Tito
2 Hambiswiritano, yana emahlweni u dyondzisa swilo leswi fambisanaka ni dyondzo leyi pfunaka.+ 2 Vavanuna lava kuleke a va endle swilo hi ku ringanisela, va xiximeka,* va ehleketa kahle, va tiya eripfumelweni, erirhandzwini ni ku tlhela va tiyisela. 3 Hilaha ku fanaka, vavasati lava kuleke a va tikhome hi ndlela leyi xiximekaka, va nga onhi van’wana mavito, va nga vi mahlonga ya vhinyo, va va vadyondzisi va swilo leswinene, 4 leswaku va ta dyondzisa vavasati lava ha riki vatsongo ku rhandza vanuna va vona, ku rhandza vana va vona, 5 va ehleketa kahle, va va lava tengeke, va tirha mitirho ya le kaya, va va ni mahanyelo lamanene, va titsongahata eka vanuna va vona,+ leswaku rito ra Xikwembu ri nga sandziwi.
6 Hilaha ku fanaka, yana emahlweni u tsundzuxa vavanuna lava ha riki vatsongo leswaku va ehleketa kahle,+ 7 u va xikombiso lexinene eka hinkwaswo leswi u swi endlaka. Dyondzisa ntiyiso hi ku tiyimisela,+ 8 hi ku tirhisa marito lamanene leswaku vanhu van’wana va nga ku xopaxopi,+ kutani lava hi kanetaka va ta khomiwa hi tingana, hikuva a va nge vi na nchumu wo biha wo wu vula hi hina.+ 9 Mahlonga a ma titsongahate eka vini va wona eka swilo hinkwaswo,+ ma ringeta ku va tsakisa, ma nga kanetani na vona, 10 ma nga va yiveli+ kambe a ma tshembeke, leswaku ma sasekisa dyondzo ya Muponisi wa hina, ku nga Xikwembu hi tindlela hinkwato.+
11 Hikuva musa lowukulu wa Xikwembu wu kombisiwile naswona wu endla leswaku vanhu hinkwavo va ponisiwa.+ 12 Wu hi dyondzisa leswaku hi papalata ku nga xi xiximi Xikwembu ni ku navela ka misava,+ ku va ni mianakanyo leyinene ni ku va lava lulameke ni ku tinyiketela eka Xikwembu enkarhini lowu hi hanyaka eka wona,+ 13 hi ri karhi hi rindzele ntshembo wo tsakisa+ ni ku humelela loku vangamaka ka Xikwembu lexikulu ni ka Muponisi wa hina, ku nga Yesu Kreste, 14 loyi a nyikeleke hi vutomi byakwe hikwalaho ka hina+ leswaku a hi tshunxa*+ eka swidyoho swa mixaka hinkwayo ni ku basisa vanhu lava nga nhundzu yakwe yo hlawuleka, lava hisekelaka mitirho leyinene.+
15 Yana emahlweni u dyondzisa swilo leswi, u khutaza ni ku tshinya swinene.+ U nga pfumeleli munhu a ku tekela ehansi.