Pfuna Van’wana Leswaku Va Famba Hi Mukhuva Lowu Fanelaka Eka Yehovha

“[A] hi [tshikangi] ku mi khongelela ni ku kombela leswaku mi . . . famba hi mukhuva lowu fanelaka eka Yehovha leswaku mi n’wi tsakisa hi ku helela mi ri karhi mi veka mihandzu entirhweni wun’wana ni wun’wana lowunene.”—VAKOLOSA 1:9, 10.

1, 2. I yini lexi ngopfu-ngopfu xi nga vaka xihlovo xa ntsako ni ku eneriseka?

“HI TSHAMA epurasini ekharavhanini. Hi ku hanya vutomi byo olova, hi va ni nkarhi lowu engetelekeke wo byela vanhu mahungu lamanene. Hi katekisiwe swinene hi lunghelo ro pfuna vanhu vo tala leswaku va nyiketela vutomi bya vona eka Yehovha.”—Mpatswa lowu tekaneke, vatirheli va nkarhi hinkwawo va le Afrika Dzonga.

² Xana a wu pfumelelani na swona leswaku ku pfuna van’wana swi tisa ntsako? Van’wana nkarhi ni nkarhi va ringeta ku pfuna lava vabyaka, lava pfumalaka, kumbe lava nga ni xivundza—naswona va eneriseka loko va endla sweswo. Vakreste va ntiyiso va tiyiseka leswaku loko va avelana ni van’wana vutivi bya Yehovha Xikwembu na Yesu Kreste, hi yona ndlela leyikulu ngopfu leyi va nga va pfunaka ha yona. Hi wona ntsena ntirho lowu nga endlaka leswaku van’wana va amukela nkutsulo wa Yesu, va aka vuxaka lebyinene ni Xikwembu ivi va fanelekela ku kuma vutomi lebyi nga heriki.—Mintirho 3:19-21; 13:48.

 3. I mpfuno wa muxaka muni lowu lavaka nyingiso wa hina?

³ Hambiswiritano, ku vuriwa yini hi ku pfuna lava ana se va tirhelaka Xikwembu, lava va landzelaka “Ndlela”? (Mintirho 19:9) A swi kanakanisi leswaku u va tsakela ngopfu, kambe swi nga ha endleka u nga tivi leswaku u nga va pfunisa ku yini hilaha ku engetelekeke. Kumbe xiyimo xa wena xi nga ha vonaka xi ku sivela leswaku u va pfuna hilaha u rhandzaka hakona, xisweswo xi ku sivela ku kuma ku eneriseka lokukulu. (Mintirho 20:35) Hi nga dyondza swo karhi eka buku ya Vakolosa malunghana ni tinhla leti timbirhi.

 4. (a) Xana Pawulo u tsalele Vakolosa a ri ehansi ka xiyimo xihi? (b) Epafrasi u katseke njhani?

⁴ Loko muapostola Pawulo a tsalela Vakreste va le Kolosa, a a ri eRhoma a pfaleriwile ekaya, hambileswi a a pfumeleriwa ku va ni vaendzi. Hilaha u nga swi langutelaka hakona, Pawulo u tirhise ntshunxeko wa yena lowu pimiweke leswaku a chumayela hi Mfumo wa Xikwembu. (Mintirho 28:16-31) Vakreste-kulobye a va pfumeleriwa ku endzela Pawulo, kumbexana van’wana va vona a va khotsiwe na yena minkarhi yin’wana. (Vakolosa 1:7, 8; 4:10) Un’wana wa vona a ku ri muevhangeli la hisekaka, Epafrasi la humaka emutini wa Kolosa eFrigiya, evuxeni bya rivala ra ntshava ya Efesa le Asia Minor (eTurkey ya manguva lawa). Epafrasi u tirhe swinene eku simekiweni ka vandlha ra le Kolosa, naswona u pfune mavandlha ya le kusuhi ya Lawodikiya na Hiyerapoli. (Vakolosa 4:12, 13) Ha yini Epafrasi a a ye eRhoma a ya vona Pawulo, naswona hi nga dyondza yini eka ndlela leyi Pawulo a anguleke ha yona?

