Timotiya Wa Vumbirhi
4 Ndza ku lerisa swinene emahlweni ka Xikwembu na Kreste Yesu, loyi a nga ta avanyisa+ lava hanyaka ni lava feke+ loko ku paluxiwa yena+ ni Mfumo wakwe,+ ndzi ri: 2 Chumayela rito;+ u hiseka loko swi famba kahle ni loko swi tika; u tshinya,+ u holovela, u khongotela, hi ku lehisa mbilu ni ku dyondzisa kahle.+ 3 Hikuva ku ta va ni nkarhi lowu va nga ta ka va nga amukeli dyondzo leyi pfunaka+ kambe hi ku landza ku navela ka vona, va ta tihlengeletela vadyondzisi leswaku va va nyangalata* tindleve.+ 4 Va ta tshika ku yingisela ntiyiso kutani va yingisela mavunwa. 5 Kambe wena, tirhisa mianakanyo ya wena eka swilo hinkwaswo, tiyiselela nhlomulo,+ yana emahlweni u chumayela mahungu lamanene, wu endle kahle ntirho wa Xikwembu.+
6 Hikuva se ndza chuluriwa ku fana ni gandzelo ra swakunwa+ naswona nkarhi wa leswaku ndzi tshunxiwa+ wu tshinele. 7 Ndzi lwe nyimpi leyinene,+ ndzi tsutsume mphikizano kukondza ndzi heta,+ ndzi hlayise ripfumelo. 8 Ku sukela sweswi ku ya emahlweni, ndzi vekeriwe harhi ya ku lulama+ leyi Hosi, ku nga muavanyisi wo lulama,+ yi nga ta ndzi nyika yona yi va hakelo hi siku ra kona+ kambe yi nge nyiki mina ntsena, yi ta nyika ni hinkwavo lava rindzeleke nkarhi lowu yi nga ta humelela ha wona.
9 Hatlisa u ta eka mina. 10 Hikuva Demasi+ u ndzi balekerile hileswi a rhandzeke swa misava leyi, u ye eTesalonika, Kreskene u ye eGalatiya, Tito u ye eDalamatiya. 11 Ndzi sale na Luka ntsena. Tana na Marka hikuva u ta ndzi pfuna swinene loko ndzi ri karhi ndzi tirhela Xikwembu. 12 Kambe ndzi rhume Tixiko+ eEfesa. 13 Loko u ta, tana ni xiambalo lexi ndzi xi siyeke na Karpo eTrowasi ni tibuku leti songiwaka, ngopfungopfu leta madzovo.
14 Alekzanda loyi a endlaka swilo hi koporo u ndzi endle swilo swo tala swo biha. Yehovha* u ta n’wi xupula hi ku ya hi mitirho yakwe.+ 15 Na wena tivonele eka yena, hikuva u swi kanete ngopfu swilo leswi hi swi vuleke.
16 Loko ndzi tihlamulela ro sungula a nga kona loyi a yimeke na mina kambe hinkwavo va ndzi fularherile, onge Xikwembu xi nga ka xi nga va voni nandzu. 17 Kambe Hosi yi yime ekusuhi na mina yi ndzi nyika matimba, leswaku ndzi chumayela mahungu lamanene hi ku helela leswaku matiko hinkwawo ma ta ma twa;+ naswona ndzi ponisiwe enon’wini wa nghala.+ 18 Hosi yi ta ndzi ponisa eka mitirho yo homboloka naswona yi ta ndzi hlayisa leswaku ndzi kuma Mfumo wa yona wa le tilweni.+ Ku vangama a ku ve eka yona hilaha ku nga heriki. Amen.
19 Ndzi rungulele Priska na Akhwila+ ni ndyangu wa Onesiforo.+
20 Erasto+ u sale eKorinto kambe ndzi siye Trofimo+ a ri karhi a vabya eMileta. 21 Hatla u fika vuxika byi nga si fika.
Yubulo wa ku rungula na Pude na Lino na Klawudiya ni vamakwerhu hinkwavo.
22 Ndzi khongelela leswaku Hosi yi katekisa moya lowu u nga na wona. Musa wa yona lowukulu a wu ve na n’wina.