Mikiya

3 Ndzi te: “Ndzi kombela mi yingisa n’wina varhangeri va Yakobo

Na n’wina tindhuna ta yindlu ya Israyele.+

 2 Kambe mi venga leswinene+ mi rhandza leswo biha;+

Mi yevula nhlonge ya vanhu va mina mi susa ni nyama eka marhambu ya vona.+

 3 Mi tlhela mi dya nyama ya vanhu va mina,+

Mi yevula ni nhlonge ya vona,

Mi pfotlosa marhambu ya vona ma va swiphemuphemu,+

Ku fana ni leswi swekiwaka embiteni, ku fana ni nyama embiteni yo sweka ha yona.

 4 Hi nkarhi wolowo va ta kombela mpfuno eka Yehovha,

Kambe a nge va hlamuli.

Enkarhini wolowo u ta va fularhela,+

Hikwalaho ka mitirho ya vona yo biha.+

 5 Yehovha u vula leswi eka vaprofeta lava hambukisaka vanhu va mina,+

Lava nge ‘Ku rhula,’+ loko va nyikiwa swakudya,+

Kambe loko munhu a nga va nyiki nchumu va pfuxa nyimpi:

 6 ‘Mi ta va ni munyama;+ a ku nge vi ni xivono;+

Ku ta va ku lo dzwii, a mi nge koti ku hlahluva.

Vaprofeta va ta peleriwa hi dyambu,

Nhlikanhi wu ta hundzuka munyama eka vona.+

 7 Lava vonaka swivono va ta khomiwa hi tingana,+

Lava vhumbhaka va ta nyuma.

Hinkwavo ka vona va ta boheka ku tipfala milomo,*

Hikuva ku hava nhlamulo leyi humaka eka Xikwembu.’”

 8 Mina ndzi nyikiwe matimba hi moya wa Yehovha,

Ni vululami ni xivindzi,

Leswaku ndzi byela Yakobo ku xandzuka ka yena na Israyele xidyoho xakwe.

 9 Ndzi kombela mi yingisa leswi, n’wina varhangeri va yindlu ya Yakobo

Na n’wina tindhuna ta yindlu ya Israyele,+

N’wina lava vengaka vululami ni lava va cincaka hinkwaswo leswinene,+

10 Lava akaka muti wa Siyoni hi ku halata ngati na Yerusalema hi leswi nga lulamangiki.+

11 Varhangeri va wona va pfumela ku xaviwa ehubyeni,+

Vaprista va wona va lava ku holeriwa+ loko va dyondzisa,

Ni vaprofeta va wona va hlahluva leswaku va kuma mali.+

12 Siyoni u ta rimiwa ku fana ni nsimu,

Hikwalaho ka n’wina,

Yerusalema u ta va ndhundhuma ya marhumbi,+

Ntshava ya Yindlu* ya Xikwembu yi ta fana ni tindhawu leti tlakukeke ekhwatini.+