Mpfuno Lowu Tirhaka Eka Vakolosa

 5. Ha yini Pawulo a tsalele Vakolosa?

⁵ Leswaku a ya kanela na Pawulo hi swiyimo swa le vandlheni ra le Kolosa, Epafrasi u teke riendzo ro nonon’hwa a ya eRhoma. U n’wi vikele hi ta ripfumelo, rirhandzu ni matshalatshala ya Vakreste volavo yo twarisa evhangeli. (Vakolosa 1:4-8) Kambe, u fanele a n’wi byela ni hi ku karhateka ka yena malunghana ni minkucetelo yo biha leyi xungetaka vumoya bya Vakolosa. Pawulo u angule hi ku tsala papila leri huhuteriweke leri a ri lwisana ni malangutelo man’wana lawa a ma hangalasiwa hi vadyondzisi va mavunwa. U kandziyise swinene xiphemu lexikulu lexi hetisisiwaka hi Yesu Kreste.a Xana mpfuno wa yena a wo kandziyisa mintiyiso leyikulu ya Bibele ntsena? A a ta va pfuna hi ndlela yihi Vakolosa, naswona i tidyondzo tihi leti hi nga ti dyondzaka malunghana ni ku pfuna van’wana?

 6. I yini lexi Pawulo a xi kandziyiseke eka papila ra yena leri yaka eka Vakolosa?

⁶ Loko a sungula papila ra yena, Pawulo u hlamusele muxaka wa mpfuno lowu hi nga ha wu honisaka. Leswi Pawulo na Epafrasi a va ri ekule swinene na le Kolosa, va nyikele mpfuno lowu tirhaka lowu humaka ekule. Pawulo u te: “Hi nkhensa Xikwembu Tata wa Hosi ya hina Yesu Kreste minkarhi hinkwayo loko hi mi khongelela [nhlamuselo ya le hansi, “hi khongela minkarhi hinkwayo”].” Ina, leswi a swi ri swikhongelo leswi kongomeke leswi a swi endleriwa Vakreste va le Kolosa. Pawulo u engeterile: “Hi yona mhaka leyi hina, ku sukela esikwini leri hi tweke ha rona, hi nga tshikangiki ku mi khongelela ni ku kombela leswaku mi tala vutivi lebyi kongomeke bya ku rhandza ka xona hi vutlhari hinkwabyo ni ku twisisa ka moya.”—Vakolosa 1:3, 9.

7, 8. Swikhongelo swa hina hi hexe ni leswi endleriwaka vandlha hakanyingi swi katsa timhaka tihi?

⁷ Ha swi tiva leswaku Yehovha i “Mutwi wa xikhongelo,” kutani hi nga tshemba ku lunghekela ka yena ku twa swikhongelo swa hina leswi endliwaka hi ku pfumelelana ni ku rhandza ka yena. (Pisalema 65:2; 86:6; Swivuriso 15:8, 29; 1 Yohane 5:14) Kambe, loko hi khongelela van’wana, swikhongelo swa hina swi njhani?

⁸ Hakanyingi hi nga ha ehleketa hi ‘nhlengeletano hinkwayo ya vamakwerhu emisaveni’ hi tlhela hi yi khongelela. (1 Petro 5:9) Kumbe hi nga ha tshinelela Yehovha hi xikhongelo malunghana ni Vakreste ni van’wana lava nga endhawini leyi hlaseriweke hi mhangu kumbe khombo ro karhi. Loko vadyondzisiwa va lembe-xidzana ro sungula va le tindhawini tin’wana va twe leswaku mhisi yi tlakule tshuri eYudiya, va fanele va va khongelele swinene vamakwavo niloko va nga si rhumela mali yo phalala ha yona. (Mintirho 11:27-30) Enkarhini wa hina, eminhlanganweni ya Vukreste ku khongeleriwa nhlengeletano hinkwayo kumbe ntlawa lowukulu wa vamakwerhu, laha vo tala va faneleke va twisisa leswi vuriwaka ivi va kota ku vula va ku, “Amen.”—1 Vakorinto 14:16.

