118 Khensani Yehovha, hikuva hi lonene;+
Rirhandzu rakwe lerikulu a ri heli.
2 Israyele a a vule sweswi a ku:
“Rirhandzu rakwe lerikulu a ri heli.”
3 Vandyangu wa Aroni a va vule sweswi va ku:
“Rirhandzu rakwe a ri heli.”
4 Lava chavaka Yehovha a va vule sweswi va ku:
“Rirhandzu rakwe lerikulu a ri heli.”
5 Ndzi vitane Yehovha loko ndzi ri emaxangwini;
Yehovha u ndzi hlamurile kutani a ndzi yisa laha ku hlayisekeke.+
6 Yehovha u le kusuhi na mina; a ndzi nge chavi.+
Xana munhu a nga ndzi endla yini?+
7 Yehovha u le kusuhi na mina leswaku a ta ndzi pfuna;+
Ndzi ta swi vona loko lava ndzi vengaka va hluriwa.+
8 Swa antswa ku tumbela eka Yehovha
Ku ri ni ku tshembela eka vanhu.+
9 Swa antswa ku tumbela eka Yehovha
Ku ri ni ku tshembela eka tihosana.+
10 Matiko hinkwawo ma ndzi rhendzerile,
Kambe ndzi ma hlurile
Hi vito ra Yehovha.+
11 A ma ndzi rhendzerile, a ndzi rhendzeriwe matlhelo hinkwawo,
Kambe ndzi ma hlurile
Hi vito ra Yehovha.
12 A ma ndzi rhendzerile onge i tinyoxi,
Kambe ma herisiwe hi ku hatlisa ku fana ni mitwa loko yi tshwa hi ndzilo.
Ndzi ma hlurile
Hi vito ra Yehovha.+
13 Ndzi susumetiwe hi matimba leswaku ndzi wa,
Kambe Yehovha u ndzi pfunile.
14 Yehovha i vutumbelo ni matimba ya mina,
Naswona u ndzi ponisile.+
15 Ku twala mikulungwana ni ku khana
Ematendeni ya lavo lulama.
Voko ra Yehovha ra xinene ri kombisa matimba ya rona.+
16 Voko ra Yehovha ra xinene ri tlakukile;
Voko ra Yehovha ra xinene ri kombisa matimba ya rona.+
17 A ndzi nge fi, e-e, ndzi ta hanya,
Leswaku ndzi ta twarisa mitirho ya Yehovha.+
18 Yehovha u ndzi xupule hi ndlela yo vava,+
Kambe a nga ndzi tshikanga ndzi fa.+
19 Ndzi pfuleleni tigede to lulama;+
Ndzi ta nghena ndzi dzunisa Yehovha.
20 Leyi i gede ya Yehovha.
Lavo lulama va ta nghena ha yona.+
21 Ndzi ta ku dzunisa, hikuva u ndzi hlamurile+
Naswona u ndzi ponisile.
22 Ribye leri vaaki va nga ri nyenya
Hi rona ri veke ribye ra nkoka swinene.+
23 Ri huma eka Yehovha;+
Ra hi hlamarisa.+
24 Leri i siku leri endliweke hi Yehovha;
Hi ta tsaka, hi khana hi siku leri.
25 Yehovha, hi kombela u hi ponisa!
Yehovha, hi kombela u hi pfuna hi hlula!
26 U katekile loyi a taka hi vito ra Yehovha;+
Ha mi katekisa hi ri endlwini ya Yehovha.
27 Yehovha i Xikwembu;
U hi nyika ku vonakala.+
Longolokani ni lava yaka enkhubyeni, mi khome marhavi,+
Ku ya fika etimhondzweni ta altari.+
28 U Xikwembu xa mina, ndzi ta ku dzunisa;
Xikwembu xanga, ndzi ta ku tlakusa.+
29 Khensani Yehovha,+ hikuva hi lonene;
Rirhandzu rakwe a ri heli.+