Samuwele Wa Vumbirhi
23 Lawa i marito yo hetelela ya Davhida:+
“Marito ya Davhida n’wana wa Yese,+
Marito ya wanuna loyi a a tlakuseriwe ehenhla,+
Muhlawuriwa+ wa Xikwembu xa Yakobo,
Xilombe xa tinsimu+ ta Israyele.
2 Moya wa Yehovha a wu tirhisa mina ku vulavula;+
Rito rakwe a ri ri eririmini ra mina.+
3 Xikwembu xa Israyele xi vulavurile;
Ribye ra Israyele+ ri vulavule na mina ri ku:
‘Loko loyi a fumaka vanhu a lulamile,+
A fuma hi ku chava Xikwembu,+
4 Swi fana ni ku vonakala ka nimixo loko dyambu ri tlhava,+
Mixo lowu pfumalaka mapapa.
Swi fana ni ku vonakala loku vaka kona endzhaku ka mpfula,
Loku endlaka byanyi byi hluka emisaveni.’+
5 Xana yindlu ya mina a yi tano eka Xikwembu?
Hikuva xi endle ntwanano lowu nga heriki na mina,+
Wu hleriwe kahle naswona wu tiyisekisiwile.
Hikuva wu vula ku ponisiwa ka mina loku heleleke ni ntsako wa mina hinkwawo,
Sweswo hi swona swi endlaka leswaku xi wu katekisa.+
6 Kambe hinkwavo lava nga pfuniki nchumu va cukumetiwa+ ku fana ni swihlahla swa mitwa,
Hikuva a va nge khomiwi hi mavoko.
7 Loko munhu a va khumba,
U fanele a va a hlomile hi tlhari ra nsimbhi ni mbhinyi wa kona,
Va fanele va hisiwa va hela laha va nga kona.”
8 Lawa i mavito ya tinhenha ta matimba ta Davhida:+ Yoxebe-baxebete wa le Takimoni, ndhuna ya tinhenha tinharhu ta matimba.+ U tshame a dlaya vavanuna va 800 hi tlhari hi nkarhi wun’we. 9 Ku landzela Eliyazara+ n’wana wa Dodo,+ n’wana wa Ahohi, a a ri un’wana wa tinhenha tinharhu ta matimba leti a ti ri na Davhida loko va tlhontlha Vafilista. A va hlengeletane kwalaho va ta lwa nyimpi, kutani loko vavanuna va Israyele va tlhentlha, 10 u yime a ku tserhee, a dlaya Vafilista kukondza voko rakwe ri khoma hi vusindza hikwalaho ko khoma banga nkarhi wo leha.+ Yehovha u endle leswaku va hlula hi ndlela leyikulu siku rero;+ masocha ma vuyile ma ta phanga nhundzu eka lava dlayiweke.
11 Ku landzela Xamaha n’wana wa Agi wa le Harari. Vafilista va hlengeletane eLehi, laha a ku ri ni nsimu ya swinyawana; kutani vanhu va baleka hikwalaho ka Vafilista. 12 Kambe a yima exikarhi ka nsimu leyi, a yi sirhelela hi ku dlayetela Vafilista lerova Yehovha a va pfuna va hlula hi ndlela leyikulu.+
13 Vavanuna vanharhu eka tindhuna ta 30 va ye eka Davhida ebakweni ra Adulamu+ hi nkarhi wa ntshovelo, Vafilista a va dzime mixaxa eNkoveni wa Refayimi.+ 14 Hi nkarhi wolowo Davhida a a ri endhawini leyi swi tikaka ku yi fikelela+ naswona Vafilista a va dzime mixaxa eBetlehema. 15 Kutani Davhida a ku: “Ndzi navela ku nwa mati ya xihlovo lexi nga egedeni ya Betlehema!” 16 Hiloko tinhenha tinharhu ta matimba ti manyukuta ti nghena laha Vafilista a va dzime kona mixaxa, ti ya ka mati exihlobyeni lexi nga egedeni ya Betlehema, ti ya ma nyika Davhida; kambe a ala ku ma nwa kutani a ma halata emahlweni ka Yehovha.+ 17 A ku: “Yehovha, a hi swinene ku va ndzi endla leswi! Xana ndzi nga nwa ngati+ ya vavanuna lava vekeke vutomi bya vona ekhombyeni?” Xisweswo a nga pfumelanga ku ma nwa. Leswi i swilo leswi endliweke hi tinhenha ta yena tinharhu ta matimba.
18 Abixayi+ makwavo wa Yowabu, n’wana wa Seruya,+ a a ri ndhuna ya tinhenha tin’wana tinharhu; u tshame a dlaya vavanuna va 300 hi tlhari, a a dume ku fana ni tinhenha tinharhu ta matimba.+ 19 Hambileswi a a xiximeka ku tlula tinhenha letin’wana tinharhu naswona a a ri ndhuna ya tona, a a nga ringani hi xiyimo ni tinhenha letiya tinharhu to sungula.
20 Benaya+ n’wana wa Yoyada a a ri wanuna wa xivindzi naswona u endle swilo swo tala eKabizele.+ U dlaye vana vambirhi va Ariyele wa le Mowabu naswona u tshame a nghena exihlobyeni hi siku leri a ku ri ni gamboko a dlaya nghala.+ 21 U tlhele a dlaya wanuna wa Muegipta loyi a a ri xihontlovila. Hambileswi Muegipta loyi a a khome tlhari, Benaya u ye eka yena a khome nhonga, a fika a n’wi vutlela tlhari rakwe a n’wi dlaya hi rona. 22 Swilo leswi swi endliwe hi Benaya n’wana wa Yoyada naswona a a dume ku fana ni tinhenha letiya tinharhu ta matimba. 23 Hambileswi a a xiximeka ku tlula tinhenha leta 30, a a nga ringani hi xiyimo ni tinhenha tinharhu ta matimba. Hambiswiritano, Davhida u n’wi endle ndhuna ya varindzi vakwe.
24 Asahele+ makwavo wa Yowabu a a ri un’wana wa lava va 30: Elihanani n’wana wa Dodo wa le Betlehema,+ 25 Xamaha wa le Haroda, Elika wa le Haroda, 26 Helese+ wa le Pelete, Ira+ n’wana wa Ikexi wa le Tekowa, 27 Abi-ezere+ wa le Anathoti,+ Mebunayi wa le Huxa, 28 Zalmona wa le Ahowa, Maharayi+ wa le Netofa, 29 Helebe n’wana wa Bana wa le Netofa, Itayi n’wana wa Ribayi wa le Gibiya wa vana va Benjamini, 30 Benaya+ wa le Piratoni, Hidayi loyi a humaka emikoveni ya le Gaxi,+ 31 Abi-aliboni wa le Araba, Azamavhete wa le Bahurimi, 32 Eliyahaba wa le Xalabimi, vana va Yaxeni, Yonathani, 33 Xamaha wa le Harari, Ahiyamu n’wana wa Xarari wa le Harari, 34 Elifalete n’wana wa Ahasibayi n’wana wa Mukati, Eliyama n’wana wa Ahitofele+ wa le Gilo, 35 Hesiro wa le Karimeli, Parayi wa le Arabiya, 36 Igali n’wana wa Nathani wa le Soba, Bani wa le Gadi, 37 Seleke wa Muamoni, Naharayi wa le Beroti, murhwali wa matlhari ya Yowabu n’wana wa Seruya, 38 Ira wa le Itira, Garebe wa le Itira+ 39 na Uriya+ wa Muheti—hinkwavo a va ri 37.