Bana Nhloko Ya Mhaka eXikhongelweni

9, 10. (a) I swikombiso swihi leswi kombisaka leswaku ku khongelela vanhu vo karhi swa fanela? (b) Pawulo a a khongeleriwa njhani hi ndlela yo hlawuleka?

⁹ Kambe, Bibele yi hi nyika swikombiso swa swikhongelo swa van’wana lava a va ba nhloko ya mhaka, va boxa vanhu vo karhi. Anakanya hi marito ya Yesu lama tsariweke eka Luka 22:31, 32. A a ri swin’we ni vaapostola vo tshembeka va 11. Hinkwavo a va ta lava nseketelo wa Xikwembu eminkarhini yo nonon’hwa leyi a yi ta va kona, kutani Yesu u va khongelerile. (Yohane 17:9-14) Hambiswiritano, Yesu u boxe vito ra Petro, a n’wi kombelela hi ku hlawuleka. Swikombiso swin’wana hi leswi: Elixa u khongele leswaku Xikwembu xi pfuna munhu wo karhi, mutirhi wa yena. (2 Tihosi 6:15-17) Muapostola Yohane u khongelele Gayo leswaku a hambeta a hanya kahle hi tlhelo ra nyama ni ra moya. (3 Yohane 1, 2) Kasi swikhongelo swin’wana a swi vulavula hi mintlawa yo karhi.—Yobo 42:7, 8; Luka 6:28; Mintirho 7:60; 1 Timotiya 2:1, 2.

¹⁰ Mapapila ya Pawulo ma kandziyisa mhaka ya swikhongelo swo karhi leswi kongomeke. U kombele leswaku va n’wi khongelela kumbe va khongelela yena ni vanakulobye vakwe. Vakolosa 4:2, 3 yi hlayekisa xileswi: “Phikelelani exikhongelweni, mi tshama mi hiteka eka xona hi ku nkhensa, hi nkarhi lowu fanaka mi hi khongelela na hina, leswaku Xikwembu xi hi pfulela nyangwa ya marito, leswaku hi vula xihundla xo kwetsima hi ta Kreste, lexi entiyisweni ndzi nga etimpecanini ta khotso hikwalaho ka xona.” Nakambe anakanya hi swikombiso leswi: Varhoma 15:30; 1 Vatesalonika 5:25; 2 Vatesalonika 3:1; Vaheveru 13:18.

 11. Loko a ri eRhoma, xana Epafrasi a a khongelela vamani?

¹¹ A swi ri tano ni hi nakulobye wa Pawulo eRhoma. “Epafrasi, loyi a humaka exikarhi ka n’wina, . . . wa mi rungula, nkarhi hinkwawo u tikarhatela n’wina eswikhongelweni swakwe.” (Vakolosa 4:12) Rito leri hundzuluxeriweke ri va “tikarhatela” ri nga ha vula “ku kayakaya,” ku fana ni mutlangi wa le mintlangwini ya khale. Xana Epafrasi a a khongela hi mbilu hinkwayo malunghana ni ntlawa wa vapfumeri va le misaveni hinkwayo kumbe a a khongelela ni vagandzeri va ntiyiso va le Asia Minor hinkwaro ntsena? Pawulo u kombise leswaku Epafrasi a a khongelela lava a va ri eKolosa hi ku hlawuleka. Epafrasi a a xi tiva xiyimo xa vona. A hi ma tivi mavito ya vona hinkwavo, naswona a hi swi tivi swiphiqo leswi a va langutane na swona, kambe anakanya hi swin’wana leswi a swi va karhata. Kumbexana Lino lontsongo a a lwisana ni nkucetelo wa filosofi leyi a a yi tolovelekile, kasi Rhufasi swi nga ha endleka a a lava matimba ya ku lwisana ni ku tlhelela eka mikhuva ya yena ya khale ya Vuyuda. Leswi Persida a a ri ni nuna la nga riki mupfumeri, xana a a fanele a tiyisela a tlhela a va ni vutlhari byo kurisa vana va yena eHosini, kasi Asinkrito, loyi a a xanisiwa hi vuvabyi lebyi dlayaka, xana a a lava nchavelelo lowu engetelekeke? Ina, Epafrasi a a va tiva lava a va ri evandlheni ra rikwavo, naswona u va khongelele swi huma embilwini hikuva yena na Pawulo a va lava leswaku vanhu vo tano lava tinyiketeleke va famba hi mukhuva lowu fanelaka eka Yehovha.

