Ezekiyele

37 Ndzi twe matimba* ya Yehovha ma ri eka mina, kutani Yehovha a ndzi tlakula hi moya wa yena, a ndzi veka endhawini leyi nga rivala+ naswona a yi tele hi marhambu. 2 A ndzi hundzisa ekusuhi na wona, kutani ndzi vona ku ri ni marhambu yo tala swinene endhawini leyi nga rivala naswona a ma ome ngopfu.+ 3 A ndzi vutisa a ku: “N’wana wa munhu, xana marhambu lawa ma nga tlhela ma hanya?” Hiloko ndzi ku: “Yehovha Hosi Leyi Tlakukeke, hi wena u swi tivaka.”+ 4 A ku eka mina: “Profeta mayelana ni marhambu lawa, u ku eka wona, ‘N’wina marhambu lama omeke, yingisani leswi Yehovha a swi vulaka:

5 “‘Yehovha Hosi Leyi Tlakukeke u byela marhambu lawa a ku: “Ndzi ta nghenisa moya eka n’wina, mi ta tlhela mi hanya.+ 6 Ndzi ta nghenisa misiha ni nyama eka n’wina, ndzi ta mi nameka nhlonge, ndzi ta nghenisa moya eka n’wina, mi ta tlhela mi hanya; kutani mi ta swi tiva leswaku hi mina Yehovha.”’”

7 Hiloko ndzi profeta hilaha ndzi lerisiweke hakona. Endzhaku ka loko ndzi profetile ku twakale mpfumawulo wa ku ketlaketla ka marhambu, marhambu ma sungula ku hlangana. 8 Ndzi vona ya va ni misiha ni nyama, ma funengetiwa hi nhlonge. Kambe a ma nga hefemuli.

9 A ku eka mina: “Profeta eka moya. Profeta n’wana wa munhu, u byela moya u ku, ‘Yehovha Hosi Leyi Tlakukeke u ri: “Wena moya hunga u huma eka timheho ta mune, u nghena eka vanhu lava a va dlayiwile leswaku va tlhela va hanya.”’”

10 Hiloko ndzi profeta hilaha a ndzi leriseke hakona, kutani moya wu nghena eka vona va sungula ku hanya, va yima hi milenge,+ a va ri vuthu lerikulu ngopfu ra nyimpi.

11 A ku eka mina: “N’wana wa munhu, marhambu lawa i vanhu hinkwavo va Israyele.+ Vona va ri, ‘Marhambu ya hina ma omile, a ha ha ri na ntshembo.+ Hi hambanisiwile ni vanhu van’wana.’ 12 Hikwalaho profeta u ku eka vona, ‘Yehovha Hosi Leyi Tlakukeke u ri: “Ndzi ta pfula masirha+ ya n’wina, ndzi ta mi humesa eka wona n’wina vanhu va mina, ndzi mi tisa etikweni ra Israyele.+ 13 Mi ta swi tiva leswaku hi mina Yehovha loko ndzi pfula masirha ya n’wina niloko ndzi mi humesa eka wona, n’wina vanhu va mina.”’+ 14 ‘Ndzi ta nghenisa moya wa mina eka n’wina, mi ta tlhela mi hanya,+ ndzi ta mi tshamisa etikweni ra n’wina; kutani mi ta swi tiva leswaku mina Yehovha, ndzi swi vurile naswona ndzi swi endlile,’ ku vula Yehovha.”

15 Yehovha a tlhela a vulavula na mina a ku: 16 “Wena n’wana wa munhu, teka nhonga u tsala ehenhla ka yona u ku, ‘Ya Yuda ni Vaisrayele hinkwavo lava nga na yena.’*+ Kutani u teka nhonga yin’wana u tsala ehenhla ka yona u ku, ‘Ya Yosefa, ku nga nhonga leyi fanekiselaka Efrayimi ni yindlu hinkwayo ya Israyele leyi nga na yena.’*+ 17 Ti khome u ti hlanganisa ti va nhonga yin’we evokweni ra wena.+ 18 Loko vanhu varikwenu va ku eka wena, ‘Hi byele leswaku swilo leswi swi vula yini,’ 19 va byele u ku, ‘Yehovha Hosi Leyi Tlakukeke u ri: “Ndzi ta teka nhonga ya Yosefa leyi nga evokweni ra Efrayimi ni tinyimba ta Israyele leti nga na yena, ndzi ta va hlanganisa ni nhonga ya Yuda; ndzi ta va endla nhonga yin’we,+ va ta va nchumu wun’we evokweni ra mina.”’ 20 Tinhonga leti u tsalaka ehenhla ka tona u fanele u ti khoma hi voko leswaku va ta ti vona.

21 “Kutani u va byela u ku, ‘Yehovha Hosi Leyi Tlakukeke u ri: “Ndzi ta teka Vaisrayele exikarhi ka matiko lawa va yeke eka wona, ndzi ta va hlengeleta ematlhelweni hinkwawo, ndzi va tisa etikweni ra vona.+ 22 Ndzi ta va endla rixaka rin’we etikweni leri,+ etintshaveni ta Israyele, hinkwavo va ta fumiwa hi hosi yin’we,+ a va nge he vi tinxaka timbirhi; naswona a va nge he vi mifumo yimbirhi.+ 23 A va nge he tithyakisi hi swikwembu swa vona leswi nyenyetsaka* ni hi mikhuva ya vona leyi nyangatsaka ni hi swidyoho swa vona.+ Ndzi ta va ponisa eka ku nga tshembeki ka vona loku endleke leswaku va dyoha, ndzi ta va basisa. Va ta va vanhu va mina kutani mina ndzi ta va Xikwembu xa vona.+

24 “‘“Nandza wa mina Davhida u ta va hosi ya vona+ naswona hinkwavo va ta va ni murisi un’we.+ Va ta yingisa swiboho swa mina swa vuavanyisi ni milawu ya mina.+ 25 Va ta tshama etikweni leri ndzi ri nyikeke nandza wa mina Yakobo laha vakokwa wa n’wina va tshameke kona,+ va ta tshama ni vana* va vona swin’we ni vatukulu+ va vona eka rona hilaha ku nga heriki;+ naswona nandza wa mina Davhida u ta va ndhuna* ya vona hilaha ku nga heriki.+

26 “‘“Ndzi ta endla ntwanano wo va ni ku rhula na vona;+ wu ta va ntwanano lowu nga heriki na vona. Ndzi ta va lunghisela ndhawu ndzi va endla va andza+ naswona ndzi ta veka ndhawu ya mina yo kwetsima exikarhi ka vona hilaha ku nga heriki. 27 Tende* ra mina ri ta va na* vona, ndzi ta va Xikwembu xa vona kutani vona va ta va vanhu va mina.+ 28 Matiko ma ta swi tiva leswaku mina Yehovha, ndzi kwetsimisa Israyele loko ndhawu ya mina yo kwetsima yi ri exikarhi ka vona hilaha ku nga heriki.”’”+