Samuwele Wo Sungula
16 Eku heteleleni Yehovha a ku eka Samuwele: “Xana u ta rilela Sawulo+ ku fikela rini leswi ndzi n’wi bakanyeke leswaku a nga ha vi hosi eIsrayele?+ Tata rimhondzo ra wena hi mafurha+ u famba. Ndzi ta ku rhuma eka Yese+ lowa le Betlehema, hikuva ndzi tihlawulele hosi exikarhi ka vana vakwe.”+ 2 Kambe Samuwele a ku: “Ndzi ta fambisa ku yini? Loko Sawulo o swi twa, u ta ndzi dlaya.”+ Yehovha a ku: “Teka rhole u famba na rona u ta fika u ku, ‘Ndzi tele ku ta endlela Yehovha gandzelo.’ 3 Rhamba Yese egandzelweni; kutani ndzi ta ku byela leswi u faneleke u swi endla. U fanele u tota loyi ndzi nga ta ku komba yena hi mafurha.”+
4 Hiloko Samuwele a endla leswi Yehovha a swi vuleke. Loko a fika eBetlehema,+ vakulukumba va muti a va rhurhumela loko va hlangana na yena, kutani va ku: “Xana u te hi leswinene?” 5 Hiloko a ku: “Ndzi te hi leswinene. Ndzi tele ku ta endlela Yehovha gandzelo. Tibasiseni, mi ya na mina egandzelweni.” Kutani a basisa Yese ni vana vakwe, endzhaku ka sweswo a va vitana va ya egandzelweni. 6 Loko va nghena a vona Eliyabu,+ kutani a ku: “Hakunene loyi hi yena loyi a hlawuriweke hi Yehovha.” 7 Kambe Yehovha a ku eka Samuwele: “U nga languti xivumbeko xa yena kumbe ku leha ka yena,+ hikuva ndzi n’wi bakanyile. Hikuva Xikwembu a xi voni hi ndlela leyi munhu a vonaka ha yona, munhu u vona ntsena leswi voniwaka hi matihlo, kambe Yehovha u vona leswi nga embilwini.”+ 8 Hiloko Yese a vitana Abinadaba+ a n’wi hundzisa emahlweni ka Samuwele, kambe a ku: “Na yena loyi, Yehovha a nga n’wi hlawulanga.” 9 Endzhaku ka sweswo, Yese a tisa Xamaha,+ kambe yena a ku: “Na yena loyi, Yehovha a nga n’wi hlawulanga.” 10 Kutani Yese a hundzisa vana vakwe va nkombo emahlweni ka Samuwele, kambe Samuwele a byela Yese a ku: “Yehovha a nga hlawulanga munhu eka lava.”
11 Eku heteleleni Samuwele a vutisa Yese a ku: “Xana lava hi vona ntsena vana va wena va majaha?” A hlamula a ku: “Ku sale lontsongo+ eka hinkwavo; u le ku riseni ka tinyimpfu.”+ Samuwele a byela Yese a ku: “A landziwe hikuva a hi nge tshami ehansi hi dya a nga si fika laha.” 12 Hiloko a rhumela vanhu va n’wi landza. Yena a a ri jaha ro xonga ra matihlo yo saseka.+ Kutani Yehovha a ku: “Suka u yima, n’wi tote, hikuva loyi hi yena!”+ 13 Hikwalaho Samuwele a teka rimhondzo ra mafurha+ a n’wi chela, vamakwavo va langutile. Kutani moya wa Yehovha wu sungula ku tirha eka Davhida ku sukela siku rero ku ya emahlweni.+ Endzhakunyana ka nkarhi, Samuwele a khoma ndlela a ya eRhama.+
14 Moya wa Yehovha a wu sukile eka Sawulo,+ kutani moya wo biha wa Yehovha wu n’wi xanisa.+ 15 Malandza ya Sawulo ma ku eka yena: “Wa swi vona leswaku moya wo biha lowu humaka eka Xikwembu wa ku xanisa. 16 Hi kombela hosi ya hina yi lerisa malandza ya yona ku ya yi lavela munhu loyi a nga ni vuswikoti byo chaya haripa.+ Loko moya wo biha lowu humaka eka Xikwembu wu ta eka wena, u ta yi chaya, kutani u ta titwa kahle.” 17 Xisweswo Sawulo a byela malandza yakwe a ku: “Ndzi kombela mi ndzi lavela munhu loyi a nga ni vuswikoti byo chaya, mi n’wi tisa eka mina.”
18 Un’wana wa vatirhi a ku: “Ndzi vone ndlela leyi n’wana wa Yese lowa le Betlehema a nga ni vuswikoti byo chaya ha yona, i nhenha leyi nga ni xivindzi ni matimba.+ A nga tilumalumi loko a vulavula, u sasekile+ naswona Yehovha u na yena.”+ 19 Hiloko Sawulo a rhumela vanhu eka Yese, a ku: “Ndzi rhumelele n’wana wa wena Davhida, loyi a risaka ntlhambi.”+ 20 Yese a teka xinkwa, gula ra vhinyo leri endliweke hi dzovo ni ximbutana a swi tlhandleka ehenhla ka mbhongolo, a swi rhumela eka Sawulo swi famba na n’wana wa yena Davhida. 21 Kavaloko Davhida a sungula ku tirhela Sawulo.+ Sawulo a n’wi rhandza swinene, a va mukhomi wa matlhari yakwe. 22 Sawulo a rhumela rito eka Yese a ku: “Ndzi kombela leswaku Davhida a ya emahlweni a ndzi tirhela, hikuva wa ndzi tsakisa swinene.” 23 Loko moya wo biha lowu humaka eka Xikwembu wu ta ehenhla ka Sawulo, Davhida a a teka haripa a yi chaya naswona Sawulo a a chaveleleka a titwa kahle, kutani moya wo biha a wu suka eka yena.+