 12. Hi yihi ndlela leyi hi nga ha yi tirhisaka yo boxa mavito eswikhongelweni swa hina hi hexe?

¹² Xana wa xi vona xikombiso lexi hi nga na xona—ndlela yo pfuna van’wana? Hilaha swi xiyiweke hakona, swikhongelo leswi endliwaka eminhlanganweni ya Vukreste hakanyingi a swi boxi mavito ya vanhu, hikwalaho ka leswi ku nga ni vayingiseri vo hambana-hambana. Kambe eswikhongelweni swa hina hi hexe kumbe swa ndyangu hi nga boxa hi ku kongoma. Loko minkarhi yin’wana hi kombela Xikwembu leswaku xi kongomisa ni ku katekisa valanguteri lava famba-fambaka hinkwavo kumbe varisi va moya, xana minkarhi yin’wana a hi nge boxi vito hi ku kongoma? Hi xikombiso, ha yini u nga n’wi boxi hi vito exikhongelweni mulanguteri la famba-fambaka loyi a endzeleke vandlha ra ka n’wina kumbe mufambisi wa Dyondzo ya Buku ya Vandlha ra ka n’wina? Vafilipiya 2:25-28 na 1 Timotiya 5:23 ti kombisa ku karhateka ka Pawulo hi rihanyo ra Timotiya na Epafrodito. Xana na hina hilaha ku fanaka hi nga va boxa hi mavito vanhu lava vabyaka lava hi va tivaka?

 13. Hi le hansi ka swiyimo swa muxaka muni laha hi nga katsaka timhaka leti fanelaka eswikhongelweni swa munhu hi xiyexe?

¹³ I ntiyiso, hi fanele hi papalata ku nghena-nghena timhaka ta vanhu, kambe swi fanerile leswaku swikhongelo swa hina swi kombisa ku tsakela ka xiviri eka lava hi va tivaka naswona hi khathalaka ha vona. (1 Timotiya 5:13; 1 Petro 4:15) Swi nga ha endleka makwerhu a heleriwe hi ntirho ivi hi nga swi koti ku n’wi lavela wun’wana. Kambe, hi nga n’wi boxa hi vito ivi hi kandziyisa xiphiqo xa yena eswikhongelweni swa munhu hi xiyexe. (Pisalema 37:25; Swivuriso 10:3) Xana ha n’wi vona makwerhu wa xisati la dyuhaleke kambe a nga ri na nuna na vana hikuva u tiyimisele ku tekiwa “eHosini ntsena”? (1 Vakorinto 7:39) Ha yini loko u khongela exihundleni u nga kombeli eka Yehovha leswaku a n’wi katekisa a tlhela a n’wi pfuna a hambeta a tshembeka entirhweni wa yena? Xikombiso xin’wana hi leswaku, vakulu vambirhi va nga ha va va nyike makwerhu wa xinuna la endleke xihoxo ndzayo. Ha yini un’wana ni un’wana wa vona a nga n’wi boxi hi vito loko a khongela a ri yexe exihundleni nkarhi ni nkarhi?

