Vakolosa
4 N’wina vini va mahlonga, khomani mahlonga ya n’wina hi ndlela yo lulama ni leyinene, mi ri karhi mi swi tiva leswaku na n’wina mi ni N’wini etilweni.+
2 Phikelelani exikhongelweni,+ mi nga rivali ku khongela, mi endla tano mi ri karhi mi khensa.+ 3 Hi nkarhi lowu fanaka, na hina hi khongeleleni+ leswaku Xikwembu xi ta hi pfulela nyangwa ya leswaku hi chumayela rito ni ku vula xihundla xo kwetsima hi Kreste, lexi ndzi nga ekhotsweni hikwalaho ka xona,+ 4 leswaku ndzi ta xi hlamusela kahle hilaha ndzi faneleke ndzi endla hakona.
5 Yanani emahlweni mi hanya hi vutlhari loko mi ri ni vanhu lava nga riki swirho swa vandlha, mi wu tirhisa kahle nkarhi wa n’wina.*+ 6 Marito ya n’wina a ma ve ni nsovo nkarhi hinkwawo, ma lungiwe hi munyu+ leswaku mi ta tiva ndlela leyi mi faneleke ku hlamula munhu un’wana ni un’wana ha yona.+
7 Tixiko,+ makwerhu loyi a rhandzekaka, nandza wo tshembeka ni mutirhikulorhi eHosini, u ta mi byela timhaka hinkwato ha mina. 8 Ndzi n’wi rhuma eka n’wina, mi ta swi tiva leswaku hi pfuke njhani ni leswaku a ta mi chavelela. 9 U ta na Onesima,+ makwerhu loyi a tshembekaka no rhandzeka, loyi a humaka endhawini ya ka n’wina; va ta mi byela swilo hinkwaswo leswi endlekaka haleno.
10 Aristako,+ mubohiwakulorhi wa mi rungula na Marka+ xaka ra Barnaba wa mi rungula (loyi mi kumeke swiletelo swo n’wi amukela+ loko a ta eka n’wina), 11 na Yesu loyi a vuriwaka Yusto, loyi a nga un’wana wa lava yimbeke. Lava hi vona ntsena lava nga vatirhikulorhi eMfun’weni wa Xikwembu naswona va ndzi chavelerile swinene. 12 Epafrasi+ nandza wa Kreste Yesu loyi a humaka endhawini ya ka n’wina wa mi rungula. Nkarhi hinkwawo wa mi khongelela hi mbilu hinkwayo, leswaku mi ta va lava wupfeke, mi tshemba swilo hinkwaswo leswi fambisanaka ni ku rhandza ka Xikwembu. 13 Ndza mi tiyisekisa leswaku u tirha hi matimba hikwalaho ka n’wina ni hikwalaho ka lava nga eLawodikiya ni le Hiyerapoli.
14 Luka,+ dokodela* loyi a rhandzekaka wa mi rungula na Demasi+ wa mi rungula. 15 Ndzi runguleleni vamakwerhu lava nga eLawodikiya na makwerhu wa xisati Nimfa ni vandlha leri hlanganaka endlwini yakwe.+ 16 Loko mi hetile ku hlaya papila leri, ri rhumeleni evandlheni ra Valawodikiya leswaku ri ya hlayiwa+ na n’wina mi hlaya leri humaka eLawodikiya. 17 Nakambe byelani Arkipo+ mi ku: “Tshama u ri karhi u tirha hi matimba leswaku u heta ntirho lowu u nyikiweke wona hi Hosi.”
18 Hi lawa marungula ya mina Pawulo, lama tsariweke hi voko ra mina.+ Mi nga rivali leswaku ndzi le khotsweni.+ Musa lowukulu wa Xikwembu a wu ve na n’wina.