi un’wana a ku, “Mina ndzi wa Kreste.” 13 Xana Kreste u avanile? Xana Pawulo u dlayiwile emhandzini hikwalaho ka n’wina? Kumbe, xana mi khuvuriwe hi vito ra Pawulo ke? 14 Ndzi khensa Xikwembu leswi ndzi nga khuvulangiki munhu exikarhi ka n’wina handle ka Krispo+ na Gayo,+ 15 leswaku ku nga vi ni munhu loyi a nga vulaka leswaku mi khuvuriwe hi vito ra mina. 16 Ina, ndzi khuvule ni vandyangu wa Stefanasi.+ Loko ku ri lavan’wana hinkwavo, a ndzi swi tivi loko a ri kona loyi ndzi n’wi khuvuleke. 17 Hikuva Kreste a nga ndzi rhumanga ku khuvula kambe u ndzi rhume ku chumayela mahungu lamanene;+ ku nga ri hi mavulavulelo ya vutlhari, leswaku mhandzi ya nxaniso* ya Kreste yi nga vi ya hava.
18 Hikuva ku vulavula hi ku fa ka Kreste emhandzini ya nxaniso* i vuphukuphuku eka lava lovaka,+ kambe eka hina lava ponisiwaka i matimba ya Xikwembu.+ 19 Hikuva ku tsariwile: “Ndzi ta herisa vutlhari bya tintlhari naswona ndzi ta herisa* vutivi bya vanhu lava nga ni vutivi.”+ 20 U kwihi munhu wo tlhariha? U kwihi mutsari?* U kwihi mukaneti emisaveni leyi? Xana Xikwembu a xi endlanga vutlhari bya misava byi va vuphukuphuku? 21 Leswi vanhu va misava leyi va tshembaka vutlhari bya vona,+ a va xi tivi Xikwembu,+ kambe Xikwembu xi kombise vutlhari bya xona hi ku ponisa lava tshembaka rungula leri hi ri chumayelaka, leri vanhu va misava leyi va ri tekaka ku ri vuphukuphuku.+
22 Hikuva Vayuda va kombela masingita,+ kasi Magriki ma lava vutlhari; 23 kambe hina hi chumayela hi Kreste loyi a dlayiweke emhandzini, leswi eka Vayuda swi nga xivangelo xa ku khunguvanyeka kasi eka matiko i vuphukuphuku.+ 24 Hambiswiritano, eka lava vitaniweke, ku nga Vayuda ni Magriki, Kreste i matimba ya Xikwembu ni vutlhari bya Xikwembu.+ 25 Leswi vanhu va nge i vuphukuphuku bya Xikwembu swi tlharihe ku tlula vanhu ni leswi tsaneke swa Xikwembu swi ni matimba ku tlula vanhu.+
26 Vamakwerhu mi swi vonile leswaku loko mi vitaniwa hi Xikwembu, a va talanga lava tlhariheke hi ku ya hi vanhu,+ a va talanga lava nga ni matimba, a va talanga va le vuhosini,+ 27 kambe Xikwembu xi hlawule swiphukuphuku emisaveni leswaku xi ta khomisa lavo tlhariha tingana; naswona xi hlawule lava tsaneke emisaveni leswaku xi ta khomisa lava nga ni matimba tingana;+ 28 naswona Xikwembu xi hlawule lava tekiwaka va nga ri va nkoka emisaveni ni lava languteriwaka ehansi ni lava nga riki nchumu* leswaku xi ta herisa lava tekiwaka va ri va nkoka,*+ 29 leswaku ku nga vi na munhu* loyi a tibumaka emahlweni ka Xikwembu. 30 Kambe hikwalaho ka xona mi ni vun’we na Kreste Yesu, loyi eka hina a veke vutlhari lebyi humaka eka Xikwembu, ni ku lulama+ ni ku kwetsima+ ni ku tshunxiwa hi nkutsulo,+ 31 leswaku swi ta endleka hilaha ku tsariweke hakona: “Loyi a tibumaka, a a tibume hi Yehovha.”*+