 14. Xana swikhongelo leswi kongomeke swi fambisana njhani ni ku pfuna van’wana?

¹⁴ Va kona vanhu lava u va tivaka lava u nga va katsaka eswikhongelweni swa wena n’wini, lava lavaka nseketelo wa Yehovha, nchavelelo wa yena, vutlhari bya yena ni moya wa yena lowo kwetsima, kumbe mihandzu ya wona. Hikwalaho ka mpfhuka kumbe swiyimo swin’wana, u nga ha titwa u nga swi koti ku nyikela mpfuno wa swilo leswi vonakaka kumbe lowu kongomeke. Kambe u nga rivali ku khongelela vamakwenu. Wa swi tiva leswaku va lava ku famba hi mukhuva lowu faneleke eka Yehovha, kambe, entiyisweni va nga ha va va lava mpfuno wa leswaku va endla tano hilaha ku nga heriki. Xilotlelo xo va pfuna i swikhongelo swa wena.—Pisalema 18:2; 20:1, 2; 34:15; 46:1; 121:1-3.

Tirhela Ku Tiyisa Van’wana

 15. Ha yini hi fanele hi tsakisiwa hi xiyenge xo hetelela xa Vakolosa?

¹⁵ Ina, swikhongelo leswi humaka embilwini, leswi kongomeke a hi yona ntsena ndlela yo pfuna van’wana, ngopfu-ngopfu lava u va rhandzaka ngopfu. Buku ya Vakolosa yi swi veka erivaleni sweswo. Swidyondzi swo tala swi anakanya leswaku endzhaku ka loko Pawulo a nyikele nkongomiso malunghana ni tidyondzo ni ndzayo leyi tirhaka, u engetele hi ku va rungula. (Vakolosa 4:7-18) Ematshan’weni ya sweswo, se hi swi vonile leswaku xiphemu lexi xo hetelela xa buku leyi xi ni ndzayo ya nkoka, naswona ku nga dyondziwa swo tala eka xiyenge lexi.

16, 17. Hi nga vula yini hi vamakwerhu lava boxiweke eka Vakolosa 4:10, 11?

¹⁶ Pawulo u tsarile: “Aristako khumbi-kulorhi wa mi rungula, na Marka makwavo wa Barnaba wa mi rungula, (malunghana na yena mi kume swileriso swo n’wi amukela loko a tshuka a tile eka n’wina,) na Yesu loyi a vuriwaka Yusto, lava hi lava va yimbeke. Lava hi vona ntsena lava nga vatirhi-kulorhi emfun’weni wa Xikwembu, naswona vona lava va ve mpfuno lowu tiyisaka eka mina.”—Vakolosa 4:10, 11.

¹⁷ Pawulo kwalaho u vulavule hi vamakwerhu vo karhi lava a va faneriwa hi ku tekiwa va ri va nkoka. U vule leswaku a va ri van’wana va lava yimbeke, va ri Vayuda. A ku ri ni Vayuda vo tala lava yimbeke eRhoma, naswona van’wana se a va ri Vakreste. Hambiswiritano, lava Pawulo a va boxeke va n’wi pfunile. Swi nga ha endleka a va kanakananga ku tihlanganisa ni Vakreste lava a va ri Vamatiko, naswona va fanele va tsakele ku hlanganyela na Pawulo eku chumayeleni ka Vamatiko.—Varhoma 11:13; Vagalatiya 1:16; 2:11-14.

 18. Xana Pawulo u va bumabumele njhani van’wana lava a va ri na yena?

¹⁸ Xiya marito ya Pawulo: “Vona lava va ve mpfuno lowu tiyisaka eka mina.” U tirhise rito ra Xigriki leri humelelaka kan’we ntsena eBibeleni. Vahundzuluxeri vo tala va ri hundzuluxela va ku i “nchavelelo.” Hambiswiritano, ku ni rito rin’wana ra Xigriki (pa·ra·ka·le’o) leri talaka ku hundzuluxeriwa ri va “nchavelelo.” Pawulo u tirhise marito yo tano kun’wana eka rona papila leri kambe hayi eka Vakolosa 4:11.—Matewu 5:4; Mintirho 4:36; 9:31; 2 Vakorinto 1:4; Vakolosa 2:2; 4:8.

19, 20. (a) Hi wihi mongo wa xivulwa lexi Pawulo a xi tirhiseke eka vamakwerhu lava n’wi pfuneke eRhoma? (b) Xana vamakwerhu volavo va nga ha va va n’wi pfune hi tindlela tihi Pawulo?

¹⁹ Vanhu lava Pawulo a va boxeke va fanele va nga lo chavelela ntsena hi nomu. Rito ra Xigriki leri hundzuluxeriweke ri va “mpfuno lowu tiyisaka” eka Vakolosa 4:11 minkarhi yin’wana a ri tirhisiwa etibukwini ta tiko, ri kombetela eka murhi lowu herisaka ntshikilelo. New Life Version yi hlayekisa xileswi: “Va ndzi pfune swinene!” Today’s English Version yi tirhisa xivulwa lexi: “Va ve mpfuno lowukulu eka mina.” Xana vamakwerhu va Vakreste lava a va tshama ekusuhi ni laha Pawulo a a ri kona a va n’wi pfunise ku yini?

²⁰ Pawulo a a va ni vaendzi, kambe a ku ri ni swilo swo tala leswi a a nga ta kota ku swi endla, swo tanihi ku xava swilo leswi a swi pfumalaka—swakudya ni swiambalo swa vuxika. A a ta ti kumisa ku yini tibuku-songwa to ti dyondza kumbe ku xava to tsalela eka tona? (2 Timotiya 4:13) Xana a wu swi ehleketi leswaku vamakwerhu volavo va pfune Pawulo hi swilo leswi a a swi pfumala, va n’wi endlela swilo swa nkoka swo tanihi ku n’wi yela exitolo kumbe va n’wi endlela swintirhwana swin’wana? Swi nga ha endleka a a lava ku kambela ni ku aka vandlha ro karhi. Leswi a a pfaleriwile, a a nga ta swi kota, hikwalaho vamakwerhu volavo swi nga ha endleka va endzele Pawulo, va hundzisa marungula, va vuya ni swiviko. A swi n’wi tiyisa hakunene!

21, 22. (a) Ha yini marito lama nga eka Vakolosa 4:11 ma fanele ma hi tsakisa? (b) Hi tihi tindlela tin’wana leti ha tona hi nga tirhisaka xikombiso xa lava a va ri na Pawulo?

²¹ Leswi Pawulo a swi tsaleke malunghana ni ku va “mpfuno lowu tiyisaka” swi hi endla hi twisisa ndlela leyi hi nga pfunaka van’wana ha yona. Va nga ha va va famba hi mukhuva lowu faneleke eka Yehovha malunghana ni mimpimanyeto ya yena ya mahanyelo, va va kona eminhlanganweni ya Vukreste naswona va hlanganyela entirhweni wo chumayela. Hi fanele hi va byela marito yo tlangela hikwalaho ka sweswo. Kambe, xana hi nga endla leswi engetelekeke, hi va ‘mimpfuno leyi tiyisaka’ ku fana ni vanhu lava a va ri na Pawulo?

²² Loko u tiva makwerhu wa xisati loyi hi vutlhari a yingisaka 1 Vakorinto 7:37 kambe sweswi a nga riki na ndyangu lowu nga ekusuhi na yena, xana u nga n’wi katsa eka mintirho yin’wana ya ndyangu, kumbexana u n’wi rhamba leswaku a ta dya na n’wina swakudya kumbe a ta va kona eka xinkhubyana xa vanghana kumbe maxaka? Ku vuriwa yini hi ku n’wi rhamba leswaku a famba ni ndyangu wa wena loko mi ya entsombanweni kumbe loko mi ya eku wiseni? Kumbe u n’wi kombela leswaku a famba na wena hi nkarhi lowu n’wi fanelaka loko u ya eku xaveni ka swakudya. Ku nga ha vuriwa leswi fanaka malunghana ni tinoni kumbe vavanuna lava feriweke, kumbexana lava va nga ha swi kotiki ku chayela. U nga ha swi vona swi pfuna ku yingisela mintokoto ya vona kumbe ku twa hi ta vutivi bya vona bya swilo leswi tolovelekeke swo tanihi ku hlawula mihandzu leyinene kumbe ku hlawula swiambalo swa vana. (Levhitika 19:32; Swivuriso 16:31) Sweswo swi nga ha yisa eka vunghana lebyikulu. Xisweswo va nga ha titwa va ntshunxekile ku kombela mpfuno wa wena loko va lava mirhi ekhemisi kumbe swin’wana swo tano. Vamakwerhu lava a va ri na Pawulo eRhoma va fanele va n’wi pfune hi ndlela leyi tirhaka, hilaha ku tiyisaka, hilaha na wena u nga endlaka hakona. Enkarhini lowu hundzeke ni sweswi nkateko lowu engetelekeke hi leswaku swiboho swa rirhandzu swa tiyisiwa naswona hi tiyimisele hilaha ku tiyeke ku tirhela Yehovha swin’we hi ku tshembeka.

 23. Xana swi nga va swinene leswaku un’wana ni un’wana wa hina a heta nkarhi a endla yini?

²³ Un’wana ni un’wana wa hina a nga anakanyisisa hi swiyimo leswi boxiweke exihlokweni lexi. Swo va swikombiso ntsena, kambe swi nga hi tsundzuxa hi swiyimo leswi nga kona laha hi nga vaka “mpfuno lowu tiyisaka” swinene eka vamakwerhu. Mhaka ya kona laha, a hi ku va ni mboyamelo wa vanhu lava kondletelaka swiendlo leswinene. Yoleyo a ku nga ri pakani ya vamakwerhu lava boxiweke eka Vakolosa 4:10, 11. A va ri “[vatirhi-kulobye] emfun’weni wa Xikwembu.” Vuyelo lebyi va tiyiseke a byi fambisana hi ku kongoma ni sweswo. Onge na hina hi nga endla tano.

 24. Hi xihi xivangelo-nkulu xa ku khongela ka hina ni xa ku lava ku tiyisa van’wana?

²⁴ Van’wana hi va boxa hi mavito eswikhongelweni swa hina vini naswona hi endla matshalatshala yo va tiyisa hikwalaho ka leswi: Ha tiyiseka leswaku vamakwerhu va lava ku “famba hi mukhuva lowu fanelaka eka Yehovha leswaku [va] n’wi tsakisa hi ku helela.” (Vakolosa 1:10) Ntiyiso wa kona wu fambisana ni nchumu wun’wana lowu Pawulo a wu boxeke loko a tsala hi leswi Epafrasi a swi khongeleleke malunghana ni Vakolosa, leswaku va ta “yima [va] hetiseka naswona [va] va ni ku khorwiseka loku tiyeke hi ku rhandza ka Xikwembu hinkwako.” (Vakolosa 4:12) Xana sweswo hi nga swi fikelela njhani? A hi voneni.

[Tinhlamuselo ta le hansi]

Xana U Lemukile?

• Hi nga va lava pfunaka swinene eka swikhongelo swa hina vini hi ndlela yihi?

• Vakreste van’wana a va ri “mpfuno lowu tiyisaka” eka Pawulo hi ndlela yihi?

• Hi nga va “mpfuno lowu tiyisaka” eka swiyimo swa muxaka muni?

• Hi yihi pakani ya ku khongela ka hina ni ku lava ku tiyisa vamakwerhu?

[Xifaniso lexi nga eka tluka 18]

Xana u nga katsa Mukreste un’wana loko ndyangu wa wena wu tihumesa?

[Xihlovo Xa Kona]

Courtesy of Green Chimney’s Farm